26 C
Phnom Penh

លោក ហ៊ុន សែន កាត់​ដី​បឹងតាមោក ៧០​ហិកតារ​បន្ថែម​ទៀត​ឱ្យ​គ្រួសារ​មេបញ្ជាការ​រង «ង៧០» ជា​លើក​ទី​៥

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​កាត់​ដី​បឹងតាមោក​ជិត ១០០​ហិកតារ​បន្ថែម​ទៀត​ទៅ​ឱ្យ​គ្រួសារ​មេបញ្ជាការ​រង​នៅ​អង្គភាព «ង៧០» និង​បុគ្គល​ម្នាក់​ទៀត​កាលពី​ខែ​វិច្ឆិកា ឆ្នាំ​២០២១ ខណៈ​ដី​បឹង​ធម្មជាតិ​ជាង ១០០​ហិកតារ​ទៀត​ក៏​ត្រូវ​បាន​លោក ហ៊ុន សែន សម្បទាន​ឱ្យ​គ្រួសារ​សមាជិក​លេខា​លោក ហ៊ុន សែន ដែរ។

កាលពី​ថ្ងៃ​ទី​៤ ខែ​វិច្ឆិកា ឆ្នាំ​២០២១ លោក ហ៊ុន សែន បាន​ចេញ​អនុក្រឹត្យ​កាត់​ផ្ទៃដី​បឹងតាមោក ឬ​បឹង​ទំនប់កប់ស្រូវ​ចំនួន ៧០​ហិកតារ ស្ថិត​នៅ​សង្កាត់​ព្រែកព្នៅ សង្កាត់​ពញាពន់ និង​សង្កាត់​គោករកា ខណ្ឌ​ព្រែកព្នៅ ឱ្យ​ទៅ​អ្នកស្រី សាយ សោភា ជា​កម្មសិទ្ធិ។

អ្នកស្រី សាយ សោភា ដែល​ជា​អគ្គនាយិកា​សាលា​អន្តរជាតិ វើលដ៍​កម្ពុជា និង​ជា​ភរិយា​របស់​ឧត្ដមសេនីយ៍​ផ្កាយ​ពីរ​នៃ​អង្គភាព «ង៧០» លោក ភឿន ផល្លា ទទួល​បាន​ដី​បឹងតាមោក​ចំនួន ៤​លើក​រួច​មក​ហើយ ហើយ​គិត​មក​ដល់​ថ្ងៃ​នេះ អ្នកស្រី សាយ សោភា ទទួល​បាន​ដី​សរុប​ជិត ១០០​ហិកតារ​ពី​រដ្ឋាភិបាល។

លើស​ពី​នេះ អំឡុង​ខែ​វិច្ឆិកា ឆ្នាំ​២០២១ ដដែល លោក ហ៊ុន សែន បាន​ចេញ​អនុក្រឹត្យ​មួយ​ទៀត​កាត់​ផ្ទៃដី​បឹងតាមោក​ចំនួន ៥​ទីតាំង​ទំហំ​ជាង ១២១​ហិកតារ ស្ថិតនៅ​សង្កាត់​ពន្សាំង និង​សង្កាត់​ពញាពន់ ខណ្ឌ​ព្រែកព្នៅ រាជធានី​ភ្នំពេញ ប្រគល់​ឱ្យ​កូនៗ​របស់​អ្នកស្រី ជូ ដារ៉ារ៉េត សមាជិក​ក្រុម​លេខា​នាយករដ្ឋមន្ត្រី ដើម្បី​ធ្វើជា​កម្មសិទ្ធិ ខណៈ​ផ្ទៃដី​បឹង​ជិត ៣០​ហិកតារ​កាត់​ឱ្យ​លោក ចេង ស្រ៊ុនហេង និង​លោក ជឹម ពិសី ជា​កម្មសិទ្ធិ។

ទាក់ទង​នឹង​ករណី​នេះ ប្រធាន​គណបក្ស​ឆន្ទៈ​ខ្មែរ លោក គង់ មុនីកា បាន​សរសេរ​លើ​ទំព័រ Facebook កាលពី​ពេល​ថ្មីៗ​នេះ​ថា ក្រុម​លេខា​នាយករដ្ឋមន្ត្រី​សព្វថ្ងៃ​នេះ​ប្រហែល​គ្មាន​ផ្ទះ​ស្នាក់នៅ​ទេ ទើប​ត្រូវ​កាត់​បឹង​ឱ្យ​ពួកគាត់​យក​ទៅ​ធ្វើជា​កម្មសិទ្ធិ ខណៈ​ពលរដ្ឋ​ជាច្រើន​ខ្វះ​ទី​ជម្រក​រស់នៅ​សមរម្យ។ លោក​បន្ត​ថា បើ​កាត់​ដី​បឹង​ទាំងនោះ​ក្រោម​ហេតុផល​អភិវឌ្ឍ ក៏​កម្ពុជា​ពុំ​ទាន់​ខ្វះ​ដី​សម្រាប់​អភិវឌ្ឍ​រហូត​ដល់​ថ្នាក់​ត្រូវ​លុប​បឹង​នោះ​ដែរ។

ចំណែក​នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព បាន​សរសេរ​នៅ​លើ Facebook ដោយ​លើក​ជា​សំណួរ​ថា តើ​ត្រូវ​ពុះ​ច្រៀក​ដី​បឹង​ចែក​គ្នា​យ៉ាង​នេះ​ឬ? អ្នកស្រី​ថា ក្រសួង​ក៏​មាន​ចំណែក ក្រុមហ៊ុន​ក៏​មាន​ចំណែក បុគ្គល​ឯកជន​ក៏​មាន​ចំណែក។ តើ​នេះ​ជា​អភិបាលកិច្ច​អ្វី ដែល​ត្រូវ​លេប និង​លុប​បឹង​យ៉ាង​នេះ?

បឹងតាមោក​មាន​ផ្ទៃដី​សរុប ៣២៣៩​ហិកតារ ជា​អាង​ស្ដុក​ទឹក​កខ្វក់ និង​រំដោះ​ទឹក​ចេញពី​រាជធានី​ភ្នំពេញ ហើយ​បឹង​នេះ​ត្រូវ​បាន​រដ្ឋាភិបាល​ចេញ​អនុក្រឹត្យ​មួយ​កាលពី​ដើម​ខែ​កុម្ភៈ ឆ្នាំ​២០១៦ កំណត់​បឹង​ធម្មជាតិ​មួយ​នេះ​ជា​សម្បត្តិ​សាធារណៈ​របស់​រដ្ឋ។

ប៉ុន្តែ​ចាប់តាំង​ពី​ឆ្នាំ​២០១៨ ដល់​ខែ​វិច្ឆិកា ឆ្នាំ​២០២១ ផ្ទៃ​បឹងតាមោក​ជាង ១៦០០​ហិកតារ ឬ​ជាង ៥០% ត្រូវ​បាន​លោក ហ៊ុន សែន កាត់​និង​ដោះដូរ​ទៅ​ឱ្យ​ស្ថាប័ន​រដ្ឋ ឲ្យ​ក្រុមហ៊ុន​ឯកជន ឱ្យ​បុគ្គល​ឯកជន ដែល​គេ​ដឹង​ថា​ជា​ឧកញ៉ា និង​អ្នក​មាន​អំណាច​សម្រាប់​សាងសង់​អគារ និង​ហេដ្ឋារចនាសម្ព័ន្ធ​ផ្សេងៗ ព្រមទាំង​ធ្វើជា​កម្មសិទ្ធិ​ផ្ទាល់ខ្លួន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស