មន្ត្រីជាន់ខ្ពស់នៃរាជបណ្ឌិត្យសភាកម្ពុជា លើកឡើងថា បើប្រទេសជាតិខ្សោយ កុំថាឡើយនិយាយពីឯករាជ្យ និងអព្យាក្រឹត្យ សូម្បីតែសំពះសុំសន្តិភាពពីគេ ក៏មិនប្រាកដថាគេឱ្យកម្ពុជាបានសុខដែរ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានសរសេរលើគណនី Facebook របស់លោកកាលពីថ្ងៃទី១៦ ខែមិថុនា ថា មានតែអ្នកនយោបាយ និងពលរដ្ឋនាំគ្នាប្រឹងប្រែងធ្វើឱ្យប្រទេសជាតិខ្លាំងប៉ុណ្ណោះ ទើបធ្វើឲ្យកម្ពុជាគេចផុតពីការប្រមាថរបស់ជាតិសាសន៍ដទៃ។ ជាងនេះទៀត ក៏អាចទទួលបាននូវវឌ្ឍនភាព និងវិបុលភាពជាតិទាំងបច្ចុប្បន្ន និងអនាគត។
លោកអះអាងថា ដើម្បីឱ្យប្រទេសជាតិខ្លាំង កម្ពុជាត្រូវតែធ្វើឱ្យធនធានមនុស្សខ្លាំង ប្រព័ន្ធច្បាប់ខ្លាំង ប្រព័ន្ធនយោបាយខ្លាំង សេដ្ឋកិច្ចខ្លាំង ខឿនការពារជាតិខ្លាំង នយោបាយការទូតខ្លាំង និងប្រព័ន្ធយុត្តិធម៌សង្គមខ្លាំង ជាដើម ហើយភាពខ្លាំងនេះមិនមែនខ្លាំងតែមួយពេលនោះទេ គឺខ្លាំងជាយូរអង្វែង។ លើសពីនេះ កម្ពុជាក៏ត្រូវតែអនុវត្តផែនការនយោបាយសាមគ្គីជាតិ និងឯកភាពជាតិរវាងខ្មែរ និងខ្មែរផងដែរ។
បណ្ឌិត គិន ភា បញ្ជាក់ថា ដោយសារប្រទេសជាតិចេះតែកើតមានវិបត្តិផ្ទៃក្នុង ដែលបណ្តាលឲ្យបែកបាក់សាមគ្គីផ្ទៃក្នុងជាតិនេះហើយ ទើបធ្វើឲ្យកម្ពុជាដែលជាចក្រភពដ៏ខ្លាំងពូកែមួយ ធ្លាក់ខ្លួនជារដ្ឋស្ថិតក្រោមអាណានិគមផ្លាស់វេននៃរដ្ឋក្បែរខាង ដែលបណ្តាលឲ្យទឹកដីជាច្រើនត្រូវបាត់បង់រាប់សិបខេត្តទៅប្រទេសថៃ និងដែនដីកម្ពុជាក្រោម រួមទាំងក្រុងព្រៃនគរ ផង បានធ្លាក់ទៅក្នុងការគ្រប់គ្រងរបស់អាជ្ញាធរប្រទេសវៀតណាម រហូតដល់សព្វថ្ងៃនេះ។
ការអះអាងនេះ ធ្វើឡើងបន្ទាប់ពីមានភាពចម្រូងចម្រាសរវាងកម្ពុជា-វៀតណាម ពាក់ព័ន្ធនឹងការបណ្តេញជនអន្តោប្រវេសន៍ខុសច្បាប់ដែលកំពុងរស់នៅយ៉ាងអណាធិបតេយ្យលើទឹកដីកម្ពុជា ដែលហាក់ពុំមានការអនុវត្តច្បាប់ណាមួយលើពួកគេទាល់តែសោះពីសំណាក់អាជ្ញាធរខ្មែរ។
សាលារាជធានីភ្នំពេញ បានជូនដំណឹងកាលពីថ្ងៃទី២ ខែមិថុនា ឆ្នាំ២០២១ ដល់ជនជាតិវៀតណាមខុសច្បាប់ដែលរស់នៅលើផ្ទៃទឹកក្នុងភូមិសាស្ត្ររាជធានីភ្នំពេញ ឲ្យរុះរើផ្ទះបណ្តែតទឹក និងបែចិញ្ចឹមត្រីរបស់ពួកគេចេញពីទីក្រុងភ្នំពេញ ដោយទុករយៈពេលឲ្យតែ ៩ថ្ងៃប៉ុណ្ណោះ។
ក្រុមអ្នកឃ្លាំមើលសង្គម អះអាងថា ក្រោយលោក ហ៊ុន សែន ត្រូវបានរដ្ឋាភិបាលវៀតណាម លើកបន្តុបជានាយករដ្ឋមន្ត្រីខ្មែរ ឬជារដ្ឋាភិបាលអាយ៉ងមក ត្រូវគេមើលឃើញថា ប្រព័ន្ធនយោបាយ និងវិស័យយោធារបស់កម្ពុជា ត្រូវបានរដ្ឋាភិបាលវៀតណាមគ្រប់គ្រងទាំងស្រុង។
បញ្ហានេះបានជំរុញឲ្យរដ្ឋាភិបាលកម្ពុជា ចុះហត្ថលេខាលើកិច្ចព្រមព្រៀងខុសច្បាប់ជាច្រើនជាមួយវៀតណាម។
ពួកគេបញ្ជាក់ថា បច្ចុប្បន្ននេះតាមដងទន្លេកម្ពុជា គឺពោរពេញទៅដោយភូមិអណ្ដែតជនជាតិវៀតណាម ដូចជានៅឃុំកំពង់ហ្លួង ស្រុកក្រគរ ខេត្តពោធិ៍សាត់ ជាដើម ដែលមានភូមិសរុបចំនួន ១០ ក្នុងនោះពលរដ្ឋខ្មែរធ្វើជាមេភូមិមានចំនួន ៣ភូមិ រីឯជនជាតិវៀតណាម ធ្វើជាមេភូមិមានដល់ទៅ ៧ភូមិឯណោះ។ លើសពីនេះ ពួកគេក៏បានក្លាយជាក្រុមប្រឹក្សាឃុំ-សង្កាត់ទៀតផង។
ទាក់ទិននឹងបញ្ហានេះ កាលពីអំឡុងឆ្នាំ២០១៨ រដ្ឋាភិបាលកម្ពុជា បានសម្រេចផ្តល់ដីប្រមាណ ៤០ហិកតារស្ថិតនៅឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ដើម្បីរៀបចំកន្លែងរស់នៅថ្មីសម្រាប់ជនជាតិវៀតណាម និងជនជាតិឥស្លាម ដើមកំណើតវៀតណាម ដែលកំពុងរស់នៅលើបឹងទន្លេសាបដែលមានចំនួនប្រមាណជិត ៥ពាន់គ្រួសារផងដែរ៕