មេដឹកនាំគណបក្សក្រៅរដ្ឋាភិបាលមួយរូបអះអាងថា ជនផ្ដាច់ការនៅលើពិភពលោកតែងយកប្រទេសជាតិធ្វើជាកម្មសិទ្ធិផ្ដាច់មុខសម្រាប់បក្ខពួក ពូជពង្សវង្សត្រកូលខ្លួនឯង ដោយរៀបចំប្រព័ន្ធគ្រប់គ្រងប្រទេសតាំងពីថ្នាក់ជាតិរហូតដល់ថ្នាក់មូលដ្ឋាន។
ប្រធានគណបក្សបំណងពលរដ្ឋ លោក អ៊ិត សារម្យ បានសរសេរលើគណនី Facebook របស់លោកនៅថ្ងៃទី៣ ខែវិច្ឆិកា នេះថា ជនផ្ដាច់ការតែងប្រើយន្តការជាបណ្ដាញ ឬ Network តាមរយៈយកសាច់ញាតិរបស់ខ្លួន ដូចជាកូនបង្កើត កូនប្រសា ឪពុកម្ដាយរបស់ពួកគេធ្វើជាថ្នាក់ដឹកនាំកំពូលៗរបស់ជាតិ ដែលមានឋានៈ ឬតួនាទីជារដ្ឋមន្ត្រី សមាជិករដ្ឋសភា និងជាសមាជិកព្រឹទ្ធសភាដែលសង្គមបែបនេះត្រូវគេមើលឃើញថា ជាសង្គមដែលធ្វើឱ្យពលរដ្ឋរស់ក្នុងស្ថានភាពជាទាសករក្នុងសម័យថ្មីបច្ចុប្បន្ននេះ។
ប្រធានគណបក្សរូបនេះអះអាងថា ពលរដ្ឋដែលរស់នៅក្នុងសង្គមផ្ដាច់ការ គ្មានសេរីភាពដូចមានចែងក្នុងរដ្ឋធម្មនុញ្ញស្ដីពីសិទ្ធិពលរដ្ឋដែលស្មើគ្នាចំពោះមុខច្បាប់ ដែលជាច្បាប់ត្រឹមត្រូវឡើយ។ ពួកគេតែងតែបង្កើតច្បាប់ដើម្បីបំបិទមាត់ពលរដ្ឋមិនឲ្យបញ្ចេញមតិចំពោះអំពើអយុត្តិធម៌ដែលបានកើតមានក្នុងសង្គម។
ការអះអាងនេះ ធ្វើក្រោយពេលប្រធានបក្សរូបនេះត្រូវបានអាជ្ញាធរក្រុងភ្នំពេញ នាំខ្លួនទៅសាកសួរទាក់ទិននឹងការបញ្ចេញមតិរបស់លោកលើបណ្ដាញសង្គម ដែលពួកគេសង្ស័យថាជាការរិះគន់ដល់ការដឹកនាំរបស់រដ្ឋាភិបាលកម្ពុជាបច្ចុប្បន្ន។
កាលពីអំឡុងខែមេសា ឆ្នាំ២០២១ ប្រធានគណបក្សបំណងពលរដ្ឋ លោក អ៊ិត សារម្យ ត្រូវកម្លាំងនគរបាលខណ្ឌពោធិ៍សែនជ័យ ដឹកនាំដោយលោក ហែម ដារិទ្ធ នាំគ្នាទៅព័ទ្ធផ្ទះរបស់លោក និងនាំខ្លួនមេបក្សរូបនេះទៅអគ្គស្នងការដ្ឋាននគរបាលជាតិ ដើម្បីសាកសួរអស់រយៈពេលពេញមួយថ្ងៃ ក្រោយរូបលោកបង្ហោះសារលើបណ្ដាញសង្គមរួចមក។
មាត្រា១៩ នៃកតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ បានចែងថា មនុស្សគ្រប់រូបត្រូវមានសិទ្ធិសេរីភាពនៃការសម្ដែងមតិ ហើយសិទ្ធិនេះត្រូវរាប់បញ្ចូលទាំងសេរីភាពក្នុងការស្វែងរកព័ត៌មាន ទទួល និងផ្សព្វផ្សាយព័ត៌មាន និងគំនិតយោបល់សព្វបែបយ៉ាងដោយគ្មានកំណត់ព្រំដែនអ្វីទាំងអស់ ទោះទាំងតាមផ្ទាល់មាត់ក្តី ទាំងតាមការសរសេរ ឬបោះពុម្ពក្តី ក្នុងទម្រង់នៃសិល្បៈ ឬតាមរយៈប្រព័ន្ធផ្សព្វផ្សាយដទៃទៀតក្តី។
ដោយឡែកមាត្រា៣១ នៃរដ្ឋធម្មនុញ្ញកម្ពុជា ចែងថា ប្រជាពលរដ្ឋខ្មែរមានសិទ្ធិស្មើគ្នាចំពោះមុខច្បាប់ និងករណីយកិច្ចដូចៗគ្នាទាំងអស់ ដែលកម្ពុជាទទួលស្គាល់ដូចមានចែងក្នុងរដ្ឋធម្មនុញ្ញនៃអង្គការសហប្រជាជាតិ សេចក្តីប្រកាសជាសកលស្ដីពីសិទ្ធិមនុស្ស ប៉ុន្តែការប្រើសិទ្ធិនេះត្រូវប្រព្រឹត្តតាមលក្ខខណ្ឌដែលកំណត់ក្នុងច្បាប់។
លោក ហ៊ុន សែន ធ្លាប់បានព្រមានកាលពីអំឡុងខែកញ្ញា ឆ្នាំ២០២១ ថា ប្រសិនបើអ្នកដែលហ៊ានបញ្ចេញមតិលើបណ្ដាញសង្គម Facebook រិះគន់លើរដ្ឋាភិបាលរបស់លោក សូមកុំបន្សល់នូវបទល្មើសឱ្យសោះ ទោះម៉ោង ១២យប់ ក៏ត្រូវតែចាប់ខ្លួនដែរ ព្រោះលោកចាត់ទុកថាទង្វើនោះគឺជាបទល្មើសជាក់ស្តែង។
ករណីនេះ ក្រុមអ្នកសង្កេតការណ៍លើកឡើងថា ប្រទេសកម្ពុជាស្ថិតក្រោមការគ្រប់គ្រងរបស់គណបក្សកាន់អំណាចដែលដឹកនាំដោយលោក ហ៊ុន សែន រយៈពេលជាង ៤០ឆ្នាំមកនេះ គឺកំពុងទាញកម្ពុជាទៅរកសង្គមផ្ដាច់ការ ជាជាងការអនុវត្តតាមកិច្ចព្រមព្រៀងសន្តិភាពទីក្រុងប៉ារីស ដែលជាច្បាប់តម្រូវឱ្យបើកទូលាយនូវសេរីភាពបញ្ចេញមតិរបស់ពលរដ្ឋ ដូចដែលរដ្ឋាភិបាលរបស់លោកកំពុងចាប់ខ្លួនអ្នករិះគន់លើការដឹកនាំរបស់ខ្លួនយ៉ាងអនាធិបតេយ្យនៅកម្ពុជាសព្វថ្ងៃនេះ៕