ព្រះសង្ឃខ្មែរក្រោមមួយអង្គជាព្រះចៅអធិការវត្តវង្សគតបុរីសេរីភ្នំពេញ ហៅវត្តភ្នំពេញថ្មី ខេត្តកំពង់ចាម ត្រូវបានអាជ្ញាធរ និងមន្ត្រីសង្ឃចាប់ឃាត់ព្រះកាយ រួចផ្សឹកនៅសាលាអនុគណស្រុកចំការលើ កាលពីយប់ថ្ងៃទី២ ខែកញ្ញា កន្លងទៅនេះ ដោយមិនទាន់ដឹងមូលហេតុច្បាស់លាស់។
សារព័ត៌មានព្រៃនគរ (The Prey Nokor News) បានចុះផ្សាយក្នុងបណ្ដាញសង្គមរបស់ខ្លួននៅរសៀលថ្ងៃទី៣ ខែកញ្ញា ថា ព្រះតេជព្រះគុណព្រះនាម ប៉ាង សុដា ត្រូវសមត្ថកិច្ចចាប់ព្រះកាយ បន្ទាប់ពីសមត្ថកិច្ចបានចូលទៅរុះរើ និងឆែកឆេរកុដិរបស់ព្រះអង្គ ប៉ុន្តែគេនៅមិនទាន់ដឹងថា សមត្ថកិច្ចបានរកឃើញសម្ភារៈជាភស្តុតាងអ្វីខ្លះដែលព្រះភិក្ខុអង្គនេះប្រព្រឹត្តកំហុសផ្ទុយទៅនឹងធម៌វិន័យព្រះពុទ្ធសាសនា ដើម្បីដាក់បន្ទុករហូតឈានដល់ការចាប់ផ្សឹកនោះនៅឡើយទេ។
តាមសេចក្តីប្រកាសព័ត៌មានរបស់មិត្តសមាគមខ្មែរកម្ពុជាក្រោម នៅថ្ងៃទី៣ កញ្ញា បានឲ្យដឹងថា ការចាប់ព្រះកាយព្រះតេជព្រះគុណ ប៉ាង សុដា គឺនគរបាលស្រុក ខេត្ត និងព្រះអនុគណស្រុក ព្រះមេគណខេត្តកំពង់ចាម បានមកឡោមព័ទ្ធ និងនាំខ្លួនដោយគ្មានមូលហេតុច្បាស់លាស់។
សេចក្ដីប្រកាសព័ត៌មានដដែលបានបញ្ជាក់ទៀតថា ការចាប់ខ្លួននេះធ្វើឡើងក្នុងស្ថានភាពយ៉ាងតក់ក្រហល់ និងមិនមានដីកាតាមនីតិវិធីច្បាប់ឡើយ។ សមត្ថកិច្ចថ្នាក់ឃុំ ស្រុក ខេត្ត និងមន្ត្រីសង្ឃខេត្តជាច្រើនរូបបាននិមន្ត និងចុះមកដល់ទីតាំងវត្តចាប់ខ្លួនទាំងព្រះអង្គមិនបានដឹងខ្លួនជាមុន និងមិនបានត្រៀមលក្ខណៈឲ្យបានត្រឹមត្រូវសូម្បីតែស្បែកជើងក៏គ្មានផង។
ប្រភពដដែលបញ្ជាក់ថា ចំណែកព្រះសង្ឃក្នុងវត្ត គណៈកម្មការវត្ត ក៏ត្រូវបានសមត្ថកិច្ចដកហូតទូរស័ព្ទទាំងអស់ដើម្បីលុបរូបថត ឬ VIDEO ដែលថតអំពីទិដ្ឋភាពនៃការចាប់ខ្លួននេះផងដែរ។ បន្ទាប់ពីការនាំខ្លួននេះ កុដិរបស់ព្រះអង្គត្រូវបានសមត្ថកិច្ចចូលរុះរើ ឆែកឆេរ និងបម្រាមមិនឲ្យមានជនណាមួយចូលជិតឡើយ។ បន្ថែមពីនោះ សមត្ថកិច្ចក៏ត្រូវបានពង្រាយកម្លាំងជុំវិញបរិវេណវត្តយ៉ាងតឹងរ៉ឹង។
រហូតមកដល់រសៀលថ្ងៃទី០៣ ខែកញ្ញា ទាំងក្រុមគ្រួសារ និងអង្គការសមាគមខ្មែរកម្ពុជាក្រោម នៅមិនទាន់បានទទួលដំណឹងជាផ្លូវការណាមួយថា ព្រះតេជព្រះគុណត្រូវបាននាំខ្លួនទៅកាន់ទីណានោះនៅឡើយទេ។
ទោះយ៉ាងណា លេខាធិការដ្ឋាននៃអង្គការសមាគមខ្មែរកម្ពុជាក្រោម បានអំពាវនាវដល់គណៈមន្ត្រីសង្ឃ និងសមត្ថកិច្ច ផ្តល់មូលហេតុច្បាស់លាស់នៃការចាប់ខ្លួននេះ និងសូមបង្ហាញទីកន្លែងឲ្យបានច្បាស់លាស់អំពីទីកន្លែងដែលព្រះតេជព្រះគុណ ប៉ាង សុដា កំពុងស្ថិតនៅដោយក្ដីអនុគ្រោះ។
សារព័ត៌មាន The Cambodia Daily នៅមិនទាន់អាចទាក់ទងទៅសមត្ថកិច្ចនគរបាល ឬព្រះមេគុណខេត្តកំពង់ចាម ដើម្បីសុំការពន្យល់ចំពោះករណីចាប់ខ្លួនព្រះតេជព្រះគុណ ប៉ាង សុដា បាននៅឡើយទេ។
បើតាមគេហទំព័រសារព័ត៌មានឈ្មោះ «ខ្មែរណាស់» បានចុះផ្សាយនៅល្ងាចថ្ងៃទី៣ កញ្ញា ដោយដកស្រង់សម្ដីលោក សេង សុមុនី មន្ត្រីនាំពាក្យក្រសួងធម្មការ និងសាសនា អះអាងថា ព្រះតេជព្រះគុណ ប៉ាង សុដា ត្រូវបានឃាត់ខ្លួនកាលពីម្សិលមិញ (ថ្ងៃទី២ កញ្ញា) ហើយត្រូវបានគណៈសង្ឃវិន័យចាប់ផ្សឹកប្រគល់ទៅឱ្យសមត្ថកិច្ច ដើម្បីបញ្ជូនទៅតុលាការ។ ប៉ុន្តែលោកមិនទាន់បញ្ជាក់ពីមូលហេតុនៃការចាប់ខ្លួនព្រះចៅអធិការនេះទេ ដោយគ្រាន់តែអះអាងថា តុលាការកំពុងអនុវត្តតាមនីតិវិធី។
ប្រភពពីសារព័ត៌មាន «ខ្មែរណាស់» ដដែលបានដកស្រង់សម្ដីលោក លី ប៊ុនឡុង អធិការរងនគរបាលស្រុកចំការលើ ឲ្យដឹងថា ដីកាចាប់ខ្លួនព្រះតេជព្រះគុណ ប៉ាង សុដា គឺបានចេញពីក្រសួងមហាផ្ទៃ ហើយអាជ្ញាធរខេត្តមិនបានដឹងរឿងនេះឡើយ។ លោកថ្លែងថា ខាងអធិការស្រុកចំការលើ ក៏មិនបានដឹងអំពីករណីចាប់ព្រះកាយព្រះតេជព្រះគុណ ប៉ាង សុដា អង្គនេះដែរ ដោយសារសមត្ថកិច្ចក្រសួងមហាផ្ទៃ ជាអ្នកចាប់ផ្ទាល់៕