30 C
Phnom Penh

លោក ហ៊ុន សែន កាត់​ដី​បឹងតាមោក​ជាង​៤០០​ហិកតារ​បន្ថែម​ឱ្យ​ឧកញ៉ា​និង​ឧត្ដមសេនីយ៍​នៅ «ង​៧០»

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន កាត់​ផ្ទៃ​បឹងតាមោក ៤២៥​ហិកតារ​បន្ថែម​ទៀត​កាលពី​អំឡុង​ខែ​វិច្ឆិកា និង​ខែ​ធ្នូ ឆ្នាំ​២០២១ ប្រគល់​ទៅ​ឱ្យ​ឧកញ៉ា និង​ឧត្ដមសេនីយ៍​ម្នាក់​នៅ​អង្គភាព «ង​៧០» ដើម្បី​ធ្វើជា​កម្មសិទ្ធិ។

អនុក្រឹត្យ​ចុះ​ថ្ងៃ​ទី​១៧ ខែ​វិច្ឆិកា ឆ្នាំ​២០២១ ដែល​សារព័ត៌មាន The Cambodia Daily ទើប​ទទួល​បាន លោក​នាយករដ្ឋមន្ត្រី ហ៊ុន សែន បាន​កាត់​ដី​បឹងតាមោក​ចំនួន​ជាង ១៨០​ហិកតារ (១៨០៧៥៩៧​ម៉ែត្រ​ក្រឡា) ស្ថិតនៅ​សង្កាត់​ពន្សាំង ខណ្ឌ​ព្រែកព្នៅ រាជធានី​ភ្នំពេញ ប្រគល់​ឱ្យ​អ្នកស្រី អ៊ុំ បុប្ផា ហើយ​ដី​ផ្ទៃ​បឹងតាមោក​ទំហំ​ជាង ១៥០​ហិកតារ (១៥៥៣៨៣២​ម៉ែត្រ​ក្រឡា) ស្ថិតនៅ​សង្កាត់​គោករកា ខណ្ឌ​ព្រែកព្នៅ រាជធានី​ភ្នំពេញ ប្រគល់​ឱ្យ​លោក កុក អាន ដោយ​ពន្ធ និង​អាករ​ផ្សេងៗ​ជា​បន្ទុក​របស់​រដ្ឋ។

អនុក្រឹត្យ​ចុះ​ថ្ងៃ​ដដែល លោក ហ៊ុន សែន ក៏​បាន​កាត់​ដី​បឹងតាមោក​ចំនួន​ជាង ៦៥​ហិកតារ (៦៥៤៩៣៤​ម៉ែត្រ​ក្រឡា) ស្ថិតនៅ​សង្កាត់​សំរោង ខណ្ឌ​ព្រែកព្នៅ រាជធានី​ភ្នំពេញ ប្រគល់​ឱ្យ​អ្នកស្រី ឈូ សុខយូ និង​ដី​បឹងតាមោក​ចំនួន​ជាង ១០០​ហិកតារ (១០០០១៦៨​ម៉ែត្រ​ក្រឡា) ស្ថិតនៅ​សង្កាត់​គោករកា សង្កាត់​ពញាពន់ និង​សង្កាត់​សំរោង ខណ្ឌ​ព្រែកព្នៅ ប្រគល់​ឱ្យ​អ្នកស្រី ជឹង ធានសេង ដោយ​ពន្ធ និង​អាករ​ផ្សេងៗ​ជា​បន្ទុក​របស់​រដ្ឋ។

ក្នុង​អនុក្រឹត្យ​ចុះ​ថ្ងៃ​ទី​១៧ ខែ​ធ្នូ ឆ្នាំ​២០២១ បុរស​ខ្លាំង​នៅ​កម្ពុជា លោក ហ៊ុន សែន ក៏​បាន​កាត់​ដី​បឹងតាមោក​ចំនួន ៣​ហិកតារ ស្ថិតនៅ​ក្នុង​សង្កាត់​ពញាពន់ ខណ្ឌ​ព្រែកព្នៅ ប្រគល់​ទៅ​ឱ្យ​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប.) ដើម្បី​ធ្វើជា​កម្មសិទ្ធិ ខណៈ​ថ្ងៃ​ទី​២១ ខែ​ធ្នូ ឆ្នាំ​២០២១ លោក ហ៊ុន សែន បាន​កាត់​ដី​ផ្ទៃ​បឹងតាមោក​ចំនួន ៧៥​ហិកតារ​នៅ​ទីតាំង​៤ ស្ថិត​ក្នុង​សង្កាត់​សំរោង សង្កាត់​ពញាពន់ និង​សង្កាត់​គោករកា ខណ្ឌ​ព្រែកព្នៅ រាជធានី​ភ្នំពេញ ប្រគល់​ទៅ​ឱ្យ​អ្នកស្រី សាយ សោភា។

អ្នកស្រី សាយ សោភា ដែល​ជា​អគ្គនាយិកា​សាលា​អន្តរជាតិ វើលដ៍​កម្ពុជា និង​ជា​ភរិយា​របស់​ឧត្ដមសេនីយ៍​ផ្កាយ​ពីរ​នៃ​អង្គភាព «ង​៧០» លោក ភឿន ផល្លា ទទួល​បាន​ដី​បឹងតាមោក​ចំនួន ៥​លើក ដែល​គិត​មក​ដល់​ថ្ងៃ​នេះ អ្នកស្រី សាយ សោភា ទទួល​បាន​ដី​បឹងតាមោក​សរុប​ជាង ១០០​ហិកតារ​ហើយ​ពី​រដ្ឋាភិបាល។

ការ​កាត់​ផ្ទៃ​បឹងតាមោក​បន្តបន្ទាប់​នេះ នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព ធ្លាប់​បាន​សរសេរ​លើ​បណ្ដាញ​សង្គម Facebook ដោយ​លើក​ជា​សំណួរ​ថា តើ​ត្រូវ​ពុះ​ច្រៀក​ដី​បឹង​ចែក​គ្នា​បែប​នេះ​ឬ? អ្នកស្រី​ថា ក្រសួង​ក៏​មាន​ចំណែក ក្រុមហ៊ុន​ក៏​មាន​ចំណែក បុគ្គល​ឯកជន​ក៏​មាន​ចំណែក។ តើ​នេះ​ជា​អភិបាលកិច្ច​អ្វី ដែល​ត្រូវ​លេប និង​លុប​បឹង​យ៉ាង​នេះ?

បឹងតាមោក​មាន​ផ្ទៃដី​សរុប ៣២៣៩​ហិកតារ ជា​អាង​ស្ដុក​ទឹក​កខ្វក់ និង​រំដោះ​ទឹក​ចេញពី​រាជធានី​ភ្នំពេញ ហើយ​បឹង​នេះ​ត្រូវ​បាន​រដ្ឋាភិបាល​ចេញ​អនុក្រឹត្យ​មួយ​កាលពី​ដើម​ខែ​កុម្ភៈ ឆ្នាំ​២០១៦ ដោយ​កំណត់​បឹង​ធម្មជាតិ​មួយ​នេះ​ជា​សម្បត្តិ​សាធារណៈ​របស់​រដ្ឋ។

ប៉ុន្តែ​បើ​យោង​តាម​អនុក្រឹត្យ​របស់​រដ្ឋាភិបាល​ដែល​បាន​ចេញ​ជាបន្តបន្ទាប់​ចាប់តាំង​ពី​ឆ្នាំ​២០១៨ ដល់​ចុង​ខែ​ធ្នូ ឆ្នាំ​២០២១ ផ្ទៃ​បឹងតាមោក​សរុប​ជាង ២​ពាន់​ហិកតារ​ហើយ​ត្រូវ​បាន​រដ្ឋាភិបាល​កាត់ និង​ដោះដូរ​ទៅ​ឱ្យ​ស្ថាប័ន​រដ្ឋ ក្រុមហ៊ុន​ឯកជន និង​បុគ្គល​ឯកជន ដែល​គេ​ដឹង​ថា​ជា​អ្នក​មាន​ប្រាក់ និង​មាន​អំណាច សម្រាប់​សាងសង់​អគារ និង​ហេដ្ឋារចនាសម្ព័ន្ធ​ផ្សេងៗ ព្រមទាំង​ធ្វើជា​កម្មសិទ្ធិ​ផ្ទាល់ខ្លួន។

កាលពី​ថ្ងៃ​ទី​៨ ខែ​វិច្ឆិកា ឆ្នាំ​២០២១ លោក ហ៊ុន សែន បាន​ថ្លែង​ថា បញ្ហា​ទឹកជំនន់​ដែល​បង្ក​ឱ្យ​លិច​រាជធានី​ភ្នំពេញ មិនមែន​បណ្ដាល​មកពី​ការ​លុប​បឹង​ធម្មជាតិ​ទេ។ លោក​អះអាង​ថា កន្លងមក​ទោះបីជា​មិន​លុប​បឹង នៅ​រាជធានី​ភ្នំពេញ​ក៏​មាន​ទឹកជំនន់​ដែរ ដែល​ករណី​នេះ​លោក​ថា គួរតែ​ឈប់​រិះគន់។

ផ្ទុយពី​ការ​អះអាង​លោក ហ៊ុន សែន កាលពី​ខែ​ឧសភា ឆ្នាំ​២០២០ រដ្ឋមន្ត្រី​ក្រសួង​ធនធាន​ទឹក និង​ឧតុនិយម លោក លឹម គានហោ បាន​ចេញ​លិខិត​មួយ​ដោយ​ព្រមាន​អំពី​គ្រោះ​មហន្តរាយ​ដោយសារ​ទឹកជំនន់ ក្រោយ​ពី​ក្រសួង​មើល​ឃើញ​ថា មាន​ការ​ចាក់​ដី​លុប និង​ការ​សាងសង់​សំណង់​ផ្សេងៗ​បិទ​ផ្លូវ​ទឹក និង​កន្លែង​ស្តុក​ទឹក​នានា​ជាបន្តបន្ទាប់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស