ក្រុមអង្គការការពារសិទ្ធិការងារនៅកម្ពុជាសម្តែងការភា្ញក់ផ្អើលចំពោះសេចក្តីព្រាងច្បាប់នៃព្រឹទ្ធសភារបស់សហរដ្ឋអាមេរិក ដែលកាន់តែធ្វើឲ្យសេដ្ឋកិច្ចរបស់កម្ពុជាជួបគ្រោះមហន្តរាយ ប្រសិនបើរបបលោកហ៊ុន សែនមិនព្រមស្តារប្រជាធិបតេយ្យឡើងវិញនោះ។
នាយកអង្គការសម្ព័ន្ធភាពការងារ និងសិទ្ធិមនុស្ស លោកមឿន តុលាបានប្រាប់សារព័ត៌មានThe Cambodia Dailyថា កម្ពុជានឹងរងផលប៉ះពាល់ជាទម្ងន់ ប្រសិនបើសហគមន៍អ៊ឺរ៉ុបដកប្រព័ន្ធអនុគ្រោះពន្ធ EBAចេញពីកម្ពុជា ហើយសហរដ្ឋអាមេរិកដកប្រព័ន្ធអនុគ្រោះពន្ធទូទៅGSPពីកម្ពុជាដែរនោះ។
លោកបន្តថា កម្ពុជានឹងអាចបាត់បង់ចំណូលរបស់ខ្លួនចំនួនជិត១ពាន់លានដុល្លារសហរដ្ឋអាមេរិកក្នុងមួយឆ្នាំ។ នាយកអង្គការសម្ព័ន្ធភាពការងារ និងសិទ្ធិមនុស្សរូបនេះ អះអាងថា វិស័យដែលកម្ពុជា អាចប៉ះទង្គិចធ្ងន់ជាងគេពីការដកប្រព័ន្ធអនុគ្រោះពន្ធនេះ គឺវិស័យកាត់ដេរនិងកម្មករតែម្តង។ លោកបន្តថា បណ្តាប្រទេសលោកសេរី នឹងនាំគ្នាដាក់សម្ពាធដល់កម្ពុជាដើម្បីកាត់បន្ថយអំណាចរបស់ចិននៅអាស៊ី។
ការអះអាងរបស់លោកមឿន តុលាធ្វើឡើងបន្ទាប់ពីសមាជិកព្រឹទ្ធសភាសហរដ្ឋអាមេរិកពីររូប រួមមានលោកTed Cruz និងលោកChris Coonsបានធ្វើសេចក្តីព្រាងច្បាប់ថ្មីមួយ ដែលមានឈ្មោះថា«ច្បាប់ពាណិជ្ជកម្មកម្ពុជាឆ្នាំ២០១៩» ដើម្បីឲ្យរដ្ឋាភិបាលលោកDonald Trumpដាក់ទណ្ឌកម្មដកប្រព័ន្ធអនុគ្រោះពន្ធទូទៅ ឬ GSPពីកម្ពុជា។
លោកTed Cruzដែលជាសមាជិកព្រឹទ្ធសភាសហព័ន្ធរបស់សហរដ្ឋអាមេរិកពីរដ្ឋTexasបានបញ្ជាក់នៅក្នុងសេចក្តីថ្លែងការណ៍របស់លោកកាលពីថ្ងៃពុធថា លោកហ៊ុន សែនបាននាំគ្នាកេងប្រវ័ញ្ចប្រព័ន្ធអនុគ្រោះពន្ធសហរដ្ឋអាមេរិក និងសហគមន៍អ៊ឺរ៉ុបបានផ្តល់ឲ្យដល់កម្ពុជា។ លោកបន្តថា របបលោកហ៊ុន សែន មិនបានគោរពស្តង់ការងារ មើលងាយដល់សុច្ចរិតភាពនៃការបោះឆ្នោតនៅកម្ពុជា និងកំពុងបោះពួយទៅរកប្រទេសចិនថែមទៀត។
សារព័ត៌មាន The Cambodia Dailyបានព្យាយាមសុំប្រតិកម្មពីលោកផៃ ស៊ីផាន អ្នកនាំពាក្យរដ្ឋាភិបាលដែរ តែលោកមិនលើកទូរស័ព្ទ។ សម្ពាធនយោបាយរបស់សហគមន៍អឺរ៉ុប និងសហរដ្ឋអាមេរិកកំពុងធ្វើឡើងជាបន្តបន្ទាប់ ក្រោយពីរបបក្រុងភ្នំពេញចាប់ឃុំខ្លួនលោកកឹម សុខា ប្រធានគណបក្សសង្គ្រោះជាតិ រំលាយគណបក្សសង្គ្រោះជាតិ និងរៀបចំការបោះឆ្នោតក្លែងក្លាយដ៏អាម៉ាស់កាលពីខែកក្កដាឆ្នាំ២០១៨កន្លងទៅ៕