30 C
Phnom Penh

អាមេរិក​ប្រកាស​ផ្ដល់​ជំនួយ​សព្វាវុធ​បន្ថែម​ទៀត​ទៅ​ឱ្យ​អ៊ុយក្រែន​គិតជា​ប្រាក់ ៨០០​លាន​ដុល្លារ

ដោយ ឌឹ ខេមបូឌា ដេលី

បទវិភាគ

ក្រោយ​ពី​ប្រធានាធិបតី​អ៊ុយក្រែន លោក Volodymyr Zelenskiy រៀបរាប់​អំពី​ការ​ឈឺចាប់​របស់​ប្រជាជន​អ៊ុយក្រែន ដោយសារ​សង្គ្រាម​ឈ្លានពាន​ពី​សំណាក់​រុស្ស៊ី ដែល​លោក​ថ្លែង​ទៅកាន់​សមាជិក​សភា​សហរដ្ឋ​អាមេរិក កាលពី​ថ្ងៃ​ទី​១៦ មីនា គឺ​មិន​បាន​មួយ​ម៉ោង​ផង លោក​ប្រធានាធិបតី ចូ បៃដិន ប្រកាស​ផ្ដល់​ជំនួយ​សព្វាវុធ​គិតជា​សាច់ប្រាក់ ៨០០​លាន​ដុល្លារ​ទៅ​ឱ្យ​ប្រទេស​អ៊ុយក្រែន។

តាម​បណ្ដាញ​ផ្សាយ​ព័ត៌មាន​របស់​សហរដ្ឋ​អាមេរិក VOA ផ្សាយ​ជា​ភាសា​អង់គ្លេស ឲ្យ​ដឹង​ថា សព្វាវុធ​ដែល​ត្រូវ​បញ្ជូន​ថែម​ទៀត​ទៅ​ឲ្យ​រដ្ឋាភិបាល​របស់​ប្រធានាធិបតី Zelenskiy មាន​ដូចជា យន្តហោះ Drone ប្រព័ន្ធ​កាំជ្រួច​ការពារ​ដែនអាកាស និង​កាំភ្លើង​បាញ់​កម្ទេច​រថក្រោះ ជាដើម។

ក្នុង​ជំនួយ​ជា អាវុធ​នេះ គឺ​កាំជ្រួច​បាញ់​ទម្លាក់​យន្តហោះ​មាន ៨០០​ដើម កាំជ្រួច​បាញ់​លើ​ស្មា ២​ពាន់​ដើម អាវុធ​បាញ់​រថពាសដែក ១​ពាន់​ដើម អាវុធ​បាញ់​រថក្រោះ ៦​ពាន់​ដើម គ្រាប់រំសេវ​ចំនួន ២០​លាន មួកដែក និង​អាវក្រោះ​ចំនួន ១​ម៉ឺន។

លោក បៃដិន បាន​ប្រកាស​ផ្តល់​ជំនួយ​យោធា​បន្ថែម​ចំនួន ២០០​លាន​ដុល្លារ​ដល់​អ៊ុយក្រែន​រួចហើយ​កាលពី​ថ្ងៃ​សៅរ៍​សប្ដាហ៍​មុន។ ចំណែក​ជំនួយ​យោធា ៣៥០​លាន​ដុល្លារ​លើកដំបូង ត្រូវ​បាន​ប្រកាស​ផ្តល់​ឱ្យ​អ៊ុយក្រែន​កាលពី​ចុង​ខែ​កុម្ភៈ គឺ​ប៉ុន្មាន​ថ្ងៃ​ប៉ុណ្ណោះ​ក្រោយ​ពី​រុស្ស៊ី លើក​ទ័ព​ចូល​ឈ្លានពាន​អ៊ុយក្រែន កាលពី​ថ្ងៃ​ទី​២៤ កុម្ភៈ។ ជំនួយ​របស់​អាមេរិក​ដល់​អ៊ុយក្រែន នេះ គឺជា​ជំនួយ​ផ្នែក​សន្តិសុខ​ដ៏​ធំ​បំផុត​នៅ​ក្នុង​ប្រវត្តិសាស្ត្រ​របស់​អាមេរិក។

