30 C
Phnom Penh

តុលាការ​ឃុំ​ខ្លួន​ជនជាតិ​ចិន​៣​នាក់​ករណី​ផ្ដល់​ព័ត៌មាន​កុហក​រឿង​ទាសករ​លក់​ឈាម​នៅ​ខេត្ត​ព្រះសីហនុ

ដោយ ឌឹ ខេមបូឌា ដេលី

បទវិភាគ

ចៅក្រម​ស៊ើបសួរ​សាលាដំបូង​ខេត្ត​ព្រះសីហនុ សម្រេច​ចោទប្រកាន់ និង​ឃុំ​ខ្លួន​ជនជាតិ​ចិន​ចំនួន ៣​នាក់​នៅ​ក្នុង​ពន្ធនាគារ និង​ម្នាក់​ទៀត​ត្រូវ​បាន​ពន្យារពេល​ឃុំ​ខ្លួន​ដោយសារ​បញ្ហា​សុខភាព កាលពី​ថ្ងៃ​ទី​២ ខែ​មីនា កន្លងមក​នេះ ក្រោយ​ពេល​អាជ្ញាធរ​រក​ឃើញ​ថា ព័ត៌មាន​ទាសករ​លក់​ឈាម​ជា​រឿង​ប្រតិដ្ឋ។

អ្នក​នាំពាក្យ​អយ្យការ​អម​សាលាដំបូង​ខេត្ត​ព្រះសីហនុ លោក ហួត វិចិត្រ ដែល​ជា​អ្នក​ចាត់ការ​ផ្ទាល់​លើ​ករណី​នេះ បាន​ប្រាប់​ក្រុម​អ្នក​សារព័ត៌មាន​ថា លោក​បាន​បញ្ជូន​ជន​សង្ស័យ​ទាំង ៣​នាក់​ទៅ​ចៅក្រម​ស៊ើបសួរ ហើយ​ចៅក្រម​ស៊ើបសួរ​ក៏​បាន​សម្រេច​ឃុំ​ខ្លួន​ពួកគេ​ទាំង ៣​នាក់​នោះ​នៅ​ក្នុង​ពន្ធនាគារ​ខេត្ត​ព្រះសីហនុ កាល​ពី​ម្សិលមិញ (ថ្ងៃ​ទី​៣ មីនា)។

លោក​ថា អ្នក​ទាំង ៣​នាក់​ពាក់ព័ន្ធ​នឹង​បទ​ចោទ «ផ្តល់​សេចក្តី​ប្រកាស​ដោយ​ភូត​កុហក ញុះញង់​ឱ្យ​មាន​ការ​រើសអើង» តាម​បញ្ញត្តិ​មាត្រា ៤៩៦ និង ៦៣៣ នៃ​ក្រម​ព្រហ្មទណ្ឌ។ ជន​ត្រូវ​ចោទ​ទាំង ៣​នាក់​ជា​ជនជាតិ​ចិន។

ជនជាតិ​ចិន​ទាំង ៤​នាក់ ក្នុង​នោះ​ឈ្មោះ LI YA YUAN LUN ដែល​អះអាង​ថា​ជា​ជនរងគ្រោះ ត្រូវ​បាន​ចោទប្រកាន់​ពី​បទ «ចូល​មក​កម្ពុជា​ដោយ​គ្មាន​ការអនុញ្ញាត ការ​ញុះញង់​ឱ្យ​មាន​ការរើសអើង និង​ផ្តល់​សេចក្តី​ប្រកាស​ដោយ​ភូត​កុហក» កាលពី​អំឡុង​ខែ​មិថុនា ឆ្នាំ​២០២១ ដល់​អំឡុង​ខែ​កុម្ភៈ ឆ្នាំ​២០២២។

ស្ត្រី​ឈ្មោះ TAN XIAO MEI ត្រូវ​ចោទ​ពី​បទ «ផ្តើម​គំនិត​ក្នុង​អំពើ​ញុះញង់​ឱ្យ​មាន​ការរើសអើង និង​ផ្តល់​សេចក្តី​ប្រកាស​ដោយ​ភូត​កុហក»។ ចំណែក​បុរស​ពីរ​នាក់​ទៀត ក្នុង​នោះ​ឈ្មោះ CHEN BAO RONG និង​ឈ្មោះ CHEN XIAO HUA ចោទប្រកាន់​ពី​បទ «ញុះញង់​ឱ្យ​មាន​ការរើសអើង ជ្រៀតជ្រែក​ដោយ​ខុសច្បាប់​ទៅ​ក្នុង​ការ​បំពេញ​មុខងារ​សាធារណៈ ប្រើប្រាស់​ដោយ​ខុសច្បាប់​នូវ​ឯកសារ​បញ្ជាក់​វិជ្ជាជីវៈ និង​ផ្តល់​សេចក្តី​ប្រកាស​ដោយ​ភូត​កុហក»។

យ៉ាងណាក៏ដោយ លោក LI YA YUAN LUN ដែល​អះអាង​ខ្លួន​ជា​ជនរងគ្រោះ​ធ្លាប់​បាន​ប្រាប់​សារព័ត៌មាន​ក្នុង​ស្រុក​កន្លងមក​ថា អំពើ​ប្រតិបត្តិការ​ឆបោក​នៅ​កម្ពុជា​ដែល​ត្រូវ​បាន​គេ​បូម​ឈាម​របស់​គាត់​ជាច្រើន​ដង​តាំងពី​ខែ​សីហា ឆ្នាំ​២០២១ ក្នុង​ខេត្ត​ព្រះសីហនុ ធ្វើ​ឱ្យ​ស្ថានភាព​សុខភាព​គាត់​ទន់ខ្សោយ និង​មាន​ហានិភ័យ​ខ្ពស់។

កាលពី​ថ្ងៃ​ទី​២៨ ខែ​កុម្ភៈ ឆ្នាំ​២០២២ អគ្គស្នងការដ្ឋាន​នគរបាល​ជាតិ​បាន​ចេញ​សេចក្តី​ប្រកាស​ព័ត៌មាន​ថា ការ​ចុះ​ផ្សព្វផ្សាយ​ព័ត៌មាន​ស្ដីពី​ការ​ចាប់​បង្ខាំង​ជនជាតិ​ចិន ធ្វើជា​ទាសករ​លក់​ឈាម​នៅ​តំបន់​ឆៃណាថោន ក្នុង​ខេត្ត​ព្រះសីហនុ អង្គភាព​ជំនាញ​បាន​ចុះ​ស្រាវជ្រាវ​រក​ឃើញ​ថា​ព័ត៌មាន​នោះ​ជា​រឿង​ប្រតិដ្ឋ។

នគរបាល​ជាតិ​អះអាង​ថា ព័ត៌មាន​ទាំងនោះ​ប្រតិដ្ឋ​ឡើង​ដោយ​ឈ្មោះ LI YA YUAN LUN ស្នាក់​នៅ​មន្ទីរពេទ្យ​ប៊ីធន​កម្ពុជា-ចិន រាជធានី​ភ្នំពេញ និង​អ្នក​ពាក់ព័ន្ធ​ចំនួន ៣​នាក់​ទៀត។

ក្រុម​អ្នកជំនួញ​ចិន​នៅ​កម្ពុជា​បាន​សរសេរ​លិខិត​ចំហ​រួម​មួយ​ផ្ញើ​ជូន​អាជ្ញាធរ​ចិន និង​កម្ពុជា កាលពី​ថ្ងៃ​ទី​២៤ ខែ​កុម្ភៈ កន្លងទៅ ដោយ​ស្នើ​ឱ្យ​បង្ក្រាប​អ្វី​ដែល​ពួកគេ​ចាត់ទុក​ថា​ជា​ឧក្រិដ្ឋកម្ម «ខុសច្បាប់​ដ៏​កាច​សាហាវ» ពាក់ព័ន្ធ​នឹង​ពលរដ្ឋ​ចិន​នៅ​កម្ពុជា។ សភា​ពាណិជ្ជកម្ម​ចិន​នៅ​កម្ពុជា ក៏​បាន​ជំរុញ​ដល់​មន្ត្រី​ពាក់ព័ន្ធ​ទាំងឡាយ​ឱ្យ​បង្ក្រាប​ក្រុម​ដែល​ប្រព្រឹត្ត​សកម្មភាព​ខុសច្បាប់​ទាំងនេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស