អគ្គស្នងការនគរបាលជាតិបានឱ្យដឹងថា យ៉ាងហោចណាស់មានប្រជាពលរដ្ឋចំនួន៤នាក់ ស្លាប់ជាបន្តបន្ទាប់ និង៧នាក់ផ្សេងទៀតនៅស្រុកម៉ាឡៃ និងក្រុងប៉ោងប៉ែត ខេត្តបន្ទាយមានជ័យ កំពុងសង្គ្រោះបន្ទាន់នៅមន្ទីរពេទ្យខេត្ត ដោយករណីសង្ស័យពុលស្រាថ្នាំចិនសែ។
គេហទំព័ររបស់អគ្គស្នងការនគរបាលជាតិនៅថ្ងៃនេះ បានឱ្យដឹងថា ហេតុការណ៍នេះ បានកើតឡើងនៅវេលាយប់ថ្ងៃទី៨ ចូលថ្ងៃទី៩ ខែមិថុនា ឆ្នាំ២០២០ នៅស្រុកម៉ាឡៃ និងក្រុងប៉ោយប៉ែត ខេត្តបន្ទាយមានជ័យ បន្ទាប់ពីពលរដ្ឋទាំងនោះបានពិសារកស្រាចិនសែ ដែលមានបិទយីហោលើដបឈ្មោះ តាំងគួយ ។ប្រភពដដែលឱ្យដឹងថាមរយៈ តាមរបាយការណ៍របស់សមត្ថកិច្ចនិងអាជ្ញាធរនៅថ្ងៃទី១០ ខែមិថុនានេះថា នៅរំលងអធ្រាត្រចូលថ្ងៃទី៩ ខែមិថុនា ក្រោយពលរដ្ឋទាំងនោះផឹកស្រាចិនសែនោះ បណ្តាលឱ្យពលរដ្ឋចំនួន៣នាក់ស្លាប់ និងសង្គ្រោះបន្ទាន់ចំនួន៣នាក់នៅស្រុកម៉ាឡៃ ។
ចំណែកនៅក្រុងប៉ោយប៉ែត មានពលរដ្ឋម្នាក់ទៀតបានស្លាប់តាមផ្លូវ ខណៈបញ្ជូនទៅសង្រ្គោះនៅមន្ទីរពេទ្យ និងមានពលរដ្ឋចំនួន៤នាក់ទៀត កំពុងសង្គ្រោះនៅមន្ទីរពេទ្យ។អគ្គស្នងការនគរបាលជាតិបន្ថែមថា តាមការបំភ្លឺបឋមពីជនរងគ្រោះបានឲ្យដឹងថានៅថ្ងៃទី៨ មិថុនា ក្រោយពីសំរាកពីការងារសាងសង់សំណង់ ពលរដ្ឋ៥នាក់ បានទៅទិញស្រាថ្នាំពីយីហោ តាំងគួយ ចំនួន១យួរតំលៃ ១ម៉ឺន ២ពាន់ រៀល យកមកពិសាររហូតអស់ ដោយមានម្ហូបក្លែម ដូចជាសាច់ឆ្កែ ផ្អកត្រីប្រៃ និងបុកល្ហុងលាយក្តាមជាដើម។
លុះដល់ថ្ងៃទី៩ ខែមិថុនា ពលរដ្ឋទាំងនោះក៏ចាប់ផ្តើមមានអាការៈមិនស្រួលក្នុងខ្លួន ងងុយដេក ដោយសង្ស័យថាពុលស្រាចិនសែនោះ។ក្រោយហេតុការណ៍នេះ អភិបាលខេត្តបន្ទាយមានជ័យ លោក អ៊ុំ រាត្រី បានបញ្ជាឱ្យមន្ត្រីពាក់ព័ន្ធចុះស្រាវជ្រារកមូលហេតុនៃការពុលនេះឱ្យបានច្បាស់លាស់ ប៉ុន្តែនៅមិនទាន់ដឹងលទ្ធផលប្រាកដនៅឡើយទេ។
យ៉ាងនេះក្តី កន្លងមកករណីពុលស្រា ពុលនំបុ័ងសាច់ ពុលជ្រក់ស្ពៃ ពុលត្រសក់ជ្រក់ ពុលនំបញ្ចុក ពុលត្រីក្រពត ជាដើម តែងកើតមានឡើងជារឿយៗ ប៉ុន្តែមកទល់ពេលនេះរដ្ឋាភិបាលនៅមិនទាន់មានវិធានការជាក់លាក់ដើម្បីបញ្ចៀសហានិភ័យទាំងនោះនៅឡើយទេ៕