29 C
Phnom Penh

ស្ថានទូត​ខ្មែរ​ប្រចាំ​ប្រទេស​ម៉ាឡេស៊ី​បញ្ជាក់​ថា នៅពេល​គ្រប់​ចំនួន​ក្រុមហ៊ុន នឹង​ដឹក​អ្នក​ដែល​ខក​ជើងហោះហើរ​មក​កម្ពុជា​វិញ​

ដោយ ឌឹ ខេមបូឌា ដេលី

បទវិភាគ

ស្ថានទូត​កម្ពុជា​ប្រចាំ​ទីក្រុង​កូឡាឡាំពួរ ប្រទេស​ម៉ាឡេស៊ី បាន​អះអាង​ថា​ក្រុមការងារ​របស់​ខ្លួន​កំពុងធ្វើការ​ជាមួយ Malaysian Airlines ដើម្បី​រៀបចំ​ជើងហោះហើរ​សំរាប់​អ្នក​ខកដំណើរ​កាលពី​ថ្ងៃទី៧ ខែមេសា កន្លងទៅ។

ទំព័រ​ហ្វេសប៊ុក​របស់​ស្ថានទូត​ខ្មែរ​ប្រចាំ​ប្រទេស​នេះ​អះអាង​ថា ប្រសិនបើ​មាន​អ្នកដំណើរ​គ្រប់​ចំនួន​ក្រុមហ៊ុន​អាកាសចរណ៍​ឬ Airlines អាច​ហោះ​បាន​នៅ​ថ្ងៃទី១៦ សប្តាហ៏​ក្រោយ។យ៉ាងនេះ​ក្តី​ស្ថានទូត​កម្ពុជា លើកឡើង​ថា​ក្រុមហ៊ុន​រក្សា​សិទ្ធិ​ពន្យា​ពេល​ហោះហើរ ប្រសិនបើ​ពុំ​មាន​អ្នកដំណើរ​គ្រប់​ចំនួន​ដើម្បី​អាច​ទូទាត់​ថ្លៃដើម​បាន។ ជាមួយគ្នា​នេះ ស្ថានទូត​ដដែល​បាន​អំពាវនាវ​ដល់​ពលរដ្ឋខ្មែរ​ដែល​ស្ថិត​ក្នុងចំណោម​អ្នកដំណើរ​ទាំង១៤៣នាក់ ដែល​ខកខាន​ជើងហោះហើរ​មក​កម្ពុជា​កាលពី​ថ្ងៃទី៧មេ​សាប្រញ៉ា​ប់​ទាក់ទង​ទៅ airlines ឬក្រុមការងារ​ស្ថានទូត។

ពលរដ្ឋ​ទាំង​ជិត១៥០នាក់​នេះ ត្រូវ​បាន​ខកខាន​ជើងហោះហើរ​មកកាន់​កម្ពុជា​កាលពីដើម​ខែមេសា​នោះ បន្ទាប់ពី​លោកនាយក​រដ្ឋមន្ត្រី​ហ៊ុន សែន បាន​បញ្ជា​ឱ្យ​ផ្អាក​ជើងហោះហើរ​ពី​ម៉ាឡេស៊ី មក​កម្ពុ​ជា​ភ្លាម​ៗ ដោយ​លោក​បារម្ភ​ខ្លាច​ពួក​គេ​នាំ​ជំងឺ​កូ​វីដ១៩មក​កម្ពុជា។ ក្រោយ​ផ្អាក​មិន​ឱ្យ​ពលរដ្ឋខ្មែរ​ទាំង​ជាង១០០នាក់​នោះ បាន​វិលត្រឡប់​មក​កម្ពុជា​ជាង២ខែ​មកនេះ បាន​ធ្វើ​ឱ្យ​ពលរដ្ឋខ្មែរ​ខ្លះ​ត្រូវ​ជួប​បញ្ហា​ប្រឈម​ជា​ខ្លាំង​ដូចជា​គ្មាន​ប្រាក់ចាយ​វាយ គ្មាន​ការងារ​ធ្វើ និង​ត្រូវ​ចំណាយ​ច្រើន​នៅ​ប្រទេស​ម៉ាឡេស៊ី ព្រមទាំង​ព្រួយបារម្ភ​ពី​បញ្ហា​សុខភាព​របស់​ខ្លួន​នៅ​ទីនោះ​ថែមទៀត​ផង។

កាលពី​ថ្ងៃទី ២៧ ឧសភា ប្រមុខ​រដ្ឋាភិបាល​លោក ហ៊ុន សែន បាន​ប្រកាស​ដាក់ចេញ​នូវ​វិធានការ​ដោះស្រាយ​ជា​ផ្លូវការ ចំពោះ​ពលរដ្ឋខ្មែរ​ដែល​កាន់​លិខិតឆ្លងដែន​កម្ពុជា ហើយ​កំពុង​ធ្វើដំណើរ​ឬមានបំណង​ធ្វើដំណើរ​ពីក្រៅ​ប្រទេស​វិលត្រឡប់​ចូល​មក​កម្ពុជា​វិញ គឺ​មិន​តម្រូវ​អោយ​មាន​វិញ្ញា​បន​ប័ត្រ​បញ្ជាក់​សុខភាព​ថា​គ្មាន​ជំងឺឆ្លង​កូ​វីដ​-១៩ទេ។ លោក​ថា​វិធានការ​នេះ នឹង​ជួយ​សម្រួល​ដល់​ពលរដ្ឋ​នៅ​ក្រៅប្រទេស​ឆាប់​បាន​វិលត្រឡប់​មក​ជួបជុំ​ក្រុម​គ្រួសារ​នៅក្នុង​ប្រទេស​ខ្លួន​វិញ។

យ៉ាងនេះ​ក្តី លោក​ថា ពេល​វិលត្រឡប់​មកដល់​ប្រទេស​វិញ​គឺ​តម្រូវ​អោយ​ចូល​ពិនិត្យ​សុខភាព និង​ពិនិត្យ​សំណាក ហើយ​ដាក់ឲ្យ​ស្នាក់នៅ​ដាច់ដោយឡែក ឬធ្វើ​ចត្តាឡីស័​ក រយៈ​ចំនួន១៤ថ្ងៃ​រង់ចាំ​លទ្ធផល​សំណាក​ថា​តើ​ពួក​គេ​មាន​រោគឆ្លង​ជំងឺ​កូ​វីស១៩ឬ​អត់​រោគឆ្លង ទើប​អនុញ្ញាត​ឲ្យ​ទៅ​លំនៅ​ដ្ឋាន​វិញ។ក្រៅពី​ពលរដ្ឋ​ដែល​ខកខាន​ប្រមាណ១៥០នាក់​នោះ ក៏​នៅ​មាន​ពលរដ្ឋខ្មែរ​នៅ​ប្រទេស​ម៉ាឡេស៊ី​ដែល​ជា​ពលករ​ចុះទូក​នេសាទ និង​ពលរដ្ឋ​ដែល​អាជ្ញាធរ​ម៉ាឡេស៊ី​ទើបនឹង​ដោះលែង​ពី​ពន្ធនាគារ​ជាង២រយ​នាក់​ទៀត ក៏​កំពុង​រង់ចាំ​ការ​ជួយ​ពី​រដ្ឋាភិបាល​ដើម្បី​បាន​វិលត្រឡប់​មកកាន់​កម្ពុជា​វិញ​ផង​ដែរ​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស