អ្នកធ្វើការផ្នែកសិទ្ធិមនុស្សនៅកម្ពុជា បានស្នើរដ្ឋាភិបាល និងអាជ្ញាធរទម្លាក់ចោលបទចោទ និងដោះលែងយុវជន និងសកម្មជនដែលមានមនសិការចូលរួមការពារធនធានធម្មជាតិ ដើម្បីធានាដល់លំហប្រជាធិបតេយ្យសម្រាប់ពលរដ្ឋគ្រប់រូបដោយគ្មានការរើសអើង។
អ្នកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា បានលើកឡើងក្នុងបណ្ដាញសង្គមកាលពីថ្ងៃទី២០ ខែមិថុនា ឆ្នាំ២០២១ ថា អ្នកសារព័ត៌មានតែងតែបានចោទជាសំណួរដល់អ្នកស្រីពីការយល់ឃើញរបស់អ្នកស្រីក្នុងនាមជាមន្ត្រីសិទ្ធិមនុស្សពីបញ្ហា ឬសំណុំរឿងមួយចំនួននៅតុលាការ ទាំងសំណុំរឿងសកម្មជននយោបាយ និងសកម្មជនបរិស្ថានជាដើម។
អ្នកស្រីបានថ្លែងថា ការសង្កេតជាទូទៅអាចបរិយាយបាន តែរឿងដែលអ្នកស្រីតែងគូសបញ្ជាក់ និងដាក់ជាចំណោទទៅវិញថា តើសកម្មជនដែលត្រូវបានចោទពីបទក្បត់ជាតិក្តី រួមគំនិតក្បត់ក្តី តើគាត់ក្បត់ជាតិរឿងអ្វី? តើកម្ពុជាពិតជាប្រទេសមួយដែលសម្បូរពលរដ្ឋដែលក្បត់ជាតិតាំងពីស្រុកមានសង្គ្រាមរហូតដល់ប្រទេសដែលដាក់ស្លាកស្ទើរគ្រប់កន្លែងថា “អរគុណសន្តិភាព“ ឬយ៉ាងណា?
ជនដែលក្បត់ប្រយោជន៍សាធារណៈ គួរជាជនដែលបំផ្លាញធនធានជាតិ ធនធានធម្មជាតិ និងយកផលប្រយោជន៍ជាតិធ្វើជាប្រយោជន៍បក្សពួក និងក្រុមគ្រួសាររបស់ខ្លួនទៅវិញទេ។
អ្នកស្រីបញ្ជាក់ទៀតថា កម្ពុជាគួរទទួលយកការចូលរួមរបស់យុវជន និងពលរដ្ឋគ្រប់រូប គ្រប់និន្នាការនយោបាយ និងទស្សនៈយោបល់ ដូចមានចែងក្នុងធម្មនុញ្ញ ដែលលើកទឹកចិត្ត និងធានាដល់ការចូលរួមយ៉ាងសកម្មក្នុងជីវភាពសង្គម នយោបាយ សេដ្ឋកិច្ច សង្គម និងវប្បធម៌ជាដើម។
ការផាត់ចេញ ចោទប្រកាន់ ឬចាប់ខ្លួនយុវជនសកម្មជនមួយចំនួនកន្លងមក និងការចាប់ខ្លួនចុងក្រោយលើយុវជនវ័យក្មេង ៣រូបថែមទៀត ជាការបង្ហាញកាន់តែច្បាស់ពីការមិនទទួលយកមតិចម្រុះ និងការដើរផ្ទុយពីគោលការណ៍លទ្ធិប្រជាធិបតេយ្យ។
សាលាដំបូងរាជធានីភ្នំពេញ កាលពីថ្ងៃទី២០ ខែមិថុនា ឆ្នាំ២០២១ បានសម្រេចចោទប្រកាន់ស្ថាបនិកអង្គការមាតាធម្មជាតិ លោក អាឡិច ហ្គន់សាឡេស ដេវិតសុន និងយុវជនបរិស្ថាន ៣រូបទៀត ក្នុងនោះរួមមាន លោក លី ចន្ទ្រាតារ៉ាវុធ កញ្ញា ស៊ុន រដ្ឋា និងលោក យឹម លាងហ៊ី ពីបទប្រមាថអង្គព្រះមហាក្សត្រ និងរួមគំនិតក្បត់។
សារព័ត៌មានថ្មីៗបានស្រង់សម្ដីលោក សំ គង់ មេធាវីរបស់សកម្មជនទាំង ៣រូប បញ្ជាក់ថា៖ «ក្រោយពីមានការដេញដោលពេលមួយថ្ងៃនេះ គឺចៅក្រមលោក ព្រំ វណ្ណៈ បានសម្រេចឃុំខ្លួនបណ្ដោះអាសន្ន ដែលបានបញ្ជូនពួកគេទៅមណ្ឌលអប់រំកែប្រែ១ មណ្ឌលអប់រំកែប្រែ២ ទៅពន្ធនាគារព្រៃសរួចហើយ»។ មេធាវីរូបនេះថា ចៅក្រមស៊ើបសួរបានសាកសួរសកម្មភាពការពាររបស់ក្រុមយុវជនទាំង ៣រូប ចាប់តាំងពីឆ្នាំ២០១២ រហូតដល់ឆ្នាំ២០២១ នេះ។
អ្នកស្រី ចក់ សុភាព អះអាងថា ប្រការដែលមានអ្នកស្នេហាជាតិ ស្រឡាញ់បរិស្ថាន ខ្វាយខ្វល់ពីធនធានធម្មជាតិត្រូវបានចាប់ ចោទ និងលាបពណ៌ នោះហើយមហន្តរាយរបស់ជាតិកំពុងតែខិតជិតចូលមកដល់។ អ្នកស្រីអះអាងថា មិនគួរមានពលរដ្ឋណាម្នាក់ត្រូវបានចោទប្រកាន់ថាបានរួមគំនិតក្បត់ដោយសារតែការស្នេហាជាតិ មានមនសិការចំពោះជាតិ ខណៈដែលកម្ពុជាដាក់ស្លាកថាជាប្រទេសមានសន្តិភាពនោះឡើយ៕