បុគ្គលិកក្រុមហ៊ុនកាស៊ីណូ ណាហ្គា វើលដ៍ (Naga World) ជាង ១ពាន់នាក់ បាននាំគ្នាបន្តធ្វើកូដកម្មដោយសន្តិវិធី ដើម្បីទាមទារលក្ខខណ្ឌការងារចំនួន ៩ចំណុចពីក្រុមហ៊ុន។ ក្នុងអំឡុងពេលតវ៉ានៅខាងមុខក្រុមហ៊ុននៅថ្ងៃទី២៧ ធ្នូ ក្រុមសន្តិសុខរាជធានីភ្នំពេញ បានរុញច្រាន និងបន្តដាក់របាំងរារាំងបុគ្គលិកដោយមិនឱ្យពួកគេចូលទៅជិតក្រុមហ៊ុនឡើយ។
ក្រុមបុគ្គលិកបានប្ដេជ្ញាចិត្តថា ទោះបីជាពួកគាត់ត្រូវអាជ្ញាធររុញច្រានយ៉ាងណាក៏ដោយ គឺពួកគាត់មិនបញ្ឈប់ការតវ៉ានេះទេ ប្រសិនបើភាគីក្រុមហ៊ុន និងអាជ្ញាធរពាក់ព័ន្ធមិនព្រមដោះស្រាយវិវាទការងារដល់ពួកគេឲ្យបានសមរម្យដែលអាចទទួលយកបាននោះ។
កន្លងមក ក្រុមបុគ្គលិកទាំងនោះធ្លាប់លើកឡើងថា បើសិនជាអាជ្ញាធរនៅតែមិនព្រមដោះស្រាយវិវាទការងារនេះ វាបង្ហាញឱ្យឃើញថា រដ្ឋាភិបាលនិងស្ថាប័នពាក់ព័ន្ធមានភាពលម្អៀងទៅភាគីក្រុមហ៊ុន។ ករណីនេះ ពួកគេថាវាក៏នឹងធ្វើឱ្យប៉ះពាល់ដល់មុខមាត់រដ្ឋាភិបាលដែរ។
បុគ្គលិកក្រុមហ៊ុនកាស៊ីណូ Naga World ជាង ១ពាន់នាក់ បាននាំគ្នាធ្វើកូដកម្មដោយសន្តិវិធីប្រហែល ១០ថ្ងៃមកហើយ ទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន ៣៦៥នាក់ ដែលមិនព្រមទទួលយកសំណងបញ្ចប់កិច្ចសន្យាការងារចូលបម្រើការងារឡើងវិញ។ លើសពីនេះ ក្រុមហ៊ុនត្រូវគិតប្រាក់បំណាច់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ សម្រាប់កម្មករនិយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក និងទាមទារឱ្យក្រុមហ៊ុនអនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្ដាលកាលពីថ្ងៃទី១០ ខែកញ្ញា ឆ្នាំ២០២១ ត្រង់ចំណុចទី៣ ដោយគិតប្រាក់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ។
ទាក់ទងរឿងនេះ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ធ្លាប់លើកឡើងលើទំព័រ Facebook របស់លោកកាលពីថ្ងៃទី១៩ ខែធ្នូ ឆ្នាំ២០២១ ក្នុងទំនោរការពារផលប្រយោជន៍ដល់ក្រុមហ៊ុនបើកល្បែងស៊ីសងមួយនេះថា មិនមានច្បាប់ ឬអនុសញ្ញាណាមួយដែលចែងអំពីការធ្វើការនៅកន្លែងណាមួយហើយ ត្រូវធ្វើមួយជីវិតនោះទេ ឬហាមក្រុមហ៊ុនសហគ្រាសមិនឱ្យកាត់បន្ថយបុគ្គលិកនោះដែរ។
បុគ្គលិកក្រុមហ៊ុនកាស៊ីណូ Naga World ចំនួន ១៣២៩នាក់ក្នុងចំណោមបុគ្គលិកជាង ៨ពាន់នាក់ ត្រូវបានក្រុមហ៊ុនប្រកាសបញ្ឈប់ក្រោមហេតុផលថា ក្រុមហ៊ុននេះជួបវិបត្តិហិរញ្ញវត្ថុដោយសារវិបត្តិជំងឺ Covid-19។ បើគិតចាប់តាំងពីក្រុមហ៊ុនបញ្ឈប់ពួកគេមកដល់បច្ចុប្បន្ននេះមានរយៈពេល ៨ខែហើយ ដែលវិវាទការងាររវាងបុគ្គលិក និងក្រុមហ៊ុនមិនទាន់មានដំណោះស្រាយឲ្យបានចប់។
ក្រោយពីមានការតវ៉ានេះ អង្គការ សមាគម និងសហជីពចំនួន២៥ បានចេញសេចក្ដីថ្លែងការណ៍មួយកាលពីដើមខែធ្នូ ឆ្នាំ២០២១ ដោយសម្ដែងការខកចិត្តចំពោះការបញ្ឈប់បុគ្គលិកកាស៊ីណូ Naga world នេះ។ បើតាមសេចក្ដីថ្លែងការណ៍នោះ បានចាត់ទុកការបញ្ឈប់បុគ្គលិកថា ក្រុមហ៊ុនមានចេតនារំលាយរចនាសម្ព័ន្ធថ្នាក់ដឹកនាំសហជីព ដោយពួកគេថាការធ្វើបែបនេះ មិនសមហេតុផល និងមិនអាចទទួលយកបានឡើយ៕