 ភាគីលោក សម រង្ស៊ី បានសម្រេចលាឈប់ពីតួនាទីរបស់ខ្លួនក្នុងតំណែងចំនួនបួន។){kind=link}
សមាជិកាគណបក្សសង្គ្រោះជាតិអាមេរិកាំង ឬហៅថា CNRP-A (CNRP-American) ភាគីលោក សម រង្ស៊ី បានសម្រេចលាឈប់ពីតួនាទីរបស់ខ្លួនក្នុងតំណែងចំនួនបួន។
លិខិតលាលែងពីតំណែងរបស់អ្នកស្រី Nalen Smith មន្ត្រីជាន់ខ្ពស់របស់គណបក្សសង្គ្រោះជាតិអាមេរិកាំង កាលពីថ្ងៃទី៣១ ខែកក្កដា ឆ្នាំ២០២១ ដែលសារព័ត៌មាន The Cambodia Daily ទើបទទួលពីប្រភពដែលសុំមិនបញ្ចេញឈ្មោះ ឲ្យដឹងថា អ្នកស្រីបានដាក់លិខិតលាលែងពីមុខតំណែងទាំងអស់របស់អ្នកស្រី រួមមាន៖
- តួនាទីជាហេរញ្ញិកប្រចាំរដ្ឋវ៉ាស៊ីនតោន
- អគ្គលេខាធិការរងទី១ នៃ CNRP-A
- ប្រធានមូលនិធិសង្គ្រោះប្រជាធិបតេយ្យខ្មែរ
- និងជាសមាជិក CNRP-A ប្រចាំសហរដ្ឋអាមេរិក ចាប់ពីថ្ងៃដាក់លិខិតនេះតទៅ។
សមាជិកាគណបក្សសង្គ្រោះជាតិ CNRP-A រូបនេះ អះអាងនៅក្នុងលិខិតលាលែងរបស់អ្នកស្រីថា ការសម្រេចចិត្តរបស់អ្នកស្រីមានការលំបាកណាស់ បើទោះបីជាអ្នកស្រីបានប្រើពេលពិចារណាលើបញ្ហានេះជាច្រើនលើកច្រើនសាក៏ដោយ តែទីបំផុត អ្នកស្រីនៅតែត្រូវលាលែងដោយសារហេតុផលជាច្រើន។ លិខិតដដែលឲ្យដឹងថា តួនាទីដែលអ្នកស្រីមានកន្លងមក គឺត្រូវគេបញ្ឈរចោលប្រៀបដូចជាគ្រោងឆ្អឹងអ៊ីចឹងដែរ ខណៈការខិតខំប្រឹងប្រែងរបស់អ្នកស្រីអស់រយៈពេលជាច្រើនឆ្នាំកន្លងមកនេះ បែរជាឥតប្រយោជន៍ និងគ្មានតម្លៃអ្វីទាំងអស់។
អ្នកស្រី Nalen Smith បញ្ជាក់ថា អ្នកស្រីបានពិភាក្សាជាមួយអនុប្រធានគណបក្សសង្គ្រោះជាតិ អ្នកស្រី មូរ សុខហួរ រួចហើយថា អ្នកស្រីនឹងមិនវិលត្រឡប់ទៅកាន់តួនាទីរបស់អ្នកស្រីវិញជាដាច់ខាត ហើយអ្នកស្រីក៏នឹងមិនមែនជាសកម្មជននៃផ្នែកណាមួយបន្តទៀតនោះដែរ។
គណបក្សសង្គ្រោះជាតិប្រចាំសហរដ្ឋអាមេរិក ឬ CNRP-A ត្រូវបានបង្កើតឡើងកាលពីថ្ងៃទី២ ខែធ្នូ ឆ្នាំ២០១៨ ក្នុងពិធីសមាជគណបក្សសង្គ្រោះជាតិ លើកទី២ ក្នុងទីក្រុងអាតាឡង់តា នៃទឹកដីសហរដ្ឋអាមេរិក ដែលបានប្រកាសតែងតាំងសមាជិក និងសមាជិកាជាន់ខ្ពស់ជាច្រើនរូបនៅពេលនោះ។
ការលាឈប់ពីគណបក្សសង្គ្រោះជាតិអាមេរិកាំង ឬ CNRP-A នេះ មិនមែនមានតែអ្នកស្រី Nalen Smith ម្នាក់ប៉ុណ្ណោះទេ ប៉ុន្តែក៏មានសមាជិកឬសមាជិកាផ្សេងៗទៀតបានលាឈប់ពីក្រុមនេះជាបន្តបន្ទាប់ដែរ។ ជាក់ស្តែង លោក យ៉ង់ ប្រេឌី ណុយ ឬ Brady Young សមាជិក CNRP-A ទើបតែបានដាក់លិខិតលាលែងពីតំណែងជាអនុប្រធាននៃក្រុមនេះកាលពីថ្ងៃទី១ ខែសីហា ឆ្នាំ២០២១ ផងដែរ ក្រោមហេតុផលថា លោកមិនឯកភាពនឹងមន្ត្រីជាន់ខ្ពស់របស់បក្សប្រឆាំងភាគីលោក សម រង្ស៊ី ដែលបាននាំគ្នាលួចទៅចូលរួមបង្កើតគណបក្សនយោបាយថ្មី គឺគណបក្សបេះដូងជាតិ ដោយបោះបង់ជំហរគណបក្សសង្គ្រោះជាតិចោល។
មួយរយៈពេលចុងក្រោយនេះ មន្ត្រីជាន់ខ្ពស់បក្សសង្គ្រោះជាតិ ត្រូវគេមើលឃើញថា បានបោះបង់ជំហរគណបក្សសង្គ្រោះជាតិទាំងស្រុង ដោយនាំគ្នាលួចទៅចូលរួមជួយគណបក្សដែលទើបបង្កើតថ្មីដើម្បីចូលរួមបោះឆ្នោតឆ្នាំ២០២២ ខាងមុខនេះ ខណៈមន្ត្រីមួយចំនួនបាននាំគ្នាសុំសិទ្ធិធ្វើនយោបាយឡើងវិញ និងខ្លះទៀតបានចុះចូលជាមួយគណបក្សកាន់អំណាច ជាថ្នូរនឹងការទទួលបានតួនាទីជាមន្ត្រីជាន់ខ្ពស់ក្នុងជួររដ្ឋាភិបាលកម្ពុជា ហើយក្នុងនោះក៏មានអតីតមន្ត្រីជាន់ខ្ពស់របស់បក្សប្រឆាំងភាគីលោក សម រង្ស៊ី ដូចជាអ្នកស្រី ថាក់ ឡានី និងអ្នកស្រី លី ស្រីវីណា ភរិយាទី២ របស់លោក យឹម សុវណ្ណ មន្ត្រីជាន់ខ្ពស់របស់គណបក្សសង្គ្រោះជាតិជាដើម៕