ប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាពសព្វថ្ងៃ លោក កឹម សុខា សម្ដែងមោទកភាព បន្ទាប់ពីព្រះមហាក្សត្រខ្មែរសម្តេចព្រះនរោត្តម សីហមុនី ចេញព្រះរាជសារថ្លែងអំណរគុណដល់រូបលោកកាលពីថ្ងៃពុធ សប្តាហ៍នេះ។
មេដឹកនាំបក្សប្រឆាំង លោក កឹម សុខា បានសរសេរលើគណនី Facebook របស់លោកនៅថ្ងៃទី៤ ខែវិច្ឆិកា ឆ្នាំ២០២១ នេះថា ព្រះករុណាព្រះបាទសម្តេចព្រះ នរោត្តម សីហមុនី បានចេញព្រះរាជសារជូនពរលោក បន្ទាប់ពីលោកបានចេញលិខិតថ្វាយព្រះពរជូនព្រះមហាក្សត្រក្នុងព្រះរាជពិធីខួប១៧ នៃការឡើងគ្រងរាជសម្បត្តិកាលពីពេលថ្មីៗនេះ។
ព្រះមហាក្សត្រខ្មែរព្រះករុណាព្រះបាទនរោត្តម សីហមុនី កាលពីថ្ងៃទី៣ ខែវិច្ឆិកា ឆ្នាំ២០២១ នេះ បានចេញព្រះរាជសារជូនពរប្រធានគណបក្សសង្គ្រោះជាតិ លោក កឹម សុខា ដែលកំពុងរងការធ្វើទុក្ខបុកម្នេញពីសំណាក់រដ្ឋាភិបាលឯកបក្សដែលដឹកនាំដោយបក្សកាន់អំណាចសព្វថ្ងៃនេះថា សូមឱ្យមេដឹកនាំបក្សប្រឆាំងរូបនេះមានសុខភាពល្អ និងជួបតែពរទាំងបួនប្រការជានិរន្តរ៍។
ប្រធានគណបក្សប្រឆាំង លោក កឹម សុខា បានថ្វាយព្រះពរព្រះមហាក្សត្រក្នុងពិធីខួប ១៧ឆ្នាំនៃការឡើងគ្រងរាជសម្បត្តិរបស់ព្រះអង្គ កាលពីថ្ងៃទី២៨ ខែតុលា ឆ្នាំ២០២១ កន្លងទៅ ថា លោកនៅតែគោរព និងដង្ហែតាមព្រះរាជតួនាទីរបស់ព្រះអង្គជានិច្ច ដូចដែលមានចែងក្នុងរដ្ឋធម្មនុញ្ញ ដើម្បីជាប្រយោជន៍ដល់ប្រទេសកម្ពុជា និងពលរដ្ឋខ្មែរទាំងអស់។
មេដឹកនាំបក្សប្រឆាំងរូបនេះលើកឡើងថា ព្រះមហាក្សត្រខ្មែរគឺជាព្រះប្រមុខរដ្ឋរបស់កម្ពុជា ដែលមានព្រះរាជតួនាទីសំខាន់ៗក្នុងការធានាឯករាជ្យជាតិ អធិបតេយ្យជាតិ បូរណភាពទឹកដី សេរីភាពរបស់ពលរដ្ឋ ការគោរពសិទ្ធិមនុស្ស គោរពសន្ធិសញ្ញាអន្តរជាតិ ដែលតួនាទីទាំងនេះបានចែងយ៉ាងច្បាស់ក្នុងរដ្ឋធម្មនុញ្ញដែលជាច្បាប់កំពូលរបស់កម្ពុជា។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស តាមប្រសាសន៍លោក ហ៊ុន សែន និងត្រូវបានឃុំខ្លួននៅមន្ទីរឃុំឃាំងត្រពាំងផ្លុង អស់រយៈពេល ១ឆ្នាំ។ បន្ទាប់មក នៅដើមខែកញ្ញា ឆ្នាំ២០១៨ លោកត្រូវបានអាជ្ញាធរដោះលែងឲ្យនៅក្រៅឃុំជាបណ្ដោះអាសន្ន ប៉ុន្តែមិនត្រូវបានអនុញ្ញាតឲ្យជួបអ្នកដទៃ ឬចាកចេញពីគេហដ្ឋានរបស់ខ្លួនឡើយ។
រហូតដល់ថ្ងៃទី១០ ខែវិច្ឆិកា ឆ្នាំ២០១៩ ទើបលោក កឹម សុខា ត្រូវបានផ្តល់សិទ្ធិសេរីភាពមួយកម្រិតទៀត គឺអាចធ្វើដំណើរក្នុងប្រទេស ប៉ុន្តែត្រូវហាមប្រាមការនិយាយពាក់ព័ន្ធនឹងរឿងនយោបាយ និងចេញក្រៅប្រទេសជាដាច់ខាត។ បែបនេះក្តី រហូតមកទល់នឹងពេលនេះ លោក កឹម សុខា នៅតែមានភាពស្អាតស្អំ ព្រោះតុលាការនៅតែមិនទាន់អាចកាត់ក្តីលើរូបលោកពីបទល្មើសណាមួយនៅឡើយទេ។
មន្ត្រីជាន់ខ្ពស់បក្សប្រឆាំង លោក សួន សុរីដា ធ្លាប់បានរិះគន់កាលពីពេលថ្មីៗនេះថា ការផ្អឹបសំណុំរឿងរបស់ប្រធានគណបក្សសង្គ្រោះជាតិ លោក កឹម សុខា ហើយបែរជាបន្តបើកសវនាការលើករណីផ្សេងជំនួសវិញនោះ បានបង្ហាញឲ្យឃើញនូវភាពអយុត្តិធម៌ដល់មេដឹកនាំបក្សប្រឆាំងផង និងបង្ហាញនូវការអនុវត្តច្បាប់ដែលមានស្តង់ដារពីរនៅកម្ពុជាផងដែរ។
ទោះយ៉ាងណា កាលពីអំឡុងខែកញ្ញា ឆ្នាំ២០២០ បុរសខ្លាំងនៅកម្ពុជា លោក ហ៊ុន សែន បានអះអាងថា ករណីលោក កឹម សុខា អាចនឹងត្រូវពន្យារពេល ៤ឆ្នាំទៀត គឺត្រូវពន្យាររហូតដល់ក្រោយការបោះឆ្នោតឃុំ-សង្កាត់ឆ្នាំ២០២២ និងក្រោយការបោះឆ្នោតជាតិក្នុងឆ្នាំ២០២៣ ឯណោះ៕