ក្រុមអ្នកការពារសិទ្ធិការងារសម្ដែងការព្រួយបារម្ភថា ប្រសិនបើរោងចក្រ សហគ្រាស ឬក្រុមហ៊ុនទិញឧបករណ៍តេស្ដរហ័សយកទៅប្រើប្រាស់ក្នុងស្ថាប័ន ហើយបែរជាតម្រូវឲ្យបុគ្គលិក ឬកម្មករនិយោជិតចេញលុយថ្លៃប្រើប្រាស់ឧបករណ៍ធ្វើតេស្ដទាំងនោះ គឺដូចជាការបន្ថែមបន្ទុកទៅលើបុគ្គលិកកម្មកររបស់ពួកគេទៅវិញ។
ការអះអាងនេះ ធ្វើឡើងបន្ទាប់ពីក្រសួងប្រៃសណីយ៍ និងទូរគមនាគមន៍ ប្រកាសលក់ឧបករណ៍ធ្វើតេស្ដរហ័សដល់ម្ចាស់ក្រុមហ៊ុន រោងចក្រ សហគ្រាស និងស្ថាប័នពាក់ព័ន្ធកាលពីពេលថ្មីៗនេះ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី២ ខែកក្កដា នេះថា ការប្រកាសដាក់ចេញនូវដំណើរការធ្វើតេស្ដដោយខ្លួនឯងតាមរោងចក្រសហគ្រាសបែបនេះ លោកបារម្ភថា អាចមានករណីបង្ខំ ឬតម្រូវឲ្យបុគ្គលិកកម្មករក្នុងស្ថាប័នទាំងនោះត្រូវតែធ្វើតេស្ដ ទាំងដែលពួកគេមិនត្រូវបានសង្ស័យថាវិជ្ជមានវីរុស Covid-19 ផងនោះ ដែលនេះគឺជាប៉ះពាល់ដល់សិទ្ធិបុគ្គលផងដែរ។
លោកអះអាងថា ការធ្វើតេស្ដរកវីរុស Covid-19 គួរតែផ្ដោតសំខាន់លើអ្នកដែលមានការសង្ស័យថាមានជំងឺ Covid-19 ឬអ្នកដែលបានប៉ះពាល់ដោយផ្ទាល់ ឬប្រយោលជាមួយអ្នកវិជ្ជមានវីរុស Covid-19 ឬអ្នកដែលបានចាកចេញពីតំបន់រស់នៅរបស់ខ្លួនជាដើម ជាជាងការតម្រូវឲ្យធ្វើតេស្ដលើបុគ្គលិកកម្មករដែលមិនបានពាក់ព័ន្ធដូចករណីរៀបរាប់ខាងលើបែបនេះ។
លោកបញ្ជាក់ទៀតថា លោកហាក់មិនយល់ពីដំណើរការរបស់រដ្ឋាភិបាលដែលអនុញ្ញាតឲ្យក្រសួងប្រៃសណីយ៍ និងទូរគមនាគមន៍ ដើរតួនាទីលក់ឧបករណ៍តេស្ដរហ័សនេះ ព្រោះថាទាក់ទិននឹងបរិក្ខារសុខាភិបាលមានតែក្រសួងសុខាភិបាលប៉ុណ្ណោះដែលមានជំនាញ និងសិទ្ធិទទួលស្គាល់បរិក្ខារសម្រាប់យកទៅប្រើប្រាស់លើជំនាញរបស់ខ្លួន។
កាលពីថ្ងៃទី១ ខែកក្កដា ឆ្នាំ២០២១ ក្រសួងប្រៃសណីយ៍ និងទូរគមនាគមន៍ បានប្រកាសលក់ឧបករណ៍តេស្ដរហ័សអង់ទីហ្សែន Covid-19 ដល់ម្ចាស់ក្រុមហ៊ុន សហគ្រាស រោងចក្រ ដែលមានបំណងចង់យកសំណាកលើបុគ្គលិក និយោជិត កម្មកររបស់ខ្លួនដោយខ្លួនឯងក្នុងការរកវីរុស Covid-19 ឲ្យបានទាន់ពេលវេលា។
ប្រភពដដែលបញ្ជាក់ថា ក្រសួងប្រៃសណីយ៍ និងទូរគមនាគមន៍ នឹងសហការជាមួយស្ថាប័នពាក់ព័ន្ធ ដើម្បីបណ្តុះបណ្តាលលើការយកសំណាកនេះឱ្យបានត្រឹមត្រូវ និងមានប្រសិទ្ធភាព មុននឹងប្រគល់ឧបករណ៍តេស្ដរហ័សនេះជូនដល់គ្រឹះស្ថាន សហគ្រាស ឬក្រុមហ៊ុន យកទៅប្រើប្រាស់ដោយខ្លួនឯង។ ក្រសួងក៏បានបញ្ជាក់បន្ថែមថា ឧបករណ៍នេះ ក្រសួងនឹងលក់ជូនត្រឹមតែតម្លៃ ៣,៧ដុល្លារប៉ុណ្ណោះក្នុង ១ឈុត ដែលជាតម្លៃដើមនាំចូលពីប្រទេសកូរ៉េខាងត្បូង។
ការប្រកាសលក់ឧបករណ៍តេស្ដរហ័សនេះ ធ្វើឡើងបន្ទាប់ពីលោក ហ៊ុន សែន បានចេញបទបញ្ជាកាលពីថ្ងៃទី១ ខែកក្កដា ឆ្នាំ២០២១ ឲ្យក្រសួងពាក់ព័ន្ធលក់ឧបករណ៍តេស្ដរហ័សទៅឲ្យបណ្តាក្រុមហ៊ុន សហគ្រាសនានា ដើម្បីពួកគេអាចធ្វើតេស្ដរកវីរុស Covid-19 ដោយខ្លួនឯង ដែលជាការបង្កលក្ខណៈងាយស្រួលក្នុងការគ្រប់គ្រងនៃការឆ្លងវីរុសនេះឲ្យកាន់តែមានប្រសិទ្ធភាពថែមទៀត។
របាយការណ៍ក្រសួងសុខាភិបាល បានបង្ហាញថា កម្ពុជាមានឧបករណ៍តេស្ដរហ័សរកវីរុស Covid-19 ចំនួនជាង ១លាន ១សែនឈុតនៅក្នុងឃ្លាំងស្រាប់សព្វថ្ងៃនេះ ហើយកម្ពុជាក៏នឹងទទួលបាន ១លានឈុតបន្ថែមទៀតក្នុងខែកក្កដា ឆ្នាំ២០២១ នេះផងដែរ។
ជុំវិញការឆ្លងវីរុស Covid-19 នេះ ក្រសួងសុខាភិបាលកម្ពុជា បានអះអាងនៅថ្ងៃទី២ ខែកក្កដា ឆ្នាំ២០២១ នេះថា ខ្លួនរកឃើញអ្នកឆ្លងវីរុស Covid-19 ថ្មីចំនួន ៩៦៦នាក់ និងអ្នកជាសះស្បើយថ្មីចំនួន ៦៥០នាក់ ខណៈអ្នកស្លាប់ថ្មីបានកើនឡើងដល់ទៅ ៣២នាក់ឯណោះ។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ៥ម៉ឺន ២ពាន់នាក់ហើយ និងអ្នកដែលជាសះស្បើយសរុបមានចំនួនជាង ៤ម៉ឺន ៥ពាន់នាក់ ដោយឡែកអ្នកស្លាប់សរុបបានកើនឡើងដល់ ៦៦០នាក់ហើយនៅថ្ងៃសុក្រ សប្តាហ៍នេះ៕