29 C
Phnom Penh

អ្នក​ច្បាប់​ថា​មាន​អង្គ​ហេតុ​ជាច្រើន​ទៀត​ដែល​តុលាការ​ត្រូវ​សាកសួរ​លោក កឹម សុខា

ដោយ ឌឹ ខេមបូឌា ដេលី

បទវិភាគ

សហ​មេធាវី​ការពារ​ក្តី​ឱ្យ​ប្រធាន​គណបក្ស​សង្គ្រោះ​ជាតិ លើកឡើង​ថា ថ្ងៃ​អង្គារ​នេះ​តុលាការ​នឹង​ដំណើរការ​ក្តី​លើ​លោក កឹម សុខា បន្ត​ទៀត ព្រោះ​ថា​នៅ​មាន​អង្គ​ហេតុ​ជាច្រើន​ដែល​តុលាការ​ត្រូវ​សាកសួរ។ អ្នក​ច្បាប់​រូប​នេះ​បញ្ជាក់​ថា វា​ជា​រឿង​ល្អ ប្រសិនបើ​តុលាការ​បន្ថែម​ចំនួន​ថ្ងៃ​សវនាការ​ឱ្យ​បាន​ច្រើន​ថ្ងៃ​ក្នុង ១​សប្តាហ៍ ដើម្បី​ពន្លឿន​រឿង​ក្តី​របស់​មេដឹកនាំ​បក្ស​ប្រឆាំង​រូប​នេះ​ឱ្យ​ឆាប់​ចប់។

សហ​មេធាវី​ការពារ​ក្តី​មេដឹកនាំ​បក្ស​ប្រឆាំង អ្នកស្រី ម៉េង សុភារី បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៤ មករា ថា អ្នកស្រី​ទាមទារ​ឱ្យ​តុលាការ​ទម្លាក់​ចោល​នូវ​រាល់​បទ​ចោទ​ទាំងអស់​លើ​លោក កឹម សុខា ព្រោះ​ថា​កូន​ក្តី​របស់​អ្នកស្រី​មិន​បាន​ប្រព្រឹត្ត ឬ​មាន​បំណង​ឃុបឃិត​ជាមួយ​រដ្ឋ​បរទេស​ដូច​ការ​ចោទប្រកាន់​នោះ​ឡើយ។

អ្នកស្រី ម៉េង សុភារី អះអាង​ថា សកម្មភាព​នយោបាយ​កន្លងមក​របស់​មេដឹកនាំ​បក្ស​ប្រឆាំង លោក កឹម សុខា គឺ​តែងតែ​ធ្វើ​ការ​ប្រកួតប្រជែង​ដោយ​ស្រប​តាម​រដ្ឋធម្មនុញ្ញ​របស់​កម្ពុជា ហើយ​គោលជំហរ​នយោបាយ​របស់​លោក គឺ​មិន​យក​ជាតិសាសន៍​ឯង​ធ្វើជា​សត្រូវ ឬ​ញុះញង់​ឱ្យ​មាន​អំពើ​ហិង្សា ឬ​ក៏​មាន​បំណង​ធ្វើ​រដ្ឋប្រហារ​លើ​រដ្ឋាភិបាល​កម្ពុជា​ម្តង​ណា​ឡើយ។

ការ​អះអាង​នេះ ធ្វើឡើង​មុន​មួយ​ថ្ងៃ​នៃ​សវនាការ​របស់​មេដឹកនាំ​បក្ស​ប្រឆាំង លោក កឹម សុខា ដែល​នឹង​ដំណើរ​នៅ​ថ្ងៃ​អង្គារ​នេះ បន្ទាប់ពី​បាន​ចាប់ផ្តើម​ដំណើរការ​រឿង​ក្តី​របស់​លោក​ឡើងវិញ​កាលពី​សប្តាហ៍​មុន។

កាលពី​ថ្ងៃ​ទី​១៩ ខែ​មករា ឆ្នាំ​២០២២ កន្លងទៅ សាលាដំបូង​ក្រុង​ភ្នំពេញ​បាន​បើក​សវនាការ​លើ​សំណុំរឿង​ប្រធាន​គណបក្ស​សង្គ្រោះ​ជាតិ លោក កឹម សុខា ឡើងវិញ​បន្ទាប់ពី​ខកខាន​អស់​រយៈពេល​ប្រមាណ​ជា ២​ឆ្នាំ​កន្លងមក ហើយ​សវនាការ​របស់​ប្រធាន​គណបក្ស​សង្គ្រោះ​ជាតិ​នេះ​នឹង​ដំណើរការ​បន្ត​ទៀត​នៅ​ថ្ងៃ​ទី​២៥ ខែ​មករា ឆ្នាំ​២០២២ នេះ។

ទាក់ទិន​នឹង​សវនាការ​ប្រធាន​គណបក្ស​សង្គ្រោះ​ជាតិ​នេះ កាលពី​ថ្ងៃ​ទី​២១ ខែ​មករា ឆ្នាំ​២០២២ កន្លងទៅ បណ្ដាញ​តំណាងរាស្ត្រ​អាស៊ាន​ដើម្បី​សិទ្ធិមនុស្ស (ASEAN Parliamentarians for Human Rights) ដែល​ហៅ​កាត់​ថា APHR បាន​ចេញ​សេចក្ដី​ថ្លែងការណ៍​ស្នើ​ឲ្យ​កម្ពុជា​ទម្លាក់​រាល់​បទ​ចោទ​លើ​មេដឹកនាំ​គណបក្ស​សង្គ្រោះ​ជាតិ លោក កឹម សុខា ជាបន្ទាន់ និង​ដោយ​ឥត​លក្ខខណ្ឌ។

សមាជិក​ក្រុមប្រឹក្សាភិបាល​នៃ​សមាជិក​សភា​អាស៊ាន​ដើម្បី​សិទ្ធិមនុស្ស (APHR) លោក កាស៊ីត ភីរម្យ បាន​រិះគន់​រដ្ឋាភិបាល​កម្ពុជា​តាមរយៈ​សេចក្តី​ថ្លែងការណ៍​នោះ​ថា ការ​ចាប់​ខ្លួន​មេដឹកនាំ​បក្ស​ប្រឆាំង និង​ការ​រំលាយ​គណបក្ស​សង្គ្រោះ​ជាតិ គឺ​ពិតជា​មាន​គោលបំណង​លុប​បំបាត់​គណបក្ស​ប្រឆាំង​ពិតប្រាកដ​មួយ​របស់​កម្ពុជា។ លោក​ថា ករណី​នេះ​បង្ហាញ​ឲ្យ​ឃើញ​ថា នីតិរដ្ឋ​នៅ​កម្ពុជា​គឺ​មាន​តែ​ឈ្មោះ​តែប៉ុណ្ណោះ​នៅ​ក្រោម​ការ​ដឹកនាំ​របស់​រដ្ឋាភិបាល​លោក ហ៊ុន សែន សព្វថ្ងៃ​នេះ។

យ៉ាងណាក៏ដោយ កាលពី​អំឡុង​ខែ​កញ្ញា ឆ្នាំ​២០២០ ក្នុង​កិច្ចប្រជុំ​គណៈរដ្ឋមន្ត្រី​នៅ​វិមាន​សន្តិភាព មេដឹកនាំ​បក្ស​កាន់​អំណាច លោក ហ៊ុន សែន បាន​អះអាង​ថា ករណី​លោក កឹម សុខា អាច​នឹង​ត្រូវ​អូស​បន្លាយ​ពេល ៤​ឆ្នាំ​ទៀត គឺ​ត្រូវ​ពន្យារ​រហូត​ដល់​ក្រោយ​ការ​បោះឆ្នោត​ឃុំ-សង្កាត់​ឆ្នាំ​២០២២ និង​ក្រោយ​ការ​បោះឆ្នោត​ជាតិ​ក្នុង​ឆ្នាំ​២០២៣ ឯណោះ។

ជុំវិញ​សវនាការ​មេដឹកនាំ​បក្ស​ប្រឆាំង​នេះ សមាជិក​សភា​សហរដ្ឋ​អាមេរិក​មកពី​គណបក្ស​សាធារណរដ្ឋ លោក ស្ទីវ ឆាបុត (Steve Chabot) កាលពី​ថ្ងៃ​ទី​១៧ ខែ​មករា ឆ្នាំ​២០២២ អះអាង​ថា ការ​ចោទប្រកាន់​ពី​បទ​ក្បត់​ជាតិ​លើ​លោក កឹម សុខា គឺជា​រឿង​នយោបាយ​សុទ្ធសាធ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស