33 C
Phnom Penh

ឧកញ៉ា ថោង សារ៉ាត់ និង​បក្ខពួក​ពាក់ព័ន្ធ​ការ​បាញ់​សម្លាប់​ឧកញ៉ា ម៉េងជឺ ត្រូវ​តុលាការ​ទម្លាក់​បទ​ចោទ​និង​ដោះលែង

ដោយ ឌឹ ខេមបូឌា ដេលី

បទវិភាគ

ឧកញ៉ា ថោង សារ៉ាត់ និង​បក្ខពួក ៣​នាក់​ពាក់ព័ន្ធ​នឹង​ការ​បាញ់​សម្លាប់​ឧកញ៉ា អ៊ឹង ម៉េងជឺ ត្រូវ​បាន​សាលា​ឧទ្ធរណ៍​ទម្លាក់​ចោល​បទ​ចោទប្រកាន់ និង​ដោះលែង​ឱ្យ​មាន​សេរីភាព​កាលពី​ឆ្នាំ​២០២០ ទោះបី​កន្លងមក តុលាការ​ក្រុង​ភ្នំពេញ​ផ្ដន្ទាទោស​ឱ្យ​ជាប់​ពន្ធនាគារ​ម្នាក់ៗ​អស់​មួយ​ជីវិត។

ចៅក្រម​សាលាដំបូង​រាជធានី​ភ្នំពេញ​បាន​ផ្ដន្ទាទោស​ឧកញ៉ា ថោង សារ៉ាត់ និង​បក្ខពួក ៣​នាក់​ឱ្យ​ជាប់​ពន្ធនាគារ​ម្នាក់ៗ​អស់​មួយ​ជីវិត​ដោយ​ចោទ​ពី​បទ​ឃាតកម្ម​គិត​ទុក​ជា​មុន និង​បទ​សមគំនិត​ក្នុង​សំណុំរឿង​បាញ់​សម្លាប់​ឧកញ៉ា អ៊ឹង ម៉េងជឺ ដែល​ជា​ថៅកែ​ស៊ីម៉ងត៍​ត្បូងពេជ្រ កាលពី​ឆ្នាំ​២០១៤។

សំណុំរឿង​បាញ់​សម្លាប់​ឧកញ៉ា អ៊ឹង ម៉េងជឺ មាន​បក្ខពួក​ចំនួន ៥​នាក់​រួម​មាន​ទី​មួយ​ឧកញ៉ា ថោង សារ៉ាត់ ទី​ពីរ​ឈ្មោះ ហួយ ចាន់ថុល ទី​បី​ឈ្មោះ មាស សម្បត្តិ ហៅ ទូច ហើយ​ទី​បួន​ឈ្មោះ ឃុន ចិត្រា និង​ទី​ប្រាំ​ឈ្មោះ សៀង វាសនា។ ប៉ុន្តែ​ក្នុង​ចំណោម​មនុស្ស​ទាំង ៥​នាក់ គឺ​មាន ៤​នាក់​ត្រូវ​បាន​តុលាការ​ទម្លាក់​ចោល​បទ​ចោទ និង​ដោះលែង​វិញ ខណៈ​ឈ្មោះ សៀង វាសនា ត្រូវ​បាន​តុលាការ​បន្ត​រក្សា​បទ​ចោទប្រកាន់ និង​ឃុំ​ខ្លួន​នៅ​ពន្ធនាគារ​ដដែល។

បើ​តាម​សារព័ត៌មាន​វីអូឌី​ដកស្រង់​សម្ដី​មេធាវី​ការពារ​ក្ដី​ឱ្យ​ឧកញ៉ា អ៊ឹង ម៉េងជឺ គឺ​លោក តេង បូរ៉ា ក្នុង​អំឡុង​ពេល​សវនាការ​នៅ​តុលាការ​កំពូល​នៅ​ថ្ងៃ​ពុធ ទី​២៦ មករា នេះ លោក តេង បូរ៉ា ថា​ការ​ប្ដឹង​សាទុក្ខ​នេះ​ដោយសារ​សាលា​ឧទ្ធរណ៍​ទម្លាក់​ចោល​បទ​ចោទប្រកាន់ និង​ដោះលែង​ឱ្យ​ឧកញ៉ា ថោង សារ៉ាត់ និង​បក្ខពួក ៣​នាក់​មាន​សេរីភាព ទាំង​សាលាដំបូង​រាជធានី​ភ្នំពេញ​បាន​រក​ឃើញ​ថា​ឧកញ៉ា ថោង សារ៉ាត់ និង​បក្ខពួក ៣​នាក់​ពិតជា​បាន​ជាប់​ពាក់ព័ន្ធ​សំណុំរឿង​បាញ់​សម្លាប់​ឧកញ៉ា អ៊ឹង ម៉េងជឺ នោះ។

លោក តេង បូរ៉ា ចាត់ទុក​ការ​ទម្លាក់​ចោល​បទ​ចោទប្រកាន់ និង​ដោះលែង​ឧកញ៉ា ថោង សារ៉ាត់ និង​បក្ខពួក ៣​នាក់​ថា​ជា​រឿង​អយុត្តិធម៌​សម្រាប់​គ្រួសារ និង​កូនក្ដី​របស់​លោក។

ឧកញ៉ា អ៊ឹង ម៉េងជឺ ត្រូវ​បាន​ឃាតក​បាញ់​សម្លាប់​នៅ​ថ្ងៃ​ទី​២២ ខែ​វិច្ឆិកា ឆ្នាំ​២០១៤ វេលា​ម៉ោង ៧ និង ១៨​នាទី​យប់ ខណៈ​ដែល​ឧកញ៉ា​រូប​នោះ​ចុះ​ពី​រថយន្ត​ឡិចស៊ីស ៥៧០ ដើម្បី​ទៅ​ទិញ​ផ្លែឈើ​នៅ​មុខ​ហាង​លក់​ផ្លែឈើ​មួយ​កន្លែង​ស្ថិតនៅ​ផ្លូវ​លេខ​២៧៤ សង្កាត់​ទួលស្វាយព្រៃ២ ខណ្ឌ​ចំការមន រាជធានី​ភ្នំពេញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស