ក្រុមអ្នកតស៊ូមតិនៅឯនាយសមុទ្រ លើកឡើងថា តុលាការនៅកម្ពុជាសព្វថ្ងៃនេះគ្រាន់តែជាស្ថាប័នសម្រាប់ចេញបទបញ្ជាចោទប្រកាន់ ចាប់ឃុំខ្លួន និងតាមដានអ្នកប្រជាធិបតេយ្យទាំងអយុត្តិធម៌តែប៉ុណ្ណោះ មិនមែនជាស្ថាប័នដែលធានាប្រព័ន្ធយុត្តិធម៌របស់កម្ពុជាឱ្យប្រសើរឡើងនោះទេ ជាក់ស្តែងដូចជាករណីមេដឹកនាំបក្សប្រឆាំង លោក កឹម សុខា និងមេដឹកនាំសហភាពសហជីពលោក រ៉ុង ឈុន ជាដើម។
ប្រធានប្រតិបត្តិនៃចលនាពលរដ្ឋដើម្បីលទ្ធិប្រជាធិបតេយ្យ (PMD) លោក ទូច វិបុល បានសរសេរលើគណនី Facebook របស់លោកកាលពីថ្ងៃទី៨ ខែកុម្ភៈ នេះថា ប្រទេសដែលប្រកាន់របបអត្តាធិបតេយ្យដែលមេដឹកនាំប្រើអំណាចក្តោបក្តាប់លើស្ថាប័នជាតិ ពួកគេតែងប្រើស្ថាប័នទាំងនោះដូចជាស្ថាប័នតុលាការ ជាដើម ក្នុងគោលបំណងបំបិទមាត់អ្នករិះគន់ដើម្បីការពារអំណាច ងាយស្រួលកេងប្រវ័ញ្ចប្រយោជន៍ជាតិ ធ្វើមានបានសម្រាប់ក្រុមគ្រួសារ និងបក្ខពួករបស់ពួកគេ។
លោក ទូច វិបុល បន្តថា ការតស៊ូមតិដោយអហិង្សាតាមរយៈតុលាការក្នុងរបបផ្ដាច់ការ ត្រូវការភាពអត់ធ្មត់ជាទីបំផុត។ ជាក់ស្តែង ប្រធានគណបក្សសង្គ្រោះជាតិ លោក កឹម សុខា ប្រធានសហភាពសហជីពលោក រ៉ុង ឈុន និងអ្នកច្បាប់អន្តរជាតិ កញ្ញា សេង ធារី ជាដើម កំពុងតែធ្វើសកម្មភាពអហិង្សាត្រឹមត្រូវដើម្បីយុត្តិធម៌សង្គមនៅពេលនេះ។
លោកបន្តថា សម្រាប់អ្នកប្រជាធិបតេយ្យត្រូវតែបន្តការតស៊ូមតិដោយអហិង្សាយ៉ាងសកម្មតាមរយៈតុលាការនេះ ដើម្បីធ្វើឱ្យជនប្រព្រឹត្តិអំពើអាក្រក់ ព្រមចុះចាញ់ចំពោះអំពើល្អរបស់ខ្លួន ហើយនេះជាពេលវេលាដែលអ្នកប្រជាធិបតេយ្យទាំងអស់ត្រូវតែចូលរួមឱ្យកាន់តែសកម្មជាមួយយុទ្ធនាការអហិង្សា ដើម្បីយុត្តិធម៌តាមរយៈតុលាការដែលមានលោក កឹម សុខា លោក រ៉ុង ឈុន កញ្ញា សេង ធារី និងសកម្មជនដទៃទៀតកំពុងនាំមុខក្នុងការតស៊ូមតិនៅពេលនេះ។
ការអះអាងនេះ ធ្វើឡើងស្របពេលដែលតុលាការកម្ពុជាត្រូវគេមើលឃើញថា គ្រាន់តែជាឧបករណ៍របស់អ្នកនយោបាយដែលគេប្រើដើម្បីការពារអ្នកមានអំណាចធ្វើបាបអ្នកទន់ខ្សោយ ដែលធ្វើឱ្យនីតិរដ្ឋនៅកម្ពុជាធ្លាក់ចុះយ៉ាងធ្ងន់ធ្ងរក្នុងពេលបច្ចុប្បន្ននេះ។
កាលពីចុងខែវិច្ឆិកា ឆ្នាំ២០២១ ប្រធានសហភាពសហជីពកម្ពុជា លោក រ៉ុង ឈុន រិះគន់ថា អំឡុងពេលដែលលោកត្រូវបានតុលាការឃុំខ្លួនអស់រយៈពេលជាង ១ឆ្នាំកន្លងមកនេះ លោកសង្កេតឃើញថាតុលាការនៅកម្ពុជា គ្រាន់តែជាទីផ្សារទិញលក់រឿងក្តីយ៉ាងអនាធិបតេយ្យប៉ុណ្ណោះ មិនមែនជាកន្លែងរកយុត្តិធម៌ជូនជនរងគ្រោះនោះទេ។
ចំណែកអ្នកជំនាញផ្នែកច្បាប់អន្តរជាតិ និងវិទ្យាសាស្ត្រនយោបាយ កញ្ញា សេង ធារី កាលពីដើមខែធ្នូ ឆ្នាំ២០២១ កន្លងទៅ ទិតៀនថាតុលាការកម្ពុជាគ្រាន់តែជារោងល្ខោននយោបាយរបស់ពួកអ្នកមានអំណាចតែប៉ុណ្ណោះ ដូច្នេះដើម្បីជួយរកយុត្តិធម៌ជូនជនស្លូតត្រង់ដែលកំពុងរងគ្រោះដោយសារល្ខោននយោបាយរបស់តុលាការកម្ពុជានេះ កញ្ញានឹងតស៊ូមតិរហូតដល់ទីបំផុត។
ទាក់ទិននឹងបញ្ហានេះ ក្រុមអ្នកឃ្លាំមើលសង្គមអះអាងថា បច្ចុប្បន្ននេះស្ថាប័នដែលជាសសរស្ដម្ភធំៗទាំង៣ របស់ជាតិ គឺស្ថាប័ននីតិប្បញ្ញត្តិ ស្ថាប័ននីតិប្រតិបត្តិ និងស្ថាប័នតុលាការ បានក្លាយជាឧបករណ៍របស់បក្សកាន់អំណាចទាំងស្រុងទៅហើយ ព្រោះថាមេដឹកនាំបក្សកាន់អំណាចបានពង្រាយសមាជិកបក្សរបស់ពួកគេចូលទៅគ្រប់គ្រងស្ថាប័នទាំងនោះតាំងពីថ្នាក់ជាតិរហូតដល់ថ្នាក់មូលដ្ឋាន ដែលនឹងធ្វើឱ្យកម្ពុជាបាត់បង់នីតិរដ្ឋ និងអធិបតេយ្យភាពរបស់ខ្លួនទាំងស្រុង។
ជុំវិញបញ្ហានេះ ទិន្នន័យសង្គមស៊ីវិលបានបង្ហាញកាលពីពេលកន្លងទៅថា រដ្ឋាភិបាលកម្ពុជាបានប្រើយុទ្ធសាស្ត្របណ្តឹងផ្លូវច្បាប់ជាបន្តបន្ទាប់ ដើម្បីបំបាក់ស្មារតី និងបំបិទការតវ៉ានានាចំពោះអ្នកដែលរិះគន់រដ្ឋាភិបាលរបស់ខ្លួន ខណៈបណ្តឹងទាំងនោះមានរហូតដល់ទៅជាង ១០០ករណីឯណោះ ក្នុងនោះសកម្មជនសង្គមរាប់សិបនាក់ត្រូវបានអាជ្ញាធរចាប់ឃុំខ្លួនរហូតដល់សព្វថ្ងៃនេះ។
របាយការណ៍ស្ដីពីនីតិរដ្ឋឆ្នាំ២០២១ នៃគម្រោងយុត្តិធម៌ពិភពលោក (The World Justice Project) បានរកឃើញថា កម្ពុជាបានជាប់ចំណាត់ថ្នាក់លេខទី១៣៨ ក្នុងចំណោមប្រទេស១៣៩ ដោយសារតែការដឹកនាំគ្មានតម្លាភាព មានការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម៕