រដ្ឋាភិបាលក្រុងភ្នំពេញបានប្រកាសគាំទ្រគោលនយោបាយចិនតែមួយ ដោយមិនព្រមទទួលស្គាល់ឯករាជ្យភាពរបស់ទឹកដីកោះតៃវ៉ាន់ជាដាច់ខាត។
សេចក្ដីថ្លែងការណ៍រួមគ្នារវាងកម្ពុជា-ចិន នៅរសៀលថ្ងៃនេះ រដ្ឋាភិបាលកម្ពុជាប្រកាសប្រឆាំងគ្រប់ទម្រង់ចំពោះការប្រកាសឯករាជ្យភាពរបស់កោះតៃវ៉ាន់។ មិនតែប៉ុណ្ណោះ របបក្រុងភ្នំពេញអះអាងថា តៃវ៉ាន់គ្រាន់តែជាផ្នែកមួយ របស់របបកុម្មុនីស្តចិនតែប៉ុណ្ណោះ។
ការបញ្ជាក់ជំហតម៉ឹងមាត់ជាថ្មីទៀតរបស់មេដឹកនាំកម្ពុជាពេលនេះ ធ្វើឡើងក្រោយពេលរបបក្រុងប៉េកាំងបានអួតសរសើរការដឹកនាំរបស់លោកហ៊ុន សែន ម្តងហើយម្តងទៀត និងប្តេជ្ញារឹតចំណងសាមគ្គីភាពប្រទេសទាំងពីរឱ្យខ្លាំងក្លាទ្វេរដង ហើយចិននៅតែជាបង្អែករបស់កម្ពុជាគ្រប់កាលៈទេសៈ បើទោះបីជាសហគមន៍អន្តរជាតិប្រកាសមិនគាំទ្ររបបលោកហ៊ុន សែន និងកំពុងដំណើរការដាក់ទណ្ឌកម្មសេដ្ឋកិច្ចយ៉ាងណាក៏ដោយ។
លើសពីនេះ ការប្រកាសជំហររបស់មេដឹកនាំកម្ពុជាមិនទទួលស្គាល់ ឯករាជ្យភាពរបស់កោះតៃវ៉ាន់នេះ ធ្វើឡើងក្រោយពេលមេដឹកនាំចិនបានប្រកាសផ្តល់ជំនួយជិត៦រយលានដុល្លារសហរដ្ឋអាមេរិកដល់កម្ពុជាសម្រាប់គម្រោងអភិវឌ្ឍន៍នានាក្នុងរយៈពេល៣ឆ្នាំ និងការប្រកាសទិញអង្ករពីកម្ពុជាចំនួន៤០ម៉ឺនតោននៅឆ្នាំនេះ ព្រមទាំងប្តេជ្ញាបង្កើនទំហំវិនិយោគរបស់ចិននៅកម្ពុជាជាដើម។
យ៉ាងណាក៏ដោយ ក្រុមអ្នកឃ្លាំមើលបញ្ហានយោបាយនៅកម្ពុជា មើលឃើញថា ចិននៅតែប្រើប្រាស់កម្ពុជាដើម្បីប្រយោជន៍ភូមិសាស្ត្រនយោបាយ និងសេដ្ឋកិច្ចរបស់ខ្លួនតាមរយៈការប្រើប្រាស់ជំនួយដ៏ច្រើនសន្ធឹកសន្ធាប់ មកជួយរបបក្រុងភ្នំពេញ ទប់ទល់នឹងការដាក់ទណ្ឌសេដ្ឋកិច្ចពីប្រទេសលោកខាងលិច ជាថ្នូរនឹងការការពារប្រយោជន៍របស់ចិន ទាំងប្រយោជន៍ភូមិសាស្ត្រនយោបាយ និងសេដ្ឋកិច្ចរបស់ជនជាតិចិនរាប់សែននាក់ដែលកំពុងរស់នៅលើទឹកដីកម្ពុជា ៕