សមត្ថកិច្ចចាប់បញ្ជូនកូដករក្រុមហ៊ុនណាហ្គាវើលដ៍ (NAGA World) ប្រមាណ ៦០នាក់ទាំងបង្ខំឱ្យឡើងលើរថយន្តសាលារាជធានីភ្នំពេញ ដើម្បីយកទៅធ្វើតេស្ដ Covid-19 នៅមណ្ឌលព្រែកព្នៅ ក្នុងពេលដែលពួកគេចេញធ្វើកូដករជាថ្មីទៀត បន្ទាប់ពីបញ្ចប់ការធ្វើចត្តាឡីស័កតាមវិធានការសុខាភិបាល។
កូដករក្រុមហ៊ុនណាហ្គាវើលដ៍ នៅថ្ងៃទី២១ ខែកុម្ភៈ បានប្រមូលផ្ដុំគ្នាជិតក្រុមហ៊ុន ដើម្បីបន្តធ្វើកូដកម្មទាមទារឱ្យដោះលែងថ្នាក់ដឹកនាំសហជីព និងសកម្មជនជាង ១០នាក់ រួមទាំងដោះស្រាយបញ្ចប់វិវាទការងារក្រុមហ៊ុនល្បែងមួយនេះ។
ការនាំគ្នាបន្តធ្វើកូដកម្មរបស់ក្រុមកូដករជាថ្មីទៀតនៅថ្ងៃចន្ទ នេះ បន្ទាប់ពីពួកគេទាំងអស់គ្នាបានបញ្ចប់ការធ្វើចត្តាឡីស័កតាមការកំណត់របស់អាជ្ញាធរ និងក្រសួងសុខាភិបាល ក្រោយពីក្រសួងសុខាភិបាលអះអាងថារកឃើញកូដករដែលតវ៉ាមានវិជ្ជមាន Covid-19។
កូដករម្នាក់ឈ្មោះ ពុទ្ធី លីណា បានប្រើប្រាស់បណ្ដាញសង្គម Facebook ដោយថតឡាយវីដេអូរៀបរាប់មុនពេលសមត្ថកិច្ចចាប់បញ្ជូនទៅធ្វើចត្តាឡីស័កថា សមត្ថកិច្ចស្លៀកពាក់ស៊ីវិលបានតាមឃ្លាំមើល និងថតរូបសកម្មភាព ហើយឱ្យពួកគាត់បំបែកគ្នាវិញ ខណៈទីតាំងជុំវិញក្រុមហ៊ុនត្រូវបានសមត្ថកិច្ចដាក់របាំងរារាំងមិនឱ្យកូដករទៅធ្វើកូដកម្មនៅជិតនោះឡើយ។
ក្រុមកូដករលើកឡើងថា ក្រោយពីពួកគាត់មិនបំបែក សមត្ថកិច្ចមានទាំងស្លៀកឯកសណ្ឋានជាច្រើននាក់ បាននាំគ្នាមកចាប់កូដករទាំងបង្ខំពួកគាត់ឱ្យចូលរថយន្តក្រុងរបស់សាលារាជធានីភ្នំពេញ រួចដឹកយកទៅទីតាំងសមាគមនារីកម្ពុជាដើម្បីសន្តិភាព និងអភិវឌ្ឍន៍ ដើម្បីធ្វើចត្តាឡីស័កទាំងដែលពួកគាត់ប្រមាណ ៥០នាក់នេះបានបញ្ចប់ការធ្វើចត្តាឡីស័កតាមការកំណត់របស់ក្រសួងរួចហើយនោះ។
ប្រភពដដែលបញ្ជាក់ទៀតថា អាជ្ញាធរតែងតែធ្វើទុក្ខបុកម្នេញក្រុមកូដករ ដោយមិនឱ្យជួបជុំគ្នាធ្វើកូដកម្ម ទោះបីជាពួកគាត់បាននាំគ្នារក្សាគម្លាតសុវត្ថិភាពតាមវិធានការសុខាភិបាលក៏ដោយ ដែលវិធានការនេះធ្វើឡើងមិនតម្លាភាពឡើយ ដោយកន្លែងផ្សេងៗមានការជួបជុំមនុស្សច្រើនប្រជ្រៀតគ្នា តែអាជ្ញាធរមិនដែលទៅហាមឃាត់នោះទេ។
កូដករដដែលថា ពួកគាត់ទាំងអស់គ្នាមិនចង់មកឈរកណ្ដាលថ្ងៃក្ដៅតវ៉ាឡើយ តែមកពីក្រុមហ៊ុន និងរដ្ឋាភិបាលមិនព្រមដោះលែងតំណាង និងដោះស្រាយវិវាទការងារឱ្យពួកគាត់ ដែលធ្វើឱ្យជម្លោះនេះកាន់តែអូសបន្លាយយូរ។ ក្រៅពីមិនដោះស្រាយហើយ ក្រុមកូដករថា រដ្ឋាភិបាល និងសមត្ថកិច្ចបែរជាចេញមុខមកចាប់ខ្លួន គំរាមកំហែង និងបំបែក ដោយរុញច្រានពួកគាត់ដើម្បីការពារផលប្រយោជន៍ក្រុមហ៊ុនណាហ្គាវើលដ៍ទៅវិញ ទោះបីដឹងថាក្រុមហ៊ុននេះកំពុងរំលោភបំពានច្បាប់ជាតិ និងអន្តរជាតិ។
បើតាមសេចក្ដីជូនដំណឹងរបស់សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ នៅថ្ងៃចន្ទ នេះ បានឱ្យដឹងថា ចាប់ពីថ្ងៃទី៥ ដល់ថ្ងៃទី៨ ខែកុម្ភៈ ក្រុមកូដករទាំងអស់បានទៅយកសំណាករួចរាល់អស់ហើយ និងបានធ្វើចត្តាឡីស័កខ្លួនឯងនៅផ្ទះចាប់តាំងពីថ្ងៃទី៦ ដល់ថ្ងៃទី១៦ ខែកុម្ភៈ ព្រមទាំងបានទៅធ្វើតេស្ដយកសំណាកជាលើកទី២ នៅមជ្ឈមណ្ឌលកោះពេជ្រ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ បង្ហាញការសោកស្ដាយចំពោះវិធានការរបស់សមត្ថកិច្ច។ លោកលើកឡើងលើ Facebook ទៀតថា ប្រសិនបើជារដ្ឋាភិបាល និងអាជ្ញាធរខិតខំប្រឹងប្រែងដោះស្រាយវិវាទការងារក្រុមហ៊ុនណាហ្គាវើលដ៍ដូចការហាមឃាត់ ទប់ស្កាត់ រារាំងកូដករនោះ ម៉្លេះករណីនេះបានដោះស្រាយរួចរាល់ជាយូរណាស់មកហើយ។
ចាប់ពីខែមករា ឆ្នាំ២០២២ រហូតមកទល់ពេលនេះ ថ្នាក់ដឹកនាំសហជីព និងកូដករក្រុមហ៊ុនណាហ្គាវើលដ៍ចំនួន ១១នាក់ហើយត្រូវបានតុលាការសម្រេចឃុំខ្លួន ក្រោមបទចោទប្រកាន់ «ញុះញង់ឱ្យមានកូដកម្ម» និង «ល្មើសវិធានការច្បាប់ប្រឆាំង Covid-19» ខណៈកូដករ ៤នាក់ទៀតត្រូវប្រឈមការចាប់ខ្លួនក្រោមបទចោទថា «រារាំងដល់ការអនុវត្តវិធានការប្រយុទ្ធនឹងជំងឺ Covid-19» ផងដែរ។
កាលពីថ្ងៃទី១៥ ខែកុម្ភៈ អង្គការឃ្លាំមើលសិទ្ធិមនុស្ស Human Rights Watch ក៏បានចេញសេចក្ដីថ្លែងការណ៍មួយ ដោយលើកឡើងថា ការធ្វើទុក្ខបុកម្នេញរបស់រដ្ឋាភិបាលទៅលើសកម្មជនសហជីព ទំនងជាសំដៅកាត់បន្ថយសាមគ្គីភាព និងកម្លាំងនៃចលនាសហជីពនៅកម្ពុជា ដែលកំពុងតែកើនឡើង និងការគាំទ្ររបស់ពួកគេចំពោះកូដករណាហ្គាវើលដ៍។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch លោក Phil Robertson ប្រាប់ទៅរដ្ឋាភិបាលកម្ពុជាឱ្យបញ្ឈប់ជាបន្ទាន់នូវការយកវិធានការសុខភាពសាធារណៈ ជាលេសដើម្បីគាបសង្កត់សិទ្ធិធ្វើកូដកម្មរបស់កម្មករ និងសិទ្ធិជាមូលដ្ឋានផ្សេងៗទៀត។
ចំណែកក្រុមអ្នកជំនាញនៃអង្គការសហប្រជាជាតិទទួលបន្ទុកសិទ្ធិមនុស្ស កាលពីថ្ងៃទី១៦ ខែកុម្ភៈ ឆ្នាំ២០២២ បានចាត់ទុកវិធានការថ្មីដែលអាជ្ញាធរប្រើដើម្បីទប់ស្កាត់ការធ្វើកូដកម្មរបស់ក្រុមកូដករណាហ្គាវើលដ៍ ថាជា «រឿងមិនសមហេតុផល» ដោយថាអាជ្ញាធរមិនគួរប្រើច្បាប់មួយសម្រាប់អនុវត្តទៅលើពួកគេក្នុងរូបភាពខុសគ្នាទៅនឹងសាធារណជនផ្សេងទៀតនោះឡើយ៕