25 C
Phnom Penh

ព្រះ​សង្ឃ​លួន សុ​វ៉ា​ត បាន​ច្រានចោល​នូវ​ព័ត៌មាន​ដែល​ចោទ​ថា​ព្រះអង្គ​ប្រព្រឹត្ត​ខុសវិន័យ

ដោយ ឌឹ ខេមបូឌា ដេលី

បទវិភាគ

ព្រះសង្ឃ​សកម្មជន​សិទ្ធិមនុស្ស និង​បរិស្ថាន ព្រះតេជព្រះគុណ លួន សុ​វ៉ា​ត បាន​ចេញ​សេចក្តី​ប្រកាស​បដិសេធ​ចោល​ទាំងស្រុង រាល់​ការចោទប្រកាន់ មូល​បង្កាច់ លាប​ពណ៌ ប្រឌិត​ពត៌មាន​ក្លែងក្លាយ កាត់ត​យក​រូបភាព​អ្នកដទៃ និង​សម្លេង​មក​ថត​បញ្ចូល​គ្នា​ក្នុង​ហ្វេសប៊ុក​ឲ្យ​កើតទៅជា​សាច់រឿង១ដែល​ខុស​ការពិត។

ក្នុង​សេចក្តី​ប្រកាស​ព័ត៌មាន​របស់​ព្រះអង្គ​នៅ​ថ្ងៃនេះ បាន​លើកឡើង​ថា ការ​ធ្វើ​ទង្វើ​ដាក់​ព្រះអង្គ ដោយ​ការប្រើ​ប្រាស់​បច្ចេកវិទ្យា​ក្នុង​សម័យ​បច្ចេកវិទ្យា​ទំនើប​បែបនេះ ខុស​ទៅ​នឹង​ច្បាប់​ជាតិ ច្បាប់អន្តរជាតិ ច្បាប់​សាសនា និង​ច្បាប់​បណ្តាញ​ពត៌មាន​សង្គម ដើម្បី​កំចាត់​ព្រះអង្គ​ពី វិស័យ​ពុទ្ធសាសនា។ព្រះសង្ឃ​ដែល​ជាសកម្ម​ជន​សិទ្ធិមនុស្ស និង​បរិស្ថាន​អង្គ​នេះ អះអាង​ថា​ព្រះអង្គ​នៅ​មិនទាន់​ត្រូវ​បាន​ក្រពើ ខ្លា ពស់វែក ចាប់​ហែកស៊ី ដោយ​ចាប់​ផ្សឹក​ព្រះអង្គ​បាន​នៅឡើយ​ទេ ហើយ​បច្ចុប្បន្ន​ព្រះអង្គ​កំពុង​គង់នៅ​កន្លែង​មាន​សុវត្ថិភាព១នៅ​ឆ្ងាយ ជាទី​ដែល​មិន​មាន​សត្វ​កាច​សាហាវ ឬខ្លា ក្រពើ​ណា​អាច​ទៅ​ចាប់​ស៊ី​បានទេ ។

សេចក្តី​ប្រកាស​ព័ត៌មាន​របស់​អង្គ ធ្វើឡើង​ក្រោយពេល​មន្ត្រី​ជាន់ខ្ពស់​សង្ឃ​ខេត្តសៀមរាប បាន​ចេញ​សង្ឃ​សម្រេច​ប្រកាស​ផ្សឹក​ភិក្ខុ លួន សុ​វ៉ា​ត ដែល​គង់​មិន​អចិន្ត្រៃយ៍​នៅ​វត្ត​ស្លែង ក្នុង​ឃុំ​ជីក្រែង ស្រុក​ជីក្រែង ខេត្តសៀមរាប ចេញពី​ភេទ​ជា​បព្វជិត កាលពី​ថ្ងៃទី៣មិថុនា។ក្នុង​សេចក្តី​សម្រេច​របស់​ថេរសភា​ខេត្តសៀមរាប បាន​ប្រកាស​ផ្សឹក​ព្រះសង្ឃ លួន សុ​វ៉ា​ត ក្រោម​សេចក្តី​សន្មត​ថា ព្រះអង្គ បាន​សេព​មេថុនធម្ម ឬសេពកាម ខុស​ធម៌​វិន័យ ដោយ​យោង​តាម​វីដេអូ​សារ​ជា​សំឡេង​ដែល​អះអាង​ថា​ជា​កិច្ច​សន្ទនា​រៀបរាប់​រវាង​ព្រះអង្គ ជាមួយ​ស្ត្រីជា​ម្ដាយ និង​កូនស្រី។លិខិត​របស់​សភា​សង្ឃឹម​ខេត្តសៀមរាប​សម្រេច​ថា ប្រសិនបើ​ឈ្មោះ លួន សុ​វ៉ា​ត នៅតែ​បន្ត​គ្រង​សង្ឃ​ចីវរ​ជា​បុព្វជិត​ដូច​អ្នកបួស​ក្នុង​ព្រះពុទ្ធ​សាសនា ចាត់ទុកជា​បុគ្គល​នេះ​ប្រព្រឹត្ត​ក្លែងភេទ សូម​ព្រះមេ​គណ​រាជធានី ខេត្ត និង​សមត្ថកិច្ច​ពាក់ព័ន្ធ​ចាត់វិធានការ​តាមច្បាប់​ជាធរមាន។

សម្រាប់​ព្រះតេជព្រះគុណ លួន សុ​វ៉ា​ត បាន​ចាត់ទុក​រឿង​ទាំងអស់​នេះ​គឺជា​រឿង​នយោបាយ​ទាំងស្រុង ព្រោះថា ចំណាត់ការ​របស់​មន្ត្រី​ថេរសភា​សង្ឃ​ខេត្តសៀមរាប​និង​ក្រុងភ្នំពេញ និង​មន្ទីរ​ធម្មការ និងសាសនា​ជាដើម បាន​ចេញ​សេចក្តី​សម្រេច​ស៊ីសង្វាក់​គ្នា​និង​លឿន​រហ័ស​ដូច​ភ្នែក​បន្ទោ​លដែល​ខុសពី​រឿង​បុ​គ្គ​លផ្សេង​ៗ ដោយ​មិនបាន​ធ្វើការ​ពន្យារពេល ស្រាវជ្រាវ​ឬ ស៊ើបអង្កេត រក​ភស្តុតាង បទល្មើស​ជាក់ស្តែង​ឲ្យ​ពិតប្រាកដ​ណាមួយ​ទេ ក្រៅតែ​ពឹងផ្អែក​ទៅលើ​សម្លេង​និង​ហ្វេសប៊ុក​ក្លែងក្លាយ យក​មក​ធ្វើជា​គោលដៅ​នៃ​សេចក្តី​សម្រេច ។

ព្រះអង្គ​បន្ថែម​ទៀត​ថា ភស្តុតាង​ដែល​រឹងមាំ​អាច​ថា យក​ជា​ផ្លូវការ​បាន​ស្ទើរ១០០​% គឺ​ត្រូវ​មាន​ជា​វីដេអូ​សកម្មភាព​ជាក់ស្តែង ហើយ​ប្រសិនបើ​មាន​វីដេអូ​ជាក់ស្តែង​ណាមួយ​ដែល​បាន​ប្រព្រឹត្ត​ខុសឆ្គង​ដូច​ការចោទប្រកាន់​ខាងលើ​មក​លើ​អាត្មាភាព​មែន​នោះ អាត្មា​នឹង​ទទួលយក​ទោសកំហុស​ទៅតាម​វីដេអូ​សកម្មភាព​ជាក់ស្តែង​ទាំងនោះ ប៉ុន្តែ​បើ​គ្រាន់តែ​ជា​សម្លេង​ជា​រូបភាព​កាត់ត​ទេ គឺ​អាត្មា​មិន​អាច​ទទួលយក​បានទេ ។

ព្រះសង្ឃ​ដដែល​អះអាង​ថា ក្រោយ​ការ​ចេញ​សេចក្តី​សម្រេច​ឲ្យ​ចាប់​ផ្សឹក​ដោយ​ចោទ​ថា​ខុស​នឹង​វិន័យ​សង្ឃ​រួចមក សកម្មភាព​នៃ​ការ​តាម​ចាប់ខ្លួន​ព្រះអង្គ គឺ​ខុស​បច្ចេកទេស​ទាំងស្រុង ដោយ​ការប្រើអំណាច​ព្រះរាជអាជ្ញា និង​អំណាច​ស្នងការ​ប៉ូល​ិ​សខេត្តសៀមរាប ទៅ​ចោទ​ទៅ​ចាប់​អ្នកដទៃ​ដែល​មិនមែន​ជា​ព្រះអង្គ​ទៅវិញ។ក្នុង​នោះ​មានការ​នាំ​ខ្លួន​ក្មួយប្រុស​របស់​ព្រះអង្គ២នាក់​ទៅ​សាក​សួ​នៅ​ស្នងការ​ខេត្ត​ហើយ​វ៉ៃ​ខ្នោះដៃ ប្រើ​ហិង្សា និង​ឃុំខ្លួន​ក្មួយ​របស់​ព្រះ​តេជគុណ​ម្នាក់​អស់១យប់ ២ថ្ងៃ ទើប​មានការ​ដោះលែង បន្ទាប់ពី​មាន​បងប្អូន​ទៅ​ធានា និង​បង់លុយ​កាក់​អស់​មួយចំនួន​ធំ​ផង​ដែរ ។

ក្រៅពី​ការ​នាំ​ខ្លួន​ក្មួយប្រុស​ព្រះអង្គ​ទៅ​សួរចម្លើយ និង​គម្រាម​គំ​ហែង ក្រុម​ប៉ូល​ិ​សស្នង​ការ​ខេត្ត​ប្រមាណ​ពី៤ ទៅ៥ឡាន​បាន​ដឹកនាំ​កម្លាំង​ទៅ​ឆែកឆេរ និង​រឹបអូស​ទ្រព្យសម្បត្តិ​ឯកជន រំលោភ​លើ​សិទ្ធិ​មានកម្ម​សិទ្ធិ របស់​ព្រះអង្គ​នៅ​ភូមិកំណើត​ក្នុង ឃុំ​ជីក្រែង ស្រុក​ជីក្រែង ខេត្តសៀមរាប កាលពី​ថ្ងៃ៧មិថុនា២០២០ ដោយ​ដកហូត​ទូរស័ព្ទ​មួយចំនួន​ពី​ក្មួយ​របស់​ព្រះអង្គ ដកហូត​ឡាន Lexus470 ១គ្រឿង កាមេរ៉ា​ជិត១០គ្រឿង ទូរទស្សន៍១គ្រឿង ទូ​ទឹក​ក ធុងទឹក​កក ឯក​សា​ផ្សេង​ៗមួយចំនួន​ទៀត ចេញពីផ្ទះ​ញោមប្រុស​របស់​ព្រះអង្គ​ផង និង​ផ្ទះ​ក្មួយប្រុស​ព្រះអង្គ​ផង ពី​ក្នុង​វត្ត​ស្លែង​ផង យក​ទៅ​រក្សាទុក​នៅ​ស្នងការ​ប៉ូល​ិ​សខេត្ត។

លើស​ពីនេះ ក៏​មានការ​នាំ​ខ្លួន​ព្រះសង្ឃ២អង្គ​ក្នុង​វត្ត​ស្លែង​ទៅ​សួរចម្លើយ និង​ដកហូត​ទូរស័ព្ទ​ទៀតផង ក្រោយមក​បាន​ប្រគល់​ទូរស័ព្ទ​មក​ឲ្យ​វិញ ប៉ុន្តែ​ទ្រព្យសម្បត្តិ​ដែល​ជា​កម្មសិទ្ធិ​ឯកជន​របស់​ព្រះ​អង្គលួ​ន សុ​វ៉ា​ត ត្រូវ​បាន​គេ​ដកហូត​រក្សាទុក​នៅ​ស្នងការ​ប៉ូល​ិ​សខេត្ត​រហូតមកដល់​ថ្ងៃទី១០ ខែមិថុនា​នេះ ដែល​មិនទាន់​មានការ​ប្រគល់ឲ្យ​វិញ​នៅឡើយ​ទេ ។ព្រះអង្គ​បន្ត​ថា សភា​សង្ឃ​ខេត្តសៀមរាប ចោទ​ព្រះអង្គ​ថា​ខុសច្បាប់​សាសនា ប៉ុន្តែ​នៅពេល​ធ្វើការ​អនុវត្តន៍​ច្បាប់ ពួក​គេ​មិនបាន​យក​ច្បាប់​សាសនា​មក​ប្រើ​នោះ​ទេ តែ​បែ​ជាយ​កអំណាច​អាជ្ញាធរ អំណាច​តុលាការ មក​វាយប្រហារ គំរាម​គំ​ហែង បំភិតបំភ័យ ចោទ​ចាប់គ្នា ទៅវិញ។

