អ្នកគាំទ្រគណបក្សសង្គ្រោះជាតិ កញ្ញា សេង ធារី ប្រកាសមិនគាំទ្រដោយចាត់ទុកគណបក្សភ្លើងទៀន ជាគណបក្សតេឡេ និងដើរផ្លូវទាល់ច្រកដែលមិនមានសកម្មភាពជាក់ស្ដែង ហើយគ្រាន់តែធ្វើតាមការបញ្ជារបស់លោក សម រង្ស៊ី ដែលកំពុងនៅក្រៅប្រទេសប៉ុណ្ណោះ។
តាមរយៈវីដេអូឃ្លិបជាង ១ម៉ោងកាលពីថ្ងៃទី២៩ ខែមករា ឆ្នាំ២០២២ កញ្ញា សេង ធារី ថ្លែងថា កញ្ញាមិនអាចគាំទ្រគណបក្សភ្លើងទៀន បានឡើយ ទោះបីជាគាត់ទទួលរងការគាបសង្កត់ និងលាបពណ៌ពីថ្នាក់ដឹកនាំ រួមទាំងសកម្មជនជាខ្លាំងក៏ដោយ។
កញ្ញាបញ្ជាក់ទៀតថា មូលហេតុដែលកញ្ញាមិនគាំទ្រ និងមិនចូលរួមធ្វើសកម្មភាព ដោយសារគណបក្សភ្លើងទៀន មិនមានយុទ្ធសាស្ត្រថ្មី និងមិនមានសកម្មភាពជាក់ស្ដែងច្បាស់លាស់ឡើយ ដែលគ្រាន់តែជាគណបក្សតេឡេមួយដោយធ្វើតាមការបង្គាប់បញ្ជារបស់លោក សម រង្ស៊ី ដែលកំពុងរត់ភៀសខ្លួននៅក្រៅប្រទេស។
កញ្ញាបន្តថា គណបក្សភ្លើងទៀន ជាគណបក្សរបស់លោក សម រង្ស៊ី ដែលត្រូវបានសង្គ្រោះឡើងវិញបន្ទាប់ពីគណបក្សសង្គ្រោះជាតិ ត្រូវបានតុលាការកំពូលរំលាយ ប៉ុន្តែគណបក្សភ្លើងទៀនបច្ចុប្បន្នគ្រាន់តែជាតេឡេប៉ុណ្ណោះ។
កញ្ញាអះអាងថា កន្លងមក លោក សម រង្ស៊ី មានវត្តមាននៅក្នុងប្រទេសកម្ពុជា ដឹកនាំគណបក្សមួយនេះជាក់ស្ដែងផង ក៏នៅតែមិនឈ្នះគណបក្សកាន់អំណាច ចុះទម្រាំលោក សម រង្ស៊ី មិនស្ថិតនៅក្នុងប្រទេសធ្វើសកម្មភាពវិញ តើអាចទៅរួចដែរឬទេ?
កញ្ញា សេង ធារី និយាយថា កញ្ញាធ្លាប់គាំទ្រលោក សម រង្ស៊ី ដោយសារតែលោកជានិមិត្តរូបនៃលទ្ធិប្រជាធិបតេយ្យ សេរីភាព និងយុត្តិធម៌ គឺមិនមែនជាការគាំទ្របុគ្គលនោះទេ ប៉ុន្តែប្រសិនបើជាបង្ខំឱ្យកញ្ញាគាំទ្រលោក សម រង្ស៊ី ដោយបារម្ភខ្លាចលោក សម រង្ស៊ី គ្មានកិច្ចការងារធ្វើបន្ទាប់ពីអត់គណបក្សភ្លើងទៀន គឺកញ្ញាមិនអាចទៅគាំទ្រទាំងប្រថុយប្រថានបានទេ។
លោក សម រង្ស៊ី អតីតប្រធានគណបក្សសង្គ្រោះជាតិ ដែលបានរត់ចេញពីស្រុកដោយសារតែត្រូវជាប់បណ្ដឹងនៅតុលាការនោះ ត្រូវបានក្រុមអ្នករិះគន់ខ្លះនិយាយថា គ្មានភាពក្លាហានក្នុងការប្រឈមជាមួយលោក ហ៊ុន សែន នៅក្នុងសង្វៀននយោបាយផ្ទាល់ ខណៈលោក កឹម សុខា ត្រូវបានសមត្ថកិច្ចចាប់ខ្លួន និងរឹតត្បិតសេរីភាពនយោបាយនោះ។
កាលពីថ្ងៃទី២៨ ខែវិច្ឆិកា ឆ្នាំ២០២១ លោក កឹម សុខា បានលើកឡើងតាមរយៈបណ្ដាញសង្គម Facebook ថា លោក សម រង្ស៊ី និងសហការី បានដើរចេញពីគោលការណ៍ និងស្មារតីដើមនៃការរួបរួម រួមទាំងត្រឡប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់ នោះគឺ «គណបក្សភ្លើងទៀន»។
ករណីនេះ លោកអំពាវនាវឱ្យឈប់យករូបថតរបស់លោកភ្ជាប់ទៅនឹងសកម្មភាពនយោបាយនានា ដោយលោកគិតថា ដើម្បីកុំឱ្យសាធារណមតិជាតិ និងអន្តរជាតិមានការភ័ន្តច្រឡំ ខណៈលោកជាប់បម្រាមតុលាការនៅឡើយ៕