អ្នកឃ្លាំមើលសង្គម អះអាងឡើងថា រដ្ឋាភិបាលខ្មែរពិតជារសើបណាស់នៅពេលដែលរដ្ឋាភិបាលបរទេសលើកឡើងអំពីការរំលោភសិទ្ធិមនុស្សនៅកម្ពុជា ហើយជាញឹកញយ រដ្ឋាភិបាលកម្ពុជាតែងវាយបកទៅរដ្ឋាភិបាលបរទេសទាំងនោះវិញថា ការលើកឡើងរបស់ពួកគេ គឺជាការលូកដៃចូលក្នុងកិច្ចការផ្ទៃក្នុងរបស់កម្ពុជាយ៉ាងធ្ងន់ធ្ងរ។
អ្នកវិភាគនយោបាយនិងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកនៅថ្ងៃទី២៨ ខែមិថុនា ឆ្នាំ២០២១ ថា ការលើកឡើងរបស់រដ្ឋាភិបាលកម្ពុជា គឺដូចគ្នាទៅនឹងការអះអាងរបស់ក្រសួងការបរទេសក្នុងសម័យកម្ពុជាប្រជាធិបតេយ្យ ដែលមេដឹកនាំខ្មែរក្រហម គឺលោក អៀង សារី បានសរសេរកំណត់ទូតយ៉ាងវែងមួយច្បាប់កាលថ្ងៃទី២២ ខែមេសា ឆ្នាំ១៩៧៨ វាយបកទៅប្រទេសអង់គ្លេស វិញថា ប្រទេសអង់គ្លេស គ្មានសិទ្ធិលូកដៃចូលក្នុងកិច្ចការផ្ទៃក្នុងរបស់កម្ពុជាដាច់ខាត។
លោកអះអាងថា ការចេញកំណត់ទូតរបស់លោក អៀង សារី ទៅកាន់ប្រទេសអង់គ្លេស នេះ គឺធ្វើឡើងនៅពេលដែលរដ្ឋាភិបាលអង់គ្លេស បានលើកឡើងអំពីការរំលោភសិទ្ធិមនុស្សយ៉ាងធ្ងន់ធ្ងរនៅកម្ពុជានាពេលនោះ ព្រមទាំងស្នើឲ្យអង្គការសហប្រជាជាតិ និងសហគមន៍អន្តរជាតិ តែងតាំងអ្នករាយការណ៍ពិសេសដើម្បីឃ្លាំមើលស្ថានភាពសិទ្ធិមនុស្សនៅកម្ពុជាផងដែរ។
បណ្ឌិត ឡៅ ម៉ុងហៃ បញ្ជាក់ថា បន្ទាប់ពីអង្គការសហប្រជាជាតិ និងសហគមន៍អន្តរជាតិ បានដឹងពីបញ្ហានេះហើយ ក៏នាំគ្នារិះរកមធ្យោបាយដើម្បីបញ្ចប់ការរំលោភសិទ្ធិមនុស្សក្រោមរបប ប៉ុល ពត មុនប្រទេសវៀតណាមចូលឈ្លានពានរំលំរបបនោះទៅទៀត។ ប៉ុន្តែសហភាពសូវៀត និងប្រទេសកុម្មុយនីស្តមួយចំនួនជំទាស់នឹងសំណើនេះយ៉ាងខ្លាំង ដូច្នេះវិធានការនេះក៏ត្រូវអូសបន្លាយរហូតប្រទេសវៀតណាម មានឱកាសចូលឈ្លានពានតែម្តង។
ការអះអាងរបស់បណ្ឌិត ឡៅ ម៉ុងហៃ គឺធ្វើឡើងដើម្បីរិះគន់រដ្ឋាភិបាលកម្ពុជា ដែលតែងបដិសេធការលើកឡើងពីក្រុមអ្នកឃ្លាំមើលសិទ្ធិមនុស្ស និងសហគមន៍អន្តរជាតិនានាអំពីការរំលោភសិទ្ធិមនុស្សនៅកម្ពុជា ក្រោមហេតុផលថា កម្ពុជាមិនត្រូវការឲ្យបរទេសលូកលាន់កិច្ចការផ្ទៃក្នុងរបស់ខ្លួននោះទេ។
រដ្ឋាភិបាលកម្ពុជា តែងអះអាងថា ខ្លួនបានត្រៀមខ្លួនរួចជាស្រេចក្នុងការទប់ស្កាត់រាល់ការប៉ុនប៉ងបំផ្លាញសន្តិភាពនៅកម្ពុជា។ ជាងនេះទៀត កម្ពុជាតែងហាមសហគមន៍អន្តរជាតិថាកុំឲ្យជ្រៀតជ្រែកកិច្ចការផ្ទៃក្នុងរបស់ខ្លួន ព្រោះថាកម្ពុជា គឺជារដ្ឋឯករាជ្យ មានអធិបតេយ្យភាពរបស់ខ្លួនពេញលេញ មិនចំណុះឲ្យរដ្ឋបរទេសណាឡើយ។
កាលពីអំឡុងឆ្នាំ២០១៩ ក្រសួងការបរទេសរបស់កម្ពុជា បានចេញសេចក្ដីថ្លែងការណ៍មួយបញ្ជាក់ទៅកាន់សហគមន៍អន្តរជាតិថា រដ្ឋាភិបាលលោក ហ៊ុន សែន កំពុងប្រឆាំងទប់ស្កាត់គ្រប់មធ្យោបាយចំពោះរាល់ការប៉ុនប៉ងជ្រៀតជ្រែកកិច្ចការផ្ទៃក្នុងរបស់កម្ពុជាពីបរទេសខាងក្រៅយ៉ាងហ្មត់ចត់ ព្រោះថាការលូកដៃពីរដ្ឋបរទេសខាងក្រៅ តែងបង្កឲ្យមានអស្ថិរភាព និងបំផ្លាញដល់ដំណើរការលទ្ធិប្រជាធិបតេយ្យ និងការផ្សះផ្សាជាតិនៅកម្ពុជាផងដែរ។
អង្គការលើកលែងទោសអន្តរជាតិ (International Amnesty) បានចេញរបាយការណ៍កាលពីដើមខែមេសា ឆ្នាំ២០២១ ថា រដ្ឋាភិបាលលោក ហ៊ុន សែន បានចាប់ខ្លួនសកម្មជនបរិស្ថាន សកម្មជនព្រៃឈើ សកម្មជនដីធ្លី សកម្មជនការពារសិទ្ធិមនុស្ស លើសពីនេះបានធ្វើទុក្ខបុកម្នេញលើសកម្មជនបក្សប្រឆាំង និងរឹតត្បិតសិទ្ធិសេរីភាពបញ្ចេញមតិរបស់អ្នកសារព័ត៌មានយ៉ាងធ្ងន់ធ្ងរ។
ជុំវិញបញ្ហានេះ ក្រុមអ្នកឃ្លាំមើលសង្គម លើកឡើងថា ក្រោមកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ដែលនៅមានសុពលភាព កម្ពុជាមានកាតព្វកិច្ចគោរពសិទ្ធិមនុស្សឲ្យបានម៉ឺងម៉ាត់ ហើយប្រទេសដែលជាម្ចាស់ហត្ថលេខីទាំង ១៨ផ្សេងទៀត ក៏ត្រូវមានកាតព្វកិច្ចជួយជំរុញឲ្យមានការគោរពសិទ្ធិមនុស្សទៀតផង។
រដ្ឋធម្មនុញ្ញកម្ពុជា មាត្រា៣១ ចែងថា ព្រះរាជាណាចក្រកម្ពុជា ទទួលស្គាល់ និងគោរពសិទ្ធិមនុស្សដូចដែលមានចែងក្នុងធម្មនុញ្ញអង្គការសហប្រជាជាតិ សេចក្តីប្រកាសជាសកលស្ដីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយទាក់ទងនឹងសិទ្ធិមនុស្ស សិទ្ធិនារី និងសិទ្ធិកុមារ ដែលបានបង្កើតឡើងតាំងពីឆ្នាំ១៩៤៨ មក៕