36 C
Phnom Penh

រកឃើញ​​​ប្រាសាទ​​​បុរាណ​​​មុន​​​សម័យ​​​អង្គរ​​​ចំនួន​​​ប្រាំពីរ​​​​​​នៅ​​​លើ​​​​​​​​​ដីសម្បទាន​​​ក្នុង​​​ខេត្ត​​​ព្រះវិហារ​​​

ដោយ ឌឹ ខេមបូឌា ដេលី

បទវិភាគ

ប្រាសាទ​​​បុរាណ​​​មុន​​​សម័យ​​​អង្គរ​​​​​​ចំនួន​​​ប្រាំពីរ​​​​​​ត្រូវ​​​បាន​​​​​​រក​​​ឃើញ​​​​​​នៅ​​​លើ​​​​​​ដី​​​សម្បទាន​​​ពីរ​​​កន្លែង​​​​​​ក្នុង​​​ខេត្ត​​​ព្រះវិហារ​​​ ប៉ុន្តែ​​​ខណៈ​​​ពេល​​​ដែល​​​មន្ត្រី​​​ក្រសួង​​​បរិស្ថាន​​​មួយ​​​រូប​​​លើក​​​ឡើ​​​ង​​​កាលពី​​​ម្សិលមិញ​​​ថា ក្រសួង​​​​​​​​​មិន​​​បាន​​​ដឹង​​​ពី​​​ប្រាសាទ​​​ទាំង​​​នេះ​​​នៅ​​​ពេលពួក​​​​​​គេ​ផ្ដល់​​​ដី​​​សម្ប​​ទាន​​​ទាំង​​​នេះ​​​នោះ​​​ ក្រសួង​​​​​​វប្បធម៌​​​និង​​​វិចិត្រ​​​សិល្បៈ​​​បាន​​​និយាយ​​​ថា គេ​​​ដឹង​​​ថា មាន​​​ប្រា​​​សាទ​​​ទាំង​​​នេះ​​​ជា​​​យូរ​​​មក​​​ហើយ​​​។

បន្ទាប់ពី​​​មាន​​​សេចក្ដីរាយការណ៍​​​ថា ក្រុម​​​ហ៊ុន​​​ Cambodia Blue Heaven Ltd. និង​​​ក្រុម​​​ហ៊ុន​​​ Cambodia Down Plantation Ltd. ដែល​​​ក្នុង​​​ម្នាក់​​​ៗមាន​​​ដី​​​សម្បទាន​​​​​​ប្រហែល​​​​​​១០.០០០​​​ហិកតា​​​បាន​​​ធ្វើ​​​ឲ្យ​​​​​​ខូច​​​ខាត​​​​​​ប្រាសាទ​​​ទាំង​​​នេះ​​​​​​ ក្រសួង​​​ទាំង​​​ពីរ​​​​​​បាន​​​​​​បញ្ជូន​​​គណៈ​​​ប្រតិភូ​​​មួយ​​​ក្រុម​​​ទៅ​​​កាន់​​​ទីតាំង​​​ប្រាសាទ​​​​​​ទាំង​​​នោះ​​​​​​​​​ដែល​​​ស្ថិត​​​នៅ​​​ក្នុង​​​​​​ស្រុក​​​គូលែន និង​​​ស្រុក​​​ជាំក្សាន្ត កាល​​​ពី​​​សប្ដាហ៍​​​មុន​​​ ដើម្បី​​​ពិនិត្យ​​​មើល​​​។

លោក​​​ ផាន់​ ណាឌី អនុប្រធាន​​​នាយក​​​ដ្ឋាន​​​​​​​​​បេតិកភណ្ឌ​​​វប្បធម៌​​​នៃ​​​ក្រសួង​​​​​​វប្បធម៌​​​ និង​​​​​​វិចិត្រ​​​សិល្បៈ​​​បាន​​​មាន​​​ប្រសាសន៍​​​កាលពី​​​ម្សិល​​​មិញ​​​ថា “យើង​​​​​​បានឮ​​​ថា ក្រុមហ៊ុន​​​ទាំង​​​នេះ​​​​​​ទន្ទ្រាន​​​ចូល​​​ដី​​​ជុំ​​​វិញ​​​ប្រាសាទ​​​ ហើយ​​​​​​​​​យើង​​​​​​ក៏​​​បាន​​​ចុះ​​​ទៅ​​​បញ្ជាក់​​​ថា តើ​​​​​​រឿង​​​នេះ​​​ជា​​​ការពិត​​​ឬ​​​យ៉ាង​​​ណា​​​”។ លោក​​​បាន​​​មាន​​​ប្រសា​​​សន៍​​​បន្ត​​​ទៀត​​​ថា តាម​​​ពិត​​​ប្រាសាទ​​​ទាំង​​​នេះ​​​​​​មិន​​​បាន​​​រង​​​​​​ការ​​​​​​ខូចខាត​​​ទេ​​​។

លោក សៅ សុភាព ប្រធាន​​​ខុទ្ទកាល័យ​​​ក្រសួងបរិស្ថានបានមាន​​​ប្រសាសន៍​​​ថា ក្រសួង​​​របស់​​​លោក​​​មិន​​​បាន​​​ដឹង​​​ថា មាន​​​ប្រាសាទ​​​ទាំង​​​នេះ​​​ទេ នៅពេល​​​ក្រសួង​​​របស់​​​​​​លោក​​​​​​ផ្ដល់​​​​​​ដី​​​សម្បទាន​​​​​​ដល់​​​ក្រុមហ៊ុន​​​ទាំង​​​ពីរ​​​នេះ​​​។​​​​លោក​​​​​​បាន​​​មាន​​​ប្រសាសន៍​​​ថា “យើង​​​មិន​​​បាន​​​​​​ដឹង​​​ថា ប្រាសាទ​​​ស្ថិត​​​នៅ​​​ក្នុង​​​​​​តំបន់​​​​​​ដី​​​​​​សម្ប​​​ទាន​​​​​​ទេ​” មុន​​​ពេល​​​លោក​​​​​​បដិសេធ​​​មិន​​​បញ្ជាក់​​​ថា ដីសម្បទាន​​​ទាំង​​​នេះ​​​ផ្ដល់​​​ឲ្យ​​​​​​នៅ​​​ពេល​​​ណា​​​ឬ​​​ថា តើ​​​វា​​​​​​មាន​​​ទំហំ​​​ប៉ុណ្ណា​​​នោះ​​​។

តែ​​​ទោះ​​​ជា​​​យ៉ាង​​​ណា  លោក​​​ ផាន់ ណាឌី បាន​​​មាន​​​ប្រសាសន៍​​​ថា ទីតាំង​​​ប្រាសាទ​​​ទាំង​​​នេះ​​​​​​គេ​​​ដឹង​​​​​​យ៉ាង​​​ហោច​​​ណាស់​​​ក៏​​​១០​​​ឆ្នាំ​​​ដែរ។លោក​​​បាន​​​មាន​​​ប្រសាសន៍​​​ថា “ក្រុម​​​របស់​​​ខ្ញុំ​​​បាន​​​ទៅ​​​ទីនោះ​​​កាលពី​​​ប្រហែល​​​១០​​​ឆ្នាំ​​​មុន”។ លោក​​​បាន​​​បន្តទៀត​​​ថា មាន​​​ប្រាសាទ​​​បុរាណ​​​ជា​​​ច្រើន​​​ស្ថិត​​​នៅ​​​ក្នុង​​​តំបន់​​​ដី​​​សម្ប​​​ទាន។លោក​​​បាន​​​លើក​​​ឡើង​​​ទៀត​​​ថា “មិន​​​មែន​​​មាន​​​តែ​​​​​​ក្រុមហ៊ុន​​​ទាំង​​​នេះ​​​ទេ ដីសម្បទាន​​​​​​របស់​​​ក្រុមហ៊ុន​​​​​​ភាគ​​​ច្រើន​​​ក៏​​​មាន​​​ប្រាសាទ​​​ ឬទីតាំង​​​បុរាណ​​​វិទ្យា​​​ដែរ​​​។ មាន​​​ទីតាំង​​​ជាង​​​៤០០​​​កន្លែង​​​​​​នៅ​​​ទូទាំង​​​ប្រទេស​​​ ដូច្នេះ​​​​​​គ្រប់​​​កន្លែង​​​ទាំង​​​អស់​​​​​​សុទ្ធតែ​​​មាន​​​ប្រាសាទ​​​”។

កាលពីខែ​​​វិច្ឆិកា គេ​​​បាន​​​រក​​​ឃើញ​​​ប្រាសាទ​​​​​​មួយ​​​របស់​​​​​​ជនជាតិ​​​ភាគ​​​តិច​​​ចារ៉ាយ​​​នៅ​​​ក្នុង​​​ខេត្ត​​​រតនគិរី​​​ ដែល​​​មាន​​​ទីតាំង​​​ស្ថិត​​​​​​នៅ​​​ក្នុង​​​តំបន់​​​សម្បទាន​​​ដែរ​​​។ ទោះជាយ៉ាង​​​ណា​​​ តាម​​​ច្បាប់ស្ដីពីការ​​​ការ​​​ពារ​​​​​​បេតិកភណ្ឌ​​​កម្ពុជា​​​ ដែល​​​ត្រូវ​​​បាន​​​អនុម័ត​​​នៅ​​​ក្នុង​​​ឆ្នាំ​​​១៩៩៦​​​ រដ្ឋាភិបាល​​​ត្រូវ​​​ “ការពារ​​​បេតិកភណ្ឌ​​​វប្បធម៌ និង​​​​​​សម្បត្តិ​​​វប្បធម៌​​​ជាតិ​​​​​​ទូទៅ​​​ប្រឆាំង​​​នឹង​​​ការ​​​បំផ្លេច​បំផ្លាញ​​​​​​ដោយ​​​ខុស​​​ច្បាប់ ការ​​​កែប្រែ​​​​​​ទ្រង់​​​ទ្រាយ​​​ដើម​​​ ការ​​​ធ្វើ​​​កំណាយ​​​​​​ ការ​​​ផ្ទេរ​​​កម្មសិទ្ធិ​​​ ការ​​​ដឹក​​​ជញ្ជូន​​​ ឬ​​​ការ​​​នាំចូល​​​”។

លោក​​​ ផាន់ ណាឌី បាន​​​មាន​​​ប្រសាសន៍​​​ថា ដូច្នេះ​​​ក្រុមហ៊ុន​​​ដែល​​​មាន​​​ដី​​​សម្បទាន​​​ទាំង​​​នេះ​​​ត្រូវ​​​ការពារ​​​ប្រាសាទ​​​ដែល​​​ស្ថិត​​​នៅ​​​លើ​​​​​​ដី​​​របស់​​​ខ្លួន​​​។លោក​​​ថ្លែង​​​​​​ថា “យើង​​​ [បាន​​​ប្រាប់​​​] ពួក​​​​​​គេ​​​ថា ប្រហែល​​​មួយ​​​ឬ​​​ពីរ​​​ឆ្នាំ​​​ យើង​​​នឹង​​​ទៅ​​​កាន់​​​ទី​​​នោះ​​​​​​ ដើម្បី​​​ពិនិត្យ​​​មើល​​​ [លើ​​​ទីតាំង​​​ទាំង​​​​​​នោះ​] ​​​ប៉ុន្តែ​​​ខ្ញុំ​​​គិត​​​ថា ក្រុមហ៊ុន​​​ក៏​​​ខ្លាច​​​មិន​​​ហ៊ាន​​​ប្រព្រឹត្ត​​​ខុស​​​ដែរ​​​។ ពួក​​​គេ​​​ត្រូវ​​​សន្យា​​​ថា ប្រាសាទ​​​នឹង​​​ទទួល​​​បាន​​​ការការពារ ហើយ​​​ខ្ញុំ​​​គិត​​​​​​ថា ពួក​​​គេ​​​ដឹង​​​និង​​​យល់​​​ពីរឿង​​​នេះ​​​”៕ សុខុម​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស