អាជ្ញាធររាជធានីភ្នំពេញ ចោទប្រកាន់លើក្រុមកូដករណាហ្គាវើលដ៍ (NAGA World) ជាស្ត្រី ថាបានប្រើអំពើហិង្សា និងជេរប្រមាថលើសមត្ថកិច្ចអំឡុងពេលកូដកម្ម ខណៈវិវាទការងារនេះបានអូសបន្លាយជាង ១ឆ្នាំទៅហើយ ប៉ុន្តែនៅតែមិនទាន់មានដំណោះស្រាយសមរម្យ។
ការចោទនេះ ធ្វើឡើងក្នុងសេចក្ដីប្រកាសព័ត៌មានមួយកាលពីថ្ងៃទី២៣ មីនា ដោយរដ្ឋបាលសាលារាជធានីភ្នំពេញបានឱ្យដឹងថា កន្លងមក អាជ្ញាធរបានណែនាំដល់កូដករណាហ្គាវើលដ៍ឱ្យបញ្ឈប់សកម្មភាពតវ៉ានៅតាមទីសាធារណៈ និងប្រាប់ឱ្យទៅទីលានប្រជាធិបតេយ្យ បើពួកគេចង់សម្ដែងមតិ ប៉ុន្តែកូដករទាំងនោះនៅបន្តប្រមូលផ្ដុំគ្នាធ្វើកូដកម្មខុសច្បាប់នៅតាមទីសាធារណៈដដែល។
កាលពីថ្ងៃទី២៤ ខែកុម្ភៈ អង្គការសមាគមចំនួន ៥១ស្ថាប័នដែលចេញសេចក្ដីថ្លែងការណ៍រួម លើកឡើងថា មួយរយៈមកនេះកូដករណាហ្គាវើលដ៍ដែលភាគច្រើនជាស្ត្រីបានរងនូវអំពើហិង្សា ការបៀតបៀនផ្លូវភេទ រួមទាំងការប្រើវិធានសុខាភិបាលមិនត្រឹមត្រូវពីសំណាក់អាជ្ញាធរដែលចុះទប់ស្កាត់ការធ្វើកូដកម្មដោយអហិង្សា។
ករណីនេះ ក្រុមអង្គការសង្គមស៊ីវិលជាតិ និងអន្តរជាតិ ទាមទារឲ្យអាជ្ញាធរបញ្ឈប់ជាបន្ទាន់រាល់ការបៀតបៀន ការប្រើអំពើហិង្សា រួមទាំងការអនុវត្តវិធានការកូវីដ-១៩ មិនត្រឹមត្រូវមួយចំនួនទៀត ក្នុងការឆ្លើយតបទៅនឹងកូដករណាហ្គាវើលដ៍ដោយសំអាងថា ទង្វើនេះជាការរំលោភសិទ្ធិស្ត្រី និងសិទ្ធិជួបជុំដែលការពារដោយរដ្ឋធម្មនុញ្ញ។
យ៉ាងណាក៏ដោយ កាលពីថ្ងៃទី២៣ មីនា នេះ ក្រសួងការងារ និងបណ្ដុះបណ្ដាលវិជ្ជាជីវៈក៏បានចេញសេចក្ដីជូនដំណឹងមួយពាក់ព័ន្ធនឹងដំណើរការការដោះស្រាយវិវាទការងារនៅក្រុមហ៊ុនណាហ្គាវើលដ៍ ក្រោយគូភាគីវិវាទជួបប្រជុំរកដំណោះស្រាយជាលើកទី៥។
បើតាមក្រសួងការងារ ឱ្យដឹងថា តំណាងភាគីកម្មករបន្តទាមទារក្រុមហ៊ុនពិភាក្សាលើចំណុចអនុញ្ញាតឱ្យបុគ្គលិកដែលចង់ចូលធ្វើការវិញ មុននឹងឈានទៅពិភាក្សាចំណុចវិវាទផ្សេងទៀត។ ចំណែកកម្មករដែលព្រមឈប់ពីការងារវិញ ទាមទារឱ្យមានការទូទាត់សំណងឱ្យបានត្រឹមត្រូវតាមច្បាប់។ ភាគីក្រុមហ៊ុនបន្តប្រកាន់ជំហរមិនទទួលយកកម្មករដែលបានបញ្ឈប់ពីការងារ ហើយក៏មិនពិចារណាដោះដូរកម្មករតាមសំណើរបស់ក្រុមអ្នកតវ៉ាដែរ។
ការលើកឡើងរបស់ក្រសួង បានធ្វើឡើងបន្ទាប់ពីកិច្ចប្រជុំលើកទី៥ ជាមួយភាគីពាក់ព័ន្ធ ក្នុងនោះមានក្រុមហ៊ុន តំណាងកូដករ ជាដើម ប៉ុន្តែមកដល់ថ្ងៃនេះ វិវាទការងារក្រុមហ៊ុនណាហ្គានៅមិនទាន់មានលទ្ធផលឡើយ ដោយរង់ចាំកិច្ចប្រជុំបន្ទាប់នៅថ្ងៃទី២៩ ខែមីនា៕