33 C
Phnom Penh

ជនជាតិ​ដើម​ភាគតិច​អំពាវនាវ​ឱ្យ​រដ្ឋាភិបាល​លុប​គម្រោង​កាត់​ឆ្វៀល​ដី​ព្រៃ​អភិរក្ស​ជាង​៣​ពាន់​ហិកតារ​នៅ​មណ្ឌលគិរី

ដោយ ឌឹ ខេមបូឌា ដេលី

បទវិភាគ

ក្រុម​ជនជាតិ​ដើម​ភាគតិច​ព្នង រស់នៅ​ខេត្ត​មណ្ឌលគិរី សម្ដែង​ការ​ព្រួយបារម្ភ​ថា ប្រសិនបើ​រដ្ឋាភិបាល​មិន​លុប​គម្រោង​កាត់​ឆ្វៀល​ដី​ព្រៃ​អភិរក្ស​ជាង ៣​ពាន់​ហិកតារ​ក្នុង​ដែន​ជម្រក​សត្វព្រៃ​ភ្នំ​ណាមលៀរ តាម​ការ​ស្នើសុំ​របស់​ជនជាតិ​ដើម​ភាគតិច​ទេ នោះ​គម្រោង​អភិវឌ្ឍន៍​សាងសង់​ច្រក​ទ្វារ​ព្រំដែន​កម្ពុជា-វៀតណាម នឹង​បង្ក​ជា​គ្រោះ​មហន្តរាយ​ធំធេង​បំផ្លាញ​ធនធាន​ធម្មជាតិ ជម្រក​សត្វព្រៃ ទឹកជ្រោះ ព្រៃស្រោង ទឹក​អូរ​ធម្មជាតិ និង​ប៉ះពាល់​កូនភ្នំ​តូចៗ​ជាច្រើន។

ក្រុម​សហគមន៍​ជនជាតិ​ដើម​ភាគតិច​ថា ក្រសួង​មហាផ្ទៃ​បាន​ឯកភាព​លើ​សំណើ​របស់​អភិបាល​ខេត្ត​មណ្ឌលគិរី ដែល​បាន​ស្នើ​ឡើង​នោះ​ហើយ ដោយ​បច្ចុប្បន្ន​នេះ​រង់ចាំ​តែ​សេចក្តី​សម្រេច​ពី​ទីស្ដីការ​គណៈរដ្ឋមន្ត្រី​តែប៉ុណ្ណោះ។

អភិបាល​ខេត្ត​មណ្ឌលគិរី លោក ស្វាយ សំអ៊ាង បាន​ផ្ញើ​លិខិត​កាលពី​ខែ​កុម្ភៈ ឆ្នាំ​២០២១ ទៅ​រដ្ឋមន្ត្រី​ក្រសួង​មហាផ្ទៃ លោក ស ខេង ស្នើសុំ​គោលការណ៍​ពិនិត្យ​សម្រេច​កាត់​ឆ្វៀល​ដី​ទំហំ​ជាង ៣​ពាន់​ហិកតារ (៣.២៦១,៣៦) ចេញពី​ដែន​ជម្រក​សត្វព្រៃ​ភ្នំ​ណាមលៀរ គ្រប់គ្រង​ដោយ​ក្រសួង​បរិស្ថាន។

តំណាង​ជនជាតិ​ដើម​ភាគតិច លោក គ្រើង តុលា ទាមទារ​ឱ្យ​រដ្ឋាភិបាល​ប្រុងប្រយ័ត្ន​ខ្ពស់​ក្នុង​ការ​អភិវឌ្ឍ​គម្រោង​នេះ ព្រោះ​ការ​កាត់​ឆ្វៀល​ដី​ព្រៃ​អភិរក្ស​យ៉ាង​ធំធេង​នេះ នឹង​បង្ក​គ្រោះ​មហន្តរាយ​ព្រៃឈើ​បន្សល់​ចុងក្រោយ។ លោក​ថា ប្រជា​សហគមន៍​រស់នៅ​ភូមិ​ពូលុ និង​ភូមិ​ឡាំម៉េះ បារម្ភ​ខ្លាំង​ព្រោះ​ទីតាំង​អភិវឌ្ឍន៍​ដែល​ប៉ះ​ចំ​តំបន់​ព្រៃ​អាស្រ័យផល​របស់​សហគមន៍​មួយ​ផ្នែក​ធំ និង​ដី​សមូហភាព ប្រសិនបើ​អាជ្ញាធរ​មិន​កាត់​ឆ្វៀល​ចេញ​ទេ អ្នក​ភូមិ​នឹង​រង​ទុក្ខវេទនា​បាត់បង់​ទីកន្លែង​ធ្វើ​កសិកម្ម​ចិញ្ចឹម​ជីវិត។

តំណាង​សហគមន៍​រូប​នេះ​បញ្ជាក់​ថា សហគមន៍​មិន​ប្រឆាំង​ការ​អភិវឌ្ឍ​ទេ ប្រសិនបើ​ការ​អភិវឌ្ឍ​នោះ​ធ្វើឡើង​ដោយ​ត្រឹមត្រូវ មាន​តម្លាភាព និង​សុចរិតភាព ហើយ​ផ្តល់​លទ្ធភាព​ឱ្យ​សហគមន៍​ចូលរួម​សម្រេច​ចិត្ត​លើ​គម្រោង​អភិវឌ្ឍន៍​ខ្នាត​ធំ​នេះ។

អភិបាល​ខេត្ត​មណ្ឌលគិរី លោក ស្វាយ សំអ៊ាង បាន​ថ្លែង​ក្នុង​លិខិត​ស្នើសុំ​នោះ​ថា ការរៀបចំ​សាងសង់​រដ្ឋបាល​ច្រក​ទ្វារ​ព្រំដែន​ថ្មី​នេះ នឹង​រួម​ចំណែក​ជំរុញ​កំណើន​សេដ្ឋកិច្ច​ជាតិ និង​លើក​កម្ពស់​ជីវភាព​ពលរដ្ឋ។ លោក​ថា បច្ចុប្បន្ន​តំបន់​រដ្ឋបាល​ច្រក​ទ្វារ​ព្រំដែន​ទ្វេភាគី​ណាមលៀរ ហ៊ុមព័ទ្ធ​ដោយ​ដីសម្បទាន​សេដ្ឋកិច្ច​របស់​ក្រុមហ៊ុន​ឯកជន​វិនិយោគ​ដំណាំ​កៅស៊ូ​តូច​ចង្អៀត ពុំ​អាច​រៀបចំ​តំបន់​រដ្ឋបាល​ឱ្យ​បាន​សមរម្យ​នៅឡើយ​ទេ។

អាជ្ញាធរ​ខេត្ត​មណ្ឌលគិរី បង្ហាញ​មោទនភាព​ចំពោះ​គម្រោង​អភិវឌ្ឍន៍​នេះ​ថា​នឹង​ជួយ​កំណើន​សេដ្ឋកិច្ច​ជាតិ និង​កែប្រែ​មុខមាត់​ខេត្ត​នេះ​ឱ្យ​រីកចម្រើន។ អាជ្ញាធរ​បញ្ជាក់​ក្នុង​លិខិត​ថា ការ​ស្នើសុំ​នេះ​នឹង​រៀបចំ​អគារ​រដ្ឋបាល បង្កើត​តំបន់​ទីផ្សារ ឃ្លាំង​ផ្លាស់ប្ដូរ​ទំនិញ តំបន់​ឧស្សាហកម្ម លំនៅឋាន​ពលរដ្ឋ និង​តំបន់​កសិកម្ម​ចម្រុះ។ ក្រៅពី​នេះ រដ្ឋបាល​ខេត្ត​មាន​គម្រោង​រៀបចំ​ផ្សារ​ទំនើប សណ្ឋាគារ កាស៊ីណូ ស្ថានីយ​ចម្រោះ​ទឹកស្អាត កសិដ្ឋាន​បណ្ដុះ​កូនឈើ និង​ដាំ​ស្ដារ​ព្រៃ​ឡើងវិញ​ជាដើម។

ក្រុម​មន្ត្រី​ជំនាញ​ចុះ​សិក្សា​តំបន់​អភិរក្ស​ណាំលៀរ​ដែល​ត្រូវ​កាត់​ឆ្វៀល ក្នុង​ខេត្ត​មណ្ឌលគិរី។

ផ្ទុយពី​ការ​លើកឡើង​របស់​អភិបាល​ខេត្ត ប្រជា​សហគមន៍​ជនជាតិ​ដើម​ភាគតិច​ព្នង លើកឡើង​ថា គម្រោង​អភិវឌ្ឍន៍​នេះ​ហាក់​កេងប្រវ័ញ្ច​សម្បត្តិ​ជាតិ រំលោភ​យក​ដី​ព្រៃ​តំបន់​នោះ​លក់​ឱ្យ​ក្រុម​ឧកញ៉ា ឬ​ក្រុម​អ្នក​មាន​អំណាច។ ចំណែក​ពលរដ្ឋ​មូលដ្ឋាន​រាប់​ពាន់​គ្រួសារ នឹង​បាត់បង់​ទីកន្លែង​អាស្រ័យផល​ព្រៃឈើ ហើយ​បង្កើត​ឱ្យ​មាន​បញ្ហា​ប្រឈម​ជាច្រើន ប៉ះពាល់​សិទ្ធិ និង​ជីវភាព​រស់នៅ​ជនជាតិ​ដើម​ភាគតិច។

ដែន​ជម្រក​សត្វព្រៃ​ភ្នំ​ណាមលៀរ ដែល​អាជ្ញាធរ​ស្នើសុំ​កាត់​ឆ្វៀល​ដើម្បី​ធ្វើជា​តំបន់​អភិវឌ្ឍន៍ គឺ​ទទួល​ស្គាល់​ដោយ​ព្រះរាជក្រឹត្យ​តាំងពី​ឆ្នាំ​១៩៩៣ គ្រប់គ្រង​ដោយ​ក្រសួង​បរិស្ថាន។ តំបន់​អភិរក្ស​នេះ​មាន​ផ្ទៃដី​ជាង ៥​ម៉ឺន​ហិកតារ (៥០៩៥៧) ឋិត​នៅ​ក្នុង​ឃុំ​ប៊ូស្រា ជិត​ស្រុក​ពេជ្រាដា លាតសន្ធឹង​ជាប់​ប្រទេស​វៀតណាម៕

ក្រុម​មន្ត្រី​ជំនាញ​ចុះ​សិក្សា​តំបន់​អភិរក្ស​ណាំលៀរ​ដែល​ត្រូវ​កាត់​ឆ្វៀល ក្នុង​ខេត្ត​មណ្ឌលគិរី។
ក្រុម​មន្ត្រី​ជំនាញ​ចុះ​សិក្សា​តំបន់​អភិរក្ស​ណាំលៀរ​ដែល​ត្រូវ​កាត់​ឆ្វៀល ក្នុង​ខេត្ត​មណ្ឌលគិរី។

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស