28 C
Phnom Penh

ស្ត្រី​មាន​ផ្ទៃពោះ​ម្នាក់​និង​បុគ្គលិក​ណាហ្គា​១៥​នាក់​ទៀត​ត្រូវ​បាន​ចាប់​ខ្លួន​ពេល​ធ្វើ​កូដកម្ម​ដោយ​សន្តិវិធី​ទាមទារ​លក្ខខណ្ឌ​ការងារ

ដោយ ឌឹ ខេមបូឌា ដេលី

បទវិភាគ

ស្ត្រី​មាន​ផ្ទៃពោះ​ម្នាក់ និង​មនុស្ស ១៥​នាក់​ទៀត ត្រូវ​បាន​សមត្ថកិច្ច​ចាប់​ខ្លួន​អំឡុង​ពេល​ពួកគេ​បន្ត​ធ្វើ​កូដកម្ម​ដោយ​សន្តិវិធី ដើម្បី​ទាមទារ​លក្ខខណ្ឌ​ការងារ និង​ទាមទារ​ឱ្យ​ដោះលែង​ថ្នាក់​ដឹកនាំ រួម​ទាំង​សកម្មជន​សហជីព​ក្រុមហ៊ុន​កាស៊ីណូ ណាហ្គា​វើលដ៍ (Naga world) ចំនួន ៦​នាក់ ដែល​ត្រូវ​ចាប់​ខ្លួន​នៅ​យប់​ឆ្លង​ឆ្នាំ​សកល​កន្លងមក​ថ្មីៗ​នេះ។

ក្រុម​បុគ្គលិក​ក្រុមហ៊ុន​កាស៊ីណូ ណាហ្គា​វើលដ៍ នៅ​រសៀល​ថ្ងៃ​ចន្ទ ទី​៣ មករា នេះ បាន​នាំគ្នា​បន្ត​ធ្វើ​កូដកម្ម​ដោយ​សន្តិវិធី​ជា​ថ្មី​ម្តង​ទៀត​នៅ​ក្បែរ​ក្រុមហ៊ុន ដើម្បី​ទាមទារ​លក្ខខណ្ឌ​ការងារ​ចំនួន ៩​ចំណុច និង​ទទួល​យក​បុគ្គលិក ៣៦៥​នាក់​ឱ្យ​ចូល​ធ្វើ​ការងារ​ឡើងវិញ។ ការ​តវ៉ា​នេះ​ត្រូវ​បាន​កងកម្លាំង​សមត្ថកិច្ច​ជាច្រើន​រារាំង​មិន​ឱ្យ​ទៅ​ជិត​ក្រុមហ៊ុន និង​បាន​ចាប់​ខ្លួន​ស្ត្រី​មាន​ផ្ទៃពោះ និង​បុគ្គលិក​សរុប ១៥​នាក់​ទៅ​បន្ថែម​ទៀត។

បើ​តាម​ក្រុម​បុគ្គលិក​ដែល​នាំគ្នា​ទៅ​ធ្វើ​កូដកម្ម​នា​រសៀល​ថ្ងៃ​ចន្ទ នេះ បាន​រៀបរាប់​ថា អាជ្ញាធរ​មិន​បាន​ជួយ​រក​ដំណោះស្រាយ និង​ការពារ​សុវត្ថិភាព​ពួកគាត់​ឡើយ តែ​បែរជា​មក​រារាំង​មិន​ឲ្យ​ពួកគេ​ធ្វើ​កូដកម្ម​នៅ​មុខ​ក្រុមហ៊ុន ណាហ្គា ព្រមទាំង​ចុះ​គំរាម​ដល់​បន្ទប់​ជួល និង​ផ្ទះ​របស់​ពួកគាត់​ថែម​ទៀត​ផង។ លើស​ពី​នេះ សមត្ថកិច្ច​បាន​ចាប់​ខ្លួន​សមាជិក​របស់​ពួកគេ​ចំនួន ១៥​នាក់ ក្នុង​នោះ​ស្ត្រី​មាន​ផ្ទៃពោះ ស្ថិត​នៅ​ម្តុំ​ណាហ្គា២ ខណៈ​ពួកគេ​ចូលរួម​ធ្វើ​កូដកម្ម​បន្ត​ទៀត ដើម្បី​ទាមទារ​លក្ខខណ្ឌ​ការងារ និង​ទាមទារ​ឱ្យ​ដោះលែង​ថ្នាក់​ដឹកនាំ​សហជីព និង​សកម្មជន​សហជីព​ចំនួន ៦​នាក់​ផ្សេង​ទៀត។

នៅ​យប់​ថ្ងៃ​ឆ្លង​ឆ្នាំ​សកល ពោល​គឺ​នៅ​ថ្ងៃ​ទី​៣១ ខែ​ធ្នូ ឆ្នាំ​២០២១ សមត្ថកិច្ច​រាជធានី​ភ្នំពេញ​បាន​ចាប់​ខ្លួន​ថ្នាក់​ដឹកនាំ និង​សកម្មជន​សហជីព​បុគ្គលិក​ក្រុមហ៊ុន ណាហ្គា​វើលដ៍ ចំនួន ១០​នាក់ និង​បញ្ជូន​ទៅ​សាលាដំបូង​រាជធានី​ភ្នំពេញ កាលពី​ល្ងាច​ថ្ងៃ​អាទិត្យ ទី​២ មករា ចំនួន ៦​នាក់ ខណៈ​មនុស្ស ៤​នាក់​ត្រូវ​បាន​ដោះលែង​វិញ​ក្រោយ​ពី​អប់រំ និង​ធ្វើ​កិច្ចសន្យា។ អ្នក​ទាំង ៦​នាក់​ត្រូវ​ចៅក្រម​ស៊ើបសួរ​សាលាដំបូង​រាជធានី​ភ្នំពេញ កំពុង​សាកសួរ​ក្រោម​បទ​ចោទប្រកាន់​ពី​បទ «ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជាអាទិ៍»។

អំឡុង​ពេល​ចៅក្រម​ធ្វើ​ការ​សាកសួរ​អ្នក​ទាំង ៦​នាក់​នោះ សមាជិក​បុគ្គលិក​ក្រុមហ៊ុន​មួយ​ចំនួន​បាន​នាំគ្នា​ទៅ​ប្រមូល​ផ្ដុំ​នៅ​ខាង​មុខ​តុលាការ ដើម្បី​គាំទ្រ និង​ទាមទារ​ឱ្យ​តុលាការ​ដោះលែង​ថ្នាក់​ដឹកនាំ និង​សកម្មជន​សហជីព​ទាំង ៦​នាក់​នោះ​វិញ។

បុគ្គលិក​ក្រុមហ៊ុន​កាស៊ីណូ ណាហ្គា​វើលដ៍ ម្នាក់ និយាយ​ថា ការ​តវ៉ា​របស់​ពួកគាត់​នៅ​មុខ​ក្រុមហ៊ុន​កន្លងមក​ធ្វើឡើង​ចេញ​ពី​ចិត្ត ដោយ​គ្មាន​អ្នក​ណា​ដឹកនាំ​នោះ​ទេ ហើយ​ការ​តវ៉ា​នេះ​ចង់​ឱ្យ​មាន​សហជីព​នៅ​កន្លែង​ការងារ និង​ដោះស្រាយ​លក្ខខណ្ឌ​ការងារ​ទាំង ៩​ចំណុច​តែប៉ុណ្ណោះ។ កញ្ញា​បង្ហាញ​ការ​សោកស្ដាយ​ចំពោះ​អាជ្ញាធរ និង​តុលាការ​ដែល​មិន​បាន​ជួយ​រក​យុត្តិធម៌​ឱ្យ​ពួកគាត់ តែ​បែរជា​មក​ចាប់​ខ្លួន និង​ចោទប្រកាន់​លើ​ថ្នាក់​ដឹកនាំ និង​សកម្មជន​សហជីព​ដែល​គ្រាន់តែ​សម្ដែង​មតិ​ទាមទារ​ឱ្យ​មាន​ដំណោះស្រាយ​វិវាទ​ការងារ​ទៅវិញ។

យ៉ាងណាក៏ដោយ ការ​ទៅ​ប្រមូល​ផ្ដុំ​នៅ​មុខ​តុលាការ​របស់​ក្រុម​បុគ្គលិក​ក្រុមហ៊ុន​កាស៊ីណូ ណាហ្គា​វើលដ៍ នេះ ក៏​ត្រូវ​ក្រុម​សមត្ថកិច្ច​ស្លៀកពាក់​ឯកសណ្ឋាន​ជាច្រើន​នាក់ និង​ស្លៀកពាក់​បែប​ស៊ីវិល ដើម្បី​តាមដាន និង​ថតរូប​សកម្មភាព​របស់​ក្រុម​បុគ្គលិក​នៃ​ក្រុមហ៊ុន ណាហ្គា ដែល​នាំគ្នា​ទៅ​គាំទ្រ​មនុស្ស​ចំនួន ៦​នាក់​ដែល​តុលាការ​កំពុង​សាកសួរ។

គិត​ចាប់តាំង​ពី​ថ្ងៃ​តវ៉ា​កាលពី​ខែ​ធ្នូ ឆ្នាំ​២០២១ រហូត​ដល់​ថ្ងៃ​ទី​៣ ខែ​មករា ឆ្នាំ​២០២២ នេះ ថ្នាក់​ដឹកនាំ និង​បុគ្គលិក​ណាហ្គា សរុប ២០​នាក់ ត្រូវ​បាន​សមត្ថកិច្ច​ចាប់​ខ្លួន ក្រោយ​មក​បញ្ជូន​ទៅ​តុលាការ​បើ​ទោះបីជា​ការ​ធ្វើ​កូដកម្ម​របស់​ពួកគេ​ដោយ​សន្តិវិធី ដើម្បី​ទាមទារ​ឱ្យ​ដំណោះស្រាយ​វិវាទ​ការងារ និង​ដោះស្រាយ​សំណង​ឲ្យ​បាន​សមរម្យ​ចំពោះ​ការ​បញ្ឈប់​បុគ្គលិក​ទាំងនោះ​យ៉ាងណាក៏ដោយ។

ការ​បញ្ឈប់​បុគ្គលិក​របស់​ក្រុមហ៊ុន​ភ្នាល់​ល្បែង​កណ្ដាល​ទីក្រុង​ភ្នំពេញ​នេះ ធ្វើឡើង​ក្នុង​មូលហេតុ​ដោយសារ​វិបត្តិ Covid-19 ប៉ុន្តែ​បើ​តាម​របាយការណ៍​ប្រចាំ​ឆ្នាំ​របស់​ក្រុមហ៊ុន Naga បាន​ឱ្យ​ដឹង​ទៀត​ថា នៅ​ឆ្នាំ​២០២០ ក្រុមហ៊ុន​ល្បែង​កាស៊ីណូ​ដ៏​ធំ​មួយ​នេះ​បាន​ទទួល​ប្រាក់​ចំណេញ​សុទ្ធ​ជាង ១០០​លាន​ដុល្លារ​នៅ​ឆ្នាំ​២០២០ ទោះបី​មាន​វិបត្តិ Covid-19 កើតឡើង​ក្ដី ហើយ​នៅ​ពាក់កណ្តាល​ឆ្នាំ​២០២១ ក្រុមហ៊ុន​នេះ​ទទួល​បាន​ប្រាក់​ចំណេញ​សុទ្ធ​រហូត​ដល់​ជាង ១៣០​លាន​ដុល្លារ​ឯណោះ។

ទោះបីជា​រក​ប្រាក់​ចំណេញ​ច្រើន​ក៏​ពិតមែន ប៉ុន្តែ​ក្រុមហ៊ុន​នេះ​បាន​កាត់​បុគ្គលិក​ចេញ និង​មិន​បាន​ដោះស្រាយ​អត្ថប្រយោជន៍​ជូន​ដល់​បុគ្គលិក​ឱ្យ​ស្រប​ទៅ​តាម​ច្បាប់​ការងារ​របស់​កម្ពុជា​ឡើយ។ មិន​ត្រឹម​តែប៉ុណ្ណោះ អាជ្ញាធរ និង​ក្រសួង​ការងារ មិន​បាន​ជួយ​អន្តរាគមន៍ ឬ​ការពារ​បុគ្គលិក​ដែល​ត្រូវ​បាន​បញ្ឈប់​ឡើយ ផ្ទុយទៅវិញ ទាំង​អាជ្ញាធរ និង​ក្រសួង បែរ​ជួយ​ក្រុមហ៊ុន​ទៅវិញ។ លើស​ពី​នេះ នៅ​ពេល​បុគ្គលិក​តវ៉ា​នោះ អាជ្ញាធរ​បែរជា​រារាំង និង​ចាប់​ខ្លួន​ថ្នាក់​ដឹកនាំ និង​សកម្មជន​សហជីព​ទៀត​ផង​ដែរ។ ក្នុង​នោះ ស្នងការដ្ឋាន​រាជធានី​ភ្នំពេញ​ចេញ​សេចក្ដី​បំភ្លឺ​កាលពី​ថ្ងៃ​ទី​១ ខែ​មករា ឆ្នាំ​២០២២ ថា ការ​ចាប់​ខ្លួន​បុគ្គលិក​ទាំងនោះ​ដោយសារ​ពួកគេ​នាំគ្នា​ធ្វើ​បាតុកម្ម​ខុស​ច្បាប់ ធ្វើ​ឱ្យ​ប៉ះពាល់​ដល់​សណ្ដាប់ធ្នាប់​សាធារណៈ និង​សុវត្ថិភាព​សង្គម។

នាយិកា​ប្រតិបត្តិ​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព បាន​លើកឡើង​ក្នុង​ទំព័រ Facebook ដោយ​ចាត់ទុក​ការ​ពង្រាយ​កម្លាំង និង​ចាប់​ខ្លួន​អ្នក​ធ្វើ​កូដកម្ម​ថា​មិន​មែន​ជា​ដំណោះស្រាយ​នោះ​ទេ ខណៈ​ការ​បន្ត​កូដកម្ម​របស់​បុគ្គលិក​នៃ​ក្រុមហ៊ុន ណាហ្គា​វើលដ៏ ដើម្បី​ទាមទារ​រក​ដំណោះស្រាយ​ចំពោះ​វិវាទ​ការងារ បើ​ទោះបី​មាន​តំណាង និង​សមាជិក​ខ្លួន​ត្រូវ​បាន​ឃាត់​ខ្លួន និង​បញ្ជូន​ទៅ​តុលាការ​សាកសួរ​ក៏ដោយ។ លើស​ពី​នេះ អាជ្ញាធរ​គួរ​ដោះស្រាយ​បញ្ហា​នេះ ដោយ​ការពារ​ផល​ប្រយោជន៍​របស់​ពលរដ្ឋ មិន​មែន​បង្ហាញ​ពី​ការ​គាបសង្កត់​ដល់​បុគ្គលិក​ឡើយ ហើយ​ថា​ឆ្នាំ​ថ្មី​គួរ​មាន​ការ​អធិដ្ឋាន​ថ្មី ដែល​ប្រសើរ​សម្រាប់​ពលរដ្ឋ។ អ្នកស្រី​ស្នើ​ឱ្យ​បញ្ឈប់​ការ​ចោទ ចាប់ និង​ចង​បន្ត​ទៀត ហើយ​ងាក​មក​បង្កើត​នូវ​ពន្លឺ​នៃ​យុត្តិធម៌ សមធម៌ និង​គុណធម៌​ជូន​ពលរដ្ឋ​វិញ។

ចំណែក​អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​សរសេរ​នៅ​លើ​គណនី Facebook របស់​លោក​ថា កៅអី​ប្រធាន​អាស៊ាន​របស់​លោក ហ៊ុន សែន ដែល​ខំប្រឹង​យក​មុខ​លើ​ឈ្មោះ​កម្ពុជា កាន់តែ​ឃើញ​រូបភាព​ចាំ​ចាប​ក្នុង​ខ្ទម​ហើយ ខណៈ​នៅ​ពេល​ប្រធាន​អាស៊ាន​កំពុង​ធ្វើ​ទុក្ខបុកម្នេញ​សាង​បាបកម្ម​ទៅលើ​បុគ្គលិក និង​កម្មករ​ក្នុង​ស្រុក​កាន់តែ​សាហាវ។ លើស​ពី​នេះ សហជីព និង​បុគ្គលិក​ក្រុមហ៊ុន ណាហ្គា​វើលដ៍ (Naga World) បាន​ប្រតិបត្តិ​យ៉ាង​ត្រឹមត្រូវ​ស្រប​ច្បាប់​ជាតិ រដ្ឋធម្មនុញ្ញ​ជាតិ និង​គោលការណ៍​ច្បាប់​អន្តរជាតិ។

កាលពី​ថ្ងៃ​ទី​២ ខែ​មករា ឆ្នាំ​២០២២ ក្រុម​ប្រតិភូ​ចរចា​វិវាទ​ក្រុមហ៊ុន ណាហ្គា​វើលដ៍ បាន​ចាត់ទុក​ការ​ចោទប្រកាន់​របស់​អាជ្ញាធរ​ទៅលើ​ក្រុម​កម្មករ​ដែល​ធ្វើ​បាតុកម្ម​អហិង្សា​ថា​បាន​ធ្វើ​ឱ្យ​ប៉ះពាល់​ដល់​សន្តិសុខ​សណ្ដាប់ធ្នាប់ និង​អាជីវកម្ម​របស់​ថៅកែ​នោះ វា​ជា​ការ​លើក​ទឹកចិត្ត​ឱ្យ​ភាគី​ក្រុមហ៊ុន​បន្ត​រំលោភ​ច្បាប់​បន្ត​ទៀត ដែល​នាំ​ឱ្យ​ប៉ះពាល់​ដល់​មុខមាត់​រដ្ឋាភិបាល​លើ​ឆាក​អន្តរជាតិ​ផង​ដែរ។

សេចក្តី​ប្រកាស​ព័ត៌មាន​ដដែល​បន្ត​ថា ដើមចម​ដែល​នាំ​ឱ្យ​កម្មករ​ធ្វើ​កូដកម្ម​ចំនួន ១៣​ថ្ងៃ​កន្លងមក​នេះ ដោយសារតែ​ក្រុមហ៊ុន​ព្រងើយ​កន្តើយ​មិន​អនុវត្ត​តាម​ច្បាប់ ហើយ​អាជ្ញាធរ​ពាក់ព័ន្ធ ក្រសួង​ការងារ មិន​មាន​ចេតនា​ពិតប្រាកដ​ក្នុង​ការ​រក​ដំណោះស្រាយ​ជូន​ពួកគេ​នោះ​ទេ។ ក្រៅពី​មិន​ដោះស្រាយ ឬ​ជួយ​ការពារ​សុវត្ថិភាព​បាតុករ​ហើយ អាជ្ញាធរ​បែរជា​ចោទ​ថា កម្មករ និង​តំណាង​សហជីព​ធ្វើ​បាតុកម្ម​ដោយ​ខុស​ច្បាប់ ដែល​ធ្វើ​ឱ្យ​ប៉ះពាល់​សណ្ដាប់ធ្នាប់​សាធារណៈ និង​សុវត្ថិភាព​សង្គម ព្រមទាំង​ប៉ះពាល់​អាជីវកម្ម​របស់​ក្រុមហ៊ុន​ទៅវិញ។

ក្រុម​អង្គការ​សង្គម​ស៊ីវិល និង​សហជីព​មួយ​ចំនួន​បាន​ចេញ​សេចក្ដី​ថ្លែងការណ៍​ដាច់ដោយឡែកៗ​ពី​គ្នា ដោយ​គាំទ្រ​ចំពោះ​ការ​ធ្វើ​កូដកម្ម​ដោយ​សន្តិវិធី​របស់​បុគ្គលិក​ក្រុមហ៊ុន ណាហ្គា​វើលដ៍ ជាង ១​ពាន់​នាក់។ ពួកគេ​លើកឡើង​ថា ការ​ធ្វើ​កូដកម្ម​អហិង្សា​ជា​ការ​អនុវត្ត​សិទ្ធិ​ជា​មូលដ្ឋាន ដែល​បាន​ធានា​ដោយ​រដ្ឋធម្មនុញ្ញ និង​ច្បាប់​ការងារ ច្បាប់​ស្ដីពី​សហជីព និង​ផ្អែក​តាម​លក្ខន្តិកៈ​របស់​សហជីព​ដែល​ចុះបញ្ជី​នៅ​ក្រសួង​ការងារ​ផង​ដែរ។

ក្រុម​អង្គការ និង​សហជីព​មួយ​ចំនួន​បង្ហាញ​ការ​មិន​ពេញចិត្ត និង​ថ្កោលទោស​ចំពោះ​វិធានការ​របស់​សមត្ថកិច្ច​ដែល​ចាប់​ខ្លួន​ថ្នាក់​ដឹកនាំ និង​សកម្មជន​សហជីព​ទាំងនោះ​ថា មិន​បាន​អនុវត្ត​តួនាទី និង​កាតព្វកិច្ច​របស់​ខ្លួន​ឱ្យ​ស្រប​តាម​ច្បាប់​ក្នុង​ការ​ការពារ​សុវត្ថិភាព​ក្រុម​បាតុករ ដែល​ធ្វើ​បាតុកម្ម​ដោយ​សន្តិវិធី​នោះ​ឡើយ។

បើ​ច្បាប់​ស្ដីពី​បាតុកម្ម​ដោយ​សន្តិវិធី​ត្រង់​មាត្រា​៤ ចែង​ថា បាតុកម្ម​ដោយ​សន្តិវិធី​សំដៅ​លើ​ការ​ប្រមូល​ផ្ដុំ ឬ​ការ​ដង្ហែ​ក្បួន​ដោយ​មនុស្ស​មួយ​ក្រុម ដើម្បី​ទាមទារ តវ៉ា ឬ​សម្ដែង​មតិ​ជា​សាធារណៈ​នូវ​មនោសញ្ចេតនា គំនិត ឬ​ឆន្ទៈ​របស់​ក្រុម​ខ្លួន​តាម​រូបភាព ឬ​មធ្យោបាយ​ផ្សេងៗ​ដោយ​សន្តិវិធី។

មាត្រា​១៧ នៃ​ច្បាប់​ស្ដីពី​បាតុកម្ម​ដោយ​សន្តិវិធី ចែង​ថា អាជ្ញាធរ​មាន​សមត្ថកិច្ច​ត្រូវ​ចាត់​វិធានការ​ការពារ​ដល់​ក្បួន​បាតុកម្ម​ដោយ​សន្តិវិធី ដើម្បី​ធានា​រក្សា​សន្តិសុខ សុវត្ថិភាព និង​សណ្ដាប់ធ្នាប់​សាធារណៈ​ឱ្យ​បាន​ល្អ​ប្រសើរ ហើយ​មិន​ត្រូវ​ជ្រៀតជ្រែក​ការ​ប្រព្រឹត្ត​ទៅ​ដល់​នៃ​ការ​ធ្វើ​បាតុកម្ម​ដោយ​សន្តិវិធី​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស