 បានប្រកាសជំហរថា ពួកគេមិនព្រមចូលចរចាជាមួយក្រសួង និងក្រុមហ៊ុនឡើយ បើសិនអាជ្ញាធរ និងក្រុមហ៊ុនមិនព្រមដោះលែងតំណាងពួកគេទាំង ៨នាក់ដែលត្រូវបានចាប់ខ្លួនដោយសារចូលរួមធ្វើកូដកម្មទាមទារលក្ខខណ្ឌការងារនោះ។){kind=link}
បុគ្គលិកក្រុមហ៊ុនកាស៊ីណូ ណាហ្គាវើលដ៍ (Naga World) បានប្រកាសជំហរថា ពួកគេមិនព្រមចូលចរចាជាមួយក្រសួង និងក្រុមហ៊ុនឡើយ បើសិនអាជ្ញាធរ និងក្រុមហ៊ុនមិនព្រមដោះលែងតំណាងពួកគេទាំង ៨នាក់ដែលត្រូវបានចាប់ខ្លួនដោយសារចូលរួមធ្វើកូដកម្មទាមទារលក្ខខណ្ឌការងារនោះ។
ការប្រកាសជំហរនេះ ធ្វើឡើងបន្ទាប់ពីក្រសួងការងារ បានចេញសេចក្ដីប្រកាសមួយកាលពីថ្ងៃទី៦ ខែមករា ឆ្នាំ២០២២ ដោយហៅបុគ្គលិក ណាហ្គាវើលដ៍ ដែលកំពុងធ្វើកូដកម្មឱ្យចូលរួមប្រជុំនាថ្ងៃទី៧ ខែមករា ឆ្នាំ២០២២ នៅអគ្គលេខាធិការដ្ឋាននៃគណៈកម្មការដើម្បីពិនិត្យផ្ទៀងផ្ទាត់ឡើងវិញនូវការទូទាត់ប្រាក់បំណាច់បញ្ចប់កិច្ចសន្យាការងារ ហើយឈានទៅបញ្ចប់ករណីវិវាទការងារ។ ក្រៅពីចេញសេចក្ដីប្រកាសហើយ មន្ត្រីក្រសួងការងារបានយកលិខិតនោះទៅអាននៅចំពោះកូដករដែលកំពុងបន្តធ្វើកូដកម្មនៅថ្ងៃសុក្រ នេះ។
អំឡុងពេលធ្វើកូដកម្ម ក្រុមបុគ្គលិក ណាហ្គាវើលដ៍ បានប្រាប់អ្នកសារព័ត៌មានថា ពួកគាត់នឹងមិនចូលតុចរចាដាច់ខាត ដរាបណាមិនមានតំណាងទាំង ៨នាក់នោះ។ ក្រុមកូដករបន្តថា បើសិនជាក្រសួងចង់ឱ្យពួកគាត់ឈប់តវ៉ា និងចូលចរចានោះ ត្រូវតែដោះលែងតំណាងទាំង ៨នាក់នោះឲ្យមានសេរីភាពវិញ បើមិនដូច្នោះទេ ពួកគាត់នៅតែបន្តធ្វើកូដកម្មដដែល។
ក្រុមកូដករបញ្ជាក់ថា មូលហេតុដែលទាមទារដោះលែងតំណាងទាំង ៨នាក់មកវិញ ដោយសារកន្លងមក តំណាងពួកគាត់ទាំង ៨នាក់នេះហើយដែលហ៊ានចេញមុខតវ៉ា និងការពារសិទ្ធិសេរីភាពរបស់ពួកគាត់ ហើយត្រូវបានក្រុមហ៊ុនណាហ្គាវើលដ៍ រំលោភបំពាន និងគាបសង្កត់អំឡុងពេលធ្វើការងារ។
ជាមួយគ្នានោះដែរ ក្រុមសហជីពដែលមកពីវិស័យផ្សេងបាននាំគ្នាទៅធ្វើសន្និសីទសារព័ត៌មានមួយនៅកន្លែងបុគ្គលិកណាហ្គាកំពុងបន្តធ្វើកូដកម្ម។ ក្នុងសន្និសីទសារព័ត៌មាន ក្រុមសហជីពទាំងនោះបានលើកឡើងថា ពួកគេនឹងចូលរួមគាំទ្រគ្រប់សកម្មភាពរបស់បុគ្គលិកណាហ្គា ដែលកំពុងធ្វើកូដកម្មដោយសន្តិវិធី។
ក្រុមសហជីពបន្តទៀតថា ការគាំទ្រ និងជំរុញនេះ មិនមែនជាទង្វើខុសនឹងច្បាប់ដូចការចោទប្រកាន់របស់អាជ្ញាធរឡើយ។ ផ្ទុយទៅវិញ អ្នកដែលធ្វើខុសច្បាប់ និងកំពុងរំលោភបំពានច្បាប់នោះ គឺក្រុមហ៊ុន និងអាជ្ញាធរទៅវិញទេ ដែលចាប់សហជីពតវ៉ាដោយសន្តិវិធី និងធានាដោយច្បាប់ជាតិ និងអន្តរជាតិនោះ។ លើសពីនេះ ក្រុមសហជីពទាំងនោះហៅការចាប់ខ្លួនថ្នាក់ដឹកនាំ និងសហជីពនៅណាហ្គា ទាំង ៨នាក់ ថាបានធ្វើឱ្យប៉ះពាល់ដល់សិទ្ធិសហជីព និងកម្មករនិយោជិតផ្សេងទៀត ហើយវិធានការ និងទង្វើបែបនេះបានជំរុញឱ្យថៅកែរំលោភសិទ្ធិកម្មករ និងសហជីពបន្ថែមទៀត។
ករណីនេះ ពួកគេទាមទារឱ្យអាជ្ញាធរ និងក្រុមហ៊ុនដោះលែងថ្នាក់ដឹកនាំ និងសមាជិកសហជីពនៃក្រុមហ៊ុនណាហ្គាវើលដ៍ ទាំង ៨នាក់វិញ និងដោះស្រាយវិវាទការងារជូនបុគ្គលិកណាហ្គាទៅតាមច្បាប់។
យ៉ាងណាក៏ដោយ កាលពីថ្ងៃទី៦ មករា ឯកអគ្គរដ្ឋទូតសហភាពអឺរ៉ុប ប្រចាំនៅកម្ពុជា បានសរសេរលើទំព័រ Facebook ថា សហភាពអឺរ៉ុប កំពុងតាមដានយ៉ាងយកចិត្តទុកដាក់ចំពោះការចាប់ខ្លួនថ្នាក់ដឹកនាំ និងសមាជិកសហជីពណាហ្គាវើលដ៍ជាបន្តបន្ទាប់។ លើសពីនេះ សហភាពអឺរ៉ុប ដែលមានសមាជិកចំនួន ២៥ប្រទេសនោះ ក៏បានអំពាវនាវឱ្យភាគីពាក់ព័ន្ធនៅក្នុងវិវាទការងារនៅក្រុមហ៊ុនកាស៊ីណូណាហ្គាវើលដ៍ ចរចាគ្នា និងដោះស្រាយបញ្ហាដោយសន្តិវិធី។
កាលពីខែសីហា ឆ្នាំ២០២០ សហភាពអឺរ៉ុប បានដកប្រព័ន្ធអនុគ្រោះពន្ធហៅកាត់ EBA ចំនួន ២០% ពីកម្ពុជា ក្រោយពីរដ្ឋាភិបាលកម្ពុជាមិនបានអនុវត្តតាមការអំពាវនាវរបស់ខ្លួន ដោយឱ្យស្ដារលទ្ធិប្រជាធិបតេយ្យ និងការរំលោភសិទ្ធិមនុស្សនៅកម្ពុជាឡើងវិញ។
ក្រៅពីការអំពាវនាវរបស់សហភាពអឺរ៉ុប នោះ ស្ថានទូតសហរដ្ឋអាមេរិក កាណាដា និងស្ថានទូតអូស្ត្រាលី ប្រចាំនៅប្រទេសកម្ពុជា ក៏បានចេញសេចក្ដីថ្លែងការណ៍ខ្លីរៀងៗខ្លួន ដោយអំពាវនាវឱ្យភាគីពាក់ព័ន្ធនឹងវិវាទការងារនៅក្រុមហ៊ុនកាស៊ីណូ ណាហ្គាវើលដ៍ ចរចាគ្នា និងដោះស្រាយបញ្ហាដោយសន្តិវិធី។ ស្ថានទូតទាំងនេះក៏បានលើកឡើងដែរថា ពួកគេកំពុងតាមដានយ៉ាងយកចិត្តទុកដាក់ក្រោយពីមានការចាប់ខ្លួនថ្នាក់ដឹកនាំ និងសមាជិកសហជីពណាហ្គា ខណៈក្រុមអ្នកជំនាញសិទ្ធិមនុស្សអង្គការសហប្រជាជាតិ ក៏បានចេញសេចក្ដីថ្លែងការណ៍មួយដែរ ដោយថ្កោលទោសចំពោះការចាប់ខ្លួន និងការឃុំខ្លួនថ្នាក់ដឹកនាំសហជីពណាហ្គាវើលដ៍ជាបន្តបន្ទាប់ ដែលជាការរំលោភបំពានច្បាប់សិទ្ធិមនុស្សធ្ងន់ធ្ងរ។
ក្រុមអ្នកជំនាញសិទ្ធិមនុស្សអន្តរជាតិទាំងនោះ ក៏បានស្នើឱ្យទម្លាក់ចោលការចោទប្រកាន់លើថ្នាក់ដឹកនាំ និងសកម្មជនសហជីពជាបន្ទាន់។
គិតចាប់តាំងពីថ្ងៃទី១៨ ខែធ្នូ ឆ្នាំ២០២១ ដល់ថ្ងៃទី៧ ខែមករា ឆ្នាំ២០២២ នេះ មានរយៈពេល ២១ថ្ងៃហើយដែលវិវាទការងារនៅក្រុមហ៊ុនណាហ្គាវើលដ៍ មិនទាន់ត្រូវបានដោះស្រាយ។ ការមិនដោះស្រាយនេះ បានធ្វើឱ្យអាជ្ញាធរចាប់ខ្លួនថ្នាក់ដឹកនាំ និងសកម្មជនសហជីពចំនួន ២៦នាក់អំឡុងពេលពួកគេបន្តធ្វើកូដកម្មអហិង្សា ទាមទារលក្ខខណ្ឌការងារជូនបុគ្គលិក ប៉ុន្តែក្រោយមក អាជ្ញាធរបានដោះលែងវិញចំនួន ១៨នាក់ ខណៈថ្នាក់ដឹកនាំសហជីព ៨នាក់ទៀតក្នុងនោះមានកញ្ញា ឈឹម ស៊ីថរ ដែរនោះ ត្រូវបានតុលាការសម្រេចឃុំខ្លួនបណ្ដោះអាសន្ននៅក្នុងពន្ធនាគារព្រៃស ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការបន្តចូលរួមធ្វើកូដកម្មទាមទារលក្ខខណ្ឌការងារចំនួន ៩ចំណុច និងឱ្យក្រុមហ៊ុនណាហ្គាវើលដ៍ ទទួលយកបុគ្គលិក ៣៦៥នាក់ចូលធ្វើការងារវិញ៕