បើ​តាម​ប្រភព​ដដែល​នេះ​ឲ្យ​ដឹង​ថា ជំនួយ​លើក​ទី​៣ ដែល​សហរដ្ឋ​អាមេរិក​បាន​បញ្ជូន​ទៅ​ឱ្យ​ប្រទេស​អ៊ុយក្រែន នេះ គឺ​ដើម្បី​ជួយ​ការពារ​សន្តិសុខ​របស់​ប្រទេស​នេះ ហើយ​ដែល​នាំ​ឲ្យ​ជំនួយ​របស់​អាមេរិក​សម្រាប់​ប្រទេស​អ៊ុយក្រែន​កើន​ឡើង​ជាង ១៣៥០​លាន​ដុល្លារ។

មន្ទីរ​ប៉ុងតាហ្គោន និយាយ​ថា សព្វាវុធ​ដែល​ត្រូវ​ផ្ដល់​ឱ្យ​ប្រទេស​អ៊ុយក្រែន​ថែមទៀត​នេះ បាន​រៀបចំ​អស់​ហើយ​ដើម្បី​ដឹក​ទៅ​ឱ្យ​ប្រទេស​អ៊ុយក្រែន។

នៅ​ក្នុង​សេចក្ដី​ថ្លែងការណ៍​ទៅកាន់​សមាជិក​សភា លោក​ប្រធានាធិបតី Zelenskiy បាន​ទទូច​សុំ​ឱ្យ​សហរដ្ឋ​អាមេរិក​បន្ត​ជួយ​ប្រជាជន​អ៊ុយក្រែន​ថែមទៀត ជាពិសេស​សព្វាវុធ​ដើម្បី​ឱ្យ​ប្រជាជន និង​កងទ័ព​អ៊ុយក្រែន​បន្ត​ពង្រឹង​ស្មារតី​ប្រយុទ្ធ​ការពារ​ទឹកដី​ប្រឆាំង​នឹង​កងទ័ព​រុស្ស៊ី។ បន្ថែម​លើស​ពី​នេះ​ទៀត លោក​ទទូច​សុំ​ឱ្យ​អាមេរិក និង​មេដឹកនាំ​ណាតូ (NATO) ប្រកាស​ដាក់​លំហអាកាស​ប្រទេស​អ៊ុយក្រែន​ជា​តំបន់​ហាម​ហោះហើរ។ ទន្ទឹម​នេះ លោក Zelenskiy ចាត់ទុក​លោក បៃដិន និង​សហរដ្ឋ​អាមេរិក​ជា​ប្រទេស​មហាអំណាច​ដែល​មាន​ឥទ្ធិពល​ក្នុង​ការ​ជួយ​ការពារ​សន្តិភាព​ពិភពលោក។

មន្ត្រី​សេតវិមាន​ម្នាក់​និយាយ​ថា រហូត​មក​ទល់​ពេលនេះ សហរដ្ឋ​អាមេរិក​នៅតែ​ជា​ប្រទេស​ផ្តល់​ជំនួយ​យោធា​ច្រើន​ជាងគេ​បំផុត​ទៅ​ឲ្យ​ប្រទេស​អ៊ុយក្រែន។ នៅ​ក្នុង​ដំណើរ​ទស្សនកិច្ច​នៅ​បណ្ដា​ប្រទេស​អឺរ៉ុប​ខាងកើត និង​នៅ​ក្នុង​ដែនដី​ប្រទេស​ប៉ូឡូញ កាលពី​ថ្ងៃ​ទី​៥ មីនា ដើម្បី​ត្រួតពិនិត្យ​ស្ថានភាព​រស់នៅ​របស់​ជនភៀសខ្លួន​នៃ​ប្រជាជន​អ៊ុយក្រែន រដ្ឋមន្ត្រី​ការបរទេស​អាមេរិក លោក Antony Bliken បាន​សន្យា​ថា សហរដ្ឋ​អាមេរិក​នឹង​ប្រកាស​ស្វែងរក​ជំនួយ​ហិរញ្ញវត្ថុ​បន្ថែម ២៧៥០​លាន​ដុល្លារ​សម្រាប់​ជួយ​ដោះស្រាយ​វិបត្តិ​មនុស្សធម៌ និង​ជនភៀសខ្លួន​ដោយសារ​សង្គ្រាម​នៅ​អ៊ុយក្រែន។

រហូត​មក​ដល់​ថ្ងៃ​ទី​១៧ ខែ​មីនា នេះ សង្គ្រាម​ដែល​រុស្ស៊ី​លើក​ទ័ព​ឈ្លានពាន​អ៊ុយក្រែន មាន​រយៈពេល ២២​ថ្ងៃ​មក​ហើយ។ គោលដៅ​របស់​រដ្ឋាភិបាល​លោក​ប្រធានាធិបតី វ៉្លាឌីមៀរ ពូទីន គឺ​ផ្ដួល​រំលំ​រដ្ឋាភិបាល​លោក​ប្រធានាធិបតី Zelenskiy ហើយ​លើក​បន្តុប​រដ្ឋាភិបាល​អាយ៉ង​របស់​ខ្លួន។

ប្រធានាធិបតី​រុស្ស៊ី​រូប​នេះ​អះអាង​ថា ប្រទេស​របស់​លោក​នឹង​សម្រេច​ឱ្យ​បាន​នូវ​គោលដៅ​របស់​ខ្លួន​នៅ​ក្នុង​ប្រទេស​អ៊ុយក្រែន ហើយ​នឹង​មិន​ចុះញ៉ម​ឡើយ​ចំពោះ​អ្វី​ដែល​លោក​ហៅថា​ជា​ការ​ប៉ុនប៉ង​របស់​ក្រុម​បស្ចិម​ប្រទេស ក្នុង​ការត្រួតត្រា និង​បំបែកបំបាក់​រុស្ស៊ី។ នេះ​បើ​តាម​ការ​ចេញផ្សាយ​ដោយ​ទីភ្នាក់ងារ​សារព័ត៌មាន Reuters នៅ​ថ្ងៃ​ព្រហស្បតិ៍ ទី​១៧ ខែ​មីនា។

លោក ពូទីន ធ្វើការ​កត់សម្គាល់​បែប​នេះ​នៅ​ក្នុង​សុន្ទរកថា​មួយ​ទៅកាន់​គណៈរដ្ឋមន្ត្រី​នៃ​រដ្ឋាភិបាល​របស់​លោក កាលពី​ថ្ងៃ​ពុធ សប្ដាហ៍​នេះ។ ក្នុង​ឱកាស​នោះ លោក ពូទីន ក៏​បាន​ទទួលស្គាល់​ផង​ដែរ​អំពី​ផល​ប៉ះពាល់​បង្ក​ឡើង​ទណ្ឌកម្ម​ក្រុម​បស្ចិម​ប្រទេស ប៉ុន្តែ​លោក​សច្ចា​ថា រុស្ស៊ី​នឹង​តស៊ូ​ហែល​ឆ្លង​ពេលវេលា​ដ៏​លំបាក​នេះ​រហូត​បាន​សម្រេច។

លោក​បន្ថែម​ទៀត​ថា ក្រុម​បស្ចិម​ប្រទេស​ដែល​មាន​ផែនការ​ធ្វើ​ឱ្យ​រុស្ស៊ី​ក្លាយ​ជា​ប្រទេស​ទន់ខ្សោយ​មួយ គឺ​ដើម្បី​បំពាន​បូរណភាព​ទឹកដី​រុស្ស៊ី និង​ចង់​បំបែកបំបាក់​រុស្ស៊ី​ដែល​លោក​ថា​ចាំបាច់​ត្រូវ​ឆ្លើយតប​ដូចនេះ។ តែ​អ្នក​សង្កេតការណ៍​ចោទ​សួរ​ថា តើ​នៅ​ពេលនេះ​របប​លោក ពូទីន កំពុងតែ​ឈ្នះ ឬ​កំពុង​តែ​ចាញ់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស