បុគ្គលិកទូរទស្សន៍ CNCបានទម្លាយសារសំឡេងរបស់លោក ហ៊ុយវណ្ណៈ ទីប្រឹក្សាក្រុមហ៊ុនបណ្ដាញផ្សព្វផ្សាយកម្ពុជា(Cambodia Broadcasting Service) (CBS) រួមមានទូរទស្សន៍ CNC, CTN, My TVនិងOne TVនិងជាអតីតអ្នកយកព័ត៌មានឲ្យវិទ្យុអាស៊ីសេរី បានប្រើសម្តីគំរាមវាយបំបែកក្បាល និងចាប់ខ្លួនបុគ្គលិករូបណាដែលមិនគាំទ្រលោកនិងចោទលោកថា ជាអ្នកលួចលុយក្រុមហ៊ុនទូរទស្សន៍ CNCរបស់លោកឧកញ៉ា គិត ម៉េង។
បច្ចុប្បន្ននេះ លោកហ៊ុយ វណ្ណៈ ក៏មានតួនាទីជារដ្ឋលេខាធិការក្រសួង មហាផ្ទៃ និងជាប្រធានសហភាពសហព័ន្ធអ្នកសារព័ត៌មានកម្ពុជាផងដែរ។
ក្នុងសារសំឡេងដែលសារព័ត៌មានThe Cambodia Dailyទទួលបាននោះគឺលោកហ៊ុយ វណ្ណៈបាននិយាយថា បុគ្គលិកទូរទស្សន៍CNCដែលគាំទ្រលោកគឺត្រូវខិតខំធ្វើការបន្តទៀត ហើយចំពោះបុគ្គលិកណា ដែលវាយប្រហារលោករឿងលួចលុយក្រុមហ៊ុននោះ គឺលោកនឹងចាត់វិធានការក្តៅ ដោយមិនអត់ឱនឲ្យនោះទេ។
លោកបន្តថា អ្នកដែលហ៊ានវាយប្រហារលោក ប្រហែលមិនទាន់ស្គាល់លោកច្បាស់នោះទេ ហើយប្រហែលជាមិនទាន់ដឹងថាឈើចាក់ធ្មេញក៏អាចចាក់ភ្នែកឲ្យខ្វាក់ដែរ។
សារសំឡេងនោះនិយាយទៀតថា ទោះបីជាលោកកិបកេង ឬយកលុយក្រុមហ៊ុនមែន ប៉ុន្តែវាមិនមែនជាលុយម៉ែឪអ្នកនិយាយចោទលោកដែរ។
សារសំឡេងរបស់លោកហ៊ុយ វណ្ណៈនេះលេចធ្លាយបន្ទាប់ពីទូរទស្សន៍CNCកើតមានជម្លោះផ្ទៃក្នុងរហូតមា នការលូកដៃពីលោកហ៊ុន សែន ទៀតផង។
បុគ្គលិកទូរទស្សន៍CNCឲ្យដឹងទៀតថា ជម្លោះផ្ទៃក្នុងរបស់ទូរទស្សន៍CNCដោយសារលោកឧកញ៉ាគិត ម៉េង ចង់តែងតាំងអគ្គនាយកទូរទស្សន៍ថ្មីឈ្មោះអ៊ុក វរ៉ាដើម្បីធ្វើកំណែទម្រង់ក្រុមហ៊ុនឡើងវិញ បន្ទាប់ពីក្រុមហ៊ុនខាត់បង់ និងបាត់លុយជាច្រើន ប៉ុន្តែលោកហ៊ុយ វណ្ណៈមិនព្រម ពីព្រោះលោកហ៊ុយ វណ្ណៈចង់ប្រើប្រាស់ឥទ្ធិពលរបស់លោកនៅក្នុងទូរទស្សន៍CNCបន្តទៀត និងបន្តកិបកេងលុយក្រុមហ៊ុននេះថែមទៀត។
ដូច្នេះហើយបានជាលោកហ៊ុយ វណ្ណៈ រាយការណ៍ឲ្យលោកហ៊ុន សែន ជួយអន្តរាគមន៍ទៅលោកគិត ម៉េងឲ្យបណ្តេញលោកអ៊ុក វរ៉ា ចេញពីក្រុមហ៊ុនតែម្តង។ ទីបំផុតលោកគិត ម៉េងសម្រេចបណ្តេញលោកអ៊ុក វរ៉ាតាមបញ្ជារបស់លោកហ៊ុន សែន ដោយសារតែលោកហ៊ុន សែនគំរាមថា បើមិនធ្វើតាមបញ្ជារបស់លោកទេ រាល់មុខជំនួញរបស់ លោកគិត ម៉េងនឹងមានបញ្ហាហើយថា សូម្បីតែឪម៉ែស្តេចក៏មិនអាចជួយបានដែរ។
ប្រភពដដែលបន្តទៀតថា លោកគិត ម៉េងបានតែងតាំងលោកមុន រ៉ាម៉ាឌី ដែលមានតួនាទីជាអនុរដ្ឋលេខាធិការក្រសួងព័ត៌មានឲ្យធ្វើ ជាអគ្គនាយកទូរទស្សន៍ថ្មីជំនួសលោកអ៊ុក វរ៉ា ហើយលោក មុន រ៉ាម៉ាឌី គឺជាដៃជើងនិងជាមនុស្សស្និតស្នាលបំផុតរបស់លោកហ៊ុយ វណ្ណះ។ ក្រោយបែកធ្លាយសារគំរាមវាយបំបែកក្បាល និងធ្វើទុក្ខបុកម្នេញបុគ្គលិកក្រោមបង្គាប់នោះ លោកហ៊ុយ វណ្ណៈ និងលោកមុន រ៉ាម៉ាឌី បានឃុបឃិតគ្នាបណ្តេញបុគ្គលិកចាស់វស្សា ចំនួនពីរនាក់ចេញពីការងារគឺលោកអ៊ុំ សារិន និងលោកគុន ចាន់រដ្ឋា។
កាលពីខែមិថុនា ឆ្នាំ២០១៤ លោក ហ៊ុយ វណ្ណៈ ជាអតីតអគ្គនាយករងស្ថានីយទូរទស្សន៍ CNC ធ្លាប់ដកកាំភ្លើងខ្លីអារមេបម្រុងបាញ់លោករស់ ឌីណាដែលជាប្រធានផ្នែកផែនការ និងចាត់តាំងព័ត៌មានរបស់ទូរទស្សន៍CTNនិងMyTV។
លោករស់ ឌីណាក៏បានដាក់ពាក្យប្តឹង ទៅតុលាការពីបទ «បរិហារកេរ្តិ៍ ជេរប្រមាថ និងប៉ុនប៉ងមនុស្សឃាតដោយចេតនា»នៅក្នុងអគារស្ថានីយទូរទស្សន៍ CNCនៅផ្លូវជាតិលេខ៥ ក្នុង ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវដែរ ប៉ុន្តែសំណុំរឿងនេះ បានបញ្ចប់ទៅវិញ ដោយមានការសម្របសម្រួលពីលោកឧកញ៉ា គិត ម៉េង៕