ចាប់តាំងពីកងទ័ពរុស្ស៊ី លើកទ័ពចូលឈ្លានពានអ៊ុយក្រែន នៅថ្ងៃទី២៤ កុម្ភៈ មក សោកនាដកម្មយ៉ាងរន្ធត់កើតមានទៅលើជនស៊ីវិលដោយសារតែគ្រាប់កាំភ្លើងរបស់កងទ័ពរុស្ស៊ី។
បណ្ដាញផ្សាយព័ត៌មានជាច្រើនបានធ្វើសេចក្ដីរាយការណ៍ពីប្រទេសអ៊ុយក្រែន មកថា មិនថាឡើយទីតាំងរបស់កងទ័ពនោះទេដែលជាគោលដៅនៃការវាយប្រហាររបស់កងទ័ពរុស្ស៊ី គឺសូម្បីមន្ទីរពេទ្យ សាលារៀន ទីផ្សារ និងព្រះវិហារ ក៏រងការវាយប្រហារដោយគ្រាប់កាំជ្រួច និងកាំភ្លើងធំរបស់កងទ័ពរុស្ស៊ី ដែរ។
បណ្ដាញផ្សាយព័ត៌មាន CNN, BBC, Independent, AP, ABC បានបង្ហាញវីដេអូអំពីលំនៅឋាន អគាររបស់ប្រជាជន មន្ទីរពេទ្យ សាលារៀន ទីផ្សារ និងការស្លាប់ជនស៊ីវិលរាប់ពាន់នាក់មានទាំងកុមារ បានក្លាយជាជនរងគ្រោះនៃសង្គ្រាមរុស្ស៊ីឈ្លានពានអ៊ុយក្រែន។ ដោយសារស្ថានភាពដូចនេះ តុលាការយុត្តិធម៌អន្តរជាតិ (ICJ) កាលពីថ្ងៃទី១៦ មីនា បានចេញដីកាបង្គាប់ឱ្យរបបលោកប្រធានាធិបតីរុស្ស៊ី វ៉្លាឌីមៀរ ពូទីន បញ្ចប់សង្គ្រាមនៅអ៊ុយក្រែនជាបន្ទាន់។
ចៅក្រម ១៣រូបក្នុងចំណោម ១៥រូបនៃតុលាការពិភពលោកនេះបានបោះឆ្នោតឲ្យរុស្ស៊ីបញ្ឈប់សកម្មភាពយោធាទៅលើប្រទេសអ៊ុយក្រែន ដោយបញ្ជាក់ថា ទីតាំងដែលត្រូវបានវាយកម្ទេចភាគច្រើនជាទីតាំងរបស់ជនស៊ីវិលដែលចាំបាច់ត្រូវបញ្ឈប់ជាបន្ទាន់។
តាមបណ្ដាញផ្សាយព័ត៌មាន BBC តុលាការអន្តរជាតិនេះកំពុងតែដំណើរការរឿងក្ដីប្រឆាំងនឹងរបបលោក ពូទីន ករណីប្រល័យពូជសាសន៍ ព្រោះតែការស្លាប់ជនស៊ីវិលនៃជាតិសាសន៍អ៊ុយក្រែន គឺអំពើឧក្រិដ្ឋកម្មសង្គ្រាម និងប្រល័យពូជសាសន៍។ ចំណែកឯតុលាការព្រហ្មទណ្ឌអន្តរជាតិ (ICC) បានកំពុងបើកការស៊ើបអង្កេតករណីឧក្រិដ្ឋកម្មសង្គ្រាមប្រឆាំងរបបលោក ពូទីន។
ក្នុងស្ថានភាពបែបនេះ ប្រធានាធិបតីអាមេរិកបានផ្ដើមចោទលោក ពូទីន មុនគេដោយហៅមេដឹកនាំផ្ដាច់ការនៃប្រទេសរុស្ស៊ីម្នាក់នេះថាជាឧក្រិដ្ឋជនសង្គ្រាមដ៏សាហាវ។ ជាមួយគ្នានេះ លោករដ្ឋមន្ត្រីការបរទេសអាមេរិក Antony Blinken បានយល់ស្របនឹងលោក បៃដិន។ លោកទទូចឱ្យពិភពលោកចូលរួមជាមួយគ្នាថ្កោលទោសលោក ពូទីន ហើយចាត់ទុកមេដឹកនាំរុស្ស៊ីថាជាឧក្រិដ្ឋជនប្រឆាំងមនុស្សជាតិ។
Rosemary DiCarlo អគ្គលេខាធិការរងអង្គការសហប្រជាជាតិទទួលបន្ទុកកិច្ចការសន្តិភាព និងនយោបាយ បានរំឭកទៅក្រុមប្រឹក្សាសន្តិសុខអង្គការសហប្រជាជាតិឱ្យប្រាប់ទៅរុស្ស៊ីថា ជនស៊ីវិលស្លាប់រាប់ពាន់នាក់ក្នុងសង្គ្រាមរុស្ស៊ី-អ៊ុយក្រែន ហើយស្នើទៅកងទ័ពរុស្ស៊ីកុំវាយប្រហារលើជនស៊ីវិល។ លោកចាត់ទុកថាជាការរំលោភច្បាប់អន្តរជាតិយ៉ាងធ្ងន់ធ្ងរ។
ជាមួយគ្នានេះ ថ្នាក់ដឹកនាំរដ្ឋមន្ត្រីការបរទេសនៃប្រទេសឧស្សាហកម្មជឿនលឿន G-7 ក៏បានចេញសេចក្ដីថ្លែងការណ៍រួមដោយទាមទារឱ្យរុស្ស៊ីគោរពតាមដីការបស់តុលាការយុត្តិធម៌អន្តរជាតិ ដែលបង្គាប់ឱ្យរុស្ស៊ីបញ្ចប់សង្គ្រាមនៅអ៊ុយក្រែន។
ចំណែកលោក Josep Borrell ប្រធានគោលនយោបាយសហភាពអឺរ៉ុប បានចោទធ្ងន់ៗថា រុស្ស៊ីបានរំលោភធ្ងន់ណាស់លើច្បាប់អន្តរជាតិ និងជាបទល្មើសឧក្រិដ្ឋកម្មសង្គ្រាម។ លោកថាសហភាពអឺរ៉ុបសូមថ្កោលទោសយ៉ាងខ្លាំងទៅលើកងទ័ពរុស្ស៊ី ដែលបាញ់ប្រហារទៅលើជនស៊ីវិល និងអគារលំនៅឋានរបស់ប្រជាជន។ នៅទីក្រុង Mariupol មន្ទីរពេទ្យដ៏ធំរបស់ទីក្រុងនេះចំនួន ៣កន្លែងរងការវាយប្រហារដោយគ្រាប់កាំជ្រួច និងកាំភ្លើងធំរបស់រុស្ស៊ី។ នៅទីក្រុងមួយនេះ ជនស៊ីវិលស្លាប់ជាង ២៥០០នាក់ ក្នុងនោះមានទាំងកុមារផងដែរ។
បើតាមរបាយការណ៍របស់អង្គការសុខភាពពិភពលោកដែលស្រង់មកចុះផ្សាយដោយទីភ្នាក់ងារសារព័ត៌មាន AP គឺអំឡុងសង្គ្រាមជាង ២០ថ្ងៃមកនេះ មន្ទីរពេទ្យ និងមណ្ឌលសុខភាពចំនួន ៤៣កន្លែងនៅទូទាំងប្រទេស ត្រូវបានរងការវាយប្រហារដោយគ្រាប់កាំភ្លើងរបស់កងទ័ពរុស្ស៊ី។
តែយ៉ាងនេះក្ដី រដ្ឋាភិបាលលោក ពូទីន បានប្រតិកម្មនឹងការចោទរបស់ប្រធានាធិបតីអាមេរិក លោក បៃដិន ដែលហៅលោក ពូទីន ជាឧក្រិដ្ឋជនសង្គ្រាម។ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ការចោទប្រកាន់របស់លោកប្រធានាធិបតីអាមេរិកថាលោកប្រធានាធិបតី ពូទីន គឺជាឧក្រិដ្ឋជនសង្គ្រាម គឺជាពាក្យសម្ដីមិនអាចទទួលយកបានឡើយ។
អ្នកនាំពាក្យវិមានក្រឹមឡាំងរូបនេះបានសង្កត់ធ្ងន់ថា គឺជារឿងមិនអាចទទួលយកបាន និងមិនអាចលើកលែងឱ្យបានជាដាច់ខាត។ លោកបញ្ជាក់ថា លោក បៃដិន គ្មានសិទ្ធិប្រៀនប្រដៅលោក ពូទីន ឡើយ។ តែយ៉ាងណា ទាំងតុលាការយុត្តិធម៌អន្តរជាតិ (ICJ) និងតុលាការព្រហ្មទណ្ឌអន្តរជាតិ (ICC) បានសម្រេចដំណើរការសំណុំរឿងឧក្រិដ្ឋកម្មសង្គ្រាមករណីសង្គ្រាមនៅអ៊ុយក្រែនទៅលើរបបលោក ពូទីន ជាផ្លូវការហើយនៅពេលនេះ៕