លោកសុខ ឥសានអ្នកនាំពាក្យគណបក្សប្រជាជនកម្ពុជាបានសរសេរសារក្នុងបណ្តាញទំនាក់ទំនងតេឡេក្រាមថា តាមពិត នៅពីក្រោយឆាក លោកសម រង្ស៊ី បានលួចផ្ញើសារតាមបណ្តាញទំនាក់ទំនងTwitterទៅកាន់លោកហ៊ុន សែន ដើម្បីសុំចរចាក្នុងនាមជាអ្នកតំណាងឲ្យថ្នាក់ដឹកនាំ១១៨ រូបនៃអតីតគណបក្សសង្គ្រោះជាតិ ដែលត្រូវបានដកសិទ្ធិនយោបាយ។
លោកសុខ ឥសានបានសរសេរទៅកាន់អ្នកកាសែត នៅរសៀលថ្ងៃទី១៩ ខែធ្នូនេះថា៖ទណ្ឌិតនេះលួចវាយ Messageមកផ្ទាល់តែម្តង។
ប៉ុន្តែលោកសម រង្ស៊ីតែងប្រកាសម្តងហើយម្តងទៀតថា លោកនិងមន្រ្តីគណបក្សសង្គ្រោះជាតិជាច្រើនរូបទៀតនឹងមិនចរចាជាមួយលោកហ៊ុន សែន ជាដាច់ខាត។ លោកអះអាងថា មានតែសហគមន៍អន្តរជាតិទេដែលមានឥទ្ធិពលលើរដ្ឋាភិបាលកម្ពុជា នឹងអាចធ្វើឲ្យរដ្ឋាភិបាលកម្ពុជាកែប្រែស្ថានការណ៍នយោបាយ។
កាសែត The Cambodia Dailyបានព្យាយាមទាក់ទងលោកសមរង្ស៊ី ដើម្បីសុំប្រតិកម្មលើបញ្ហានេះដែរ តែលោកមិនលើកទូរស័ព្ទ។ ប៉ុន្តែប្រភពដ៏គួរឲ្យជឿទុកចិត្តបានអះអាងថា លោកសមរង្ស៊ីមិនបានធ្វើដូច្នេះទេ ហើយថា លោកសមរង្ស៊ីមិនត្រូវការចរចានោះឡើយ ហើយថា បើចង់ចរចាត្រូវចរចាជាមួយអន្តរជាតិ។
លោកសម រង្ស៊ីនៅតែទាមទារឲ្យរដ្ឋាភិបាលលោកហ៊ុន សែន ដោះលែងលោកកឹម សុខា ទម្លាក់បទចោលរាល់ការចោទប្រកាន់លើមន្រ្តីគណបក្សប្រឆាំងអនុញ្ញាតឲ្យមន្រ្តីបក្សសង្គ្រោះជាតិទាំងអស់មានសិទ្ធិធ្វើនយោបាយឡើងវិញ ប្រគល់តំណែងជូនសមាជិកក្រុមប្រឹក្សាឃុំ-សង្កាត់របស់គណបក្សនេះវិញ និងរៀបចំការបោះឆ្នោតសាជាថ្មី៕