កាលពីម្សិលមិញអភិបាលរាជធានីភ្នំពេញបានប្រាប់ឲ្យមន្ត្រីសាលារាជធានីបញ្ឈប់អំពើពុករលួយ ហើយខិតខំធ្វើការឲ្យបានខ្លាំងជាងមុនដើម្បីផ្តល់សេវាសាធារណៈក្នុងគោលបំណងស្តារទំនុកចិត្តក្នុងចំណោមប្រជាពលរដ្ឋដែលមានការថ្នាំងថ្នាក់យ៉ាងខ្លាំងជាមួយគណបក្សកាន់អំណាច ដោយពួកគាត់បាននាំគ្នាបោះឆ្នោតគាំទ្រគណបក្សសង្គ្រោះជាតិនៅក្នុងការបោះឆ្នោតជាតិកាលពីឆ្នាំមុន។
ថ្លែងទៅកាន់មន្ត្រីជាង៤០០នាក់រួមមាននគរបាលនិងកងរាជអាវុធហត្ថដែលបានចូលរួមនៅក្នុងសន្និសីទប្រចាំឆ្នាំនៅឯសាលារាជធានីភ្នំពេញកាលពីថ្ងៃច័ន្ទ លោក ប៉ា សុជាតិវង្ស អភិបាលរាជធានីភ្នំពេញ បានស្តីបន្ទោសអាជ្ញាធរមូលដ្ឋានថា បានធ្វើឲ្យពលរដ្ឋបាត់បង់ជំនឿចិត្តលើគណបក្សកាន់អំណាច ជាពិសេសលោកនាយករដ្ឋមន្ត្រី ហ៊ុន សែន ដោយបានធ្វើឲ្យគណបក្សប្រជាជនកម្ពុជាបាត់បង់ការគាំទ្រយ៉ាងច្រើនបំផុតចាប់តាំងពីឆ្នាំ១៩៩៨មកនៅក្នុងការបោះឆ្នោតជាតិដែលធ្វើឡើងអំឡុងខែកក្កដា។
លោក ប៉ា សុជាតិវង្ស បានមានប្រសាសន៍ដោយជំរុញឲ្យមន្ត្រីរបស់លោកខិតខំធ្វើការឲ្យបានខ្លាំងជាងមុន និងធ្វើឲ្យកិច្ចការរបស់រដ្ឋាភិបាលកាន់តែមានតម្លាភាពថា “ ខ្ញុំដឹងពីអារម្មណ៍របស់មេដឹកនាំ ជាពិសេសសម្តេច តេជោ [ហ៊ុន សែន]។ លោកបានខិតខំធ្វើការដោយហ៊ានពលីជីវិតរបស់លោក លោកមិនដែលណែនាំឲ្យយើងធ្វើអាក្រក់ឬប្រព្រឹត្តខុសឡើយ”។ លោក ប៉ា សុជាតិវង្ស បានគូសបញ្ជាក់ថា លោកនាយករដ្ឋមន្ត្រី ហ៊ុន សែន បានជំរុញឲ្យលោកខិតខំធ្វើការឲ្យបានខ្លាំងជាងមុននិងប្រកបដោយក្រមសីលធម៌ខ្ពស់នៅក្នុងការផ្តល់សេវាសាធារណៈដល់ប្រជាជនរស់នៅក្នុងរាជធានី ដើម្បីស្តារការគាំទ្រនិងកសាងទំនុកចិត្តក្នុងចំណោមពលរដ្ឋដែលលោកបានមានប្រសាសន៍ថា មិនពេញចិត្តនឹងរដ្ឋាភិបាលសព្វថ្ងៃ។ លោក ប៉ា សុជាតិវង្ស បានរំឭកឡើងវិញនូវការណែនាំ របស់លោកនាយករដ្ឋមន្ត្រី ហ៊ុន សែន ដែលបានប្រើឃ្លាមួយថា“ ជួសជុលការថ្នាំងថ្នាក់របស់ប្រជាជន”។ ដោយប្រៀបធៀបការធ្វើខុសរបស់មន្ត្រីទៅនឹងរថយន្តខុសមួយគ្រឿង លោក ប៉ា សុជាតិវង្ស បានដាក់ចេញនូវយុទ្ធសាស្ត្រកំណែទម្រង់មួយរបស់លោក។
លោកបានមានប្រសាសន៍ថា “ [លោកនាយករដ្ឋមន្ត្រីហ៊ុន សែន] បានណែនាំខ្ញុំឲ្យប្រាប់មន្ត្រីឲ្យខិតខំធ្វើការឲ្យបានខ្លាំងជាងមុននិងប្តូរអត្តចរិតរបស់ខ្លួន។ នៅពេលយើងដឹងថា រថយន្តខូច យើងត្រូវតែយកវាចូលយានដ្ឋានដើម្បីជួសជុល។យើងមានបេសកកម្មពិសេសថ្មីដើម្បីលុបបំបាត់ការថ្នាំងថ្នាក់ក្នុងចំណោមពលរដ្ឋរបស់យើង”។ លោកបានលើកឡើងបន្តថា ហេតុដូច្នេះហើយដាច់ខាតមិនត្រូវប្រព្រឹត្តអំពើពុករលួយឡើយ ត្រូវទប់ស្កាត់សំណង់ខុសច្បាប់ ត្រូវកាត់បន្ថយការគ្រោះថ្នាក់ចរាចរណ៍ហើយត្រូវចាត់វិធានការចំពោះបទល្មើសនិងបទឧក្រិដ្ឋដែលកើតឡើងញឹកញាប់នៅក្នុងរាជធានីភ្នំពេញ ដូចជាអំពើប្លន់ ការប្រើប្រាស់គ្រឿងញៀន និងការលេងល្បែងស៊ីសងជាដើម៕ ស៊ុយឈាង