ក្រុម​អ្នកឃ្លាំមើល​និយាយ​ថា ការ​ផ្សឹក​កំបាំងមុខ​លើ​ព្រះតេជព្រះគុណ លួន សុ​វ៉ា​ត គឺជា​ចេតនា​នយោបាយ និង​ជា​គំនុំ​គុំគួន​យ៉ាង​ពិតប្រាកដ ដោយ​យកលេស​ថា​ខុសវិន័យ​សង្ឃ ពីព្រោះ​កន្លងមក​ភិក្ខុ​អង្គ​នេះ​ជា សកម្មជន​សិទ្ធិមនុស្ស ជា​សង្ឃ​ដ៏​ល្បី​ទាំង​ក្នុង​និង​ក្រៅប្រទេស ធ្វើការងារ​សង្គមជាតិ​សាសនា​ជាច្រើន ទាក់ទង​និង បញ្ហា​ជម្លោះដីធ្លី សិទ្ធិមនុស្ស ព្រៃឈើ តស៊ូ​មតិ​ដើម្បី​យុត្តិធម៌​សង្គម មនុស្សធម៌ បាតុកម្ម នយោបាយ ព្រមទាំង​បាន​សម្ភាសន៍ និង​ផ្សាយ​ពត៌មាន​ឯករាជ្យ​ជាដើម ដែល​ធ្វើឲ្យ​អ្នកមាន​អំណាច​មួយចំនួន​ក្តៅក្រហាយ មិន​សប្បាយចិត្ត​នឹង​សកម្មភាព​របស់​ព្រះអង្គ​ដែល​ជួយ​កិច្ចការ​សង្គមជាតិ សាសនា​ទឹកដី​ព្រៃ​ព្រឹក្សា​នោះ​ឡើយ ព្រោះ​បាន​ធ្វើឲ្យ​ប៉ះពាល់​ដល់​នយោបាយ​និង​ឆ្នាំងបាយ​ផលប្រយោជន៍​នៃ​បក្ស​ពួក​របស់​គេ ។

ព្រះអង្គ​ម្ចាស់ លួន សុ​វ៉ា​ត អះអាងបន្ថែម​ថា​ព្រះអង្គ​មិនទាន់​អស់បុណ្យ​ក្នុង​ការ​ធ្វើបុណ្យ​ខ្មែរ​ជួយ​ខ្មែរ​នៅឡើយ​ទេ ទើប​ក្រុម​ជន​បក្ស​ពួក​ដែល​រួមគំនិត រួមគ្នា​ធ្វើបាប​ព្រះអង្គ មិនទាន់​អាច​ចាប់ខ្លួន​ព្រះអង្គ​បាន​នៅឡើយ ហើយ​ប្រសិនបើ​គេ​ចាប់ខ្លួន​បាន​វិញ​នោះ គឺ​មិន​ត្រឹមតែ​គេ​ផ្សឹក​ប៉ុណ្ណោះទេ គឺ​អាច​នឹង​ត្រូវ​រង​ទារុណកម្ម អំពើ​ហិង្សា រហូតដល់​ឆ្កួត​ឬស្លាប់ ព្រមទាំង​ការចោទប្រកាន់​ពី​ប្រព័ន្ធ​តុលាការ​ទាំង​បទ​ចោទ​ចាស់​ដែល​មានស្រាប់​ក្នុង​ដៃ​តុលាការ ក៏ដូចជា បទ​ចោទ​ដែល​តុលាការ​ធ្លាប់​ចោទ​ចាប់​ព្រះអង្គ​កន្លងមក​ថែមទៀត​ផង។

ភិក្ខុ លួន សុ​វ៉ា​ត ថា​ការ​បួស​ហើយនឹង​សឹក​ជា​រឿង​ធម្មតា​ទេ ប៉ុន្តែ មិនមែន​សឹក​ដោយ​ឲ្យ​គេ​ចាប់បង្ខំ​ផ្សឹក​នោះ​ទេ​ព្រោះ​គ្មាន​តម្លៃនឹង​នាំឲ្យ​ប៉ះពាល់​កិត្តិយស ហើយ​ការ​ផ្សឹក​ក៏​មាន​ពេលវេលា​ដ៏​សមរម្យ​ណាមួយ​ដើម្បី​សឹក​ដោយ​ការសម្រេច​ចិត្ត​ខ្លួនឯង នៅ​ក្រៅប្រទេស​ក្នុង​ពេល​អនាគត​ខាងមុខ ការ​រត់គេច​ពី​សេចក្តី​ទុក្ខ​ដ៏​ធំធេង នៃ​ការចោទប្រកាន់​បែប បំផ្លាញ បំភ្លៃ បំភិតបំភ័យ ក្នុង​ន័យ​នយោបាយ​លាយឡំ​និងសាសនា​ក្នុង​ការ​ចាប់​យក​ចំណុចខ្សោយ​របស់​អ្នកបួស​ក្នុង​សាសនា​ទាំងអស់​អង្គ មិនថា លោក​តូច លោកធំ លោកនេន ភិក្ខុ ទេ គឺ​បើ​គេ​ចោទ​ថា ខុស​ធម៌​វិន័យ​មាន​ស្រី​ហើយ គឺ១០០ទាំង១០០អាច​នឹង​ប៉ះពាល់​កិត្តិយស កេរ្តិ៍ឈ្មោះ បើ​ទោះជា​រឿង​នោះ​ពិត​ឬមិន​ពិត​ក៏ដោយ។

ក្រៅពី​ច្រានចោល​ការចោទប្រកាន់​ទាំងនេះ ព្រះអង្គ លួន សុ​វ៉ា​ត អំពាវនាវ និង​សំណូមពរ​ដល់​ស្ថាប័ន​ព្រះពុទ្ធ​សាសនា ចាត់​វិធាន​ការ​ទុ​បស្កាត់​នូវ​រាល់​ព័ត៌មាន​ក្លែងក្លាយ​ទាំងឡាយ​ណា ឬ បុគ្គល​ទាំងឡាយ​ណា ដែល​មាន​ចេតនា ផ្សព្វផ្សាយ​នាំឲ្យ​ប៉ះពាល់​ដល់​តម្លៃ​ព្រះសង្ឃ ព្រះពុទ្ធ​សាសនា​ជា​រួម ត្រូវតែ​ទប់ស្កាត់​ជាបន្ទាន់ ដូចជា​ការប្រើ​ពាក្យ​ចំណងជើង អត្ថបទ ដែល​ធ្វើ​ឱ្យ​ប៉ះពាល់​ដល់​សង្ឃ​ទូទៅ។

ជាង​នេះ​ទៅទៀត ព្រះអង្គ​សូម​ស្នើ​ដល់​ស្ថាប័ន​សង្ឃ និង​អំណាច​ពុទ្ធចក្រ ត្រូវ​ប្រើប្រាស់​អំណាច​ពុទ្ធចក្រ​ដើម្បី​កាត់ក្តី វិនិច្ឆ័យ​វិន័យ​សង្ឃ​ដោយ​ព្រះសង្ឃ ហើយ​មិន​ត្រូវ​ប្រើអំណាច អាណាចក្រ ដូចជា​ប៉ូល​ិ​ស តុលាការ មក​ចាត់ការ​ដោះស្រាយ​រឿង​វិន័យ​សង្ឃ​នោះ​ទេ។ បន្ថែម​ពីនេះ ព្រះអង្គ​ស្នើ​ឲ្យ​សមត្ថកិច្ច​ស្នងការ​ខេត្តសៀមរាប ត្រូវ​ប្រគល់​សម្ភារៈ​ប្រើប្រាស់​មាន​ឡាន​ជាដើម​ដែល​បាន​ដកហូត​យក ត្រូវ​ប្រគល់​ជូន​ក្រុម​គ្រួសារ​របស់​ព្រះអង្គ​វិញ ព្រោះ​ឡាន និង​សម្ភារៈ​ទាំងនោះ​មិន​មានទោស​ខុសច្បាប់ និង​មិន​ជាប់ពាក់ព័ន្ធ​នឹង​វិន័យ​សង្ឃ​នោះ​ទេ។

ជាង​នេះ​ទៀត​ព្រះអង្គ​ក៏​ស្នើ​ឲ្យ​សមត្ថកិច្ច ឬស្នងការ​ខេត្តសៀមរាប បញ្ឈប់​ការ​នាំ​ខ្លួន​អ្នកដទៃ​ទៅ​សួរចម្លើយ និង​បញ្ឈប់​ការ​ដកហូត សម្ភារៈ​ផ្សេង​ៗ បញ្ឈប់​ការ​គំរាម​គំ​ហែង និង​ការ​បំភិតបំភ័យ​ដល់ បងប្អូន​ក្រុម​គ្រួសារ​ព្រះអង្គ និង​ព្រះសង្ឃ​ដទៃ​ក្នុង​វត្ត​ជាដើម​៕

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស