29 C
Phnom Penh

អាជ្ញាធរ​ព្រមាន​ចាត់​វិធានការ​លើ​កូដករ NAGA បើ​ពួកគេ​បន្ត​ធ្វើ​កូដកម្ម​នៅ​ទីតាំង​ចាស់​ជាប់​នឹង​ក្រុមហ៊ុន

ដោយ ឌឹ ខេមបូឌា ដេលី

បទវិភាគ

អាជ្ញាធរ​រាជធានី​ភ្នំពេញ ព្រមាន​ចាត់​វិធានការ​ច្បាប់​លើ​ក្រុម​កូដករ​ណាហ្គា​វើលដ៍ (NAGA World) បើសិនជា​ពួកគេ​នៅតែ​បន្ត​នាំគ្នា​ធ្វើ​កូដកម្ម​នៅ​ទីតាំង​ចាស់​ជិត​ក្រុមហ៊ុន​ណាហ្គា​វើលដ៍ ដើម្បី​តវ៉ា​ទាមទារ​ឱ្យ​ដោះលែង​ថ្នាក់​ដឹកនាំ និង​សកម្មជន​ជាង ១០​នាក់​កំពុង​ជាប់​ពន្ធនាគារ និង​ដោះស្រាយ​បញ្ចប់​វិវាទ​ការងារ​ជាមួយ​ក្រុមហ៊ុន។

ក្នុង​សេចក្ដី​ជូនដំណឹង​របស់​សាលា​រាជធានី​ភ្នំពេញ ចេញ​នៅ​ថ្ងៃ​ទី​១៥ ខែ​កុម្ភៈ នេះ​ឱ្យ​ដឹង​ថា អាជ្ញាធរ​រាជធានី​ភ្នំពេញ​មិន​អនុញ្ញាត​ឱ្យ​បុគ្គលិក​ក្រុមហ៊ុន​ណាហ្គា​វើលដ៍ ប្រមូល​ផ្ដុំ​ធ្វើ​សកម្មភាព​បាតុកម្ម​ខុសច្បាប់​នៅ​ក្នុង​សង្កាត់​ទន្លេបាសាក់ ខណ្ឌ​ចំការមន ជាដាច់ខាត។ ការ​ប្រកាស​មិន​អនុញ្ញាត​នេះ ក្រោម​ហេតុផល​ថា ដើម្បី​ទប់ស្កាត់​ការ​ឆ្លង​រាលដាល​ជំងឺ Covid-19 បំប្លែង​ខ្លួន​ថ្មី​ប្រភេទ​អូមីក្រុង ចូល​ក្នុង​សហគមន៍​កាន់តែ​ច្រើន​ឡើងៗ ក៏ដូចជា​ធានា​បាន​នូវ​សន្តិសុខ សណ្ដាប់ធ្នាប់ របៀប​រៀបរយ​សាធារណៈ។

លើស​ពី​នេះ ក្នុង​រយៈពេល​ធ្វើ​បាតុកម្ម និង​ធ្វើ​សកម្មភាព​របស់​ក្រុម​កូដករ​កន្លងមក បាន​បង្ក​ឱ្យ​ប៉ះពាល់​យ៉ាង​ធ្ងន់ធ្ងរ​ដល់​សណ្ដាប់ធ្នាប់ របៀប​រៀបរយ​សាធារណៈ ការ​កក​ស្ទះ​ចរាចរណ៍ ព្រមទាំង​បង្ក​ការ​រំខាន​ដល់​ការ​ប្រកប​របរ​អាជីវកម្ម និង​ប្រកប​ការងារ​ប្រចាំ​ថ្ងៃ។ តែ​បើសិនជា​កូដករ​ចង់​ធ្វើ​កូដកម្ម​បន្ត​នោះ សាលា​រាជធានី​ភ្នំពេញ​បាន​បង្គាប់​ឱ្យ​បុគ្គលិក​ណាហ្គា​វើលដ៍ ទៅ​ធ្វើ ឬ​ប្រមូល​ផ្ដុំ​នៅ​ទីលាន​ប្រជាធិបតេយ្យ​ថ្មី​ដែល​ស្ថិតនៅ​សង្កាត់​ឫស្សីកែវ ខណ្ឌ​ឫស្សីកែវ វិញ។

ក្នុង​ករណី​កូដករ​នៅតែ​រឹងរូស​បន្ត​សកម្មភាព​ទៀត​នោះ រដ្ឋបាល​រាជធានី​ភ្នំពេញ ព្រមាន​ចាត់​វិធានការ​រដ្ឋបាល និង​វិធានការ​ច្បាប់​ដោយ​គ្មាន​ការ​លើកលែង។

ឆ្លើយតប​នឹង​សេចក្ដី​ជូនដំណឹង​របស់​សាលា​រាជធានី​ភ្នំពេញ គណនី Facebook ឈ្មោះ Sem Sokea ដែល​ជា​កូដករ​ណាហ្គា បាន​លើកឡើង​ថា ទីតាំង​ដែល​ពួកគាត់​ត្រូវ​ធ្វើ គឺ​នៅ​ខាងមុខ​ក្រុមហ៊ុន​ណាហ្គា​វើលដ៍ ឬ​ជាប់​នឹង​របង​ក្រុមហ៊ុន Naga world ប៉ុន្តែ​ខាង​ក្រុមហ៊ុន​បាន​ដាក់​របាំង​ដោយ​មិន​ឱ្យ​ពួកគាត់​ឈរ​នៅ​ទីនោះ​ឡើយ ហើយ​អ្នក​ដែល​ខុស​នោះ​គឺ​ក្រុមហ៊ុន។ ជាង​នេះ​ទៀត មូលហេតុ​ដែល​ពួកគាត់​ឈរ​រហូត​មកដល់​ខាងមុខ​រដ្ឋសភា និង​ក្បែរ​ស្ថានទូត​អូស្ត្រាលី រហូត​ជិត​ដល់​ទូត​រុស្ស៊ី គឺ​ដោយសារ​ក្រុមហ៊ុន​ណាហ្គា​វើលដ៍ រារាំង​ដោយ​មាន​អាជ្ញាធរ​ជាច្រើន​ចាំ​ការពារ និង​ជួយ​ក្រុមហ៊ុន​ទៀត​ផង។

ប្រភព​ដដែល​លើកឡើង​ថា ពួកគាត់​ទាំងអស់​គ្នា​មាន​វិវាទ​ការងារ​ជាមួយ​ក្រុមហ៊ុន Naga world មិនមែន​មាន​ទំនាស់​ជាមួយ​អាជ្ញាធរ​ទេ ប៉ុន្តែ​ហេតុ​អ្វី​បាន​ជា​អាជ្ញាធរ​តម្រូវ​ឱ្យ​ពួកគាត់​ទៅ​ធ្វើ​នៅ​ទីលាន​ប្រជាធិបតេយ្យ។ ពួកគាត់​បាន​ធ្វើ​កូដកម្ម​ស្រប​ទៅ​តាម​ច្បាប់​ស្ដីពី​ការ​ធ្វើ​កូដកម្ម មិនមែន​បាតុកម្ម​ដូច​ការ​ចោទប្រកាន់​របស់​សាលា​រាជធានី​ភ្នំពេញ​ឡើយ។

គណនី​ឈ្មោះ Sem Sokea ដដែល​បាន​អំពាវនាវ​ដល់​ក្រសួង​ការងារ និង​ក្រសួង​ដែល​ពាក់ព័ន្ធ​ទាំងអស់ ឲ្យ​ជំរុញ​ឱ្យ​ភាគី​ក្រុមហ៊ុន​ដោះលែង​តំណាង​ពួកគាត់​ទាំង ៨​រូប និង​សមាជិក ៣​រូប​ទៀត​មក​វិញ ដើម្បី​ឱ្យ​ពួកគាត់​ចូល​តុ​ចរចា​ដោះស្រាយ​វិវាទ​ការងារ​នេះ​តាម​ប្រសាសន៍​របស់​រដ្ឋមន្ត្រី​ក្រសួង​មហាផ្ទៃ លោក ស ខេង។

ចំណែក​កូដករ​ម្នាក់​ទៀត​ទាមទារ​ឱ្យ​ថៅកែ​ចេញ​មក​ដោះស្រាយ​វិវាទ ដោយ​លើកឡើង​ថា ប្រសិនបើ​នៅ​បណ្ដែតបណ្ដោយ​ករណី​នេះ​ទៀត នឹង​ធ្វើ​ឱ្យ​ក្រុមហ៊ុន​ណាហ្គា​វើលដ៍ ដ៏​ធំ​នេះ ស្អុយ​ឈ្មោះ​កាន់តែ​ខ្លាំង។

អ្នក​គ្រប់គ្រង​កម្មវិធី​ការងារ​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) លោក ឃុន ថារ៉ូ បាន​សរសេរ​លើ​ទំព័រ Facebook ដោយ​ចាត់ទុក​ការ​ព្រមាន​របស់​អាជ្ញាធរ​នេះ​ថា មិនមែន​ជា​ដំណោះស្រាយ​ឡើយ។ លោក​ថា អាជ្ញាធរ និង​ស្ថាប័ន​ពាក់ព័ន្ធ​គួរ​រក​វិធី​ដោះស្រាយ​ដោយ​ប្រសិទ្ធភាព និង​អាច​ទុកចិត្ត​បាន ជាជាង​យក​ហេតុផល​ទប់ស្កាត់ Covid-19 ដើម្បី​បង្ក្រាប​សកម្មភាព​កូដកម្ម​ស្រប​ច្បាប់​របស់​កូដករ។ លោក​ស្នើ​សាលា​រាជធានី​ភ្នំពេញ មើល​ច្បាប់​ស្ដីពី​ការងារ និង​គោលការណ៍​ណែនាំ​របស់​ក្រសួង​មហាផ្ទៃ ស្ដីពី​ការ​ធ្វើ​កូដកម្ម និង​បាតុកម្ម​ដោយ​សន្តិវិធី។

បុគ្គលិក​ក្រុមហ៊ុន​កាស៊ីណូ​ណាហ្គា​វើលដ៍​រាប់​រយ​នាក់ បាន​ផ្អាក​ការ​ជួបជុំ​គ្នា​ធ្វើ​កូដកម្ម​ចាប់ពី​ថ្ងៃ​ទី​៥ ខែ​កុម្ភៈ ឆ្នាំ​២០២២ ក្រោយ​ពី​រក​ឃើញ​កូដករ​មួយ​ចំនួន​បាន​ឆ្លង​ជំងឺ Covid-19 និង​បន្ទាប់ពី​អាជ្ញាធរ​បាន​ចាប់​ខ្លួន​តំណាង​របស់​ពួកគេ​ចំនួន ៣​នាក់​បន្ថែម​ទៀត​ទៅ​ឃុំ​ខ្លួន​នៅ​ពន្ធនាគារ​ព្រៃស ខណៈ​កូដករ ៤​នាក់​ទៀត​ត្រូវ​បាន​តុលាការ​បញ្ជា​ឱ្យ​ចូល​ខ្លួន​ឆ្លើយ​បំភ្លឺ​ពាក់ព័ន្ធ​ការ​ចោទ​ថា ពួកគេ​រារាំង​ការ​អនុវត្ត​វិធានការ​ទប់ស្កាត់​ជំងឺ Covid-19។

ក្រោយ​ពី​មាន​ការ​ចាប់​ខ្លួន និង​ហាមឃាត់​កូដករ​ធ្វើ​កូដកម្ម​ទៀត​នោះ ក្រុម​អង្គការ​សង្គម​ស៊ីវិល សមាគម និង​សហជីព​តំណាង​ឱ្យ ១៣៤​ស្ថាប័ន បាន​នាំគ្នា​ដាក់​លិខិត​ចំហ​ទៅ​ក្រសួង​ពាក់ព័ន្ធ និង​រដ្ឋសភា ដើម្បី​ឱ្យ​ជួយ​អន្តរាគមន៍​ដោះស្រាយ​វិវាទ​ការងារ​នៅ​ក្រុមហ៊ុន​ណាហ្គា​វើលដ៍ ព្រមទាំង​ដោះលែង​តំណាង​សហជីព និង​ទម្លាក់​ចោល​ការ​ចោទប្រកាន់​ទៅលើ​ពួកគេ។

កាលពី​ថ្ងៃ​ទី​១៨ ខែ​មករា ឆ្នាំ​២០២២ សហជីព​អន្តរជាតិ​បាន​ផ្ញើ​លិខិត​មួយ​ទៅកាន់​លោក ហ៊ុន សែន ដោយ​លើកឡើង​ថា វិវាទ​ការងារ​នៅ​ក្រុមហ៊ុន​ណាហ្គា​វើលដ៍ បាន​កើត​ចេញពី​ការ​បរាជ័យ​របស់​ភាគី​ក្រុមហ៊ុន​ក្នុង​ការ​គោរព​សិទ្ធិ​កម្មករ និង​សហជីព ចំពោះ​កិច្ច​ចរចា​ដោយ​សមូហភាព ដើម្បី​ទទួល​បាន​ប្រាក់ឈ្នួល និង​លក្ខខណ្ឌ​ការងារ​កាន់តែ​ល្អ​ប្រសើរ។ លិខិត​ដដែល​លើកឡើង​ថា ក្រុមហ៊ុន​ណាហ្គា​វើលដ៍ មិន​បាន​គោរព​តាម​គោលការណ៍​របស់​រដ្ឋាភិបាល​លើ​ការងារ សុវត្ថិភាព និង​ការ​ការពារ​សុខភាព​ក្នុង​អំឡុង​ពេល​មាន​ជំងឺ Covid-19 នោះ​ទេ។

ទោះ​យ៉ាងណា កាលពី​ថ្ងៃ​ទី​១ ខែ​កុម្ភៈ ឆ្នាំ​២០២២ ស្ថានទូត​អាល្លឺម៉ង់ បាន​បង្ហាញ​ការ​គាំទ្រ​ប្រសាសន៍​លោក ស ខេង ដែល​ជំរុញ​ឱ្យ​ដោះស្រាយ​វិវាទ​ការងារ​នៅ​ក្រុមហ៊ុន​ណាហ្គា ឱ្យ​ឆាប់​ចប់ ដោយ​លោក​លើកឡើង​ថា ការ​ធ្វើ​កូដកម្ម​របស់​កូដករ​ជា​រឿង​វិវាទ​ការងារ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស