31 C
Phnom Penh

តុលាការ​កំពូល​សម្រេច​ទោស​ឱ្យ​អតីត​អភិបាល​ខេត្ត​តាកែវ​និង​បងប្រុស​ជាប់​ពន្ធនាគារ​ជាង​១០​ឆ្នាំ

ដោយ ឌឹ ខេមបូឌា ដេលី

បទវិភាគ

តុលាការ​កំពូល សម្រេច​ដាក់​គុក​អតីត​អភិបាល​ខេត្ត​តាកែវ រយៈពេល ១៣​ឆ្នាំ ហើយ​បងប្រុស​របស់​អតីត​អភិបាល​ខេត្ត​រូប​នេះ​ជាប់​ពន្ធនាគារ ១០​ឆ្នាំ​ក្នុង​សំណុំរឿង «មនុស្ស​ឃាត»។

ប្រធាន​ក្រុមប្រឹក្សា​ជំនុំជម្រះ​តុលាការ​កំពូល លោក និល ណុន បាន​ប្រកាស​សាលដីកា​ដោយ​កាត់​ឱ្យ​អតីត​អភិបាល​ខេត្ត​តាកែវ លោក ឡាយ វណ្ណៈ ជាប់​ពន្ធនាគារ ១៣​ឆ្នាំ និង​លោក ឡាយ ណារិទ្ធ ជាប់​ពន្ធនាគារ ១០​ឆ្នាំ​ដូច​ការ​សម្រេច​របស់​សាលាដំបូង​រាជធានី​ភ្នំពេញ និង​សាលា​ឧទ្ធរណ៍​ដែរ។

ការ​ប្រកាស​សាលដីកា​នៅ​ថ្ងៃ​សុក្រ ទី​២៤ ធ្នូ នេះ តុលាការ​មិន​បាន​ឱ្យ​ឆ្មាំ​ពន្ធនាគារ​យក​អតីត​អភិបាល​ខេត្ត​តាកែវ លោក ឡាយ វណ្ណៈ និង​លោក ឡាយ ណារិទ្ធ មក​ចូលរួម​ក្នុង​សវនាការ​នោះ​ទេ ដោយ​តុលាការ​ប្រកាស​សាលដីកា​កំបាំង​មុខ​ជន​ជាប់ចោទ​ទាំង​ពីរ។

លោក ឡាយ វណ្ណៈ អតីត​អភិបាល​ខេត្ត​តាកែវ

យ៉ាងណាក៏ដោយ អំឡុង​ពេល​សវនាការ​កាលពី​ថ្ងៃ​ទី​១០ ខែ​ធ្នូ ឆ្នាំ​២០២១ អតីត​អភិបាល​ខេត្ត​តាកែវ លោក ឡាយ វណ្ណៈ និង​លោក ឡាយ ណារិទ្ធ បាន​បដិសេធ​ចំពោះ​ការ​ចោទប្រកាន់​របស់​សាលាដំបូង​រាជធានី​ភ្នំពេញ ខណៈ​មេធាវី​ក៏​បាន​លើកឡើង​ពី​ភាព​មិន​ប្រក្រតី​ចំពោះ​ភស្តុតាង និង​របាយការណ៍​របស់​នគរបាល​យុត្តិធម៌​នៃ​ក្រសួង​មហាផ្ទៃ។ ភាព​មិន​ប្រក្រតី​ដែល​មេធាវី​បាន​លើកឡើង​ពាក់ព័ន្ធ​នឹង​សំណុំរឿង​លោក ឡាយ វណ្ណៈ និង​លោក ឡាយ ណារិទ្ធ នេះ គឺ​ចម្លើយ​របស់​សាក្សី​នៅ​ក្នុង​ហេតុការណ៍​នៃ​ការ​ស្លាប់​របស់​អ្នកស្រី ចេវ សុវឌ្ឍនា។

ក្នុង​សវនាការ​កាលពី​ថ្ងៃ​ទី​១០ ខែ​ធ្នូ ឆ្នាំ​២០២១ សហ​មេធាវី​លោក ឡាយ វណ្ណៈ និង​លោក ឡាយ ណារិទ្ធ បាន​លើកឡើង​ថា ចម្លើយ​ដែល​សាក្សី​ឆ្លើយ​ចំនួន ៤​ដង​នោះ គឺ​ខុស​គ្នា​ចំនួន ២​ដង។ បើ​តាម​មេធាវី ថា​ការ​ឆ្លើយ​នេះ ធ្វើឡើង​ទាំង​បង្ខំ ដោយសារ​ពេល​នោះ​សាក្សី​ត្រូវ​គេ​ឃុំ​ចំនួន ២០​ថ្ងៃ ខណៈ​កូន​របស់​សាក្សី​ដែល​នៅ​ផ្ទះ​ជាមួយ​អ្នកស្រី ចេវ សុវឌ្ឍនា ត្រូវ​បាន​គេ​យក​មក​ភ្នំពេញ​មិន​ឱ្យ​ជួប​ម្ដាយ​សាក្សី ដោយ​មិន​ដឹង​មូលហេតុ ជាដើម។

លោក ឡាយ ណារិទ្ធ បងប្រុស​របស់​លោក ឡាយ វណ្ណៈ អតីត​អភិបាល​ខេត្ត​តាកែវ

លើស​នេះ មេធាវី​ថា​របាយការណ៍ និង​ភស្តុតាង​របស់​នគរបាល​បង្ហាញ​ថា អ្នកនាង ចេវ សុវឌ្ឍនា ស្លាប់​ដោយ​ធ្វើ​អត្តឃាត​ខ្លួនឯង ដោយសារ​សាកសព​មិន​មាន​ស្លាកស្នាម​ដែល​បញ្ជាក់​ថា​មាន​ប្រើ​អំពើ​ហិង្សា​ឡើយ ប៉ុន្តែ​ចំណុច​ក្រោយ​នៃ​សេចក្ដី​សន្និដ្ឋាន​បែរជា​ថា​ករណី​នេះ​អាច​ជា​រឿង​ឃាតកម្ម​ទៅវិញ។

អតីត​អភិបាល​ខេត្ត​តាកែវ លោក ឡាយ វណ្ណៈ និង​លោក ឡាយ ណារិទ្ធ ត្រូវ​បាន​ចាប់​ខ្លួន​ពាក់ព័ន្ធ​សំណុំរឿង​ឃាតកម្ម​លើ​អ្នកស្រី ចេវ សុវឌ្ឍនា កាលពី​ឆ្នាំ​២០១៨។ ក្រោយមក ចៅក្រម​សាលាដំបូង​រាជធានី​ភ្នំពេញ បាន​សម្រេច​ផ្ដន្ទាទោស​លោក ឡាយ វណ្ណៈ ជាប់​ពន្ធនាគារ ១៣​ឆ្នាំ និង​លោក ឡាយ ណារិទ្ធ ជាប់​ពន្ធនាគារ ១០​ឆ្នាំ ពី​បទ «ឃាតកម្ម»។

ចំណែក​បុរស​ឈ្មោះ ម៉ែន សាម៉ៃ ដែល​ជា​អ្នក​បើកបរ​រថយន្ត​ឱ្យ​លោក ឡាយ វណ្ណៈ និង​បុរស​ឈ្មោះ ជឹម វុធ ដែល​ជា​ប្ដី​របស់​ស្ត្រី​អ្នក​បម្រើ​នៅ​ផ្ទះ​របស់​អ្នកស្រី ចេវ សុវឌ្ឍនា ក៏​ត្រូវ​បាន​តុលាការ​កាត់ទោស​ឱ្យ​ជាប់​ពន្ធនាគារ​ម្នាក់ៗ ២​ឆ្នាំ​ផង​ដែរ ក្រោម​បទ​ចោទ​ថា​បាន​លាក់​កំបាំង​តម្រុយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស