28 C
Phnom Penh

អ្នកឃ្លាំមើល​សង្គម​ជំរុញ​រដ្ឋាភិបាល​កម្ពុជា​អនុវត្ត​វិធានការ​សុខាភិបាល​ដោយ​យកចិត្ត​ទុកដាក់

បទវិភាគ

មន្ត្រី​ជាន់ខ្ពស់​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស ដែល​ហៅ​កាត់​ថា សង់ត្រាល់ បាន​ជំរុញ​ឲ្យ​រដ្ឋាភិបាល​កម្ពុជា​អនុវត្ត​វិធានការ​សុខាភិបាល​ដោយ​យកចិត្ត​ទុកដាក់​ជាទីបំផុត ដើម្បី​ធានា​បាន​នូវ​ប្រសិទ្ធភាព​ក្នុង​ការ​ទប់ស្កាត់​ការ​ឆ្លង​វីរុស Covid-19 បាន ១០០%។

នាយក​ប្រតិបត្តិ​អង្គការ​សង់ត្រាល់ លើកឡើង​បែប​នេះ​គឺ​បន្ទាប់ពី​ក្រសួង​សុខាភិបាល​កម្ពុជា ប្រកាស​ឲ្យ​ប្រើប្រាស់​សេវា​កក់​សណ្ឋាគារ​ធ្វើ​ចត្តាឡីស័ក​សម្រាប់​អ្នក​ដំណើរ​ទៅ​ពី​បរទេស​ដែល​ចូល​ទៅ​ក្នុង​ប្រទេស​កម្ពុជា កាលពី​ពេល​ថ្មីៗ​នេះ។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស លោក មឿន តុលា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៣ ខែ​កក្កដា ថា កម្ពុជា​អាច​មាន​បទពិសោធន៍​គ្រប់គ្រាន់​ក្នុង​ការ​អនុវត្ត​វិធានការ​សុខាភិបាល​ដើម្បី​ទប់ស្កាត់​ការ​ឆ្លង​វីរុស Covid-19 បន្ទាប់ពី​ការ​ផ្ទុះ​ឡើង​នូវ​ព្រឹត្តិការណ៍​សហគមន៍ ២០​កុម្ភៈ ដែល​បាន​បន្ត​រហូត​មក​ដល់​សព្វថ្ងៃ​នេះ។

លោក​អះអាង​ថា ការរៀបចំ​ឲ្យ​មាន​វិធានការ​ធ្វើ​ចត្តាឡីស័ក​បាន​ត្រឹមត្រូវ គឺជា​រឿង​ល្អ ប៉ុន្តែ​ការ​អនុវត្ត​ត្រូវតែ​ម៉ឺងម៉ាត់ និង​ហ្មត់ចត់​ជាទីបំផុត ចៀសវាង​ការ​អនុវត្ត​ដូច​ពេល​មុន​ផ្ទុះ​ការ​ឆ្លង​វីរុស Covid-19 ចូល​ក្នុង​សហគមន៍ ដែល​បណ្តាល​មក​ពី​មិន​មាន​វិធានការ​តឹងរ៉ឹង​លើ​ជនជាតិ​ចិន ក្នុង​អំឡុង​ពេល​នៃ​ការ​ប្រារព្ធ​ពិធី​ចូល​ឆ្នាំ​កាលពី​ដើម​ខែ​កុម្ភៈ ឆ្នាំ​២០២១ កន្លងទៅ​នោះ។

លោក មឿន តុលា អំពាវនាវ​ឲ្យ​ប្រជាពលរដ្ឋ​ខ្មែរ​គ្រប់​មជ្ឈដ្ឋាន ត្រូវតែ​បន្ត​យកចិត្ត​ទុកដាក់​លើ​ការ​ថែរក្សា​សុខភាព​ដោយ​ការ​អនុវត្ត​វិធានការ​សុខាភិបាល​ឲ្យ​បាន​ត្រឹមត្រូវ​ជាប្រចាំ ព្រោះ​ថា​ជំងឺ Covid-19 បំប្លែង​ខ្លួន​ប្រភេទ​ថ្មី​កំពុងតែ​កើត​មាន​នៅ​កម្ពុជា ដែល​មាន​លក្ខណៈ​កាច​សាហាវ​ជាង​វីរុស Covid-19 ប្រភេទ​ចាស់ ដូច្នេះ​ការ​រក្សា​អនាម័យ​គឺ​ត្រូវតែ​អនុវត្ត​ឲ្យ​បាន​ត្រឹមត្រូវ​ជាដាច់ខាត។

កាលពី​ថ្ងៃ​ទី​២២ ខែ​កក្កដា ឆ្នាំ​២០២១ ក្រសួង​សុខាភិបាល បាន​ចេញ​សេចក្តី​ប្រកាស​ព័ត៌មាន​ស្ដីពី​ការ​ដាក់​ឲ្យ​ប្រើប្រាស់​សេវា​កក់​សណ្ឋាគារ​ធ្វើ​ចត្តាឡីស័ក​សម្រាប់​អ្នកដំណើរ​ចូល​ទៅ​ក្នុង​ប្រទេស​កម្ពុជា តាម​ច្រក​អាកាសយានដ្ឋាន​អន្តរជាតិ​ភ្នំពេញ ដោយ​តម្កល់​លុយ​ចំនួន ២​ពាន់​ដុល្លារ​អាមេរិក​ជាមុន។ ក្នុង​នោះ សណ្ឋាគារ​ដែល​ត្រូវ​កំណត់​ធ្វើ​ជា​មណ្ឌល​ចត្តាឡីស័ក​សម្រាប់​ឲ្យ​អ្នក​ធ្វើដំណើរ​ពី​ក្រៅ​ប្រទេស​ស្នាក់​នៅ​នោះ គឺ​សណ្ឋាគារ​សុខា​ភ្នំពេញ និង​រ៉េស៊ីដង់ (Sokha Phnom Penh Hotel & Residence) និង​សណ្ឋាគារ ខតយ៉ាត ម៉ារីយ៉ុត ភ្នំពេញ (Courtyard by Marriott Phnom Penh)។

ប្រភព​ដដែល​អះអាង​ថា អ្នក​ធ្វើដំណើរ​ពី​ក្រៅ​ប្រទេស​ត្រូវ​កក់​ទៅ​សណ្ឋាគារ​ទាំង​ពីរ​ខាងលើ​ឲ្យ​បាន ២​ថ្ងៃ​មុន​នៃ​ការ​ចេញ​ដំណើរ។ ក្រោយ​ពេល​ទៅដល់​អាកាសយានដ្ឋាន​អន្តរជាតិ​ភ្នំពេញ អ្នកដំណើរ​ទាំងនោះ​ត្រូវ​បង្ហាញ​ឯកសារ​ដូច​ទិដ្ឋាការ​ដែល​មាន​សុពលភាព វិញ្ញាបនបត្រ​បញ្ជាក់​ពី​សុខភាព​ដែល​ចេញ​ដោយ​ប្រទេស​សាមី ថា​គ្មាន​ជំងឺ Covid-19 ក្នុង​រយៈពេល ៧២​ម៉ោង។ ជាង​នេះ​ទៀត ក៏​ត្រូវ​បង្ហាញ​លិខិត​លើ​ការ​ទិញ​កញ្ចប់​ធានា​រ៉ាប់រង​សុខភាព​សម្រាប់​ព្យាបាល​ជំងឺ Covid-19 និង​ត្រូវ​បង្ហាញ​លិខិត​បញ្ជាក់​ថា ខ្លួន​ពិតជា​បាន​កក់​បន្ទប់​ស្នាក់​នៅ​សម្រាប់​ធ្វើ​ចត្តាឡីស័ក​រយៈពេល ១៤​ថ្ងៃ​ផង​ដែរ។ ប៉ុន្តែ​ក្នុង​ករណី​រក​ឃើញ​ថា អ្នកដំណើរ​ណា​ម្នាក់​វិជ្ជមាន​វីរុស Covid-19 គឺ​ត្រូវ​សហការ​តាម​អាជ្ញាធរ​មាន​សមត្ថកិច្ច​ជាដាច់ខាត​ក្នុង​ពេល​ស្នាក់​នៅ​មណ្ឌល​ចត្តាឡីស័ក​ដែល​អាជ្ញាធរ​បាន​រៀបចំ​នោះ។

ជុំវិញ​បញ្ហា​នៃ​ការ​ឆ្លង​វីរុស Covid-19 នេះ ក្រសួង​សុខាភិបាល បាន​អះអាង​នៅ​ថ្ងៃ​ទី​២៣ ខែ​កក្កដា ឆ្នាំ​២០២១ ថា ខ្លួន​រក​ឃើញ​អ្នក​ឆ្លង​វីរុស Covid-19 ថ្មី​ចំនួន ៨២៥​នាក់ និង​អ្នក​ជាសះស្បើយ​ថ្មី​ចំនួន ៨៩៧​នាក់ ខណៈ​អ្នក​ស្លាប់​ថ្មី​មាន​ចំនួន ៣៤​នាក់​ផង​ដែរ។

ក្រសួង​បញ្ជាក់​ថា មក​ទល់​នឹង​ពេល​នេះ អ្នក​ឆ្លង​វីរុស Covid-19 សរុប​បាន​កើន​ឡើង​ដល់​ជាង ៧​ម៉ឺន ១​ពាន់​នាក់​ហើយ និង​អ្នក​ដែល​ជាសះស្បើយ​សរុប​មាន​ចំនួន​ជាង ៦​ម៉ឺន ៣​ពាន់​នាក់ ដោយឡែក​អ្នក​ស្លាប់​សរុប​បាន​កើន​ឡើង​ជាង ១២០០​នាក់​ហើយ​គិត​ត្រឹម​ថ្ងៃ​សុក្រ​សប្តាហ៍​នេះ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស