 ជិត ២០០នាក់ទាំងបង្ខំដាក់រថយន្តបញ្ជូនទៅទុកនៅមណ្ឌលចត្តាឡីស័កក្នុងខណ្ឌព្រែកព្នៅ បន្ទាប់ពីពួកគេបាននាំគ្នាចេញធ្វើកូដកម្មជាថ្មីទៀត។){kind=link}
សមត្ថកិច្ចរាជធានីភ្នំពេញ វាយ និងចាប់ខ្លួនក្រុមកូដករណាហ្គាវើលដ៍ (NAGA World) ជិត ២០០នាក់ទាំងបង្ខំដាក់រថយន្តបញ្ជូនទៅទុកនៅមណ្ឌលចត្តាឡីស័កក្នុងខណ្ឌព្រែកព្នៅ បន្ទាប់ពីពួកគេបាននាំគ្នាចេញធ្វើកូដកម្មជាថ្មីទៀត។
ក្នុងវីដេអូឃ្លីបកងកម្លាំងសមត្ថកិច្ចជាច្រើននៅថ្ងៃទី៧ មីនា នេះ បានចុះទៅចាប់ខ្លួន ហើយថែមទាំងបានវាយត្រូវក្បាលកូដករ និងបានចាប់បង្ខំឱ្យចូលរថយន្ត ដើម្បីដឹកយកទៅមណ្ឌលចត្តាឡីស័កជាថ្មីទៀត។ វិធានការរបស់សមត្ថកិច្ច បានធ្វើឡើងបន្ទាប់ពីពួកគេបាននាំគ្នាបន្តធ្វើកូដកម្មជាថ្មីទៀតនៅមុខក្រុមហ៊ុនណាហ្គាវើលដ៍ទី២។
កូដករម្នាក់ក្នុងចំណោមជិត ២០០នាក់ ឈ្មោះ Tulip Mar ដែលត្រូវបានសមត្ថកិច្ចរាជធានីភ្នំពេញចាប់ទៅដាក់នៅមណ្ឌលចត្តាឡីស័កខណ្ឌព្រែកព្នៅ បានប្រើប្រាស់បណ្ដាញសង្គមហ្វេសប៊ុកឡាយរៀបរាប់ថា សមត្ថកិច្ចមិនបានជួយដោះស្រាយវិវាទជាមួយក្រុមហ៊ុនណាហ្គា ប៉ុន្តែថែមទាំងចាប់ខ្លួន និងប្រើទាំងអំពើហិង្សាលើពួកគាត់ជាកូដករទៀត។
អ្នកស្រីចាត់ទុកសកម្មភាពរបស់ក្រុមសមត្ថកិច្ចដែលចេះតែរារាំង និងប្រើអំពើហិង្សា រួមទាំងចាប់ខ្លួនទាំងបង្ខំយកទៅដាក់នៅមណ្ឌលចត្តាឡីស័កម្ដងហើយម្តងទៀតនេះ ថាជារឿងអយុត្តិធម៌សម្រាប់ពួកគាត់ដែលជាជនរងគ្រោះ។ អ្នកស្រីយល់ថា អាជ្ញាធរកំពុងយកលេសទប់ស្កាត់កូវីដ-១៩ បំបិទសិទ្ធិសេរីភាពក្នុងការជួបជុំដោយសន្តិវិធី។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ យល់ថាវិវាទការងារនេះនឹងមិនអាចបញ្ចប់ដោយសន្តិវិធីនោះទេ បើភាគីនិយោជក និងរដ្ឋអំណាចមិនមានឆន្ទៈក្នុងការចូលរួមដោះស្រាយដោយភាពស្មោះត្រង់ តម្លាភាព និងអាចទុកចិត្តបាន ហើយនៅតែបន្តដាក់សម្ពាធទៅកាន់ភាគីជនរងគ្រោះ។
កាលពីថ្ងៃទី២៥ ខែកុម្ភៈ ឆ្នាំ២០២២ ក្រុមសង្គមស៊ីវិលទាមទារឲ្យអាជ្ញាធរបញ្ឈប់ជាបន្ទាន់រាល់ការបៀតបៀន ការប្រើអំពើហិង្សា រួមទាំងការអនុវត្តវិធានការកូវីដ-១៩ មិនត្រឹមត្រូវមួយចំនួនទៀតដែលនាំឲ្យមានការរំលោភសិទ្ធិស្ត្រី និងសិទ្ធិជួបជុំដែលការពារដោយរដ្ឋធម្មនុញ្ញ៕