TAG
weekend2
ការប្រកួតធ្វើម្ហូបនៅកែប
ក្រុងកែប - ក្រោមកម្តៅថ្ងៃនៃពេលព្រឹក យុវជនម្នាក់ បានដើរយ៉ាងវីវក់ជុំវិញតុវែងមួយ ដែលមានចុងភៅប្រាំនាក់ប្រញាប់ប្រញាល់បញ្ចប់ការរៀបចំចម្អិនម្ហូបមឹកឆាម្រេចកំពត។ យុវជនរូបនេះស្រែកទៅកាន់គូប្រកួត ជាភាសាបារាំង បន្ទាប់មកជាភាសាខ្មែរថា "នៅសល់២នាទីទៀត"។
ជាម្តងម្កាល ដែលទីក្រុងមាត់សមុទ្រស្ងាត់ជ្រងំនេះ ឃើញមានភាពរីករាយជុំវិញមឹក ប៉ុន្តែកាលពីថ្ងៃអាទិត្យសប្តាហ៍មុន ព្រឹត្តិការណ៍នៅឯរមណីយដ្ឋានស្ព្រីងវា៉ាល្លី ហាក់ដូចជាការបង្ហាញម្ហូបតាមទូរទស្សន៍។ ចុងភៅ១០នាក់ បានប្រមូលផ្តុំគ្នាក្នុងកម្មវិធី"ចុងភៅកែប" ជាការប្រកួតដើម្បីស្វែងរកម្ហូបឆ្ងាញ់បំផុតនៃម្ហូបខ្មែរ។
កម្លាំងនៅពីក្រោយព្រឹត្តិការណ៍ប្រចាំឆ្នាំ គឺលោក សុខផល ងោស៊ីសុវត្ថិ អាយុ៣៩ឆ្នាំ ដែលបានបង្កើតការប្រកួតនេះឡើងនៅក្នុងឆ្នាំ២០១៣។
លោកបាននិយាយថា គោលបំណងសំខាន់នៃការប្រកួត គឺរៃអង្គាសប្រាក់ឲ្យសាលាភាសាអាយរ៉ាវាឌីរបស់លោកក្នុងខេត្តកែប (Jardin des Langues Ayravady) ដែលលោកបានបង្កើតក្នុងឆ្នាំ២០០៧។
លោកបាននិយាយថា"តាមពិត យើងចង់លើកកម្ពស់ម្ហូបខ្មែរនិងក្រុងកែបនៅពេលទេសចរមានចំនួនតិច"។
យោងតាមលោក ងោស៊ីសុវត្ថិឲ្យដឹងថា ព្រឹត្តិការណ៍នោះ ឧបត្ថម្ភថវិកាដោយអ្នកឧបត្ថម្ភក្នុងស្រុក ហើយជ័យលាភី មិនទទួលបានអ្វីទេ លើកលែងតែទទួលបានការកោតសរសើរពីអ្នកទស្សនាប៉ុណ្ណោះ។
ជាសមាជិកនៃរាជវង្សានុវង្ស លោក ងោស៊ីសុវត្ថិ មានអចលនទ្រព្យមួយចំនួននៅក្នុងខេត្តកែប។ ក្រៅពីបើកសាលាភាសា លោកក៏គ្រប់គ្រងក្លឹបតិន្និស មណ្ឌលកម្សាន្ត ភោជនីយដ្ឋានបណ្តុះបណ្តាល ហាងអនុស្សាវរីយ៍តាំងពិព័រណ៍ពាណិជ្ជកម្ម និងក្រុមហ៊ុនដែលនាំចេញម្រេចកំពត។
កើតក្នុងក្រុងប៉េកាំង ក្នុងឆ្នាំ១៩៧៥ គឺប៉ុន្មានខែបន្ទាប់ពីខ្មែរក្រហម បានកាន់អំណាច លោក ងោស៊ីសុវត្ថិ បានរស់នៅក្នុងប្រទេសបារាំងប្រហែល១០ឆ្នាំ ក្រោយមកលោកបានវិលត្រឡប់មកប្រទេសកម្ពុជាវិញ បន្ទាប់ពីបញ្ចប់ការសិក្សាផ្នែកការអប់រំផ្លូវកាយ។
លោកបាននិយាយថា"នៅពេលដែលខ្ញុំបានសម្រេចចិត្តមកកាន់កម្ពុជា ខ្ញុំបានយល់ឃើញថា អង្គការក្រៅរដ្ឋាភិបាលនិងទីភ្នាក់ងារអភិវឌ្ឍន៍ភាគច្រើន មានមូលដ្ឋានក្នុងក្រុងភ្នំពេញ។ នេះជាហេតុដែលខ្ញុំចាប់ផ្តើមគម្រោងទាំងនោះក្នុងខេត្តកែប"។
ដោយសារតែទំនាក់ទំនងទាំងនេះ ការប្រកួតកាលពីសប្តាហ៍មុន ពិពណ៌នាអំពីមនុស្សល្បីបីនាក់ដូចជាចៅក្រម ឯកអគ្គរដ្ឋទូតបារាំង ហ្សង់ខ្លូត ពមប៊ឺស ស្ថាបនិកមូលនិធិកំណើនកុមារកម្ពុជា សេស៊ិល ម៉ាលទែរ និងអ្នកអង្គម្ចាស់ស៊ីសុវត្ថិ អាយរ៉ាវាឌី(ដែលជាម្តាយរបស់លោក ងោស៊ីសុវត្ថិ)។ចៅក្រមបានវាយតម្លៃម្ហូប ដែលរៀបចំចម្អិនក្នុងរយៈពេល៣០នាទីដែលបែងចែកជាបីប្រភេទ គឺបទបង្ហាញ ការច្នៃប្រឌិតនិងរសជាតិ។ ចំពោះអ្នកដែលមិនបានទទួលការបណ្តុះបណ្តាល ម្ហូបទាំងនោះហាក់ដូចជាឆ្ងាញ់ដូចៗគ្នា។
នៅម៉ោង៣រសៀល រយៈពេល៤ម៉ោងបន្ទាប់ពីព្រឹត្តិការណ៍បានចាប់ផ្តើម ជ័យលាភី ត្រូវបានប្រកាស គឺ សុភាព យៀត និង សារឿន ម៉ី មានអាយុប្រហែល២០ឆ្នាំ ដែលជាអ្នកឈ្នះការប្រកួតកាលពីឆ្នាំមុនផងដែរ។
លោកស្រី ម៉ាលទែរ បាននិយាយថា"មានការខុសប្លែកគ្នាច្រើនចំពោះរសជាតិបើប្រៀបធៀបនឹងម្ហូបដទៃទៀត។ អ្នកអាចនិយាយថា ពួកគេពិតជាអ្នកមានវិជ្ជាជីវៈ ប៉ិនប្រសប់"។
ទោះជាយ៉ាងនេះក្តី លោក ម៉ី បាននិយាយថា ជោគជ័យរបស់លោក កើតឡើងដោយសារតែមានការបណ្តុះបណ្តាល។ លោកបានសិក្សានៅសាលាដុនបូស្កូ ហូតែល ក្នុងក្រុងព្រះសីហនុ ដែលជួយជ្រោមជ្រែងជនជាតិខ្មែរក្រីក្រឲ្យទទួលបានឧស្សាហកម្មទេសចរណ៍។
លោកបានពន្យល់ថា"ការសម្ងាត់ គឺត្រូវឆាគ្រឿងជាមុន បន្ទាប់មកឆាមឹក។ អ្នកចម្អិនទំនងធ្វើតាមវិធីផ្សេងទៅវិញ ហើយវាធ្វើឲ្យខូចដល់រសជាតិ"។
យើងក៏ប្រើម្រេចស្ងួតបន្ថែមលើម្រេចកំពត។ អ្នកចាត់ចែងបានផ្តល់គ្រឿងទេសឲ្យពួកយើង ប៉ុន្តែខ្ញុំបានកត់ឃើញសម្គាល់ថា បេក្ខជនប្រកួតផ្សេងទៀត មិនបានប្រើវាទេ។ វាធ្វើឲ្យមានរសជាតិខុសគ្នា"។
ចំពោះលោក ងោស៊ីសុវត្ថិ លោកមានគម្រោងធំមួយសម្រាប់ការប្រកួតនេះ។ លោកបាននិយាយថា "ប្រហែលជាថ្ងៃណាមួយ យើងនឹងមានកម្មវិធីបង្ហាញការចម្អិនម្ហូបតាមទូរទស្សន៍ផ្ទាល់របស់យើង ដូចជាចុងភៅចំណាន អ៊ីចឹង"៕រើន
ការសម្តែងជាសាកល
ក្រុមហ៊ុនសម្តែងសៀកមកពីប្រទេស៥ សម្តែងក្នុងក្រុងបីក្នុងរយៈពេលជាង១០ថ្ងៃ
នេះជាអ្វីដែលមហោស្រពសៀកអន្តរជាតិ ទីនេះ ទីនោះ នឹងសម្តែងជូននៅខែនេះ ដោយចាប់ផ្តើមពីថ្ងៃព្រហស្បតិ៍ក្នុងក្រុងភ្នំពេញ និងបញ្ចប់ក្នុងក្រុងបាត់ដំបងនៅថ្ងៃទី១៦ខែឧសភា។ សម្រាប់ឆ្នាំទីពីរជាបន្តបន្តាប់ ក្រុមហ៊ុនសៀកហ្វារពន្លឺសិល្បៈក្នុងក្រុងសៀមរាបនិងសាលាបណ្តុះបណ្តាលក្នុងក្រុងបាត់ដំបង កំពុងតែរួមគ្នាជាមួយសាលាសៀកជាតិក្នុងក្រុងភ្នំពេញ ដើម្បីសម្តែងសិល្បៈនេះ។
លោក ហួត ដារ៉ា នាយកប្រតិបត្តិក្រុមហ៊ុនសៀកហ្វារ បានមានប្រសាសន៍ថា ការសម្តែងដែលលក់សំបុត្រអស់កាលពីឆ្នាំមុន បានជំរុញឲ្យអ្នកចាត់ចែងគិតគូរបន្ថែមទៀត នៅពេលដែលមានគម្រោងរៀបចំព្រឹត្តិការណ៍នៅខែនេះ ដោយអញ្ជើញក្រុមហ៊ុនសៀកទាំងឡាយពីតៃវ៉ាន់ ប្រទេសបារាំង ស្វីស និងវៀតណាមដើម្បីចូលរួម។
នាយកប្រតិបត្តិក្រុមហ៊ុនសៀកហ្វាររូបនេះ បានមានប្រសាសន៍ថា "មានន័យច្រើនណាស់សម្រាប់កម្ពុជា ពីព្រោះវាមានតែមួយ គឺវាជាមហោស្រពសៀកអន្តរជាតិតែមួយ ដែលប្រារព្វឡើងនៅអាស៊ីអាគ្នេយ៍។ ជាឱកាសដើម្បីលើកមុខមាត់កម្ពុជាជាគោលដៅសិល្បៈ"។ លោក ដារ៉ាបាននិយាយថា លោកជឿថា ព្រឹត្តិការណ៍នេះនឹងជាមហោស្រពសៀកតែមួយគត់ ដែលបញ្ជាក់នូវសៀកសហសម័យ ដែលលាយបញ្ចូលគ្នានូវល្ខោន និងសៀកនៅក្នុងតំបន់។
លោកស្រី ហេឌី ប៊ឺឆីបណែធ័រ នៃក្រុមហ៊ុនឡឺ ប៉ាពីលឡុងស៍ (ឌឹ បាត់ធឺហ្វ្លាយ) ជាក្រុមហ៊ុនស្វីសដែលមានអ្នកហាត់កាយសម្ពន្ធចង្វាក់ រួមបញ្ចូលការលោតហក់ជាមួយនឹងការរាំដែលមានតាំងពីហ៊ិបហប់រហូតដល់របាំបាឡេ បានមានប្រសាសន៍ថា ក្រុមហ៊ុនរបស់អ្នកស្រី បានចូលរួមក្នុងមហោស្រព បន្ទាប់ពីអ្នកស្រីបានឃើញសិល្បករហ្វារសម្តែងនៅក្នុងប្រទេសស្វីស និងកម្ពុជា។
អ្នកស្រី ប៊ឺឆីបណែធ័រ បានមានប្រសាសន៍ថា លោកស្រីសង្ឃឹមថា ការចូលរួមរបស់ពួកគេនឹងជួយឲ្យអ្នកចាត់ចែងបង្កើតឡើងនូវមហោស្រពជាព្រឹត្តិការណ៍ប្រចាំឆ្នាំ។
ក្រុមហ៊ុនអន្តរជាតិផ្សេងទៀតមាននៅក្នុងមហោស្រពនេះ គឺក្រុមហ៊ុនសៀកហ្វ័រម៉ូសារបស់តៃវ៉ាន់ ដែលមានឯកទេសក្នុងការរួមបញ្ចូលស្ទីលរាំតាមផ្លូវជាមួយការលោតហក់ និងការត្រេះបាល់ មានក្រុមហ៊ុនអូអាល់ទីម៉ូ មូ៉មិនតូ របស់ប្រទេសបារាំង ដែលរួមបញ្ចូលបច្ចេកទេសរាំនឹងបង្គោលចិននិងពហុប្រព័ន្ធផ្សព្វផ្សាយ និងក្រុមហ៊ុនក្រុងហូជីមិញសង្គមបេតិកភណ្ឌ ដែលមានការសម្តែងសៀកក៏ដូចជាការថ្ពឹនភ្នែកផងដែរ។
ចំពោះលោកស្រី ភោគ ណារិន នាយិកាសាលាសៀកជាតិ និយាយថា មានរឿងជាច្រើនដែលត្រូវដោះស្រាយជាមួយមហោស្រពនេះ។
លោកស្រី ណារិន បានមានប្រសាសន៍ថា ប្រពៃណីសៀកនៅក្នុងប្រទេសកម្ពុជា អាចមានប្រវត្តិជាង១០០០ឆ្នាំ ដោយចម្លាក់អ្នកសម្តែងសៀកមានឆ្លាក់នៅលើជញ្ជាំងប្រាសាទនាសតវត្សរ៍ទី៧នៅឯសម្បូណ៍ព្រៃគុកក្នុងខេត្តកំពង់ធំ។ ប៉ុន្តែទម្រង់សិល្បៈនេះប្រឈមមុខនឹងការបាត់បង់។ លោកស្រីនាយិការូបនេះបានមានប្រសាសន៍ថា មានតែសិស្សបួននាក់ប៉ុណ្ណោះ បានចុះឈ្មោះចូលរៀននៅសាលាសៀកនៅឆ្នាំនេះ ដោយសារតែខ្វះឱកាសការងារ។
ការប្រារព្ធមហោស្រពនេះ អាចជួយធ្វើឲ្យចំណាប់អារម្មណ៍ជនជាតិខ្មែរនិយមឡើងវិញនូវទម្រង់សិល្បៈនេះ ហើយធ្វើឲ្យមានការសម្តែងសៀកជាទៀងទាត់នៅក្នុងក្រុងភ្នំពេញ ដែលកម្រមានឱកាសសម្តែងនោះ។
លោកស្រី ការ៉េន ចាង មន្ត្រីសិល្បៈនៃក្រុមហ៊ុនសៀកហ្វ័រម៉ូសា ជឿថាមហោស្រពទីនេះទីនោះ អាចផ្តល់ផលប្រយោជន៍ដល់សៀកនៅក្នុងតំបន់ទាំងមូល។
លោកស្រី បានមានប្រសាសន៍ក្នុងបទសម្ភាសតាមអីុម៉ែលថា "មហោស្រពសៀកអន្តរជាតិ នឹងមានភាពអស្ចារ្យណាស់។ ទីមួយ យើងយល់ស្របជាមួយគំនិតនេះ....ទីពីរ យើងគិតថា សាលាសៀកនៅទ្វីបអាស៊ី ឬក្រុមហ៊ុននានា គួរមានការប្រាស្រ័យទាក់ទងគ្នាឲ្យបានច្រើន"។
លោក ហួត ដារ៉ា នាយកប្រតិបត្តិហ្វារ បានមានប្រសាសន៍ថា សម្រាប់ហេតុផលនេះ មហោស្រព នឹងរួមមានការរៀបចំសិក្ខាសាលានៅក្នុងក្រុងនីមួយៗក្នុងបណ្តាក្រុងទាំងបី ដើម្បីឲ្យសិល្បករមកពីប្រទេសទាំងប្រាំ អាចចែករំលែកបច្ចេកទេស ហើយបង្កើតបាននូវទំនាក់ទំនងគ្នា។
ក្នុងអំឡុងពេលធ្វើមហោស្រពនេះ សាលាសៀកជាតិ នឹងសម្តែងរឿងខ្មែរដែលមានចំណងជើងថា "ព្រះសុធន នាងកែវ មនោរា" តាមរយៈការសម្តែងសៀក។ ហើយក្រុមហ៊ុនហ្វារ នឹងសម្តែងសៀកសហសម័យមានចំណងជើងថា "សុខា" ដែលទាក់ទងនឹងស្ត្រីម្នាក់ ដែលរស់រានមានជីវិតពីរបបប៉ុល ពល ត្រូវលងដោយការមើលឃើញភាពសាហាវយង់ឃ្នងនៃសម័យនោះ ប៉ុន្តែនាងអាចជម្នះលើបញ្ហានេះបាន ដោយចាប់ផ្តើមជួយជ្រោមជ្រែងក្រុមយុវវ័យ។
មហោស្រពនឹងប្រាព្ធធ្វើនៅក្នុងក្រុងភ្នំពេញនៅថ្ងៃទី៧ ទី៨ និង៩ខែឧសភានៅឯប៊ិចថប់ សាលាសៀកជាតិតាមវិថីរដ្ឋសភាជាតិ ធ្វើនៅក្នុងក្រុងសៀមរាបនៅថ្ងៃទី១១ ទី១២ និង១៣ខែឧសភានៅឯអគារសៀកហ្វារ នៅក្រោយសារមន្ទីរជាតិអង្គរ និងនៅក្នុងក្រុងបាត់ដំបងនៅថ្ងៃទី១៥ និង១៦នៅឯបរិវេណហ្វារពន្លឺសិល្បៈ៕ រើន
ស្ត្រីលើផ្ទាំងគំនូរ
ការតាំងពិព័រណ៍រូបធ្វើឲ្យវិចិត្រករស្ត្រីមកជុំគ្នាក្នុងការតាំងពិព័រណ៍ដ៏កម្រ
ការតាំងពិព័រណ៍សិល្បៈក្នុងក្រុងបាត់ដំបងកាលពីថ្ងៃសៅរ៍ តំណាងឲ្យរឿងរ៉ាវកម្រមួយនៃវិចិត្រករស្ត្រី។ កម្រពីព្រោះមានជាងគំនូរនិងជាងចម្លាក់ស្ត្រីតិចតួចណាស់នៅក្នុងប្រទេសនេះ មិនថាជាជនជាតិខ្មែរ ឬបរទេសទេ។
គោលគំនិតសម្រាប់ការតាំងពិព័រណ៍នេះ "ស្ត្រីដោយស្ត្រី" បានកើតឡើងនៅឯពិធីអាពាហ៍ពិពាហ៍របស់ អឿ សុគន្ធាវី ជាវិចិត្រករស្ត្រីម្នាក់ក្នុងចំណោមវិចិត្រករស្ត្រីល្បីៗនៅក្នុងប្រទេសកម្ពុជា នៅពេលដែលវិចិត្រករ ឆាន់ ឌីណា បានពិភាក្សាជាមួយ ដារ៉េន ស្វលឡូ នៃវិចិត្រសាលឡូថឹសអំពីគំនិតរបស់នាងក្នុងការរៀបចំតាំងពិព័រណ៍ជាក្រុមជាមួយវិចិត្រករស្ត្រីពីរនាក់ដែលជាមិត្តនឹងគ្នា។
លោកស្រី បានមានប្រសាសន៍ថា"សង្ឃឹមថា ការតាំងពិព័រណ៍នេះនឹងជំរុញមនុស្សទូទៅនិងស្ត្រីច្រើនថែមទៀតឲ្យធ្វើជាវិចិត្រករ"។ លោក ស្វលឡូ ដែលបានរៀបការនឹងវិចិត្រករមកពីខេត្តបាត់ដំបង គឺ ខៅ ទូច បានយល់ស្របនឹងគំនិតនោះ។
លទ្ធផល គឺការប្រមូលផ្តុំរូបស្ត្រីដែលបង្កើតដោយលោកស្រី ឌីណា លោកស្រី អានណា សុត្រា និងលោកស្រី ប៊ឺណាដែត វ៉ាំងសង់ គឺរូបនីមួយៗមានស្ទីលខុសៗគ្នា ដែលធ្វើឲ្យកម្មវត្ថុនីមួយៗរស់រវើកដោយភាពមានតែមួយរបស់លោកស្រី។
លោកស្រី សុត្រា បានមានប្រសាសន៍ថា "ជាវិចិត្រករស្ត្រីបីនាក់ យើងចង់ចាប់យកកម្លាំង ភាពរឹងមាំ ភាពចេះគិតគូរ និងភាពកក់ក្តៅដែលស្ត្រីមានដូចគ្នា"។
នៅក្នុងគំនូររបស់លោកស្រី ឌីណា ដែលមានចំណងជើងថា "អ្នកនេសាទ" ទ្រង់ទ្រាយស្ត្រីម្នាក់លេចឡើងពីសាកលលោកអរូបីយ មុខរបស់នាងរំលេចនូវពណ៌ខៀវនិងខៀវខ្ចីទល់នឹងផ្ទៃខាងក្រោយពណ៌ខៀវភ្លឺ។ ស្នាមប្រឿងៗនៃពណ៌លឿងមាសនិងក្រហមជាំ បន្ថែមលើរូបថតដោយមិនប៉ុនប៉ងបន្ធូរបន្ថយទឹកមុខស្រងូតស្រងាត់របស់នាង។
សម្រាប់ការងារជាបន្តបន្ទាប់ វិចិត្រករខ្មែរ បានងាកទៅប្រើថ្នាំលាបអាគ្រីលិកវិញ ទោះបីជាអ្នកស្រីប្រើប្រេងនិងបច្ចេកទេសចម្រុះម្តងម្កាលក៏ដោយ។ អ្នកស្រីបានមានប្រសាសន៍ថា "សកម្មភាពនីមួយៗ គឺជាមធ្យោបាយផ្សេងៗគ្នា"។ អ្នកស្រី សុត្រា ក៏បានប្រើទាំងប្រេង ទាំងថ្នាំលាបអាគ្រីលិក ប៉ុន្តែប្រើក្រដាសខ្សាច់ សរសៃនិងក្រដាសកាតុង ដើម្បីបន្ថែមភាពរលើបរលោង។
សម្រាប់គំនូររបស់លោកស្រីដែលមានចំណងជើងថា"គំនិតរវើរវាយ" វិចិត្រករជនជាតិអាមេរិកាំង បានលាបស្រទាប់ថ្នាំលាបទៅលើស្រទាប់ដែលមិនទាន់ស្ងួតនៅឡើយ ដើម្បីបង្កើតឲ្យមានជម្រៅ។ លទ្ធផល គឺជាគំនូរស្រមោលនៃស្ត្រីម្នាក់ដែលកំពុងសញ្ជឹងគិត បង្ហាញឲ្យឃើញតាមស្បៃមុខពណ៌ត្នោត លឿងនិងខៀវចាស់។
វិចិត្រករជនជាតិបែលហ្សិក លោកស្រី ប៊ឺណាដែត វ៉ាំងសង់ រឹតតែធ្វើច្រើនជាងនេះ គឺធ្វើពិសោធ រួមផ្តុំរូបថត និងអ៊ីមែហ្ជិងកុំព្យូទ័រជាមួយគំនូរ។
លោកស្រីបានមានប្រសាសន៍ថា គំនូររបស់អ្នកស្រី "គឺគូរនៅលើផ្ទាំងក្រណាត់។ គំនូរពាក់ព័ន្ធនឹងចំណុចមួយ ប៉ុន្តែត្រូវបានថត ដាក់បញ្ចូលក្នុងកុំព្យូទ័រ លាយជាមួយអ្វីផ្សេងទៀត ហើយបន្ទាប់មកបោះពុម្ពនៅលើផ្ទាំងក្រណាត់"។
នៅក្នុងគំនូររបស់លោកស្រី វ៉ាំងសង់ ដែលមានចំណងជើងថា "បាត់បង់" ទឹកមុខស្រស់ថ្លានៃស្ត្រីវ័យក្មេងជនជាតិខ្មែរ ដោយមានបេះដូងពណ៌ក្រហមនៅលើថ្ពាល់របស់នាង បង្ហាញនៅលើក្តារចត្រង្គនៃឥដ្ឋក្រហម។ នៅក្នុងគំនូរដែលមានចំណងជើងថា "ភាពដូចគ្នា" មុខស្ត្រីម្នាក់ទៀត គឺពាក់កណ្តាលបាំងដោយស្រទាប់ស្រទន់នៃពណ៌ក្រហមស៊ីជម្ពូ។
លោកស្រី សុត្រា បានមានប្រសាសន៍ថា "អ្វីដែលភ្ជាប់ការតាំងពិព័រណ៍នេះ ក្រៅតែពីប្រធានបទស្ត្រី គឺជាធម្មជាតិពិសោធ និងពិតនៃការងាររបស់យើង។ ទោះបីជាយើងទាំងអស់គ្នាប្រើបច្ចេកទេសខុសគ្នាក៏ដោយ ក៏យើងទាំងអស់គ្នាជាវិចិត្រករដែលចូលចិត្តប្រថុយប្រថាន និងពិសោធការងាររបស់យើងដែរ។ ជាឧទាហរណ៍ លោកស្រី ប៊ឺណាដែត...លាយបញ្ចូលប្រព័ន្ធផ្សព្វផ្សាយប្រពៃណី និងឌីជីថលក្នុងវិធីថ្មីគួរឲ្យចាប់អារម្មណ៍ ហើយទទួលបានសេរីភាពដែលផ្តល់ឲ្យអ្នកស្រី។ លោកស្រី ឌីណាក៏ប្រើប្រព័ន្ធផ្សព្វផ្សាយមួយចំនួន ហើយបញ្ចេញយោបល់ដោយមិនខ្លាចក្រែងចំពោះអ្វីៗដែលអ្នកស្រី ចាប់កាន់នឹងដៃ ទោះបីជាប្រើដីលែង ឬក៏ប្រើចុងម្រាមដៃរបស់អ្នកស្រីក៏ដោយ។
លោកស្រី បានមានប្រសាសន៍ថា"ចំពោះខ្លួនខ្ញុំ ខ្ញុំចូលចិត្តពិសោធភាពរលើបរលោង និងជក់ដែលសម្តែងនូវមនោសញ្ចេតនា"។
ការតាំងពិព័រណ៍នៅឯវិចិត្រសាលឡូថឹស មានអាសយដ្ឋានផ្ទះលេខ៥៣ វិថី២.៥ក្បែរផ្សារណាត់បើកនៅម៉ោង៥:៣០ល្ងាចថ្ងៃសៅរ៍ ហើយនិងបើករហូតដល់ខែសីហា៕ រើន
ការដួលរលំ
អ្នកថតរូបជាសាក្សីចំពោះការចូលកាន់កាប់ក្រុងភ្នំពេញដោយខ្មែរក្រហម
មួយថ្ងៃមុននឹងជ័យជម្នះយោធាខ្មែរក្រហម ជារបបដែលធ្វើឲ្យមនុស្សមួយភាគបីនៃប្រជាពលរដ្ឋទូទាំងប្រទេសបានបាត់បង់ជីវិតក្នុងរយៈពេលមិនដល់៤ឆ្នាំផងនោះ ភាពស្ងប់ស្ងាត់បានកើតឡើងក្នុងកណ្តាលទីក្រុងភ្នំពេញ ក្នុងខណៈដែលមានការប្រយុទ្ធគ្នាចុងក្រោយនៅខាងក្រៅទីក្រុង។
លោក រូឡង់ដ៍ ណឺវឺ សរសេរនៅក្នុងសៀវភៅរូបថតរបស់លោកដែលមានចំណងជើងថា"ការដួលរលំនៃក្រុងភ្នំពេញ"ថា"ក្នុងរយៈពេលពីរបីម៉ោង មហាវិថីមុនីវង្ស ត្រូវកកស្ទះ ពីព្រោះមនុស្សម្នាសម្រុកចេញពីតំបន់សំណង់អនាធិបតេយ្យនៅផ្នែកភាគខាងជើងនៃទីក្រុង និងតំបន់ទួលគោក។ រូបថតរបស់លោក នឹងតាំងពិព័រណ៌នៅឯមេត្តាហាវដែលចាប់ផ្តើមនៅថ្ងៃអង្គារ។
លោក ណឺវឺ សរសេរថា ៉មិនមានការស្រែក ឬសញ្ញាភ័យស្លន់ស្លោទេ គឺគ្រាន់តែមានមនុស្សម្នាកកកុញធ្វើដំណើរតាមរុក្ខវិថីប៉ុណ្ណោះ"។
នេះជាថ្ងៃទី១៦ខែមេសា ឆ្នាំ១៩៧៥។ សង្គ្រាមស៊ីវិលបានឆាបឆេះអស់រយៈពេល៥ឆ្នាំមកហើយ ក្នុងពេលដែលកងទ័ពរដ្ឋាភិបាលសាធារណរដ្ឋខ្មែរ ដែលគាំទ្រដោយសហរដ្ឋអាមេរិក បានប្រយុទ្ធនឹងខ្មែរក្រហម ដែលគាំទ្រដោយប្រទេសចិន និងអំឡុងពេលប៉ុន្មានឆ្នាំដំបូង គាំទ្រដោយទ័ពកុម្មុយនីស្តវៀតណាមខាងជើង។
ទីក្រុងទាំងមូលបានស្ថិតក្រោមការឡោមព័ទ្ធរបស់កងកម្លាំងខ្មែរក្រហមដែលវាយរុលចូលមក ហើយមិនមានម្ហូបអាហារសម្រាប់ប្រជាពលរដ្ឋទាំងអស់ទេ ដែលមានចំនួនកើនឡើងស្ទើរតែដល់២លាននាក់ ដោយសារតែប្រជាពលរដ្ឋរត់ភៀសខ្លួនចូលមកទីក្រុង ដើម្បីគេចចេញពីតំបន់សង្គ្រាមនានា។ នៅក្នុងរូបថតលោក ណឺវឺ ដែលបានថតនៅពេលរសៀលថ្ងៃនោះ ប្រជាពលរដ្ឋបានប្រមូលផ្តុំគ្នានៅតាមវិថីធំៗ ដោយមិនអាចចេញទៅណារួច និងមិនបានដឹងថាតើមានអ្វីនឹងកើតឡើងបន្ទាប់មកទៀតទេ។
អ្នកថតរូបរូបនេះសរសេរថា"ពេលវេលាបានកន្លងផុតទៅ ដោយគ្មានសញ្ញាពិតប្រាកដថា ពេលណាខ្មែរក្រហម ដែលឥឡូវបានមានលេណដ្ឋានរឹងមាំនៅជាយក្រុងភ្នំពេញ នឹងរុលចូលកណ្តាលទីក្រុង ឬថាតើវានឹងកើតឡើងយ៉ាងដូចម៉្តេចនោះ"។
អ្នកថតរូបជនជាតិបារាំងរូបនេះគឺស្ថិតក្នុងចំណោមអ្នកកាសែតនិងអ្នកថតរូបដប់នាក់ជាង ដែលមិនព្រមទៅតាមការអញ្ជើញចុងក្រោយរបស់ស្ថានទូតសហរដ្ឋអាមេរិកក្នុងការចាកចេញពីប្រទេសបួនថ្ងៃមុននោះ ក្នុងពេលដែលសហរដ្ឋអាមេរិកបិទស្ថានទូតរបស់ខ្លួន ហើយបានដឹកជញ្ជូនជនជាតិអាមេរិកាំង និងខ្មែរចំនួនពីរបីរយនាក់ រួមទាំងជនបរទេសផ្សេងទៀតតាមឧទ្ធម្ភាគចក្រ។លោក ណឺវឺ បានមកប្រទេសខ្មែរលើកដំបូងក្នុងឆ្នាំ១៩៧៣ដើម្បីយកព័ត៌មានអំពីសង្គ្រាមស៊ីវិល។ វិលត្រឡប់ទៅប្រទេសវិញដើម្បីបំពេញកាតព្វកិច្ចយោធាបារាំង ជាអ្នកថតរូបទាហានឆត្រយោង លោកវិលត្រឡប់មកប្រទេសកម្ពុជាវិញនៅថ្ងៃទី១ខែមីនា ឆ្នាំ១៩៧៥ ដើម្បីយកព័ត៌មានពីអ្វីដែលបានក្លាយជាសប្តាហ៍ចុងក្រោយនៃសង្គ្រាមទៅវិញ។នៅដើមខែមេសា អ្នកថតរូបអាយុ២៤ឆ្នាំរូបនេះ មានរបបលុយកាក់ចាយវាយតែ២ដុល្លារប៉ុណ្ណោះក្នុងមួយថ្ងៃ។ ហ្វិលថតរូបរបស់លោក ក៏កាន់តែហោចទៅដោយមិនអាចរកបានហ្វិលបន្ថែមទៀតនៅក្នុងប្រទេសឡើយ។ ដោយព្រលានយន្តហោះពោធិចិនតុងត្រូវផ្លោងដាក់រាល់ថ្ងៃនោះ ភ្លាមនោះ លោកមិនអាចបញ្ជូនរូបថតរបស់លោកទៅកាន់ទីភ្នាក់ងាររូបថតហ្គាម្មានៅក្នុងប្រទេសបារាំងបានទេ ដែលលោកបានធ្វើជាអ្នកកាសែតសេរី។ ប៉ុន្តែអ្នកថតរូបរូបនេះ មិនមានបំណងចាកចេញទេ។
លោក ណឺវឺ បានមានប្រសាសន៍នៅក្នុងបទសម្ភាសថា"វាជាបញ្ហានៅទីនេះដើម្បីធ្វើជាសាក្សី គឺមានវត្តមាននៅចុងបញ្ចប់នៃជម្លោះនេះ"។
នៅរាត្រីថ្ងៃទី១៦ខែមេសា លោក ណឺវឺ និងអ្នកកាសែតពីរបីនាក់ផ្សេងទៀត បានសម្រេចចិត្តស្នាក់នៅឯស្ថានទូតបារាំងតាមមហាវិថីមុនីវង្ស។ នៅពេលនោះ បុគ្គលិកទាំងអស់របស់សណ្ឋាគារនៅក្នុងខណ្ឌទួលគោក បាននាំគ្នាចាកចេញអស់រលីង ហើយស្ថានទូត ទំនងជាជម្រើសមានសុវត្ថិភាព។
លោក ណឺវឺ សរសេរថា"បន្ទាប់ពីម៉ោង៤ភ្លឺបន្តិច ការប្រយុទ្ធគ្នាយ៉ាងខ្លាំង បានផ្ទុះឡើងនៅជុំវិញស្ថានីយអគ្គិសនីធំនៃទីក្រុង និងប៉មទូរគមនាគមន៍ ដែលនៅកៀកបង្កើយភាគពាយព្យនៃស្ថានទូតបារាំង។ ការប្រយុទ្ធគ្នាបានកើតឡើងរហូតដល់ថ្ងៃរះព្រាងៗ.... ពេលព្រឹកមានថ្ងៃរះចែស ប៉ុន្តែភាពស្ងាត់ជ្រងំបានគ្របដណ្តប់លើទីក្រុងនេះ"។
សម្រាប់ប្រជាពលរដ្ឋនៅក្នុងទីក្រុងភ្នំពេញ ថ្ងៃទី១៧ខែមេសា ឆ្នាំ១៩៧៥ គឺជាភាពច្របូកច្របល់និងភាពមិនប្រាកដប្រជា ដែលកើតរាលដាលក្នុងរយៈពេល៣ឆ្នាំ ៨ខែ ២០ថ្ងៃស្ថិតក្រោមរបបប៉ុល ពត។
ដូចបង្ហាញនៅក្នុងរូបថតរបស់លោក ណឺវឺ នោះ ទាហានខ្មែរក្រហមដំបូងគេ ដែលបានមកដល់មហាវិថីមុនីវង្សក្បែរស្ថានទូតបារាំង ពិតជាញញិមញញែម ក្នុងពេលដែលយុវជនចោមរោមពួកគេ ស្រែកអបអរសាទរ ហើយឲ្យបារីដល់ពួកគេ។ ទាហានរដ្ឋាភិបាលម្នាក់ បានឱបទាហានខ្មែរក្រហមម្នាក់។ ពួកគេមកពីភូមិជាមួយគ្នា ហើយទើបតែបានស្គាល់គ្នា។
ដើរសំដៅទៅទិសខាងត្បូងតាមមហាវិថី ដោយមិនបានដឹងថាតើទាហានខ្មែរក្រហមនឹងមានប្រតិកម្មចំពោះការថតរូបពួកគេយ៉ាងដូចម៉្តេចនោះ លោក ណឺវឺ បានថតរូបមនុស្សម្នាអបអរសាទរកងទ័ពដែលទទួលបានជ័យជម្នះ។ រំពេចនោះទាហានខ្មែរក្រហម ដែលបានចូលមកដល់ពីគ្រប់ទិសទី មិនមានទឹកមុខញញិមទេ។
លើកលែងតែកងពិសេសនៃទាហានរដ្ឋាភិបាលប៉ុណ្ណោះ ដែលបានបន្តប្រយុទ្ធគ្នានៅថ្ងៃនោះ ប៉ុន្តែទាហានរដ្ឋាភិបាលភាគច្រើន បានទម្លាក់អាវុធចុះចូលយ៉ាងស្ងៀមស្ងាត់ ហើយរង់ចាំបទបញ្ជាពីខ្មែរក្រហម។ លោក ណឺវឺ សរសេរថា ក្នុងពេលដែលគំនរអាវុធកាន់តែគរច្រើនឡើងនៅតាមមហាវិថីមុនីវង្សនោះ ទាហានដែលចុះចាញ់ ដើរជាក្បួនយ៉ាងស្ងៀមស្ងាត់ទៅកាន់ពហុកីឡដ្ឋានអូឡាំពិក ដែលពួកគេភាគច្រើនត្រូវបានសម្លាប់នៅទីនោះ។
នៅថ្ងៃនោះ មានភាពភាន់ច្រឡំមិនដឹងថា ទាហានដែលធ្វើដំណើរតាមរថយន្តផ្សេងៗគឺជាទាហានក្រុមណាពិតប្រាកដទេ។ លោក លន់ ណុន ជាប្អូនប្រុសលោក លន់ នល់ ប្រធានសាធារណរដ្ឋ រហូតដល់ថ្ងៃទី១ខែមេសា ឆ្នាំ១៩៧៥ បានបំពាក់អាវុធដល់កងពលធំផ្ទាល់របស់លោក ហើយមានបំណងឆ្លៀតកេងចំណេញពីការបរាជ័យរបស់រដ្ឋាភិបាល ដើម្បីដណ្តើមអំណាច។
គម្រោងការរបស់លោក ត្រូវទប់ស្កាត់បានភ្លាមៗ ហើយលោកគឺស្ថិតក្នុងពួកមន្ត្រីដំបូងគេដែលសម្លាប់ដោយខ្មែរក្រហម។ ប៉ុន្តែតែមួយរយៈពេលខ្លីប៉ុណ្ណោះនៅតាមមហាវិថីមុនីវង្ស ទាហានដែលស្រែកហ៊ោកញ្ជ្រៀវរបស់លោក លន់ ណុន បានដើរក្បួនក្នុងសម្លៀកបំពាក់ស្អាតៗ មានកាន់អាវុធគ្រប់ដៃ និងកាន់ទង់ជាតិដែលមានសញ្ញាខ្វែងចម្លែក។ នៅក្នុងសៀវភៅរបស់លោកនោះ លោក ណឺវឺហៅពួកគេថា ក្រុមចលនាជាតិ។
ប៉ុន្តែក្នុងពេលដែលទាហានខ្មែរក្រហមបន្តចូលពពាក់ពពូនមកក្នុងទីក្រុង ស្ថានការណ៍នៅតាមមហាវិថីនោះបានផ្លាស់ប្តូរ។ នៅត្រង់ចំណុចមួយ លោក ណឺវឺ បានដឹងខ្លួនថា លោកគឺជាជនបរទេសតែម្នាក់គត់ឈរនៅលើផ្លូវនោះ ហើយបានព្រួយបារម្ភថា គេនឹងរឹបអូសម៉ាស៊ីនថតរបស់លោក ហើយបន្ទាប់មកក៏បានសម្រេចចិត្តដើរត្រឡប់មកស្ថានទូតបារាំងវិញ។
អ្នកថតរូបរូបនេះ បានបន្តថតរូប ទោះបីជាលោកមានការត្បិតត្បៀតដោយមិនប្រើហ្វិលឲ្យអស់ទេ ដោយទុកហ្វិលខ្លះសម្រាប់ថតនៅឯសន្និសីទកាសែត ដែលអ្នកកាសែតរំពឹងថា រដ្ឋាភិបាលថ្មីនឹងប្រកាសខ្លួនថាជាមេដឹកនាំប្រទេស។ ប៉ុន្តែមិនមានការធ្វើសន្និសីទកាសែតទេ ហើយរយៈពេលជាងពីរឆ្នាំបានកន្លងផុតទៅ មុននឹងលោក ប៉ុល ពត បានប្រកាសនៅតាមវិទ្យុថា អង្គការជាពាក្យដែលប្រើដោយខ្មែរក្រហមដើម្បីរៀបរាប់ពីថ្នាក់ដឹកនាំរបបនោះ តាមពិតទៅគឺជាគណបក្សកុម្មុយនិស្តកម្ពុជា។
ពេលវិលត្រឡប់មកកាន់ស្ថានទូតបារាំងវិញនៅថ្ងៃទី១៧ ខែមេសា លោក ណឺវឺ បានដឹងថាគេបានប្រាប់ឲ្យប្រជាពលរដ្ឋចាកចេញពីទីក្រុងយ៉ាងប្រញាប់។ ពីខ្លោងទ្វារស្ថានទូត អ្នកថតរូបរូបនេះបានឈរមើលក្រុមមនុស្ស ដែលធ្វើដំណើរជាមួយអីវ៉ែអីវ៉ាន់របស់គេទៅទិសខាងជើង។
ជនបរទេសទាំងអស់ ត្រូវបាននាំមកស្ថានទូតបារាំង។ ស្ត្រីជនជាតិខ្មែរដែលមិនអាចបង្ហាញភ័ស្តុតាងថា ពួកគេបានរៀបការស្របច្បាប់ជាមួយជនបរទេស និងបុរសជនជាតិខ្មែរទាំងអស់ដែលបានចូលជ្រកកោនក្នុងស្ថានទូត ត្រូវបានបញ្ជាឲ្យចាកចេញពីបរិវេណស្ថានទូត។
ពួកគេបានស្នាក់នៅឯស្ថានទូតបារាំងជាច្រើនសប្តាហ៍ មុននឹងត្រូវបញ្ជូនតាមក្បួនរថយន្តពីរខ្សែទៅកាន់ប្រទេសថៃ។ លោក ណឺវឺ បានធ្វើដំណើរតាមក្បួនរថយន្តទីពីរ ដែលបានចេញដំណើរនៅក្នុងដើមខែឧសភា។ ក្នុងរយៈពេលធ្វើដំណើរបីថ្ងៃទៅកាន់ព្រំដែន លោក ណឺវឺ រំឭកថា"យើងមិនដែលបានជួបអ្នករស់នៅទីក្រុងទេ ដែលត្រូវគេបញ្ជូនទៅតាមភូមិថ្មីៗរបស់គេ។ អាជ្ញាធរថ្មី បានរៀបចំយ៉ាងផ្ចិតផ្ចង់ ដើម្បីកុំឲ្យយើងឃើញកម្ពុជាថ្មីរបស់ពួកគេ"។
ការយកព័ត៌មានអំពីកម្ពុជារបស់លោក ណឺវឺ មិនបានបញ្ចប់នៅត្រឹមនេះទេ។ ក្នុងខែសីហា ឆ្នាំ១៩៧៥ លោកបានជួបជនភៀសខ្លួនតាមបណ្តោយព្រំដែនថៃខ្មែរ ហើយបានដឹងអំពីភាពឃោរឃៅរបស់ខ្មែរក្រហមដែលបានកើតឡើងនៅក្នុងប្រទេសខ្មែរ។ លោក បានវិលត្រឡប់មកព្រំដែនវិញក្នុងឆ្នាំ១៩៧៧ និង១៩៧៨ ដើម្បីទទួលបានព័ត៌មានបន្ថែម ដោយព្យាយាមគេចចេញពីកងទាហានថៃ ពីព្រោះប្រទេសថៃ បានប្រកាសប្រើច្បាប់អាជ្ញាសឹកនៅក្នុងតំបន់នោះ។
មានមូលដ្ឋាននៅក្នុងក្រុងបាងកកពីឆ្នាំ១៩៧៩ដល់ឆ្នាំ១៩៨២ លោក ណឺវឺ យកព័ត៌មានតាមជំរំជនភៀសខ្លួនដែលបានបង្កើតឡើងតាមព្រំដែន ក្នុងពេលដែលប្រជាពលរដ្ឋខ្មែររាប់ពាន់នាក់បានភៀសខ្លួនចេញពីប្រទេស បន្ទាប់ពីការបរាជ័យរបស់ខ្មែរក្រហមក្នុងឆ្នាំ១៩៧៩។
លោក សរសេរថា"ខ្ញុំបានឃើញផ្ទាល់ភ្នែកនូវដំណាក់កាលដំបូងនៃអ្វីដែលបានក្លាយជាវិបត្តិជនភៀសខ្លួនដ៏ធំបំផុតមួយក្នុងទសវត្សរ៍ឆ្នាំ១៩៨០"។ យោងតាមរបាយការណ៍សហប្រជាជាតិឆ្នាំ១៩៩២ឲ្យដឹងថា មានប្រជាពលរដ្ឋខ្មែរប្រមាណ៦៨០,០០០នាក់បានរស់នៅក្នុងជំរំទាំង៨តាមបណ្តោយព្រំដែននៅខែធ្នូឆ្នាំ១៩៧៩។
ក្នុងខែមករា ឆ្នាំ១៩៨១ លោក ណឺវឺ ទទួលបានការអនុញ្ញាតធ្វើដំណើរមកក្រុងភ្នំពេញ។ លោកត្រូវបានគេនាំទៅមើលមន្ទីរទារុណកម្មទួលស្លែង និងវាលពិឃាតជើងឯក ដែលអាជ្ញាធរខ្មែរបានតម្រៀមលលាដ៍ក្បាលនៅលើដី ដើម្បីរាប់ចំនួនថាមនុស្សប៉ុន្មាននាក់ត្រូវគេសម្លាប់នៅទីនោះ។
លោក ណឺវឺ សរសេរថា"នៅពេលនោះហើយដែលភ្នែករបស់ខ្ញុំបានមើលឃើញនូវទំហំធំធេងនៃអ្វីដែលបានកើតឡើងពិតប្រាកដ"ក្នុងរបបខ្មែរក្រហម។ អស់រយៈពេលពីរទសវត្សរ៍ក្រោយមក លោក ណឺវឺ បានយកព័ត៌មានពីវិបត្តិផ្សេងៗទូទាំងពិភពលោក ពោលគឺជម្លោះនៅអាហ្វហ្គានីស្តាន ការឡោមព័ទ្ធនៃក្រុងបេរុត និងសង្គ្រាមនៅក្នុងប្រទេសលីបង់ រហូតដល់ការបះបោរតួរ៉េកក្នុងប្រទេសម៉ាលី និងវិបត្តិជនភៀសខ្លួនឃឺត បន្ទាប់ពីសង្គ្រាមឈូងសមុទ្រទី១។
បន្ទាប់មក លោកបានធ្វើការក្នុងហូល្លីវូត ជាអ្នកថតរូបហ្វិក រួមមានរឿងខ្សែភាពយន្ត អូលីវឺ ស្តូន"ផ្លាទូន"ដែលទាក់ទងនឹងសង្គ្រាមឥណ្ឌូចិនរវាងសហរដ្ឋអាមេរិក និងវៀតណាមខាងជើង។ឥឡូវនេះ លោក ណឺវឺ មានមូលដ្ឋានក្នុងក្រុងបាងកក ធ្វើគម្រោងពាណិជ្ជកម្ម ក៏ដូចជាការយកព័ត៌មាននៅក្នុងតំបន់ បន្ថែមលើការធ្វើការលើសៀវភៅផ្សេងៗតាមរយៈគ្រឹះស្ថានបោះពុម្ពរបស់លោក គឺ អាស៊ីហ័ររីហ្សុនប៊ុក។
លោកបានសម្រេចចិត្តបោះពុម្ពពង្រីកសៀវភៅឆ្នាំ២០០៩របស់លោក ដែលមានចំណងជើងថា"ការដួលរលំនៃក្រុងភ្នំពេញ" ជាភាសាបារាំង និងភាសាអង់គ្លេស រីឯភាសាខ្មែរនឹងត្រូវបោះពុម្ពផ្សាយ ពេលណាដែលលោករកបានជំនួយថវិកា ដើម្បីរំឭកខួបជ័យជម្នះខ្មែរក្រហមកាលពីបួនទសវត្សរ៍កន្លងមកនេះ។
លោក ណឺវឺ បានមានប្រសាសន៍ក្នុងកិច្ចសម្ភាសនៅខែនេះថា"ប្រវត្តិនេះ នឹងក្លាយជាហេតុការណ៍ប្រវត្តិសាស្ត្រ។ ក្នុងពេលមិនយូរមិនឆាប់ ក៏នឹងមានមនុស្សកាន់តែតិចទៅៗ ដែលនៅរស់ បានឆ្លងកាត់របបនោះ"។
ទោះជាយ៉ាងនេះក្តី លោក ណឺវឺ បានមានប្រសាសន៍ថា ក្រុងភ្នំពេញកំពុងតែមានការផ្លាស់ប្តូរយ៉ាងឆាប់រហ័ស។
លោក ណឺវឺ បានមានប្រសាសន៍ថា"មួយរយៈនេះ.... ក្រុងភ្នំពេញនៅតែស្ថិតនៅកៀកនឹងទីក្រុងកាលពីទសវត្សរ៍ឆ្នាំ១៩៧០នៅឡើយទេបើតាមភូមិសាស្ត្រ សោភ័ណភាព។ សព្វថ្ងៃ ជាប្រទេសមួយដែលកំពុងតែបើកទំព័រថ្មី"។៕រើន
កែវស្នេហា
រូបថតនៃការធ្វើដំណើររបស់តួសម្តែងជនជាតិបារាំងមកកាន់ឥណ្ឌូចិន បង្ហាញឲ្យឃើញកម្ពុជានាទសវត្សរ៍ឆ្នាំ១៩២០
ការតាំងពិព័រណ៍រូបថតដែលបើកនៅថ្ងៃអង្គារនៅឯសណ្ឋាគារសូហ៊្វីតែលក្នុងក្រុងភ្នំពេញផ្តល់នូវការយល់ធ្លុះជ្រៅទៅក្នុងប្រទេសកម្ពុជា ដែលអ្នកទេសចរបានឃើញនាចុងទសវត្សរ៍ឆ្នាំ១៩២០។
មើលតាមរូបថតខ្មៅសចំនួន៨៤សន្លឹកដែលបានថតនៅក្នុងឆ្នាំ១៩២៩នោះ ភ្នំពេញគឺជាទីក្រុងស្ងាត់ជ្រងំ មហាវិថីទូលំទូលាយគ្មានចរាចរណ៍ ចំណែកឯប្រាសាទភាគច្រើននៅឯអង្គរក្នុងខេត្តសៀមរាប មិនទាន់ត្រូវបានជួយសង្គ្រោះពីព្រៃព្រឹក្សានៅឡើយ។
អ្នកថតរូប គឺលោក ហ្សជ ប៉កតាល់ តួសម្តែងជនជាតិបារាំងដែលការស្រឡាញ់វិជ្ជាជីវៈថតរូប មានច្រើនជាងការកម្សាន្តទៅទៀត។ ការប្រមូលរូបថតដ៏ទូលំទូលាយរបស់លោក ទទួលមរតកពី ញាតិសាច់ឆ្ងាយ គឺលោក ព្យាហ្សង់ រៃ និងប្អូនប្រុសលោក គឺ អង់ដ្រេ ក្លូដ រៃ ដែលបានទិញវត្ថុទាំងអស់ពីប្រទេសបារាំងមកកាន់ប្រទេសកម្ពុជានៅខែនេះសម្រាប់ការតាំងពិព័រណ៍ "ហ្សជ ប៉កតាល់ វត្ថុអច្ឆរិយនាឆ្នាំ១៩២៩"។
លោក ព្យាហ្សង់ រៃ បានមានប្រសាសន៍ថា "រូបថត គឺជាការរំជួលចិត្តរបស់គាត់ ទោះបីជាការងាររបស់គាត់ គឺជាល្ខោនក៏ដោយ"។
ក្នុងឆ្នាំ១៩២៨ លោក ប៉កតាល់ ដែលធ្វើការជានាយកធំនិងតួសម្តែងនៅក្នុងប្រទេសបារាំង បានបង្កើតក្រុមហ៊ុនល្ខោនមួយ ដែលនិយាយពីតួសម្តែងល្បីៗជាច្រើននាពេលនោះ ដើម្បីធ្វើទស្សនាចរណ៍នៅឥណ្ឌូចិន ពោលគឺជាទឹកដីគ្រប់គ្រងដោយប្រទេសបារាំង ដែលឥឡូវនេះហៅថា កម្ពុជា ឡាវ និងវៀតណាម។ ដូច្នេះ បន្ទាប់ពីការធ្វើដំណើរតាមទូករយៈពេលមួយខែមក ទើបក្រុមហ៊ុនបានចូលចតក្នុងឥណ្ឌូចិនដោយដឹកមកជាមួយនូវគ្រឿងតែងឆាកនិងសម្លៀកបំពាក់ក្នុងខែធ្នូ ឆ្នាំ១៩២៨។
ទោះបីជាមានសេចក្តីពិស្តារតិចតួចទាក់ទងនឹងដំណើរទស្សនកិច្ចរបស់ពួកគេក៏ដោយ ក៏កាលបរិច្ឆេទនៅលើរូបថតលោក ប៉កតាល់ បង្ហាញថារូបគាត់ និងក្រុមហ៊ុនរបស់គាត់ បានស្ថិតនៅក្នុងប្រទេសកម្ពុជាក្នុងខែកុម្ភៈ និងខែមីនា ឆ្នាំ ១៩២៩ដែរ។
ដូចដែលរូបថតរបស់គាត់បង្ហាញនោះ ទីក្រុងភ្នំពេញក្នុងពេលនោះ គឺមិនមមាញឹកដូចសព្វថ្ងៃនេះទេ។ យោងតាមជំរឿនឆ្នាំ១៩២១ឲ្យដឹងថា ប្រជាជននៅពេលនោះមានត្រឹមតែ៧៥.០០០នាក់ប៉ុណ្ណោះនៅក្នុងប្រទេសដែលមានតែមនុស្ស២,៤លាននាក់។
ក្នុងរូបថតមួយរបស់លោក ប៉កតាល់ មហាវិថីដ៏ទូលាយដែលលាតសន្ធឹងពីវត្តភ្នំ គឺមានដើមឈើដុះជាជួរនិងស្ងាត់ជ្រងំ ដោយមានតែថ្មើរជើងម្តងម្កាល អ្នកជិះកង់ និងឆៃកែវធ្វើដំណើរកាត់ ពោលគឺស៊ីក្លូបានបង្ហាញខ្លួនក្នុងពាក់កណ្តាលទសវត្សរ៍ឆ្នាំ១៩៣០ប៉ុណ្ណោះ។ នៅក្នុងរូបថតមួយផ្សេងទៀត ចរាចរណ៍នៅតាមផ្លូវពីមុខព្រះបរមរាជវាំង មានតែកង់ប៉ុណ្ណោះ។
រូបថតអង្គររបស់លោក ប៉កតាល់បង្ហាញពីរបៀបការងារដែលត្រូវធ្វើចាប់តាំងពីពេលនោះមក មិនត្រឹមតែរក្សាប្រាសាទនិងចម្លាក់ពីរុក្ខជាតិប៉ុណ្ណោះទេ ប៉ុន្តែបង្ហាញអំពីប្រាសាទទាំងនោះផងដែរ។នៅឯទីលានជល់ដំរី ថ្មដែលទ្រក្បាលដំរី និងថ្មដែលបង្កើតប្រមោយរបស់វា ហាក់ដូចជាស្ថិតក្នុងគ្រោះថ្នាក់បាក់រលំក្នុងពេលខាងមុខនេះដូច្នោះដែរ។ ថ្មចាស់ៗនៃរចនាសម្ព័ន្ធខូចបែកបាក់ នៅរប៉ាត់រប៉ាយតាមថេវនៃប្រាសាទបាយ័ន ហើយរូបបដិមាមួយចំនួននៅពាសពេញដីក្នុងរុក្ខជាតិ ហាក់បីដូចជាកំពុងរង់ចាំការជួយសង្គ្រោះដូច្នេះដែរ។
ប៉កតាល់បានប្រើកាមេ៉រារីឆាត វីរ៉ាស្កូប ដែលជាកាមេ៉រាមានកែវពីរ ដែលអាចចាប់យករូបស៊្រីឌីនិងដំណើរការ ហៅថា ការថតរូបស្ទេរីអូ។ លោក ព្យាហ្សង់ រៃ ជាអ្នកថតរូបអាជីព និងអ្នកកាន់កាមេរ៉ា បានពន្យល់ថា ហ្វិលមិនទាន់ផ្តិតគឺជាបន្ទះកញ្ចក់តូចៗ។ លោកបានមានប្រសាសន៍ថា "វាជាដំណើការប្រើជាតិខាប់អន្ធិល... សារធាតុដែលត្រូវដាក់លើ គឺកញ្ចក់។ ហ្វិលផ្លាស្ទិក មិនទាន់បានបង្កើតនៅឡើយទេ"។
លោកបានមានប្រសាសន៍ថា ឧបករណ៍នេះ ជាម៉ាស៊ីនថតដែកធ្ងន់ ត្រូវបានបំពាក់ដោយថាសមួយ ដែលអាចផ្ទុកហ្វិលកញ្ចក់ដើមបានចំនួន១២បន្ទះ ហើយដូច្នេះអាចឲ្យអ្នកថតរូបថតបាន១២រូប មុននឹងដាក់បញ្ចូលហ្វិលកញ្ចក់ថ្មី។ ទាំងលោក ព្យាហ្សង់ រៃ ទាំងលោក អង់ដ្រេ ក្លូដរៃរំឭកដល់លោក ប៉កតាល់ ដែលពួកគេហៅថា "បងប្អូនលួត" ដែលផ្តិតហ្វិលដើមនៅឯគេហដ្ឋានក្រុមគ្រួសាររបស់គេនៅក្នុងប្រទេសបារាំងនាដើមទសវត្សរ៍ឆ្នាំ ១៩៥០។ នៅពេលនោះ តួសម្តែង គឺជានាយកក្រុមហ៊ុនល្ខោន រ៉ាឌីយូ អាល់ហ្សេ នៅក្នុងប្រទេសអាល់ហ្សេរី ហើយបានដើរលេងកម្សាន្តជាមួយក្រុមគ្រួសាររបស់គេ។
លោក អង់ដ្រេហ្សង់ រៃ ជាអ្នកឯកទេសខាងចិត្តវិភាគដែលចូលនិវត្តន៍ ហើយដែលកាលពីក្មេងជួយធ្វើការងារឲ្យបងប្អូនជីលួតជីលានៅក្នុងបន្ទប់លាងហ្វិល បានមានប្រសាសន៍ថា ល្បាយសូលូស្យុងដើម្បីផ្តិតបន្ទះទាំងនេះ គឺមិនទាន់រកបាននៅឡើយទេ។ លោកបាននិយាយថា លោក ប៉កតាល់ នឹងយកបណ្តុំសារធាតុគីមីផ្សេងៗ ហើយលាយបញ្ចូលគ្នាក្នុងធុងព័រស៊ីឡែន ដើម្បីផ្តិតហ្វិលកញ្ចក់ដើម ហើយបន្ទាប់មកកែរូប។ ដោយសារតែហ្វិលកញ្ចក់ដើម មិនប្រែប្រួលទៅតាមពន្លឺក្រហមក្រមៅ រូបលោកនិងលោក ប៉កតាល់ ធ្វើការក្រោមពន្លឺភ្លើងក្រហមក្រមៅ។ លោកបាននិយាយថា "វាអស្ចារ្យមែនទែន"។
កើតក្នុងឆ្នាំ១៨៨៧ លោកប៉កតាល់ បានទទួលអនិច្ចកម្មក្នុងឆ្នាំ១៩៥៨។ លោកបានបន្សល់ទុកឲ្យបងប្អូនប្រុសពីរនាក់នូវម៉ាស៊ីនថត សម្ភារទាំងអស់ និងហ្វិលកញ្ចក់ដើមនៃរូបថតប្រហែល៨០០០បន្ទះ ដែលបានថតក្នុងប្រទេសជាច្រើន។
ការតាំងពិព័រណ៍រូបថតនេះ ដែលនឹងតាំងរហូតដល់ខែកក្កដានៅឯសូហ៊្វីតែល ភ្នំពេញ ភូគិត្រា នឹងជាលើកទីមួយហើយ ដែលរូបថតលោក ប៉កតាល់ ត្រូវបានដាក់តាំងបង្ហាញឲ្យសាធារណជនមើល៕រើន
កេរដំណែលដែលបាត់បង់?
ចាងហ្វាងភាពយន្ត គ្រិសស្តូហ្វឺ រ៉ុមព្រេ ដែលបានចាប់ផ្តើមសម្ភាសស្ថាបត្យករដ៏ល្បីល្បាញបំផុតរបស់ប្រទេសកម្ពុជាកាលពីឆ្នាំមុន បាននិយាយថា អង្គុយក្នុងផ្ទះរបស់លោកនៅក្រុងភ្នំពេញជុំវិញដោយឯកសារស្នាដៃរបស់លោក លោក វណ្ណ មូលីវណ្ណ បានមានប្រសាសន៍មួយៗ ប៉ុន្តែដោយអារម្មណ៍ក្រៀមក្រំ។
ផលិតករ ហាគ បាលាន បានបន្ថែមថា "គាត់ជាមនុស្សដែលពិបាកយល់"។
លោក រ៉ុមព្រេ និង លោក បាលាន កំពុងថតរឿង "បុរសដែលកសាងកម្ពុជា" ជាខ្សែភាពយន្តដំបូងគេស្តីអំពីមនុស្សដ៏ល្បីល្បាញសម័យទំនើបវ័យចំណាស់ ដែលគ្រោងបញ្ចប់នៅខែឧសភា។
កើតនៅខេត្តកំពតក្នុងឆ្នាំ១៩២៦ លោក...
តម្លៃនៃការរស់នៅ
អ្នកថតរូប នីកូឡាស អាហ្សែលរ៉ដ ចងក្រងជាឯកសារនូវការវាយកម្ទេចចោលលំនៅដ្ឋាន និងការអភិវឌ្ឍរយៈពេល៧ឆ្នាំនៅក្នុងទីក្រុងដែលមានការផ្លាស់ប្តូរយ៉ាងឆាប់រហ័ស
ការដើរមើលទេសភាពនៅក្នុងបឹងកក់នៅពាក់កណ្តាលឆ្នាំ២០០៨ ដោយអ្នកថតរូបជនជាតិស្វីសអូស្ត្រាលី លោក នីកូឡាស អាហ្សែលរ៉ដ បានបង្កើតឲ្យមានគម្រោងរយៈពេល៧ឆ្នាំ ដែលកត់ត្រាការបណ្តេញប្រជាពលរដ្ឋចេញពីដីធ្លីដោយបង្ខិតបង្ខំនៅក្នុងទីក្រុងភ្នំពេញ ក៏ដូចជាស្ថានភាពទីក្រុងដែលកំពុងតែវិវត្តន៍។
ធ្វើដំណើរមកដល់ក្រុងភ្នំពេញពីទីក្រុងបាងកក ដើម្បីយកព័ត៌មានទាក់ទងនឹងការបោះឆ្នោតជាតិកាលពីខែកក្កដានៅឆ្នាំនោះ លោក អាហ្សែលរ៉ដ ក៏បានសម្រេចចិត្តរស់នៅកម្ពុជា និងក្រោយពីប្រជាពលរដ្ឋសហគមន៍ ដែលត្រូវបានបណ្តេញចេញពីដីធ្លីក្នុងចុងទសវត្សរ៍ឆ្នាំ២០០០ និងនៅដើមទសវត្សរ៍ឆ្នាំ២០១០ រួមមានបឹងកក់ ដីក្រហម បូរីកីឡា និងក្រុម៧៨។
អ្នកថតរូបមានវ័យ៣២ឆ្នាំរូបនេះ បាននិយាយថា "ខ្ញុំចំណាយពេលមួយសប្តាហ៍ធ្វើដំណើររាល់ព្រឹកនៅម៉ោង៦ព្រឹកទៅបូរីកីឡា ពីព្រោះមានពាក្យចចាមអារាមថា ពួកគេនឹងបណ្តេញប្រជាជនឲ្យចេញពីផ្ទះសំបែង"។
មានប្រជាពលរដ្ឋចំនួន៥០គ្រួសារ រស់នៅក្នុងលំនៅដ្ឋាននោះ ហើយមួយគ្រួសារៗ ក៏មានសមាជិកដែលផ្ទុកមេរោគអេដស៍ផងដែរ។ ទីបំផុត ពួកគេត្រូវអាជ្ញាធរដឹកតាមឡានឲ្យទៅរស់នៅចម្ងាយរាប់សិបគីឡូម៉ែត្រឆ្ងាយពីទីក្រុង ដែលជាហេតុធ្វើឲ្យពួកគេមិនអាចមានលទ្ធភាពរកស៊ីចិញ្ចឹមជីវិតដូចសព្វដងបានទេ ជាពិសេសនៅក្នុងក្រុងភ្នំពេញតែម្តង។
លោក អាហ្សែលរ៉ដ បាននិយាយថា "ការអភិវឌ្ឍនេះ....គឺជាការវិវត្តន៍ធម្មតារបស់ទីក្រុងមួយ"។
អ្នកថតរូបរូបនេះ បាននិយាយថា "បញ្ហាគឺត្រង់ថាអ្វីដែលគេបានធ្វើ....ប្រសិនបើពួកគេពិតជាធ្វើការបានល្អប្រសើរទាក់ទងនឹងការតាំងទីលំនៅជាថ្មីរបស់ប្រជាពលរដ្ឋទាំងនេះ វានឹងក្លាយជាការអភិវឌ្ឍមួយដ៏ធំធេងសម្រាប់ទីក្រុង ពីព្រោះវានឹងផ្តល់ឱកាសឲ្យប្រជាពលរដ្ឋដែលគ្មានឱកាសកាលពីមុនមកនោះ"។
លោក អាហ្សែលរ៉ដ ក៏បានចងក្រងជាឯកសារនូវការអភិវឌ្ឍនៅក្នុងទីតាំងដែលមានការបណ្តេញចេញ វប្បធម៌យុវវ័យខ្មែរ និងការកើនឡើងនៃប្រជាជនវណ្ណៈកណ្តាល។
រូបថតប្រហែល១៥០សន្លឹកនៃរូបថតរាប់ពាន់សន្លឹក ដែលអ្នកថតរូបនេះបានថតនៅក្នុងប្រទេសខ្មែរ នឹងចងក្រងទៅក្នុងសៀវភៅរបស់គាត់ និងសៀវភៅអេឡិកត្រូនិក ដែលមានចំណងជើងថា "ប្រទេសកម្ពុជាដែលកំពុងតែមានការវិវត្តន៍" ដែលនឹងចេញផ្សាយនៅក្នុងចុងខែមេសាខាងមុខនេះ៕រើន
អ្នកថតរូបដំបូងគេ
សៀវភៅថ្មីបង្ហាញរូបថតដំបូងៗនៃប្រាសាទអង្គរ
នៅពេលដែលការនិពន្ធរបស់លោក ហិនរី មូហត់ ស្តីពីអង្គរ បានចេញផ្សាយនៅក្នុងឆ្នាំ១៨៦៣និងឆ្នាំ១៨៦៤ ដែលធ្វើឲ្យទ្វីបអឺរ៉ុបមានការចាប់អារម្មណ៍ដល់ប្រទេសកម្ពុជាជារហូតនោះ អ្នកថតរូបជនជាតិស្កុតឈ្មោះ ចន ថមសុន កើតមានគំនិតថតរូបប្រាសាទដែលគូសព្រាងដោយអ្នកធម្មជាតិនិយមនិងជាអ្នកស្រាវជ្រាវជនជាតិបារាំង។
ការនិយាយស្រួលជាងការធ្វើកាលពី១៥០ឆ្នាំមុន គឺមិនមែនមានន័យថាត្រឹមតែត្រូវរៀបចំធ្វើដំណើរទៅកាន់ទីតាំងជ្រៅក្នុងព្រៃស្បាតប៉ុណ្ណោះទេ តែថែមទាំងត្រូវដឹកជញ្ជូនឧបករណ៍ថតរូបសម័យនោះ ដែលត្រូវការអ្នកដឹកជញ្ជូនដល់ទៅ១០នាក់ទៀតផង។
ការធ្វើដំណើរ កាលពីឆ្នាំ១៨៦៦នោះ លោក ថមសុន បានចំណាយពេលបីខែ ដែលនៅពេលនោះលោកស្ទើរតែស្លាប់ដោយសារជំងឺគ្រុនចាញ់ទៅហើយ។ ប៉ុន្តែនៅឆ្នាំបន្ទាប់មកមានការបោះពុម្ពផ្សាយសៀវភៅរបស់លោកមានចំណងជើងថា "វត្ថុបុរាណកម្ពុជា" ដែលបង្ហាញឲ្យឃើញរូបថតប្រាសាទអង្គរចំនួន១៦សន្លឹកដំបូងដែលមិនធ្លាប់មានពីមុនមក។
ទោះជាយ៉ាងនេះក្តី ដោយសារដំណើរការត្រូវចំណាយលុយកាក់ច្រើននិងរយៈពេលយូរទាក់ទិននឹងការបោះផ្សាយរូបថតក្នុងសៀវភៅមួយក្បាលនៅពេលនោះ អត្ថបទត្រូវបានបោះពុម្ពមុន ហើយរូបថតដាក់ចូលម្តងមួយៗលើចន្លោះទំព័រទំនេរនោះ...
សងសឹក
និពន្ធដោយ អាឡិន ឡៃថ៍មិន ប្រែជាខេមរភាសាដោយ លឹម ហ៊ាង ហេង
រីណា ចាប់ផ្តើមទម្លាក់សាច់ជ្រូកពីរខាំកន្លះ និងអំពិល ប្រាំមួយប្រាំពីរគួទៅក្នុងកន្ត្រកម្ហូបចិត្តមួយគិតថា ប្រហែលជាត្រូវមាត់ប្តី ដែលតែងតែស្តីបន្ទោស ពេលនាងចាយវាយ ប្រាក់កាសទិញម្ហូបច្រើនពេក។ ក្នុងពេលដដែលនោះនាង គ្រលៀសភ្នែកឃើញ បុរសម្នាក់ជាឃាតករសម្លាប់ឳពុកនាង។
ដំបូងនាងស្រពេចស្រពិល មិនដឹងថាមែន ឬក៏អត់។ រីណា ខានជួបបុរសម្នាក់នោះ ធុំជាង សាមសិបបីឆ្នាំមកហើយ គឺតាំងតែពីនាង មានអាយុ ដប់ពីរឆ្នាំ មកម៉្លេះ។ ឥឡូវរូបរាងទ្រង់ទ្រាយ ឃាតករ ម្នាក់នោះ ផ្លាស់ប្តូរច្រើនណាស់ តាំងពីខ្នង ក៏កោង សក់ក៏ស្កូវព្រោង រាងកាយក៏ស្គមស្គាំងស្បែក ដណ្តប់ឆ្អឹង ស្ទើរខ្យល់បក់ដួល ទៅណាមកណា ទាល់ តែពឹងឈើច្រត់។
យ៉ាងណាមិញ រីណា ក៏ចាំមិនភ្លេចនូវទម្រង់បបូរមាត់ពេប និងថ្ពាល់ផត ព្រមទាំងប្រជ្រុយដែលដៅលើភ្នែកខាងឆ្វេងរបស់តាចាស់ម្នាក់នេះ។ នាងខិតកាន់តែជិត ដើម្បីសង្កេតតាចាស់នោះ នៅចម្ងាយបីតូប រីណា ក៏កាន់តែប្រាកដក្នុងចិត្តថា នាងមិនច្រឡំឡើយ គឺពិតជាគាត់មែន។ កន្លងមករាប់ឆ្នាំរាល់ពេលនាងរំឭកពីឃាតករនោះកាលណា នាងតែងស្រមៃថា តើនឹងត្រូវធ្វើយ៉ាងណា ដើម្បីសងសឹក ពេលជួបបុរសម្នាក់នេះម្តងទៀត។ នាងធ្លាប់តែបួងសួងសូមឲ្យរឿងអពមង្គល ឬទុក្ខមហន្តរាយបានដល់ឃាតករម្នាក់នោះ ហើយធ្វើឲ្យ គេបែកបាក់និរាសគ្រួសារ ដូចដែលនាងត្រូវ ព្រាត់ប្រាសពីឳពុកអ៊ីចឹងដែរ ឬបើមិនដូច្នោះទេ នាងបួងសួងសូមឲ្យឃាតករនោះ គ្រាំគ្រាដោយសារជំងឺមហារីក ទទួលការឈឺចុកចាប់បន្តិចម្តងៗ ដេករង់ចាំតែថ្ងៃស្លាប់។
ល្ងាចដដែលនោះ បន្ទាប់ពីប្តី នាងបរិភោគបាយទឹករួច រីណា ក៏តាំងផ្តើម ពោលទៅប្តី “ឪវា! ព្រឹកមិញ នៅឯផ្សារ ខ្ញុំគិតថា ខ្ញុំបានឃើញ ទូច ផេង។” ក្លិនសាច់ជ្រូក សាយភាយពេញផ្ទះ ព្រោះភ្លៀង ផ្អាប់ក្លិនទាំងអស់នោះ ទៅណាមិនឆ្ងាយ នាំឲ្យធុំក្លិនផ្អុះ ត្បិតអ្វីៗសើមមិនងាយស្ងួតឡើយ ក្នុងវស្សានរដូវ។ “នរណាគេ?” ពេជ្រ សួរ ទាំងដែលខ្លួនឯងកំពុងជូតមាត់។ “ទូច ផេង ហ្នឹង?” “មេជំរំនៅជំរំសុភមង្គលហ្នឹងមែន?” រីណា សម្លឹងមើលមុខពេជ្រ...
ប្រាសាទតូចច្រឡឹងបង្អួតសម្រស់កណ្តាលទ្រូងព្រៃដែលរងការវិនាស
នៅក្នុងចំណោមសម្រស់ធម្មជាតិដ៏ស្រស់ត្រកាលទាំងអស់ក្នុងខេត្តរតនគិរី មានកន្លែងមួយដែលមានលក្ខណៈដ៏ពិសេស។ វាពុំមែនជាបឹង ទឹកជ្រោះ ឬទឹកជួរធម្មជាតិ ដែលហូរក្រោមម្លប់ឈើដ៏ត្រឈឹងត្រឈៃនោះទេ។ វាត្រូវបានបង្កើតឡើងដោយស្នាដៃមនុស្សតាំងពីយូរលង់ណាស់មកហើយ ក៏ប៉ុន្តែត្រូវបានបិទបាំងដោយព្រៃឈើដ៏សែនក្រាស់ពីក្រសែភ្នែករបស់មនុស្សទាំងឡាយ នោះគឺជាប្រាសាទតាណាង។
ស្ថិតនៅដាច់ស្រយាល ពិបាកធ្វើដំណើរទៅដល់ និងត្រូវបានគេបំភ្លេចចោលរាប់រយឆ្នាំមកហើយផងនោះ ប្រាសាទតាណាង (Ta Nang) នេះហាក់ដូចជាមានលក្ខណៈខុសប្លែកពីបណ្តាប្រាសាទផ្សេងៗទៀត ដែលអ្នកធ្លាប់បានឃើញនៅក្នុងប្រទេសកម្ពុជា។
អ្នកភូមិចារ៉ាយ ដែលរស់នៅក្នុងតំបន់នេះ បាននិយាយថា ប្រាសាទនេះគឺត្រូវបានកសាងឡើងដោយជនជាតិចាម ដែលជាប់សែស្រឡាយខ្លួន និងដែលកាលពីយូរលង់ណាស់មកហើយបានយកផ្លូវនៅតំបន់នេះធ្វើជាផ្លូវធ្វើដំណើរនៅពេលមកច្បាំងជាមួយនឹងខ្មែរអង្គរសម័យបុរាណ។ សង់ឡើងពីឥដ្ឋតភ្ជាប់គ្នាដ៏ល្អឥតខ្ចោះដែលមើលទៅគឺហាក់ដូចជាស្អិតជាប់គ្នាពីមួយទៅមួយនោះ ប្រាសាទតាណាងពណ៌ក្រហមដ៏តូចច្រឡឹងនេះ គឺត្រូវបានកសាងឡើងនៅជាប់មាត់ទន្លេដ៏ស្រស់ស្អាត...