27 C
Phnom Penh

អ្នក​ឃ្លាំមើល​ថា​វត្តមាន​លោក កឹម សុខា លើ​វេទិកា​អន្តរជាតិ​គឺ​លើក​មុខមាត់​កម្ពុជា​និង​រដ្ឋាភិបាល​ខ្មែរ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​និយាយ​ថា ការ​បង្ហាញ​វត្តមាន​របស់​លោក កឹម សុខា ជា​មេ​បក្ស​ប្រឆាំង​ធំ​ជាងគេ​ដែល​កំពុង​ជាប់​បម្រាម​តុលាការ នៅ​លើ​វេទិកា​អន្តរជាតិ​ដ៏​ធំ គឺជា​ការ​លើក​មុខមាត់​របស់​កម្ពុជា និង​រដ្ឋាភិបាល​ខ្មែរ​យ៉ាង​ធំធេង។

អតីត​អគ្គ​ទីប្រឹក្សា​ខ្មែរ​ប្រចាំ​ស្ថានទូត​ប្រទេស​ឥណ្ឌូនេស៊ី បណ្ឌិត សូ ណារ៉ូ បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ទី​២៣ ខែ​មីនា ថា វត្តមាន​របស់​មេដឹកនាំ​ប្រឆាំង លោក កឹម សុខា នៅ​លើ​វេទិកា​ពិភពលោក​នេះ នឹង​ប្រាប់​ពិភពលោក​ថា ដើម្បី​ឧត្តម​ប្រយោជន៍​ជាតិ រដ្ឋាភិបាល​កម្ពុជា​មាន​ចិត្ត​ទូលាយ​ហ៊ាន​ធ្វើ​នូវ​អ្វី​ដែល​គេ​មិន​ហ៊ាន ក្នុង​ការ​អនុញ្ញាត​រយៈពេល​ខ្លី​ឲ្យ​លោក កឹម សុខា មាន​សេរីភាព​ដើម្បី​បំពេញ​បេសកកម្ម​បម្រើ​ប្រយោជន៍​ជាតិ និង​ប្រជាជន​តាម​សំណូមពរ​របស់​សហគមន៍​អន្តរជាតិ។

បណ្ឌិត សូ ណារ៉ូ អះអាង​ថា ការ​បង្ហាញ​វត្តមាន​របស់​លោក កឹម សុខា ជា​មេ​បក្ស​ប្រឆាំង​ធំ​ជាងគេ​ដែល​កំពុង​ជាប់​បម្រាម​តុលាការ លើ​វេទិកា​អន្តរជាតិ​ដ៏​ធំ​នេះ គឺជា​ការ​លើក​មុខមាត់​របស់​កម្ពុជា និង​រដ្ឋាភិបាល​ខ្មែរ​យ៉ាង​ធំធេង។ លោក​បន្ថែម​ថា តាមរយៈ​នៃ​វេទិកា​នេះ បាន​បង្ហាញ​យ៉ាង​ច្បាស់​ថា ការ​តស៊ូ​ដោយ​អហិង្សា​របស់​លោក កឹម សុខា កន្លងមក​ត្រូវ​បាន​ទទួលស្គាល់ និង​ស្វាគមន៍​យ៉ាង​ពេញ​ទំហឹង​ពី​សហគមន៍​អន្តរជាតិ ខណៈ​មេដឹកនាំ​បក្ស​កាន់​អំណាច និង​អតីត​មេដឹកនាំ​បក្ស​ប្រឆាំង លោក សម រង្ស៊ី ដែល​មាន​សេរីភាព​ក្នុង​ការ​ដើរហើរ​យ៉ាង​ពេញលេញ មិន​ត្រូវ​បាន​អញ្ជើញ និង​ស្វាគមន៍​ឱ្យ​ទៅ​ចូលរួម​ក្នុង​វេទិកា​ពិភពលោក​នេះ។

ការ​អះអាង​នេះ ធ្វើឡើង​បន្ទាប់ពី​តុលាការ​ក្រុង​ភ្នំពេញ​បាន​បដិសេធ​នូវ​សំណើ​របស់​ប្រធាន​បក្ស​ប្រឆាំង លោក កឹម សុខា សុំ​ទៅ​ចូលរួម​វេទិកា​ពិភពលោក​នៅ​ប្រទេស​អាល្លឺម៉ង់ នៅ​ចុង​ខែ​មីនា ឆ្នាំ​២០២២ នេះ។

កាលពី​ថ្ងៃ​ទី​២៣ ខែ​មីនា ឆ្នាំ​២០២២ តុលាការ​ក្រុង​ភ្នំពេញ​បាន​បដិសេធ​សំណើ​សុំ​ចេញ​ទៅ​ចូលរួម​កិច្ចប្រជុំ​វេទិកា​គោល​នយោបាយ​ពិភពលោក​របស់​អង្គការ Global Solution ក្នុង​ទីក្រុង​ប៊ែរឡាំង ប្រទេស​អាល្លឺម៉ង់ របស់​លោក កឹម សុខា នៅ​ថ្ងៃ​ទី​២៨ និង​ទី​២៩ ខែ​មីនា ឆ្នាំ​២០២២។

មន្ត្រី​ជាន់ខ្ពស់​បក្ស​ប្រឆាំង លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៤ មីនា នេះ​ថា ប្រធានាធិបតី​អាល្លឺម៉ង់ លោក Frank-Walter Steinmeier គ្រោង​ជួប​ដោយ​ផ្ទាល់​ជាមួយ​លោក កឹម សុខា នៅ​ក្នុង​ឱកាស​នោះ។ លោក​បន្ត​ថា នេះ​គឺជា​ឱកាស​ដ៏​ល្អ​បំផុត​សម្រាប់​កម្ពុជា​ដែល​នឹង​ទទួល​គុណប្រយោជន៍​ពី​វេទិកា​អន្តរជាតិ​ដ៏​សំខាន់​មួយ​នេះ។

លោក មាជ សុវណ្ណារ៉ា បញ្ជាក់​ថា វេទិកា​គោល​នយោបាយ​ពិភពលោក​នេះ នឹង​ធ្វើ​ឱ្យ​មាន​ការ​ចាប់អារម្មណ៍​យ៉ាង​ខ្លាំង​ពី​អ្នក​វិនិយោគទុន​ចង់​មក​កម្ពុជា ដែល​ជា​ប្រទេស​មហាអំណាច​សេដ្ឋកិច្ច​ទាំង​ប្រទេស​សមាជិក G7 និង​ប្រទេស​សមាជិក G20 តាមរយៈ​វត្តមាន​មេដឹកនាំ​បក្ស​ប្រឆាំង​នៅ​ក្នុង​វេទិកា​គោល​នយោបាយ​ពិភពលោក​មួយ​នេះ។

ចំណែក​អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៤ មីនា នេះ​ថា មូលហេតុ​ដែល​អង្គការ GLOBAL SOLUTIONS អញ្ជើញ​លោក កឹម សុខា ឲ្យ​ទៅ​ចូលរួម​វេទិកា​អន្តរជាតិ​នេះ គឺ​អាច​ដោយសារតែ​សហរដ្ឋ​អាមេរិក និង​សហគមន៍​អឺរ៉ុប រួម​ទាំង​សហគមន៍​អន្តរជាតិ មើល​ឃើញ​ថា ផ្លូវ​ដោះស្រាយ​វិបត្តិ​នយោបាយ​នៅ​កម្ពុជា គឺ​មាន​តែ​រុញ​ឲ្យ​លោក កឹម សុខា ចេញ​មុខ​កាន់តែ​លេចធ្លោ​លើ​ឆាក​អន្តរជាតិ​ប៉ុណ្ណោះ។

លោក គឹម សុខ លើកឡើង​ថា ការ​ធ្វើ​បែប​នេះ​មាន​ន័យ​ថា សហគមន៍​អន្តរជាតិ​បាន​បង្ហាញ​ជំហរ​ចង់​ដោះស្រាយ​វិបត្តិ​នយោបាយ​កម្ពុជា​កុំ​ឲ្យ​រីក​ក្លាយ​ទៅជា​វិបត្តិ​ផ្សេងៗ​ទៀត ដែល​អាច​ជះ​ឥទ្ធិពល​ដល់​សន្តិសុខ​ក្នុង​តំបន់ និង​អន្តរជាតិ ហើយ​លោក កឹម សុខា ក៏​ទំនង​ជា​គន្លឹះ​សំខាន់​បំផុត​មួយ​ក្នុង​ដំណោះស្រាយ​នៃ​វិបត្តិ​នេះ​ដែរ ដែល​ធ្វើ​ឲ្យ​សហគមន៍​អន្តរជាតិ​ផ្តល់​កិត្តិយស​ដល់​រូប​គាត់​ក្នុង​ការ​ចូលរួម​វេទិកា​គោល​នយោបាយ​ពិភពលោក​នេះ។

អ្នកវិភាគ​នយោបាយ​សង្គម​រូប​នេះ បញ្ជាក់​ថា ការ​លើក​តម្កើង​លោក កឹម សុខា ដោយ​សហគមន៍​អន្តរជាតិ​នេះ គឺជា​មេរៀន​បង្រៀន​អ្នក​នយោបាយ​ជំនាន់​ក្រោយ​ឲ្យ​យល់​ច្បាស់​ថា គឺ​មាន​តែ​ការ​ធ្វើ​នយោបាយ​ប្រតិបត្តិ​នៅ​លើ​សមរភូមិ​ជាក់ស្តែង​ប៉ុណ្ណោះ ដែល​មាន​ការ​ទទួលស្គាល់​ពី​អន្តរជាតិ​ឈាន​ទៅ​រក​ការ​ប្រែប្រួល និង​មាន​ដំណោះស្រាយ​ពិតប្រាកដ​សម្រាប់​រាល់​វិបត្តិ​ទាំងអស់​របស់​នៅ​កម្ពុជា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស