26 C
Phnom Penh

លោក ស ខេង ជំរុញ​ឱ្យ​ដោះស្រាយ​បញ្ចប់​វិវាទ​ការងារ​នៅ​ក្រុមហ៊ុន​ណាហ្គា​វើលដ៍​ឱ្យ​បាន​ឆាប់

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង នៅ​ថ្ងៃ​ទី​២៥ មករា បាន​ជំរុញ​ទៅ​ភាគី​ពាក់ព័ន្ធ​ឱ្យ​ដោះស្រាយ​បញ្ចប់​វិវាទ​ការងារ​នៅ​ក្រុមហ៊ុន ណាហ្គា​វើលដ៍ (NAGA World) ឲ្យ​បាន​ឆាប់​ចប់ ក្រោយពី​វិវាទ​ការងារ​នេះ​បាន​អូស​បន្លាយ​អស់​រយៈពេល​ជាង ១​ខែ​មក​ហើយ មិន​ត្រឹម​តែប៉ុណ្ណោះ អាជ្ញាធរ​បាន​ចាប់​ខ្លួន​តំណាង​សហជីព ៨​នាក់​ឃុំ​ខ្លួន​ដាក់​ពន្ធនាគារ​ទៀត​ផង។

ក្នុង​ពិធី​ប្រគល់​រថយន្ត​ជូន​នគរបាល​ការពារ​ព្រំដែន​នៅ​ថ្ងៃ​ទី​២៥ ខែ​មករា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ថា ការ​តវ៉ា​របស់​បុគ្គលិក ណាហ្គា​វើលដ៍ កន្លងមក​ជា​រឿង​វិវាទ​ការងារ ហើយ​ករណី​នេះ​គណៈកម្មការ​ដោះស្រាយ​វិវាទ​ការងារ​នៃ​ក្រសួង​ការងារ និង​ភាគី​ក្រុមហ៊ុន រួម​ទាំង​កូដករ ត្រូវ​អត់ធ្មត់​ដោយ​ប្រកាន់​ជំហរ​សម្របសម្រួល​ដើម្បី​ដោះស្រាយ​វិវាទ​ការងារ​នេះ​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន។ លើស​ពី​នេះ បើ​សិន​ភាគី​ពាក់ព័ន្ធ​បែរ​ខ្នង​ដាក់​គ្នា​រហូត​បែប​នេះ គឺ​មិន​អាច​ដោះស្រាយ​វិវាទ​ការងារ​នេះ​បាន​ទេ ហើយ​ជម្លោះ​នេះ​នឹង​បន្ត​អូស​បន្លាយ​ជាច្រើន​ឆ្នាំ ដោយ​មិន​ដឹង​ដោះស្រាយ​ចប់ ឬ​យ៉ាង​ណា​នោះ​ឡើយ។

លោក ស ខេង បញ្ជាក់​ថា កន្លងមក​លោក​តែងតែ​ផ្ដល់​យោបល់​ទៅ​អាជ្ញាធរ និង​រដ្ឋមន្ត្រី​ក្រសួង​ការងារ ត្រូវ​ខិតខំ​សម្របសម្រួល​ឱ្យ​ភាគី​ក្រុមហ៊ុន និង​បុគ្គលិក​ដែល​កំពុង​ធ្វើ​កូដកម្ម​បាន​ជជែក​គ្នា ដើម្បី​រក​ដំណោះស្រាយ​រួម​មួយ​ដែល​អាច​ទទួល​យក​បាន​ទាំង​សងខាង។

វិវាទ​ការងារ​នៅ​ក្រុមហ៊ុន ណាហ្គា​វើលដ៍ បាន​ឈាន​ទៅ​ដល់​ការ​ចាប់​ខ្លួន​ថ្នាក់​ដឹកនាំ​សហជីព ៨​នាក់​ដាក់​ពន្ធនាគារ​ព្រៃស ក្រោម​បទ​ចោទ «ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍» កាលពី​ថ្ងៃ​ទី​៥ ខែ​មករា ឆ្នាំ​២០២២។ ថ្នាក់​ដឹកនាំ​សហជីព​ទាំង ៨​នាក់​ដែល​ត្រូវ​បាន​ឃុំ​ខ្លួន​នោះ​ក៏​មាន​ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន ណាហ្គា​វើលដ៍ គឺ​កញ្ញា ឈឹម ស៊ីថរ ផង​ដែរ។

គិត​មក​ដល់​ថ្ងៃ​នេះ បុគ្គលិក​ក្រុមហ៊ុន​កាស៊ីណូ ណាហ្គា​វើលដ៍ បាន​ធ្វើ​កូដកម្ម​ដោយ​អហិង្សា​រយៈពេល​ជាង ១​ខែ​ហើយ ដើម្បី​ទាមទារ​ឱ្យ​ដោះស្រាយ​លក្ខខណ្ឌ​ការងារ​ចំនួន ៩​ចំណុច និង​ទាមទារ​ដោះលែង​តំណាង​ពួកគេ​ទាំង ៨​នាក់​ឱ្យ​មាន​សេរីភាព​ឡើងវិញ​ផង​ដែរ។

កាល​ថ្ងៃ​ទី​៧ ខែ​មករា ឆ្នាំ​២០២២ អង្គការ​អន្តរជាតិ​ខាង​ការងារ (ILO) នៅ​ប្រទេស​ស្វីស ក៏​បាន​អំពាវនាវ​ទៅ​លោក​នាយករដ្ឋមន្ត្រី ហ៊ុន សែន ឱ្យ​ជួយ​អន្តរាគមន៍​ដោះលែង​ថ្នាក់​ដឹកនាំ និង​សកម្មជន​សហជីព​ណាហ្គា​វើលដ៍​ទាំង ៨​នាក់​ឱ្យ​មាន​សេរីភាព​វិញ និង​ទម្លាក់​ចោល​បទ​ចោទប្រកាន់​ដែល​បាន​ប្រឆាំង​អ្នក​ទាំងនោះ។

ការ​អំពាវនាវ និង​ទាមទារ​នេះ អង្គការ ILO មើល​ឃើញ​ថា ការ​ចាប់ និង​ឃុំ​ខ្លួន​មេដឹកនាំ​សហជីព​ដែល​ដឹកនាំ​ធ្វើ​កូដកម្ម​ដោយ​សន្តិវិធី​នោះ ជា​ការ​ជ្រៀតជ្រែក​យ៉ាង​ខ្លាំង​ដល់​ច្បាប់​ស្ដីពី​សេរីភាព​ការងារ និង​សិទ្ធិ​សហជីព៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស