 ៣នាក់នៅពន្ធនាគារព្រៃស ក្រោមហេតុផលរារាំងដល់ការអនុវត្តវិធានការប្រយុទ្ធនឹងជំងឺ Covid-19។){kind=link}
សាលាដំបូងរាជធានីភ្នំពេញ នៅថ្ងៃទី៩ កុម្ភៈ សម្រេចឃុំខ្លួនកូដករក្រុមហ៊ុនណាហ្គាវើលដ៍ (NAGA World) ៣នាក់នៅពន្ធនាគារព្រៃស ក្រោមហេតុផលរារាំងដល់ការអនុវត្តវិធានការប្រយុទ្ធនឹងជំងឺ Covid-19។
កូដករក្រុមហ៊ុនណាហ្គាវើលដ៍ ទាំង ៣នាក់ ក្នុងនោះរួមមានលោក សេង វណ្ណារិទ្ធ លោក ជួប ចាន់ណាត និងលោក សៅ សម្បត្តិ ត្រូវបានសមត្ថកិច្ចរាជធានីភ្នំពេញចាប់ខ្លួនកាលពីថ្ងៃទី៥ ខែកុម្ភៈ ក្រោមហេតុផលថា ពួកគាត់ជាប់ពាក់ព័ន្ធនឹងការរារាំងដល់ការអនុវត្តវិធានការប្រយុទ្ធនឹងជំងឺ Covid-19។
វិធានការលើក្រុមកូដករនេះ បន្ទាប់ពីពួកគេនៅតែនាំគ្នាបន្តធ្វើកូដកម្មអហិង្សាដើម្បីទាមទារឱ្យដោះលែងតំណាងសហជីពរបស់ពួកគេ ៨នាក់ពីពន្ធនាគារ និងទាមទារឱ្យដោះស្រាយវិវាទការងារនៅក្នុងក្រុមហ៊ុន។
ក្រោយពីមានការចាប់ខ្លួន និងចោទប្រកាន់កូដករជាបន្តបន្ទាប់ ក្រុមអង្គការសង្គមស៊ីវិល សមាគម និងសហជីពដែលធ្វើការលើវិស័យលើកកម្ពស់ និងការពារសិទ្ធិមនុស្ស សិទ្ធិស្ត្រី និងសិទ្ធិការងាររបស់កម្មករនិយោជិតនៅប្រទេសកម្ពុជា ចំនួន ១៣៤ស្ថាប័ន នៅថ្ងៃទី១០ កុម្ភៈ នេះ បាននាំគ្នាបន្តយកលិខិតចំហទៅដាក់ក្រសួងយុត្តិធម៌ ក្រសួងការងារ និងក្រសួងកិច្ចការនារី ដើម្បីទាមទារឱ្យមានការដោះលែងជាបន្ទាន់ និងទម្លាក់ចោលបទចោទប្រកាន់លើថ្នាក់ដឹកនាំ និងសកម្មជនសហជីពទាំង ៨រូបដែលតុលាការកំពុងឃុំខ្លួន។ ក្រៅពីទាមទារឱ្យដោះលែងថ្នាក់ដឹកនាំ និងសកម្មជនហើយ សង្គមស៊ីវិលទាំងនោះជំរុញឲ្យមានការស្វែងរកដំណោះស្រាយជាបន្ទាន់ ដើម្បីបញ្ចប់វិវាទការងាររួមមួយនេះ។
គិតមកដល់ថ្ងៃទី៩ ខែកុម្ភៈ ឆ្នាំ២០២២ នេះ ថ្នាក់ដឹកនាំ និងសកម្មជនសហជីពជាង ១០នាក់ត្រូវបានឃុំខ្លួន ខណៈកូដករ ៤នាក់ទៀតត្រូវបានតុលាការកោះហៅឱ្យចូលខ្លួនទៅបំភ្លឺពាក់ព័ន្ធរឿងរារាំងដល់ការអនុវត្តវិធានការទប់ស្កាត់ជំងឺ Covid-19។
កាលពីថ្ងៃទី១ ខែកុម្ភៈ ឆ្នាំ២០២២ តំណាងស្ថានទូតអាល្លឺម៉ង់ប្រចាំនៅកម្ពុជា ជំរុញឲ្យស្ថាប័នពាក់ព័ន្ធពន្លឿនការដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍ ឱ្យបានឆាប់៕