មេធាវីតំណាងដើមបណ្ដឹងរដ្ឋប្បវេណីក្នុងសំណុំរឿងព្រហ្មទណ្ឌ ដែលបានចោទប្តឹងប្រធានគណបក្សសង្គ្រោះជាតិ លោក កឹម សុខា ដាក់ពាក្យសុំពន្យារពេលសវនាការមួយសប្តាហ៍ ដោយលើកពីថ្ងៃទី៩ ខែកុម្ភៈ ទៅថ្ងៃទី១៦ ខែកុម្ភៈ សប្តាហ៍ក្រោយជំនួសវិញ។
មេធាវីតំណាងដើមបណ្ដឹងរដ្ឋប្បវេណី លោក សាន់ ជួយ បានដាក់ពាក្យសុំពន្យារពេលសវនាការទៅកាន់ចៅក្រម លោក កូយ សៅ កាលពីថ្ងៃទី៧ ខែកុម្ភៈ ឆ្នាំ២០២២ ដែលគ្រោងនឹងបើកសវនាការលើមេដឹកនាំបក្សប្រឆាំង លោក កឹម សុខា នៅថ្ងៃទី៩ ខែកុម្ភៈ នេះ ទៅថ្ងៃទី១៦ ខែកុម្ភៈ សប្តាហ៍ក្រោយវិញ ក្រោមហេតុផល មេធាវីទាំងនោះវិជ្ជមានវីរុស Covid-19 កាលពីថ្ងៃទី៥ ខែកុម្ភៈ កន្លងទៅ។
ប្រភពដដែលអះអាងថា ដើម្បីការពារ និងទប់ស្កាត់ការឆ្លងរីករាលដាលនៃជំងឺ Covid-19 ក្រុមមេធាវីដើមបណ្ដឹងកំពុងតែធ្វើចត្តាឡីស័កដើម្បីពិនិត្យ និងតាមដានបញ្ហានេះយ៉ាងយកចិត្តទុកដាក់ ដូច្នេះសវនាការរបស់ប្រធានគណបក្សសង្គ្រោះជាតិដែលគ្រោងដំណើរការនៅថ្ងៃពុធ នេះ នឹងត្រូវលើកពេល។
ការដាក់ពាក្យស្នើសុំពន្យារពេលសវនាការនេះ ធ្វើឡើងបន្ទាប់ពីមេធាវីដើមបណ្ដឹងអះអាងថា ខ្លួនបានឆ្លងវីរុស Covid-19 ប៉ុន្តែបញ្ហានេះត្រូវគេមើលឃើញថា គ្រាន់តែជាល្បិចពន្យារពេលសវនាការក្រោមការបញ្ជារបស់មេដឹកនាំបក្សកាន់អំណាចតែប៉ុណ្ណោះ។
នៅថ្ងៃទី៨ ខែកុម្ភៈ ឆ្នាំ២០២២ នេះ ប្រធានក្រុមជំនុំជម្រះសាលាដំបូងរាជធានីភ្នំពេញ លោក កូយ សៅ បានសរសេរយល់ព្រមលើលិខិតស្នើសុំរបស់មេធាវីដើមបណ្ដឹងនោះថា តុលាការឯកភាពទៅនឹងការស្នើសុំនេះ ព្រោះថាមេធាវីទាំងនោះត្រូវគោរពតាមវិធានការរបស់ក្រសួងសុខាភិបាល ដូច្នេះសវនាការនេះនឹងត្រូវលើកពេលទៅថ្ងៃទី១៦ ខែកុម្ភៈ ឆ្នាំ២០២២ ជំនួសវិញ។
ទោះយ៉ាងណា ប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ (PMD) លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៨ កុម្ភៈ ថា លិខិតស្នើសុំពន្យារសវនាការនេះបានបង្ហាញយ៉ាងច្បាស់ពីល្បិចនយោបាយពន្យារពេល ដើម្បីអូសបន្លាយសំណុំរឿងរបស់មេដឹកនាំប្រឆាំងដើម្បីផលប្រយោជន៍នយោបាយរបស់គណបក្សកាន់អំណាច ជាជាងការពន្លឿនរឿងក្តី។
លោក ម៉ែន ណាត អះអាងថា ប្រសិនបើតុលាការមានបំណងពិតប្រាកដចង់ពន្លឿនសំណុំរឿងមេដឹកនាំបក្សប្រឆាំងនេះ ពួកគេមិនពន្យារពេលសវនាការដោយលេសការឆ្លងវីរុស Covid-19 លើមេធាវីទាំងនោះទេ ពួកគេប្រាកដជាព្យាយាមរកមេធាវីមកជំនួស ដើម្បីបន្តសវនាការនេះតាមពេលកំណត់ជាមិនខាន។
ប្រធានក្រុមប្រឹក្សាភិបាលនៃចលនាពលរដ្ឋរូបនេះ អំពាវនាវឱ្យមេដឹកនាំបក្សកាន់អំណាចទម្លាក់ចោលរាល់បទចោទទាំងអស់ទៅលើលោក កឹម សុខា ដើម្បីស្វែងរកការផ្សះផ្សាជាតិ រក្សាផលប្រយោជន៍ និងសេចក្តីសុខជូនពលរដ្ឋរបស់ខ្លួន។
ការចោទប្រកាន់លើមេដឹកនាំបក្សប្រឆាំងមានរយៈពេលជាង ៤ឆ្នាំហើយ ប៉ុន្តែលោក កឹម សុខា នៅតែមានភាពស្អាតស្អំនៅឡើយ ព្រោះតុលាការបានបើកសវនាការរបស់លោកចំនួន ២៩លើករួចមកហើយ ប៉ុន្តែនៅតែគ្មានភស្តុតាងជាក់លាក់ណាមួយអាចដាក់ទោសលោកតាមការចោទប្រកាន់របស់ខ្លួនបាន ខណៈក្រុមឃ្លាំមើលរិះគន់ថា សំណុំរឿងនេះជារឿងនយោបាយប៉ុណ្ណោះ៕