 នៅពេលនេះ ឱ្យទៅធ្វើតេស្ដរកវីរុស Covid-19 ទាំងអស់គ្នា បន្ទាប់ពីក្រសួងបានរកឃើញជំងឺ Covid-19 ប្រភេទអូមីក្រុង លើស្ត្រីជាកូដករដែលមានផ្ទៃពោះម្នាក់ ប៉ុន្តែស្ត្រីដែលបានឆ្លងវីរុស Covid-19 រូបនោះ ប្រតិកម្មថា ការអះអាងរបស់ក្រសួងសុខាភិបាលជារឿងមិនសមហេតុផល។){kind=link}
ក្រសួងសុខាភិបាល អំពាវនាវឱ្យក្រុមកូដករដែលកំពុងតវ៉ាជាមួយក្រុមហ៊ុន ណាហ្គាវើលដ៍ (NAGA World) នៅពេលនេះ ឱ្យទៅធ្វើតេស្ដរកវីរុស Covid-19 ទាំងអស់គ្នា បន្ទាប់ពីក្រសួងបានរកឃើញជំងឺ Covid-19 ប្រភេទអូមីក្រុង លើស្ត្រីជាកូដករដែលមានផ្ទៃពោះម្នាក់ ប៉ុន្តែស្ត្រីដែលបានឆ្លងវីរុស Covid-19 រូបនោះ ប្រតិកម្មថា ការអះអាងរបស់ក្រសួងសុខាភិបាលជារឿងមិនសមហេតុផល។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានចេញសេចក្តីប្រកាសព័ត៌មាននៅថ្ងៃទី៤ ខែកុម្ភៈ ឆ្នាំ២០២២ នេះថា កាលពីថ្ងៃទី២៨ ខែមករា ឆ្នាំ២០២២ ក្រសួងបានរកឃើញកូដករជាស្ត្រីម្នាក់ដែលបានទៅពិនិត្យផ្ទៃពោះ ថាវិជ្ជមានវីរុស Covid-19 ប្រភេទអូមីក្រុង ដែលបញ្ជាក់ដោយមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា។
ប្រភពដដែលអះអាងថា ដើម្បីបញ្ចៀសការឆ្លងរីករាលដាលជំងឺ Covid-19 ក្រសួងបានតម្រូវឱ្យក្រុមកូដករទាំងអស់ទៅយកសំណាកដើម្បីធ្វើតេស្ដរកវីរុស Covid-19 នៅទីតាំងដែលបានកំណត់ ស្ថិតនៅក្នុងមជ្ឈមណ្ឌលកោះពេជ្រ ក្នុងរយៈពេល ៣ថ្ងៃ ចាប់ពីថ្ងៃជូនដំណឹងនេះតទៅ។
លោក ម៉ម ប៊ុនហេង ព្រមានថា បើបុគ្គលទាំងឡាយណាដែលមិនបានអនុវត្តវិធានការសុខាភិបាល និងវិធានការរដ្ឋបាលនេះ នឹងត្រូវទទួលទោសតាមច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺ Covid-19 និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតជាធរមាន។
នៅថ្ងៃទី៤ ខែមករា ឆ្នាំ២០២២ នេះ អ្នកស្រី ជួន សំអាន បានចេញឡាយវីដេអូតាមបណ្ដាញសង្គម Facebook ថា ស្ត្រីដែលក្រសួងសុខាភិបាល ថាវិជ្ជមានវីរុស Covid-19 នោះ គឺជាអ្នកស្រីផ្ទាល់តែម្តង។ ស្ត្រីរូបនេះបញ្ជាក់ថា អ្នកស្រីពិតជាពិនិត្យឃើញវិជ្ជមានវីរុស Covid-19 មែន ប៉ុន្តែអ្នកស្រីបានបញ្ជាក់ប្រាប់ក្រសួងសុខាភិបាលរួចហើយថា មុនថ្ងៃវិជ្ជមានវីរុសនេះជិត ២០ថ្ងៃ អ្នកស្រីមិនបានចូលធ្វើកូដកម្មជាមួយកូដករទាំងនោះទេ។ អ្នកស្រី ជួន សំអាន អះអាងថា អ្នកស្រីខានទៅចូលរួមធ្វើកូដកម្មជាមួយកូដករតាំងពីថ្ងៃទី១៥ ខែមករា ឆ្នាំ២០២២ មកម៉្លេះ ដូច្នេះលទ្ធផលតេស្ដកាលពីថ្ងៃទី២៨ ខែមករា ឆ្នាំ២០២១ ដែលថាអ្នកស្រីវិជ្ជមានវីរុស Covid-19 នោះ ក៏មិនមានហេតុផលណាអាចឆ្លងដល់ក្រុមកូដករទាំងនោះដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៤ កុម្ភៈ នេះថា ក្រុមអង្គការសង្គមស៊ីវិលក៏មានការព្រួយបារម្ភលើការឆ្លងវីរុស Covid-19 នេះដែរ ប៉ុន្តែដោយសារការអនុវត្តរបស់កូដករកន្លងមកមានវិន័យត្រឹមត្រូវ ទើបពួកគេគ្មាននរណាម្នាក់មានជំងឺដោយសារវីរុសនេះទេ។ លោកបញ្ជាក់ថា ការចេញសេចក្តីប្រកាសព័ត៌មានរបស់ក្រសួងសុខាភិបាលនេះ សង្គមស៊ីវិលព្រួយបារម្ភថាខ្លាចក្រែងក្រសួងសុខាភិបាលប្រើលេសនេះដើម្បីបង្អាក់ ឬបំបែកហ្វូងកូដករទៅវិញ។
បុគ្គលិកក្រុមហ៊ុនកាស៊ីណូ ណាហ្គាវើលដ៍ ជិត ១ពាន់នាក់ បានធ្វើកូដកម្មអស់រយៈពេល ៤៩ថ្ងៃមកហើយ ដើម្បីទាមទារឱ្យដោះលែងតំណាងរបស់ពួកគេ ៨នាក់ពីពន្ធនាគារ និងទាមទារឱ្យដោះស្រាយវិវាទការងារនៅក្នុងក្រុមហ៊ុនល្បែងស៊ីសងមួយនេះផងដែរ ប៉ុន្តែរហូតមកទល់ពេលនេះ មិនមានដំណោះស្រាយណាមួយពីខាងក្រុមហ៊ុននៅឡើយទេ ខណៈអាជ្ញាធរចេះតែព្យាយាមប្រើល្បិចគ្រប់រូបភាពដើម្បីបំបែកការតវ៉ានេះរហូតមក៕