អង្គការបរិស្ថានមួយដែលមានឈ្មោះថា មូលនិធិសត្វព្រៃពិភពលោក ហៅកាត់ថា WWF បានលើកឡើងកាលពីម្សិលមិញថា ទំបន់វារីអគ្គិសនីដនសាហុង ដ៏ចម្រូងចម្រាសនៅក្នុងប្រទេសឡាវ អាចបណ្ដាលឲ្យសត្វផ្សោតងាប់ផុតពូជ ហើយអង្គការនេះបានអំពាវនាវសុំឲ្យលោកនាយករដ្ឋមន្ត្រី ហ៊ុន សែន បញ្ចុះបញ្ចូលប្រទេសឡាវឲ្យផ្អាកការសាងសង់គម្រោងនេះ។
ទំនប់ដែលគេគ្រោងនឹងចាប់ផ្ដើមសាងសង់នៅរយៈពេលប៉ុន្មានខែខាងមុខនេះ បានរងការរិះគន់យ៉ាងខ្លាំងដោយសារតែវា នឹងបិទផ្លូវទឹកតែមួយគត់សម្រាប់ត្រីធ្វើបម្លាស់ទីពេញ មួយឆ្នាំ ហើយតាមការរំពឹងទុកថា ទំនប់នេះនឹងធ្វើឲ្យជីវៈចម្រុះនៅក្នុងទន្លេមេគង្គក្រោមប្រែប្រួលមិនអាចបញ្ឈប់បាន។
លោក ឈិត សំអាត នាយកអង្គការ WWF ប្រចាំប្រទេសកម្ពុជាបានមានប្រសាសន៍ថា “WWF សូមអំពាវនាវឲ្យផ្អាកការសាងសង់ទំនប់ដនសាហុង…។ ខ្ញុំក៏សូមអំពាវនាវឲ្យនាយ ករដ្ឋមន្ត្រី [ហ៊ុន សែន] ជួយផ្អាកការសាងសង់ទំនប់ដនសាហុងដែរ អំឡុងកិច្ចប្រជុំកំពូលរបស់គណៈកម្មការទន្លេមេគង្គនៅខែមេសា”។
លោក ហ្គឺរី រ៉ាយអាន (Gerry Ryan) អ្នកសរសេររបាយការណ៍មួយដែលមានឈ្មោះថា “The Don Sahong and the Mekong Dolphin” (ទំនប់ដនសាហុង និងផ្សោតទន្លេមេគង្គ) ដែលបានចុះផ្សាយកាលពីម្សិលមិញ បានមានប្រសាសន៍ថា ផ្សោតទាំងប្រាំមួយក្បាលដែលស្ថិតនៅក្នុងអន្លង់មួយនៅចម្ងាយពីរបីរយម៉ែត្រពីការដ្ឋានសាងសង់ទំនប់តាមការគ្រោងទុក ទំនងជានឹងងាប់មុនពេលទំនប់នេះសាងសង់ចប់រួចរាល់។
ដើម្បីស្ទង់មើលទិសដៅនៅក្នុងទឹកល្អក់នៅទន្លេមេគង្គ ក្នុងការស្វែងរកចំណី ផ្សោតទាំងនេះពឹងផ្អែកលើសំឡេង ជាវិញ្ញាណមួយដែលនឹងរងផលប៉ះពាល់ខ្លាំងដោយសារតែការងារសាងសង់នេះ។
លោក ហ្គឺរី រ៉ាយអាន បានមានប្រសាសន៍ទៀតថា “ថ្មរាប់លានតោននឹងត្រូវរម្លើង ដោយប្រើប្រាស់រំសេវផ្ទុះ ហើយរំសេវផ្ទុះទាំងនោះនឹងសម្លាប់ពួកវាភ្លាមៗ ឬបង្កផលប៉ះពាល់ ដែលនឹងធ្វើឲ្យពួកវាស្ទង់មើលទិសដៅមិនឃើញនៅក្រោមផ្ទៃទឹក”។
ដោយមិនអាចស្វែងរកចំណីចម្អែតក្រពះបាន ផ្សោតទាំងនេះនឹងស្រែកឃ្លានបន្ដិច ម្ដងៗរហូតបាត់បង់ជីវិត។
លោក ហ្គឺរី រ៉ាយអាន បានលើកឡើងនៅក្នុងរបាយការណ៍របស់លោកថា ទូកដែលធ្វើដំណើរទៅមកកាន់តែច្រើន ការហៀរកំពប់សារធាតុពុល និងការធ្លាក់ចុះនូវចំណីរបស់ផ្សោត អាចនឹងធ្វើឲ្យផ្សោតទាំងអស់ងាប់ផុតពូជយ៉ាងឆាប់រហ័ស។
លោកបានមានប្រសាសន៍ថា ការងាប់ផុតពូជរបស់ផ្សោត ក៏នឹងធ្វើឲ្យខាតបង់ចំណូលរាប់លានដុល្លារផងដែរនៅក្នុងវិស័យទេសចរណ៍ធម្មជាតិ ដែលត្រូវបានប៉ាន់ប្រមាណថា ទទួលបានចំណូលបួនលានដុល្លារកាលពីឆ្នាំ២០០៨ និងដែលបានទាក់ទាញភ្ញៀវទេសចរអន្តរជាតិចំនួន២០.០០០នាក់នៅក្នុងឆ្នាំ២០១២ នេះបើយោងតាមការលើកឡើងរបស់អង្គការ WWF។
លោក ផូយ វណ្ណា អនុប្រធានទេសចរណ៍ធម្មជាតិតាមសហគមន៍នៅក្នុងខេត្តស្ទឹងត្រែង បានបង្ហាញមន្ទិលរបស់លោកថា មិនដឹងជាភ្ញៀវទេសចរនឹងមកកម្សាន្តនៅតំបន់នេះទៀតឬយ៉ាងណាទេ ប្រសិនបើផ្សោតងាប់ផុតពូជនោះ។
លោកបានលើកឡើងបន្ថែមទៀតថា “ត្រីផ្សោតទាំងនេះ ទាក់ទាញភ្ញៀវទេសចរឲ្យមកកម្សាន្តនៅតំបន់របស់ខ្ញុំ ដែលធ្វើឲ្យខ្ញុំមានចំណូល”៕ សុខុម