មន្ត្រីបានលើកឡើងថា ទូរស័ព្ទ iPhone ស៊េរីថ្មីប្រហែល២៥០គ្រឿងដែលគេរត់ពន្ធពីប្រ ទេសសិង្ហបុរី ត្រូវមន្ត្រីគយរឹបអូសនៅអាកាសយានដ្ឋានអន្តរជាតិសៀមរាប កាលពីយប់ថ្ងៃពុធ។
លោក រក្សា សេរី ប្រធានគយចល័តខេត្តសៀមរាប បានមានប្រសាសន៍ថា ទូរស័ព្ទគេចពន្ធទាំងនេះត្រូវបានរកឃើញនៅក្នុងវ៉ាលិសចំនួនពីររបស់អ្នកដំណើរម្នាក់តាមជើងហោះហើរមួយរបស់ក្រុមហ៊ុនអាកាសចរណ៍ JetStar Asia ពីប្រទេសសិង្ហបុរីមកដល់ខេត្តសៀមរាប នៅវេលាម៉ោង៨និង២០នាទីយប់។
លោក រក្សា សេរី បានមានប្រសាសន៍កាលពីម្សិលមិញថា “ ជនរត់ពន្ធបានរត់ពន្ធទូរស័ព្ទស៊េរី iPhone 5S 16GB ដែលមានតម្លៃថ្លៃចំនួន២៥១គ្រឿង ដែលត្រូវមន្ត្រីគយចល័តរបស់យើងរឹបអូសបានកាលពីយប់មិញនៅចម្ងាយប្រហែល៤០០ម៉ែត្រពីអាកាសយានដ្ឋាន”។
តែទោះជាយ៉ាងណា ថ្វីបើចាប់បានជនសង្ស័យរួមជាមួយនឹងភ័ស្តុតាងក្ដី ក៏លោក រក្សា សេរី បានមានប្រសាសន៍ថា លោកមិនបានចាប់ខ្លួនជនរត់ពន្ធទាំងនោះទេ ហើយលោកក៏នឹងមិនបញ្ចេញឈ្មោះរបស់ពួកគេដែរ។ លោកមានប្រសាសន៍ថា លោក “ គ្មានសិទ្ធិ” ចាប់ខ្លួនជនរត់ពន្ធទាំងនោះទេ។
លោកបានមានប្រសាសន៍ទៀតថា “ ព្រះរាជអាជ្ញាអមសាលាដំបូង [ខេត្តសៀមរាប ] ក៏បានសួរខ្ញុំដែរថា ‘ ហេតុអ្វីបានជាលោកមិនចាប់ខ្លួនជនរត់ពន្ធទាំងនោះ?’ ។ជាការពិត មន្ត្រីគយរបស់យើងគ្មានសិទ្ធិចាប់ខ្លួនជនរត់ពន្ធទាំងនោះទេ ប៉ុន្តែយើងអាចរឹបអូសទំនិញរបស់ពួកគេបាន ពីព្រោះពួកគេមិនបានបង់ពន្ធ”។
លោក អង្គ សុកិន្នរ ប្រធានគយប្រចាំនៅអាកាសយានដ្ឋានអន្តរជាតិសៀមរាបបានមានប្រសាសន៍ថា ប្រសិនបើទូរស័ព្ទទាំងនេះនាំចូលមកក្នុងប្រទេសកម្ពុជាដោយត្រឹមត្រូវនោះគេត្រូវបង់ពន្ធប្រហែល៣០ដុល្លារក្នុងមួយគ្រឿង ហើយសរុបទាំងអស់ត្រូវបង់ពន្ធចំនួន៧.៥៣០ដុល្លារ។
លោកក៏បដិសេធមិនបញ្ចេញឈ្មោះជនសង្ស័យរត់ពន្ធទាំងនោះដែរ ប៉ុន្តែជនរត់ពន្ធទាំងនោះនឹងត្រូវចាប់បង្ខំឲ្យបង់ពន្ធលើទូរស័ព្ទគេចពន្ធទាំងនេះ ព្រមទាំងឲ្យពួកគេបង់ប្រាក់ពិន័យបន្ថែមទៀតផង៕ សុខុម