TAG
paywall
នគរបាលចាប់ខ្លួនបុរសម្នាក់នៅក្នុងខេត្តព្រៃវែងពីបទជីកគាស់សាកសព ហើយប៉ុនប៉ងរំលោភ
លោក កែវ វុត្ថា មេឃុំព្រៃពោនបានមានប្រសាសន៍ថា បុរសអាយុ៤៧ឆ្នាំម្នាក់ត្រូវបានចាប់ខ្លួនកាលពីម្សិលមិញនៅក្នុងស្រុកកំពង់ត្របែក ខេត្តព្រៃវែងចំពោះការជីកគាស់ និងបើកក្តារមឈូសសាកសពក្មេងស្រីជំទង់ម្នាក់ ហើយប៉ុនប៉ងរំលោភសាកសពនោះ។
ជនសង្ស័យឈ្មោះ ជិន ជាន បានប្រាប់នគរបាលថា នៅម៉ោង១០យប់ គាត់បានចាប់ផ្តើមជីកគាស់ផ្នូរសាកសពក្មេងស្រីជំទង់អាយុ១៧ឆ្នាំដែលបានស្លាប់កាលពីថ្ងៃព្រហស្បតគាត់បានទៅចូលរួមពិធីបុណ្យសពនៅថ្ងៃបន្ទាប់នោះដែរ។
គាត់និយាយថា គាត់បានបើកក្តារមឈូស ហើយបានប៉ះពាល់រាងកាយមុនពេលព្យាយាមរំលោភសាកសព។ ប៉ុន្តែដោយសារមឈូសតូចពេក មិនអាចឲ្យជននេះរំលោភបាន ហើយគាត់ក៏បានដេកលង់លក់នៅលើសាកសពនោះទៅ។
លោក វុត្ថា បានមានប្រសាសន៍ថា “អ្នកភូមិបានឃើញជើងរបស់ ជិន ជាន នៅក្បែរផ្នូរ ហើយបានប្រាប់ដល់ក្រុមគ្រួសារសព”។
លោក ចាន់ សារិន...
លោក ហ៊ុន សែន លើកឡើងម្តងទៀតថា ត្រូវតែធ្វើកំណែទម្រង់ដើម្បីឲ្យមន្ត្រីរាជការបើកប្រាក់ខែទាន់ពេល
ជាថ្មីម្តងទៀត លោក ហ៊ុន សែន បានប្រាប់មន្ត្រីនៅក្នុងកិច្ច្ប្រជុំប្រចាំឆ្នាំរបស់ក្រសួងមហាផ្ទៃថា ត្រូវខិតខំបន្ថែមទៀត ដើម្បីធានាឲ្យបានថា នគរបាលនិងកងកម្លាំងប្រដាប់អាវុធ អាចទទួលបានប្រាក់ខែរបស់ខ្លួនទាន់ពេលវេលា។
លោកនាយករដ្ឋមន្ត្រី ហ៊ុន សែន ក៏បានលើកឡើងបន្ថែមទៀតថា អ្នកគ្រប់គ្រងផ្សារណាដែលប្រពឹត្តអំពើពុករលួយនឹងត្រូវចាប់ខ្លួន ប្រសិនបើពួកគេកេងប្រវ័ញ្ចពីអាជីវករផ្សារនោះ។
លោកនាយករដ្ឋមន្ត្រី ហ៊ុន សែន បានលើកឡើងថា លោកនឹងចុះហត្ថលេខាលើសារាចរណែនាំមួយទាក់ទិននឹងប្រាក់ខែរបស់នគរបាល កងរាជអាវុធហត្ថ និងទាហានកងយោធពលខេមរភូមិន្ទដើម្បីធានាឲ្យបានថា ពួកគេទទួលបានប្រាក់ខែទាន់ពេលវេលា។
លោកនាយករដ្ឋមន្ត្រីបានមានប្រសាសន៍ថា “ ខ្ញុំបានបញ្ជាក់ជាមួយលោក អូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុរួចហើយថា មន្ត្រីរាជការត្រូវតែទទួលបានប្រាក់ខែរបស់ខ្លួនឲ្យបាននៅមុនដំណាច់ខែ”។
លោកនាយករដ្ឋមន្ត្រីបានបន្ថែមថា “ខ្ញុំទទួលបានដំណឹងថា ក្រសួងធនធានរ៉ែនិងថាមពលបានបើកប្រាក់ខែនៅក្នុងខែមករាឲ្យមន្ត្រីរបស់ខ្លួនកាលពីថ្ងៃទី១៨ ខែកុម្ភៈ”។
លោកនាយករដ្ឋមន្ត្រី ហ៊ុន សែន បានចុះហត្ថលេខាលើសារាចរណែនាំមួយកាលពីខែមករា ដោយបានចេញបទបញ្ជាថា មន្ត្រីរាជការត្រូវតែទទួលបានប្រាក់ខែរបស់ខ្លួននៅសប្តាហ៍ទី៤រៀងរាល់ខែ។ កំណែទម្រង់ត្រូវបានធ្វើ ដើម្បីឲ្យមន្ត្រីរាជការអាចបើកប្រាក់ខែរបស់ខ្លួនតាមរយៈគណនីយធនាគារដើម្បីចៀសវាងថ្នាក់លើកឹបកេងប្រាក់ខែរបស់ពួកគេ។
លោកនាយករដ្ឋមន្ត្រីក៏បានសម្តែងក្តីព្រួយបារម្ភម្តងទៀតអំឡុងលោកថ្លែងសុន្ទរកថាកាលពីដើមសប្តាហ៍នេះផងដែរថា អំពើពុករលួយនៅតាមផ្សារនានាទូទាំងប្រទេសចាំបាច់ត្រូវតែមានការត្រួតពិនិត្យ។
លោកនាយករដ្ឋមន្ត្រីបានមានប្រសាសន៍ថា “ ត្រូវបានអនុញ្ញាតឲ្យយកតែ២០០រៀលប៉ុណ្ណោះពីប្រជាពលរដ្ឋដែលចតកង់របស់ខ្លួននៅកន្លែងផ្ញើកង់ម៉ូតូរបស់ផ្សារ ប៉ុន្តែពួកគេបានយករហូតដល់ទៅ៥០០រៀល ចំណែកឯម៉ូតូវិញត្រូវយកតែ៥០០រៀល តែពួកគេយករហូតដល់១.០០០រៀល”។
លោកនាយករដ្ឋមន្ត្រី ហ៊ុន សែន មានប្រសាសន៍បន្ថែមទៀតថា “ទាំងនេះគឺជាបញ្ហា ហេតុដូច្នេះយើងត្រូវតែចាប់ខ្លួនអ្នកគ្រប់គ្រងផ្សារទាំងអស់ ព្រោះពួកគេជាអ្នកទទួលបន្ទុកផ្នែកប្រមូលប្រាក់នៅក្នុងផ្សារ”។
លោកនាយករដ្ឋមន្ត្រី ហ៊ុន សែន ក៏បានលើកឡើងអំពីវេជ្ជបណ្ឌិត និងគ្រូពេទ្យនៅក្នុងប្រព័ន្ធសុខាភិបាលទូទាំងប្រទេសដែលតែងតែនិយាយរឿងប្រាក់មុនពេលយល់ព្រមទទួលព្យាបាលអ្នកជំងឺ ជារឿងមួយដែលពលរដ្ឋនិយាយគ្រប់ៗគ្នាផងដែរ។
លោកបានមានប្រសាសន៍ថា “នៅពេលអ្នកជំងឺបានមកដល់មន្ទីរពេទ្យ គ្រូពេទ្យតែងតែសួរថា “តើអ្នកមានលុយអត់?” ។ លោកបានបន្ថែមថា “វាមិនគួរជាសំណួរដំបូងដែលគ្រូពេទ្យត្រូវសួរនោះទេ។ សំណួរដំបូងដែលគ្រូពេទ្យត្រូវសួរនោះគឺតើលោកពូ អ្នកមីង ឬក៏បងប្អូនឈឺអី? ។ ហើយប្រសិនបើអ្នកបាត់បង់ស្មារតី មិនចាំបាច់ត្រូវសួរអ្វីនោះទេ គឺត្រូវព្យាបាលពួកគាត់តែម្តង។ នេះទើបជាសេវាសាធារណៈ”៕ ស៊ុយឈាង
ចៅក្រមចេញបញ្ជាឲ្យមានការពិនិត្យសុខភាពសម្រាប់ នួន ជា និង ខៀវសំផន មុនដំណាក់កាលទី២
លោក និល ណុន ប្រធានអង្គជំនុំជម្រះវិសាមញ្ញក្នុងតុលាការកម្ពុជា ហៅកាត់ថា អ.វ.ត.ក. ឬដែលគេស្គាល់ថា សាលាក្តីខ្មែរក្រហម បានសម្រេចចិត្តថា ចុងចោទរបស់សាលាក្តីខ្មែរក្រហម នួន ជា និង ខៀវ សំផន ត្រូវតែមានការពិនិត្យសុខភាពដោយក្រុមអ្នកជំនាញការ មុនដំណាក់កាលទី២នៃការផ្តន្ទាទោសជនជាប់ចោទទាំងពីរនាក់នេះចាប់ផ្តើម ។
មេធាវីការពារក្តីរបស់ នួន ជា អាយុ៨៧ឆ្នាំបានលើកឡើងថា ជំងឺរបស់គាត់អាចប៉ះពាល់ដល់លទ្ធភាពរបស់គាត់ក្នុងការផ្តោតលើនីតិវិធីនិងក្រុមអ្នកច្បាប់របស់ ខៀវ សំផន វ័យ៨២ឆ្នាំ បានលើកឡើងថា កូនក្តីរបស់ខ្លួន “ឆាប់អស់កម្លាំង” និងបាត់បង់ការផ្តោតអារ ម្មណ៍។ ក្រុមទាំងពីរនេះ បានស្នើសុំឲ្យកាត់បន្ថយ ពេលវេលាជំនុំជម្រះក្តីឲ្យកាន់តែខ្លី។
ខាងអយ្យការបានវែកញែកថា ការវាយតម្លៃសុខភាពបែបនេះ មិនមានភាពចាំបាច់ទេ ពីព្រោះការវាយតម្លៃចុងក្រោយមួយត្រូវបានធ្វើឡើងប្រហែលមួយឆ្នំាមកហើយ ហើយជនវ័យចំណាស់បែបនេះត្រូវបានរកឃើញថា សមនឹងឡើ់ងតុលាការ។
ក្នុងបទបញ្ជារបស់ខ្លួន លោកចៅក្រម និល ណុន បានគូសបញ្ជាក់ថា “ការពន្យារការវាយតម្លៃជនជាប់ចោទ តាមការស្នើពីសហព្រះរាជអាជ្ញា អាចនាំឲ្យមានការរំខានក្នុង នីតិវិធីក្នុងការបង្ហាញភ័ស្តុតាងក្នុងសំណុំរឿង០០២/០២ បន្ទាប់ពីនីតិវិធីទាំងនេះបានចាប់ផ្តើមនិងផលប៉ះពាល់ខ្លាំងលើប្រសិទ្ធភាពរបស់តុលាការ”។
លោកបានបន្ថែមថា “កត្តាទាំងនេះប៉ះពាល់ដល់ការវាយតម្លៃជនជាប់ចោទទាំងពីរនៅពេលនេះ”។ ចៅក្រម និល ណុន បានតែងតាំងវេជ្ជបណ្ឌិត ស៊ីណា ហ្វាស៊ែល វេជ្ជបណ្ឌិត ព្យាបាលមនុស្សចាស់ ចាន់ គិន មីង និងវេជ្ជបណ្ឌិតផ្នែកវិកលចរិត ហួត លីណា ដើម្បីវាយតម្លៃសុខភាពរបស់ នួន ជា និង ខៀវ សំ ផន និងផ្តល់ព័ត៌មានមួយទៅឲ្យអង្គជំនុំជម្រះនៅថ្ងៃទី២៥ខែមីនា។
លោកបានលើកឡើងថា “បើមិនទាន់មានរបាយការណ៍របស់ជំនាញទេ មិនអាចវាយ តម្លៃពេលវេលាសម្រាប់ដំណើរការសំណុំរឿង០០២/០២បានទេ។ សំណុំរឿង០០២ /០២ នឹងមានទំហំធំជាងសំណុំរឿង០០២/០១ ដែលនឹងមានការចេញសាលក្រមនាពេល ឆាប់ ៗនេះ សំណុំរឿង០០២/០២ នឹងរាប់ទាំងការចោទប្រកាន់ពីបទប្រល័យពូជសាសន៍ ទីកន្លែងបទល្មើស និងទីកន្លែងធ្វើការ៕ ប៉ុននី
បុរសម្នាក់ត្រូវបានវាយដំនិងចាប់ខ្លួនខណៈក្រុមយុវជនគាំទ្របក្សសង្គ្រោះជាតិរំឭកទិវាយុត្តិធម៌សង្គម
បុរសម្នាក់ត្រូវរងការវាយដំនិងចាប់ខ្លួនហើយយុវជនដែលជាអ្នកគាំទ្រគណបក្សសង្គ្រោះជាតិប្រាំបីនាក់ផ្សេងទៀត ត្រូវកងសន្តិសុខខណ្ឌដូនពេញបណ្តេញចេញពីទីលានប្រជាធិបតេយ្យកាលពីម្សិលមិញ បន្ទាប់ពីពួកគេព្យាយាមធ្វើពិធីមួយដើម្បីរំឭកទិវាយុត្តិធម៌សង្គមពិភពលោក។
បន្ទាប់ពីក្រុមយុវជនបានដើរទៅដល់ស្ពាននាគកាលពីព្រឹកម្សិលមិញ ពួកគេបានជួបប្រ ទះនឹងនគរបាលបង្ក្រាបបាតុកម្មចំនួនប្រហែល៥០នាក់ដែលបានព្រមានពួកគេកុំឲ្យធ្វើដំណើរបន្តទៅមុខទៀត។
យុវជន លឹម គឹមសួគ៌ សកម្មជនរបស់គណបក្សសង្គ្រោះជាតិដែលរៀបចំព្រឹត្តិការណ៍នេះបាននិយាយថា “យើងចង់យកឱកាសនេះដើម្បីទាមទារឲ្យមានការលុបចោលបម្រាមហាមមិនឲ្យជួបជុំលើសពី១០នាក់ ហើយយើងក៏អំពាវនាវសុំឲ្យមានការដោះលែងមនុស្សទាំង២៣នាក់ដែលត្រូវបានចាប់បញ្ជូនចូលពន្ធនាគារ ផងដែរ”។ បន្ទាប់មកមានរថយន្តធុនធំពីរគ្រឿងដែលដឹកសុទ្ធតែកងសន្តិសុខខណ្ឌមានពាក់មួកការពារបានមកដល់។
លោក គឹម វុត្ថា ដែលជាប្រធានសណ្តាប់ធ្នាប់សាធារណៈខណ្ឌដូនពេញ បានប្រាប់ក្រុមយុវជននេះថា “អ្នកឯងមិនអាចធ្វើពិធីនេះបានឡើយ ទោះបីជានៅកន្លែងណាក៏ដោយព្រោះវាធ្វើឲ្យខូចសណ្តាប់ធ្នាប់សាធារណៈ។ អ្នកឯងអាចធ្វើបានទាល់តែមានការអនុញ្ញាត។ ប្រសិនបើអ្នកឯងមិនឈប់ទេ យើងនឹងចាប់ខ្លួនអ្នកឯង”។
បន្ទាប់មកក្រុមយុវជននេះត្រូវបានដេញរហូតដល់ផ្សារធំថ្មីជាទីដែលលោក ហៀង ស៊ាងលាង អាយុ៣០ឆ្នាំដែលក្រុមយុវជននិយាយថា មិនមែនជាសមាជិករបស់ខ្លួន ប៉ុន្តែគ្រាន់តែចេញមកដើម្បីបង្ហាញការគាំទ្រនោះត្រូវបានចាប់ខ្លួន។
លោក ស៊ាងលាង បាននិយាយនៅពេលបន្ទាប់មកថា “ខ្ញុំមិនបានចូលរួមជាមួយយុវជនទេ ប៉ុន្តែអាជ្ញាធរបែរជាចោទប្រកាន់ខ្ញុំថា បានចូលរួមជាមួយក្រុមយុវជន និងធ្វើឲ្យខូចសណ្តាប់ធ្នាប់សាធារណៈទៅវិញ។ ពួកគេបានដេញខ្ញុំឲ្យចុះពីម៉ូតូ ហើយបានប្រើដំបងវាយក្បាលខ្ញុំ វាគឺជារឿងខុសច្បាប់ដែលពួកគេចាប់ខ្លួននិងវាយដំពលរដ្ឋ”។
យុវជន រិន ចាន់រិទ្ធ ដែលជាអ្នកគាំទ្រគណបក្សសង្គ្រោះជាតិម្នាក់ដែរនោះ បាននិយាយបន្ទាប់ពីក្រុមយុវជនបានរត់ទៅកាន់ខាងក្រៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទិ្ធមនុស្សថា “យើងចង់រំឭកទិវាយុត្តិធម៌សង្គមពិភពលោក ព្រោះពលរដ្ឋរបស់យើងមិនបានដឹងអំពីទិវានេះទេ”។ យុវជនរូបនេះបាននិយាយបន្ថែមថា ក្រុមយុវជនមានបំណងចង់ឲ្យគេចាប់អារម្មណ៍ចំពោះសិទ្ធិសេរីភាពនៃការបញ្ចេញមតិ និងសិទ្ធិមនុស្ស។
យុវជន គឹមសួគ៌ បានលើកឡើងថា លោក ស៊ាងលាង ត្រូវបានឃុំខ្លួនអស់រយៈពេល៣០នាទី មុនពេលត្រូវបានដោះលែងវិញដោយគ្មានការចោទប្រកាន់។ គឹមសួគ៌ បាននិយាយថា “យើងថ្កោលទោសចំពោះការចាប់ខ្លួននេះ ព្រោះគាត់មិនបានធ្វើអ្វីខុសទេ ហើយគាត់ក៏មិនមែនជាសមាជិកក្រុមយុវជនដែរ។ គាត់បានជួបពួកយើងដោយចៃដន្យ ហើយបានតាមពួកយើងតែប៉ុណ្ណោះ”។
គឹមសួគ៌ បន្តថា “យើងធ្លាប់បានឃើញការបង្ក្រាបដ៏ហិង្សារបស់អាជ្ញាធរលើបាតុកម្មអហិង្សាដោយបណ្តាលឲ្យមនុស្សមួយចំនួនបាត់បង់ជីវិតនិងជាច្រើននាក់ផ្សេងទៀតរងរបួស”។
នៅក្នុងសេចក្តីថ្លែងការណ៍មួយ អង្គការសិទ្ធិមនុស្សក្នុងស្រុកអាដហុក បានលើកឡើងថាខ្លួន “ថ្កោលទោសចំពោះការចាប់ខ្លួនមនុស្សដែលគ្មានទោសកំហុស ដោយអាជ្ញាធររបស់សាលារាជធានី” រីឯមជ្ឈមណ្ឌលអប់រំច្បាប់កម្ពុជាវិញបានលើកឡើងនៅក្នុងសេចក្តីថ្លែងការណ៍មួយដាច់ដោយឡែកថា “នៅក្នុងប្រទេសកម្ពុជា ទិវាយុត្តិធម៌សង្គមត្រូវបានគេធ្វើឡើងនៅពេលណាដែលពលរដ្ឋ កម្មករ ក៏ដូចជាសកម្មជនត្រូវជាគេរំលោភសិទ្ធិជាមូលដ្ឋានរបស់ខ្លួនយ៉ាងធ្ងន់ធ្ងរតែប៉ុណ្ណោះ”៕ស៊ុយឈាង
នគរបាលអន្តោប្រវេសន៍ខេត្តសៀមរាបស្វែងរកអ្នកកាសែតកាណាដាម្នាក់ដែលបានបាត់ខ្លួន
នគរបាលបានឲ្យដឹងថា នគរបាលអន្តោប្រវេសន៍ខេត្តសៀមរាបកំពុងស្វែងរកអ្នកកាសែតជនជាតិកាណាដាម្នាក់ដែលបានបាត់ខ្លួនពីផ្ទះសំណាក់ដែលគាត់ស្នាក់នៅរយៈពេលមួយសប្តាហ៍មកហើយដោយគ្មានដំណឹងសោះ។
លោក ចៅ ម៉ៅវីរៈ ប្រធាននគរបាលអន្តោប្រវេសន៍ខេត្តបានមានប្រសាសន៍កាលពីម្សិលមិញថា “យើងកំពុងស៊ើបអង្កេតនៅឡើយ ហើយយើងមិនទាន់រកឃើញតម្រុយនៅឡើ យទេ”។
លោក វីរៈ បានមានប្រសាសន៍ថា លោក ដេវីដ វ៉កឃើ ជាអ្នកកាសែតដែលបានមកយកព័ត៌មានច្រើនឆ្នាំមកហើយនៅប្រទេសកម្ពុជានោះ ត្រូវគេឃើញចុងក្រោយចាកចេញពីផ្ទះសំណាក់ Green Village Angkor នៅម៉ោងប្រហែល២រសៀលថ្ងៃសុក្រសប្តាហ៍មុន។
លោកបានសួរថា “គាត់បានស្នាក់នៅទីនោះរយៈពេលជាងមួយឆ្នាំមកហើយ។ ហេតុអ្វីបានជាគាត់ចាកចេញមិនយករបស់របររបស់គាត់ដូច្នេះ?”។ លោកបានបន្ថែមថា លោក វ៉កឃើ បានទុកទូរស័ព្ទដៃ លិខិតឆ្លងដែន កុំព្យូទ័រ និងរបស់របរមានតម្លៃរបស់លោកដទៃទៀតនៅក្នុងបន្ទប់។
លោក វ៉ាង សូសួស្ដី អ្នកទទួលភ្ញៀវនៅផ្ទះសំណាក់ Green Village Angkor បាននិយាយថា លោក វ៉កឃើ បានចាកចេញពីបន្ទប់របស់លោកនៅពេលគេកំពុងបោសសម្អាតបន្ទប់នោះ ប៉ុន្តែមិនឃើញលោកត្រឡប់មកបរិភោគអាហារពេលល្ងាចវិញនៅថ្ងៃនោះទេ។ លោក សួស្ដី...
គយចាប់បានទូរស័ព្ទ iPhone គេចពន្ធជាង២៥០គ្រឿងនៅអាកាសយានដ្ឋានអន្តរជាតិសៀមរាប
មន្ត្រីបានលើកឡើងថា ទូរស័ព្ទ iPhone ស៊េរីថ្មីប្រហែល២៥០គ្រឿងដែលគេរត់ពន្ធពីប្រ ទេសសិង្ហបុរី ត្រូវមន្ត្រីគយរឹបអូសនៅអាកាសយានដ្ឋានអន្តរជាតិសៀមរាប កាលពីយប់ថ្ងៃពុធ។
លោក រក្សា សេរី ប្រធានគយចល័តខេត្តសៀមរាប បានមានប្រសាសន៍ថា ទូរស័ព្ទគេចពន្ធទាំងនេះត្រូវបានរកឃើញនៅក្នុងវ៉ាលិសចំនួនពីររបស់អ្នកដំណើរម្នាក់តាមជើងហោះហើរមួយរបស់ក្រុមហ៊ុនអាកាសចរណ៍ JetStar Asia ពីប្រទេសសិង្ហបុរីមកដល់ខេត្តសៀមរាប នៅវេលាម៉ោង៨និង២០នាទីយប់។
លោក រក្សា សេរី បានមានប្រសាសន៍កាលពីម្សិលមិញថា “ ជនរត់ពន្ធបានរត់ពន្ធទូរស័ព្ទស៊េរី iPhone 5S 16GB ដែលមានតម្លៃថ្លៃចំនួន២៥១គ្រឿង...
រកឃើញសាកសពជនរងគ្រោះពីរនាក់នៅក្នុងហេតុការណ៍បាក់ច្រាំងទន្លេមេគង្គនៅខេត្តកណ្តាល
នគរបាលបាននិយាយថា សាកសពស្ត្រីអាយុ៣៩ឆ្នាំម្នាក់ និងសាកសពក្មួយប្រុសអាយុ១៨ខែរបស់ស្ត្រីរូបនេះ ត្រូវបានស្រង់ពីក្នុងទឹកកាលពីម្សិលមិញ ពីរថ្ងៃបន្ទាប់ពីច្រាំងទន្លេនោះបានបាក់បណ្តាលឲ្យផ្ទះរបស់ពួកគេនៅក្នុងស្រុកខ្សាច់កណ្តាល ធ្លាក់ចូលទៅក្នុងទន្លេមេគង្គនៅពេលពួកគេកំពុងដេក ប៉ុន្តែ កូនប្រុសអាយុ៣ឆ្នាំរបស់ស្ត្រីរូបនេះមិនទាន់បានរកឃើញទេ។
យោងតាមលោក ខៀវ សុកាន់ អភិបាលរងស្រុកបានឲ្យដឹងថា សាកសពក្មេងប្រុសអាយុ១៨ខែត្រូវបានប្រទះឃើញនៅម៉ោង៩និង៣០នាទីព្រឹកម្សិលមិញ អណ្តែតនៅក្នុងទឹកទន្លេក្នុងឃុំព្រះប្រសប់ នៅចម្ងាយប្រហែល៦ម៉ែត្រពីកន្លែងកើតហេតុ រីឯសាកសពម្តាយធំរបស់ក្មេងប្រុសរូបនេះ ឈ្មោះ សំ អុល បានអណ្តែតនៅជិតនោះប្រហែលម៉ោង១រសៀល។
លោកបានមានប្រសាសន៍ថា “ អ្នកមុជទឹកជនជាតិវៀតណាមមួយក្រុមបានមុជទឹករាវរកសាកសពកាលពីថ្ងៃពុធ ប៉ុន្តែ ពួកគេបានឈប់រកកាលពីយប់ថ្ងៃពុធ ដោយសារពួកគេរកមិនឃើញ ដូច្នេះយើងត្រូវរង់ចាំរហូតដល់សាកសពអណ្តែតលើទឹក”។
កាលពីថ្ងៃពុធ ប្រជាជនមូលដ្ឋានបានបន្ទោសលើការបូមខ្សាច់ក្នុងទន្លេមេគង្គចំពោះការបណ្តាលឲ្យមានសោកនាដកម្មនេះដោយសារវាធ្វើឲ្យបាក់ដីមាត់ទន្លេត្រង់កន្លែងពួកគេសង់ផ្ទះ។
លោក សុកាន់ បានបដិសេធថា មិនមានការបូមខ្សាច់នៅក្នុងតំបន់នោះទេ ហើយបានមានប្រសាសន៍ថា ការហូរច្រោះពីធម្មជាតិគឺជាមូលហេតុនៃការបាក់ច្រាំងនេះ។ លោកបានមានប្រសាសន៍ថា “យើងបានណែនាំអ្នកភូមិមិនឲ្យសាងសង់ផ្ទះនៅតាមមាត់ទន្លេព្រោះវាជាតំបន់ងាយរងគ្រោះ”។
ទោះជាយ៉ាងណា យោងតាមលោក ម៉ាក ហ្គយឆុត ប្រធានផ្នែកគ្រប់គ្រងទំនប់វារីអគ្គិសនី និងអាងទន្លេនៅអង្គការ WWF Greater Mekong បាននិយាយថា ការហូរច្រោះដីច្រាំងទន្លេ គឺដោយសារការបូមខ្សាច់នៅក្នុងទន្លេមេគង្គដែលកំពុងធ្វើឲ្យធ្ងន់ធ្ងរដោយសារទំនប់វារីអគ្គិសនីនៅខ្សែទឹកខាងលើ។
លោកបានមានប្រសាសន៍ថា “ ពិតមែនហើយ ការហូរច្រោះច្រាំងទន្លេគឺជារឿងធម្មជាតិនៅក្នុងការវិវត្តរបស់ទន្លេ ប៉ុន្តែ កម្រិតហូរច្រោះដីដែលគេសង្កេតឃើញនៅតាមមាត់ទន្លេមេគង្គ និងដីសណ្តមិនមែនជាធម្មជាតិទេ។ ច្រាំងទន្លេទាំងនោះភាគច្រើនប្រហែលជាបាក់ដោយសារការបូមខ្សាច់ និងទំនប់វារីអគ្គិសនី។លោកបានបន្ថែមថា “ការបូមខ្សាច់ធ្វើឲ្យមានការប៉ះពាល់ធ្ងន់ធ្ងរដល់ហេដ្ឋារចនាសម័្ពន្ធជាពិសេសស្ពាននិងផ្លូវថ្នល់នៅតាមមាត់ទន្លេ”។
ថ្វីបើមានបម្រាមបណ្តោះអាសន្នរបស់រដ្ឋាភិបាលមិនឲ្យបូមខ្សាច់នៅទូទាំងរាជធានីភ្នំពេញក៏ដោយ ក៏គេនៅតែឃើញមានទូកបូមខ្សាច់នៅតាមទន្លេដែរ៕គឹមហឿន
អង្គការបរិស្ថានព្រួយបារម្ភខ្លាចផ្សោតទន្លេមេគង្គងាប់ផុតពូជដោយសារទំបន់វារីអគ្គិសនីដនសាហុង
អង្គការបរិស្ថានមួយដែលមានឈ្មោះថា មូលនិធិសត្វព្រៃពិភពលោក ហៅកាត់ថា WWF បានលើកឡើងកាលពីម្សិលមិញថា ទំបន់វារីអគ្គិសនីដនសាហុង ដ៏ចម្រូងចម្រាសនៅក្នុងប្រទេសឡាវ អាចបណ្ដាលឲ្យសត្វផ្សោតងាប់ផុតពូជ ហើយអង្គការនេះបានអំពាវនាវសុំឲ្យលោកនាយករដ្ឋមន្ត្រី ហ៊ុន សែន បញ្ចុះបញ្ចូលប្រទេសឡាវឲ្យផ្អាកការសាងសង់គម្រោងនេះ។
ទំនប់ដែលគេគ្រោងនឹងចាប់ផ្ដើមសាងសង់នៅរយៈពេលប៉ុន្មានខែខាងមុខនេះ បានរងការរិះគន់យ៉ាងខ្លាំងដោយសារតែវា នឹងបិទផ្លូវទឹកតែមួយគត់សម្រាប់ត្រីធ្វើបម្លាស់ទីពេញ មួយឆ្នាំ ហើយតាមការរំពឹងទុកថា ទំនប់នេះនឹងធ្វើឲ្យជីវៈចម្រុះនៅក្នុងទន្លេមេគង្គក្រោមប្រែប្រួលមិនអាចបញ្ឈប់បាន។
លោក ឈិត សំអាត នាយកអង្គការ WWF ប្រចាំប្រទេសកម្ពុជាបានមានប្រសាសន៍ថា “WWF សូមអំពាវនាវឲ្យផ្អាកការសាងសង់ទំនប់ដនសាហុង...។ ខ្ញុំក៏សូមអំពាវនាវឲ្យនាយ...
រថយន្តធុនធំដែលដឹកផលិតផលកសិកម្មជាប់គាំងជាច្រើនគ្រឿង ខណៈអាជ្ញាធរថៃបិទប៉ុស្តិ៍ត្រួតពិនិត្យព្រំដែន
មន្ត្រីយោធាម្នាក់បានឲ្យដឹងកាលពីម្សិលមិញថា រថយន្តធុនធំរាប់សិបគ្រឿងដែលដឹកផលិតផលកសិកម្មទៅប្រទេសថៃដែលត្រូវឆ្លងកាត់ប៉ុស្តិ៍ត្រួតពិនិត្យព្រំដែននៅខេត្តបន្ទាយមានជ័យ ត្រូវអាជ្ញាធរថៃឃាត់នៅព្រំដែនចាប់តាំងពីថ្ងៃច័ន្ទមកម៉្លេះ។
ឧត្តមសេនីយ៍ត្រី ពេជ្រ វណ្ណា ដែលជាប្រធានការិយាល័យទំនាក់ទំនងព្រំដែនកម្ពុជាបានឲ្យដឹងថា អាជ្ញាធរថៃមិនបានពន្យល់ថា តើហេតុអ្វីបានពួកគេមិនអនុញ្ញាតឲ្យរថយន្តធុនធំទាំងនេះបន្តដំណើរនោះទេ ប៉ុន្តែលោកបានលើកឡើងថា ពួកគេបានបដិសេធមិនឲ្យរថយន្តធុនធំទាំងនេះឆ្លងកាត់តាំងពីថ្ងៃច័ន្ទមកម៉្លេះ។
ឧត្តមសេនីយ៍ត្រី ពេជ្រ វណ្ណា បានមានប្រសាសន៍ថា “ អាជ្ញាធរថៃមិនបានផ្តល់ព័ត៌មានណាមួយដល់យើងឡើយ មុនពេលពួកគេបិទប៉ុស្តិ៍ត្រួតពិនិត្យ”។
ឧត្តមសេនីយ៍ត្រី វណ្ណា បានឲ្យដឹងបន្ថែមទៀតថា មន្ត្រីថៃដែលទទួលបន្ទុកប៉ុស្តិ៍ត្រួតពិនិត្យនេះត្រូវបានផ្លាស់ប្តូរក្នុងពេលថ្មីៗនេះ ដែលជាហេតុធ្វើរថយន្តមិនអាចឆ្លងកាត់ព្រំដែនបាន។
ឧត្តមសេនីយ៍ត្រីរូបនេះបានមានប្រសាសន៍ទៀតថា “ជារៀងរាល់ឆ្នាំ នៅពេលណា អាជ្ញាធរថៃផ្លាស់ប្តូរមន្ត្រីដឹកនាំរបស់ខ្លួន ពួកគេតែងតែរឹតបន្តឹងសន្តិសុខរបស់ខ្លួន ហើយបិទប៉ុស្តិ៍ត្រួតពិនិត្យដោយមិនអនុញ្ញាតឲ្យផលិតផលកសិកម្មរបស់យើង ឬក៏កម្មករចូលទៅក្នុងប្រទេសរបស់ពួកគេឡើយ”។
លោកបានលើកឡើងបន្តទៀតថា លោកមិនអាចបញ្ជាក់បានទេ ថាតើរថយន្តធុនធំចំនួនប៉ុន្មានគ្រឿងត្រូវជាប់គាំងនៅព្រំដែនកាលពីម្ស្ិលមិញ ប៉ុន្តែលោកបានបញ្ជាក់ថា ជាទូទៅរថយន្តធុនធំចាប់ពី៦០ទៅ៩០គ្រឿងបានឆ្លងកាត់ព្រំដែនចូលទៅក្នុងប្រទេសថៃជារៀងរាល់ថ្ងៃ៕ ស៊ុយឈាង
តុលាការចោទប្រកាន់ទាហានឆត្រយោងម្នាក់ពីបទប្រើប្រាស់ថ្នាំញៀនពេលចុះបំពេញភារកិច្ច
នៅពេលឡើងសវនាការនៅឯសាលាដំបូងរាជធានីភ្នំពេញពាក់ព័ន្ធនឹងថ្នាំញៀនទាហានម្នាក់មកពីអង្គភាពទ័ពឆត្រយោងលេខ៩១១កាលពីម្សិលមិញ បានសារភាពថា គាត់បានប្រើប្រាស់ថ្នាំញៀនមេតំហ្វេតាមីនពេលកំពុងបំពេញការងារមែន ។
លោក អ៊ុំ ចន្ធូ អាយុ២៨ឆ្នាំជាទាហានម្នាក់នៅអង្គភាពនេះត្រូវបានចាប់ខ្លួនកាលពីខែតុលាឆ្នាំមុន បន្ទាប់ពីនគរបាលបានរកឃើញថ្នាំមេតំហ្វេតាមីនបីកញ្ចប់នៅជាប់ខ្លួនលោក អំឡុងការឆែកឆេរនៅក្នុងខណ្ឌពោធិ៍សែនជ័យ រាជធានីភ្នំពេញ។
លោក ស៊ិន វិសាល ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍កាលពីម្សិលមិញថា “តុលាការបានចោទប្រកាន់លោក ចន្ធូ ពីបទរក្សាទុក ជួញដូរ និងចែកចាយថ្នាំញៀន”។
លោក ចន្ធូ បានប្រាប់តុលាការថា គាត់បានយកថ្នាំញៀនមេតំហ្វេតាមីនចូលក្នុងបន្ទាយកងពលតូចលេខ៩១១ជាប្រចាំនៅក្នុងសង្កាត់ចោមចៅ ប៉ុន្តែបានអះអាងថា ថ្នាំញៀននោះសម្រាប់ប្រើប្រាស់ផ្ទាល់ខ្លួនតែប៉ុណោះ មិនមែនសម្រាប់លក់ទេ។
ជនសង្ស័យរូបនេះបាននិយាយថា គាត់បានប្រើប្រាស់ថ្នាំញៀនជំនួយកម្លាំងនេះដើម្បីពង្រឹងស្មារតីពេលល្បាតនៅពេលយប់ជ្រៅ។ គាត់បាននិយាយថា “ខ្ញុំធ្លាប់ប្រើប្រាស់ថ្នាំញៀនអស់រយៈពេលប្រហែល១ឆ្នាំ។ ខ្ញុំប្រើប្រាស់វាដើម្បីកុំឲ្យងងុយដេកពេលបំពេញការងារនៅពេលយប់”។
ទោះជាយ៉ាងណា លោក កើ ប៊ុណ្ណារ៉ា ព្រះរាជអាជ្ញារងអមសាលាដំបូងរាជធានីភ្នំពេញបានច្រានចោលការអះអាងរបស់លោក ចន្ធូ ដែលថា ថ្នាំញៀននេះសម្រាប់ប្រើប្រាស់ផ្ទាល់ខ្លួននោះ ដោយលើកឡើងថា លោក ចន្ធូ បានជួញដូរថ្នាំញៀននៅក្នុងបរិវេណរបស់អង្គភាពកងយោធពលខេមរភូមិន្ទតែម្ដង។
លោក ប៊ុណ្ណារ៉ា បានប្រាប់ចុងចោទរូបនេះនៅក្នុងតុលាការកាលពីម្សិលមិញថា “គាត់មានបំណងជួញដូរ និងចែកចាយទៅឲ្យអ្នកដទៃ។ តុលាការនៅតែចោទប្រកាន់គាត់ពីបទរក្សាទុក ជួញដូរ និងចែកចាយថ្នាំញៀនដដែល”។
លោកបានប្រាប់តុលាការថា លោក ចន្ធូ ត្រូវបាននគរបាលឃាត់ខ្លួននៅប៉ុស្តិ៍ត្រួតពិនិត្យពេលលោកធ្វើដំណើរទៅបន្ទាយទ័ពឆត្រយោងបន្ទាប់ពីបានទិញថ្នាំញៀននៅក្នុងសង្កាត់ទឹកថ្លាកាលពីឆ្នាំមុន។
នគរបាលបានឆែកឆេររកឃើញថ្នាំមេតំហ្វេតាមីនបីកញ្ចប់ដែលមិនដឹងថា មានទម្ងន់ប៉ុន្មាននៅក្នុងប្រអប់ទូរស័ព្ទដៃរបស់លោក ចន្ធូ។ លោក អ៊ូ វុទ្ធី មេធាវីការពារលោក ចន្ធូ បានអះអាងថា កូនក្ដីរបស់លោកគឺជាអ្នកប្រើប្រាស់ មិនមែនជាអ្នកចែកចាយទេ។ លោកបានមានប្រសាសន៍ថា “ខ្ញុំសូមឲ្យតុលាការបន្ធូរបន្ថយទោសចំពោះការប្រើប្រាស់ថ្នាំញៀននេះ និងលើកលែងបទចោទប្រកាន់ដទៃទៀត”។
កាលពីដើមឆ្នាំនេះ កងពលតូចលេខ៩១១នេះបានចូលរួមក្នុងការបង្ក្រាបការតវ៉ារបស់កម្មកររោងចក្រកាត់ដេរដោយហិង្សានៅក្នុងខណ្ឌពោធិ៍សែនជ័យ រាជធានីភ្នំពេញ។
ពេលទាក់ទងកាលពីម្សិលមិញ លោកឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិបានមានប្រសាសន៍ថា “លោកមិនដឹងពីករណីនេះទេ ហើយមិនអាចនិយាយអ្វីបានទេ លុះណាតែលោកបានដឹងពីករណីនេះសិន”។
លោក ចាប ភក្ដី មេបញ្ជាការអង្គភាពទ័ពឆត្រយោងលេខ៩១១មិនអាចទាក់ទងសុំការអត្ថាធិប្បាយបានទេ។ លោកចៅក្រម ស៊ិន វិសាល បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី២៨ ខែកុម្ភៈ៕ សារុន
(រាយការណ៍បន្ថែមដោយ Matt Blomberg)
Latest news
© 2021, ដេលី. All rights reserved.