មេដឹកនាំបក្សប្រឆាំងអំពាវនាវឲ្យពលរដ្ឋបន្តយកចិត្តទុកដាក់ការពារសុវត្ថិភាព ថែរក្សាសុខភាព និងចូលរួមសហការប្រយុទ្ធប្រឆាំងនឹងមេរោគឆ្លងកាចសាហាវ Covid-19 ឲ្យបានម៉ឺងម៉ាត់ ដើម្បីសុភមង្គលគ្រួសារ សហគមន៍ និងប្រទេសជាតិ។
ប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាព លោក កឹម សុខា បានលើកឡើងថា បច្ចុប្បន្ននេះ មេរោគ Covid-19 បំប្លែងថ្មីកំពុងរាតត្បាតធ្ងន់ធ្ងរនៅកម្ពុជា ជាពិសេសនៅតាមសហគមន៍ ដូច្នេះសូមប្រជាពលរដ្ឋបង្កើននូវការប្រុងប្រយ័ត្នបន្ថែមទៀត។
លោកថា ការចាក់វ៉ាក់សាំងគឺរឿងសំខាន់មួយក្នុងការទប់ស្កាត់ការចម្លងវីរុស Covid-19 ដែលត្រូវចាក់ជូនពលរដ្ឋដើម្បីបញ្ចៀស និងកាត់បន្ថយការឆ្លងនៃវីរុសនេះឲ្យបានកាន់តែច្រើន។
កាលពីថ្ងៃទី១៦ ខែសីហា ឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា បាននាំយកជំនួយសប្បុរសធម៌មួយចំនួនដើម្បីចែកជូនដល់ពលរដ្ឋដែលកំពុងជួបការលំបាកផ្នែកសេដ្ឋកិច្ច ជាពិសេសពលរដ្ឋងាយរងគ្រោះដោយសារជំងឺ Covid-19 និងមណ្ឌលចាក់វ៉ាក់សាំងមួយចំនួន។
ប្រធានគណបក្សសង្គ្រោះជាតិដែលកំពុងរឹតត្បិតសេរីភាព លោក កឹម សុខា បានសរសេរលើគណនី Facebook របស់លោកថា ក្នុងការចូលរួមទប់ស្កាត់ការរាលដាលនៃមេរោគ Covid-19 នេះ លោកបានស្នើសុំវ៉ាក់សាំងប្រឆាំងវីរុស Covid-19 ពីបណ្តាប្រទេសជាមិត្តដោយផ្ទាល់មាត់ និងតាមលិខិតជាបន្តបន្ទាប់ដើម្បីជួយដល់ពលរដ្ឋកម្ពុជា។
ជុំវិញបញ្ហានេះ ក្រុមអ្នកសង្កេតការណ៍បានអះអាងថា ចាប់តាំងពីពលរដ្ឋរងផលប៉ះពាល់ដោយសារជំងឺ Covid-19 មក លោក កឹម សុខា បានដឹកនាំធ្វើសកម្មភាពមនុស្សធម៌ក្នុងការចែកអំណោយជូនពលរដ្ឋដែលមានជីវភាពទីទ័លខ្លាំងតាមបណ្តារាជធានី-ខេត្តជាច្រើន ដូចជារាជធានីភ្នំពេញ ខេត្តតាកែវ ព្រះសីហនុ និងខេត្តត្បូងឃ្មុំ ជាដើម។
សកម្មភាពមនុស្សធម៌របស់លោក កឹម សុខា បានជះឥទ្ធិពលដល់អតីតមេបក្សប្រឆាំងលោក សម រង្ស៊ី ដែលបានប្រកាសលក់ប័ណ្ណនាឡិកាកាលពីអំឡុងខែមិថុនា ឆ្នាំ២០២១ កន្លងទៅដើម្បីប្រមូលលុយទិញស្បៀងផ្តល់ជូនពលរដ្ឋរងគ្រោះដោយសារជំងឺ Covid-19 ប៉ុន្តែត្រូវបានមហាជនចោទថា លោកប្រមូលលុយយកទៅដំណើរការបក្សថ្មីតែប៉ុណ្ណោះបន្ទាប់ពីលុយរាប់សិបម៉ឺនដុល្លារដែលប្រមូលបានពីការលក់ប័ណ្ណនាឡិកានេះ បានស្ងាត់បាត់ឈឹងទៅវិញរហូតមកទល់នឹងពេលនេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេសតាមប្រសាសន៍របស់លោក ហ៊ុន សែន ដែលបានឃុំខ្លួននៅមន្ទីរឃុំឃាំងត្រពាំងផ្លុង អស់រយៈពេល ១ឆ្នាំ។
ទោះជាយ៉ាងណាក៏ដោយ រហូតមកទល់នឹងពេលនេះ លោកនៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ ខណៈតុលាការកម្ពុជាប្រកាសផ្អាកសវនាការរបស់លោកជាបន្តបន្ទាប់ចាប់តាំងពីខែមីនា ឆ្នាំ២០២០ មក ក្រោមហេតុផលថាដោយសារកម្ពុជាកំពុងប្រឈមនឹងការឆ្លងវីរុស Covid-19៕