តុលាការក្រុងភ្នំពេញ សម្រេចដោះលែងកូនប្រុសអភិបាលស្រុកកងមាស ខេត្តកំពង់ចាម ឈ្មោះ សាមីន វុត្ថារិទ្ធិ ឱ្យមានសេរីភាព ខណៈឈ្មោះ សុខ ច័ន្ទបូណ៍មី ហៅ យាន ដែលជាសង្សារ ត្រូវបានចោទប្រកាន់ថាមានទោសពាក់ព័ន្ធនឹងការបង្កគ្រោះថ្នាក់ចរាចរណ៍បណ្តាលឱ្យមនុស្សរងរបួស។
សាលាដំបូងរាជធានីភ្នំពេញ នៅថ្ងៃ២៤ ខែមីនា នេះ បានចេញសេចក្តីប្រកាសព័ត៌មានជុំវិញករណីគ្រោះថ្នាក់ចរាចរណ៍នៅខណ្ឌឫស្សីកែវ ដែលពាក់ព័ន្ធនឹងកូនប្រុសអភិបាលស្រុកកងមាស កាលពីពេលថ្មីៗនេះថា ផ្អែកលើលទ្ធផលស៊ើបអង្កេត និងការសន្និដ្ឋានរបស់សមត្ថកិច្ចជំនាញនៃការិយាល័យចរាចរណ៍ផ្លូវគោក បង្ហាញថា ឈ្មោះ សុខ ច័ន្ទបូណ៍មី ហៅ យាន គឺជាអ្នកបើកបររថយន្តដែលបង្កឱ្យមានគ្រោះថ្នាក់ចរាចរណ៍ រីឯឈ្មោះ សាមីន វុត្ថារិទ្ធិ គឺជាអ្នករួមដំណើរប៉ុណ្ណោះ មិនមែនជាអ្នកបើកបររថយន្តទេ។
ប្រភពដដែល អះអាងថា តាមលទ្ធផលនេះ តំណាងអយ្យការបានសម្រេចចោទប្រកាន់លើជនសង្ស័យឈ្មោះ សុខ ច័ន្ទបូណ៍មី ពីបទបើកបរបង្កគ្រោះថ្នាក់ចរាចរណ៍បណ្តាលឱ្យរបួសអ្នកដទៃក្នុងស្ថានភាពស្រវឹងមានជាតិអាល់កុល ០,៥២មិល្លីក្រាមក្នុង ១លីត្រខ្យល់ និងបើកគេចខ្លួនពីកន្លែងកើតហេតុ តាមបញ្ញត្តិមាត្រា ៨៣ នៃច្បាប់ស្ដីពីចរាចរណ៍ផ្លូវគោក និងបានបញ្ជូនសំណុំរឿងនេះទៅចៅក្រមស៊ើបសួរសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីនាពេលនេះ។
សាលាដំបូងរាជធានីភ្នំពេញ បញ្ជាក់ថា ចំណែកអ្នករួមដំណើរឈ្មោះ សាមីន វុត្ថារិទ្ធិ ត្រូវបានដោះលែងឱ្យមានសេរីភាពវិញតាមដីកាសម្រេច កាលពីថ្ងៃទី២៣ ខែមីនា ឆ្នាំ២០២៦ នេះ ជាកំហិត។
កាលពីថ្ងៃទី១៨ ខែមីនា ឆ្នាំ២០២៦ វេលាម៉ោង ២០ និង ២៤នាទីយប់ វីដេអូឃ្លីបស្ដីពីករណីគ្រោះថ្នាក់ចរាចរណ៍មួយ ត្រូវបានចែកចាយលើបណ្ដាញសង្គមហ្វេសប៊ុកស្ថិតនៅចំណុចផ្លូវបេតុងប្រសព្វផ្លូវលេខ១៧១៧ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ រវាងរថយន្តមួយគ្រឿងម៉ាក DONG FENG FORTHING បានបុកជាមួយម៉ូតូមួយគ្រឿងដែលបណ្តាលឱ្យជនរងគ្រោះរបួសធ្ងន់។ ក្នុងវីដេអូឃ្លីបនេះ បង្ហាញឱ្យឃើញពីការខឹងសម្បារបស់ពលរដ្ឋ ដោយអះអាងថាកូនប្រុសអភិបាលស្រុកកងមាស ឈ្មោះ សាមីន វុត្ថារិទ្ធិ បានប្រើសម្ដីប្រមាថជនរងគ្រោះថា បើឡានខ្លួនបុកស្លាប់ យ៉ាងច្រើនបោះលុយ ២ម៉ឺនដុល្លារ គឺចប់រឿង។
យ៉ាងណាក៏ដោយ បន្ទាប់ពីស៊ើបអង្កេត សមត្ថកិច្ចបានបង្ហោះរូបថតដោយអះអាងថាឈ្មោះ សាមីន វុត្ថារិទ្ធិ ជាអ្នករួមដំណើរ ហើយស្ត្រីឈ្មោះ សុខ ច័ន្ទបូណ៍មី គឺជាអ្នកបើកបររថយន្ត ប៉ុន្តែរូបថតទាំងនោះត្រូវអ្នកលេងបណ្ដាញសង្គមហ្វេសប៊ុករិះគន់ថាជារូបថតមិនពិត ព្រោះខោដែលជនបង្កឈ្មោះ សាមីន វុត្ថារិទ្ធិ ស្លៀកដេកក្នុងរថយន្ត និងខោដែលរូបគេស្លៀកក្នុងពេលដែលត្រូវមហាជនឃាត់ខ្លួន គឺមិនដូចគ្នា។
ជុំវិញបញ្ហានេះ បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២១ មីនា ថា បើពិនិត្យមើលតាមរូបថតដែលត្រូវបានផ្សព្វផ្សាយអំពីករណីគ្រោះថ្នាក់ចរាចរណ៍នោះ បង្ហាញថា បុរសក្នុងឡាន និងបុរសឈរពេលមហាជនឡោមព័ទ្ធ គឺជាមនុស្សតែម្នាក់ ប៉ុន្តែអាចពេលវេលា និងទីកន្លែងថតខុសគ្នា។
បណ្ឌិត គិន ភា បញ្ជាក់ថា រឿងខ្លះអាចបន្ថយបន្ទុកបុគ្គល តែបែរជាបន្ថែមបន្ទុកក្នុងសង្គម និងពង្រីកគម្លាតទំនុកចិត្តរវាងពលរដ្ឋ និងអាជ្ញាធរទៅវិញ។
ជុំវិញបញ្ហានេះ អគ្គស្នងការដ្ឋាននគរបាលជាតិ កាលពីថ្ងៃទី៣ ខែកុម្ភៈ ឆ្នាំ២០២៦ បានចេញសេចក្តីប្រកាសព័ត៌មានថា ពេញមួយខែមករា ឆ្នាំ២០២៦ គ្រោះថ្នាក់ចរាចរណ៍កើនឡើង ៤២លើក ស្មើនឹង ១៩% ក្នុងនោះមានចំនួនអ្នកស្លាប់កើន ២៥នាក់ និងអ្នករបួសកើន ៦៤នាក់ បើធៀបនឹងរយៈពេលដូចគ្នាឆ្នាំ២០២៥ ដែលបណ្តាលមកពីការបើកបរល្មើសល្បឿន មិនគោរពសិទ្ធិ មិនប្រកាន់ស្តាំ និងស្រវឹង ជាដើម។
ទាក់ទិននឹងបញ្ហានេះ លោក ហ៊ុន ម៉ាណែត ធ្លាប់បានចេញបញ្ជាកាលពីពេលកន្លងទៅ ឱ្យអនុវត្តច្បាប់ចំពោះបទល្មើសជាក់ស្តែង ដែលបើកបរធ្វេសប្រហែស បង្កគ្រោះថ្នាក់ចរាចរណ៍បុកមនុស្សស្លាប់ គឺត្រូវចាប់វាយខ្នោះនៅនឹងកន្លែង ដោយមិនបាច់សុំគោលការណ៍ពីថ្នាក់លើឡើយ៕
© 2026, ឌឹ ខេមបូឌា ដេលី. All rights reserved.