អតីតប្រធានចលនាយុវជនគណបក្សសង្គ្រោះជាតិប្រចាំសាធារណរដ្ឋកូរ៉េ ព្យាករថា ការលះបង់របស់ប្រធានគណបក្សសង្គ្រោះជាតិ លោក កឹម សុខា នឹងត្រូវចារទុកក្នុងប្រវត្តិសាស្ត្ររបស់កម្ពុជា ក្នុងនាមជាមេដឹកនាំដែលបញ្ចប់វប្បធម៌នយោបាយខ្មែរថា «អ្នកឈ្នះជាស្តេច អ្នកចាញ់ជាចោរ» មិនត្រឹមតែប៉ុណ្ណោះ លោក កឹម សុខា នឹងជាប់ឈ្មោះជាមេដឹកនាំកសាងលទ្ធិប្រជាធិបតេយ្យមួយរូបនៅកម្ពុជា។
លោក យឹម ស៊ីណន បានសរសេរលើគណនី Facebook របស់លោកកាលថ្ងៃទី២២ ខែកុម្ភៈ ថា មូលដ្ឋានគ្រឹះនៃការកសាងសង្គមប្រជាធិបតេយ្យ គឺផ្តើមចេញពីអ្នកនយោបាយចេះអត់ឱនអធ្យាស្រ័យឱ្យគ្នាទៅវិញទៅមក។
លោក យឹម ស៊ីណន លើកឡើងថា មេដឹកនាំបក្សប្រឆាំង លោក កឹម សុខា តែងប្រកាន់ជំហរនយោបាយអហិង្សា ព្រមទាំងតម្កល់សិទ្ធិសេរីភាព និងប្រជាធិបតេយ្យជាចម្បង ដូចគ្នាទៅនឹងលោក ណែលសាន់ ម៉ាន់ដេឡា (nelson mandela) ដែលល្បីល្បាញខាងប្រកាន់ជំហរខន្តីសន្តោសប្រណីនៅប្រទេសអាហ្វ្រិកខាងត្បូងដូច្នោះដែរ។
អតីតប្រធានចលនាយុវជនគណបក្សសង្គ្រោះជាតិរូបនេះ បញ្ជាក់ថា មេដឹកនាំបក្សប្រឆាំង លោក កឹម សុខា មិនមែនជាមេដឹកនាំដែលរត់ចោលស្រុក និងធ្វើនយោបាយយកអ្នកគាំទ្ររបស់ខ្លួនឱ្យចូលគុកជំនួសនោះទេ។ ជាងនេះទៀត លោកថា លោក កឹម សុខា ក៏មិនដែលប្រកាសយកអ្នកដឹកនាំនយោបាយដែលមាននិន្នាការផ្សេងជាសត្រូវនឹងការដឹកនាំរបស់ខ្លួនដែរ។
ការលើកឡើងរបស់លោក យឹម ស៊ីណន ស្របពេលដែលមេដឹកនាំបក្សប្រឆាំង លោក កឹម សុខា កំពុងតស៊ូមតិដើម្បីសេរីភាព និងលទ្ធិប្រជាធិបតេយ្យយ៉ាងស្វិតស្វាញតាមផ្លូវតុលាការ និងតាមបណ្តាអង្គទូតនៃប្រទេសលោកសេរីនាពេលបច្ចុប្បន្ននេះ។
កាលពីចុងឆ្នាំ២០២១ កន្លងទៅ មេដឹកនាំបក្សប្រឆាំង លោក កឹម សុខា អះអាងថា លោកមានបំណងប្រាថ្នាចង់ឃើញសង្គមជាតិ និងពលរដ្ឋខ្មែររួមសាមគ្គីគ្នា ចេះជួយគ្នា អត់ឱនឲ្យគ្នាដើម្បីកម្ពុជាមានសន្តិភាពពិតប្រាកដ។ ដូច្នេះ លោកនៅតែរក្សាគោលការណ៍អហិង្សា ការអត់ធ្មត់ និងការស្វែងរកដំណោះស្រាយលើបញ្ហានានាដោយសន្តិវិធី ដើម្បីបម្រើប្រយោជន៍ប្រជាពលរដ្ឋខ្មែរគ្រប់រូប។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានលើកឡើងកាលពីពេលថ្មីៗនេះថា ប្រធានគណបក្សសង្គ្រោះជាតិ លោក កឹម សុខា គឺជាកម្លាំងដ៏ធំមួយតំណាងឱ្យលទ្ធិប្រជាធិបតេយ្យនៅកម្ពុជា ប៉ុន្តែកម្លាំងមេដឹកនាំប្រឆាំងរូបនេះ គឺជាសត្រូវធំណាស់របស់លទ្ធិកុម្មុយនីស្ដផ្ដាច់ការ ហើយភស្តុតាងដែលបញ្ជាក់យ៉ាងច្បាស់នៅពេលនេះ គឺការប្រើល្បិចឃុំខ្លួនលោកតាមរយៈតុលាការដែលកំពុងរំលោភនីតិវិធីច្បាប់ ដោយការបិទសិទ្ធិសេរីភាពលើសពេលកំណត់ដូចសព្វថ្ងៃនេះ។
មេដឹកនាំបក្សប្រឆាំងលោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេសតាមប្រសាសន៍លោក ហ៊ុន សែន។
ទោះជាយ៉ាងណាក៏ដោយ រហូតមកទល់នឹងពេលនេះមានរយៈពេលជិត ៥ឆ្នាំហើយ ប្រធានបក្សប្រឆាំងរូបនេះនៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ ខណៈតុលាការចេះតែបន្តសវនាការរបស់លោកដោយពុំមានការកំណត់ពេលវេលាជាក់លាក់។
ជុំវិញបញ្ហានេះ នៅថ្ងៃទី២៣ ខែកុម្ភៈ ឆ្នាំ២០២២ នេះ តុលាការក្រុងភ្នំពេញបានបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា លើកទី៣១ ហើយ ប៉ុន្តែបានត្រឹមតែនាំគ្នាពិនិត្យ និងសាកសួរដេញដោលលើភស្តុតាងតែប៉ុណ្ណោះ ហើយតុលាការបានប្រកាសថានឹងបន្តសវនាការរបស់លោកនៅថ្ងៃទី២ ខែមីនា ឆ្នាំ២០២២ បន្តទៀត៕