31 C
Phnom Penh

លោក កឹម សុខា សោកស្តាយ​មិន​អាច​ចូលរួម​វេទិកា​ពិភពលោក​ដោយ​ជាប់​បម្រាម​តុលាការ

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​ប្រឆាំង​ដែល​កំពុង​រង​ការ​គាបសង្កត់​សិទ្ធិ​សេរីភាព​ពី​សំណាក់​រដ្ឋាភិបាល​ឯក​បក្ស​កម្ពុជា លោក កឹម សុខា សម្ដែង​ការ​សោកស្តាយ​ដែល​មិន​អាច​ធ្វើ​ដំណើរ​ទៅ​ចូលរួម​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ ជាមួយ​បណ្តា​ប្រទេស​មហាអំណាច​សេដ្ឋកិច្ច G7 និង G20 ដោយសារតែ​បម្រាម​របស់​តុលាការ​ក្រុង​ភ្នំពេញ។

ប្រធាន​គណបក្ស​សង្គ្រោះ​ជាតិ​ដែល​មិនទាន់​មាន​សេរីភាព​ពេញលេញ​ឡើងវិញ លោក កឹម សុខា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃ​ទី​២៨ មីនា ថា តាម​ការ​រំពឹង​ទុក អ្នក​រៀបចំ​កម្មវិធី​គោល​នយោបាយ​ពិភពលោក​នេះ​សង្ឃឹម​ថា លោក​អាច​នឹង​ចូលរួម​ក្នុង​វេទិកា​នេះ​បាន​ដើម្បី​ផ្តល់​ទស្សនទាន​ជា​ផលប្រយោជន៍​ដល់​ពិភពលោក និង​ក៏​ដើម្បី​កេរ្តិ៍ឈ្មោះ ព្រមទាំង​កិត្តិយស​របស់​កម្ពុជា​ផង​ដែរ។

មេដឹកនាំ​បក្ស​ប្រឆាំង​ដែល​កំពុង​តស៊ូ​ដើម្បី​លទ្ធិប្រជាធិបតេយ្យ​នៅ​កម្ពុជា លោក កឹម សុខា បាន​ថ្លែង​អំណរគុណ​ដល់​រដ្ឋាភិបាល​សហព័ន្ធ​អាល្លឺម៉ង់ និង​វេទិកា​គោល​នយោបាយ​ពិភពលោក (World Policy Forum) ដែល​បាន​ផ្តល់​កិត្តិយស​អញ្ជើញ​លោក​ឱ្យ​ចូលរួម​ធ្វើ​បាឋកថា​ចែករំលែក​នូវ​ទស្សនៈ និង​បទពិសោធន៍​ក្នុង «សន្និសីទ​កំពូល​ស្ដីពី​ដំណោះស្រាយ​សកល (Global Solution Summit) ក្នុង​ទីក្រុង​ប៊ែរឡាំង ប្រទេស​អាល្លឺម៉ង់ នៅ​ថ្ងៃ​ទី​២៨ និង​ទី​២៩ ខែ​មីនា ឆ្នាំ​២០២២។

មេដឹកនាំ​បក្ស​ប្រឆាំង​រូប​នេះ​បួងសួង​សុំ​ឱ្យ​ឲ្យ​មនុស្ស​ជាតិ​គ្រប់​ជាតិសាសន៍ គ្រប់​ពណ៌​សម្បុរ​ទាំងអស់​លើ​ពិភពលោក មាន​សិទ្ធិ​សេរីភាព មាន​យុត្តិធម៌ និង​មាន​ព្រហ្មវិហារ​ធម៌​ដើម្បី​ឲ្យ​ពិភពលោក​មាន​សន្តិភាព​ពិតប្រាកដ។

ការ​អះអាង​នេះ ធ្វើឡើង​បន្ទាប់ពី​រដ្ឋាភិបាល​កម្ពុជា​រាំង​ខ្ទប់​មិន​ឱ្យ​មេដឹកនាំ​បក្ស​ប្រឆាំង លោក កឹម សុខា ទៅ​ចូលរួម​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ នៅ​ថ្ងៃ​ចន្ទ​ដើម​សប្តាហ៍​នេះ។

នៅ​ថ្ងៃ​ទី​២៨ ខែ​មីនា ឆ្នាំ​២០២២ សហ​មេធាវី​ការពារ​ក្តី​ឱ្យ​លោក កឹម សុខា បាន​ចេញ​សេចក្តី​ប្រកាស​ព័ត៌មាន​ថា ការណ៍​ដែល​ប្រធាន​គណបក្ស​សង្គ្រោះ​ជាតិ លោក កឹម សុខា មិន​អាច​ទៅ​ចូលរួម​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ នៅ​ថ្ងៃ​ទី​២៨ និង​ទី​២៩ ខែ​មីនា ឆ្នាំ​២០២២ បាន គឺ​ដោយសារតែ​តុលាការ​បដិសេធ។

ប្រភព​ដដែល​បាន​អះអាង​ថា មន្ត្រី​សម្របសម្រួល​របស់​អាល្លឺម៉ង់ បាន​ឱ្យ​ដឹង​ថា អ្នក​រៀបចំ​កម្មវិធី​នេះ​បាន​កំណត់​កម្មវិធី​រួចរាល់​ហើយ​សម្រាប់​ប្រធាន​គណបក្ស​សង្គ្រោះ​ជាតិ លោក កឹម សុខា ជា​វាគ្មិន​កិត្តិយស​ដែល​ត្រូវ​ធ្វើ​បាឋកថា​ដោយ​ផ្ទាល់​នៅ​វេលា​ម៉ោង ៧ និង ១៥​នាទី នៅ​ថ្ងៃ​ទី​២៨ ខែ​មីនា ឆ្នាំ​២០២២ មិន​អាច​ធ្វើ​តាម​ប្រព័ន្ធ​អនឡាញ​បាន​នោះ​ទេ។ សហ​មេធាវី​ទាំងនោះ​បញ្ជាក់​ថា អ្នក​តំណាង​ក្រុម​នៃ​គំនិត​ផ្ដួចផ្ដើម​ដំណោះស្រាយ​សកល​នៃ​វេទិកា​គោល​នយោបាយ​ពិភពលោក​នេះ បាន​សម្ដែង​ការ​សោកស្តាយ​ដែល​មេដឹកនាំ​បក្ស​ប្រឆាំង​រូប​នេះ​មិន​អាច​មាន​វត្តមាន​ដើម្បី​ធ្វើ​បាឋកថា​បាន។

កាលពី​ចុង​ខែ​កុម្ភៈ ឆ្នាំ​២០២២ អគ្គលេខាធិការ​នៃ​អង្គការ Global Solution បាន​អញ្ជើញ​ប្រធាន​គណបក្ស​សង្គ្រោះ​ជាតិ លោក កឹម សុខា ឱ្យ​ទៅ​ចូលរួម​ក្នុង​វេទិកា​គោល​នយោបាយ​ពិភពលោក​ក្នុង​ប្រទេស​អាល្លឺម៉ង់ ជា​វាគ្មិន​ដើម្បី​ធ្វើ​បាឋកថា​ក្នុង​សន្និសីទ​ដំណោះស្រាយ​សកល​សម្រាប់​ឆ្នាំ​២០២២ នេះ។ លិខិត​ដដែល​លើកឡើង​ថា ការ​ចូលរួម​របស់​មេ​បក្ស​ប្រឆាំង​រូប​នេះ នឹង​ពិភាក្សា​ទៅលើ​បញ្ហា​ប្រឈម​សំខាន់ៗ​អំពី​គោល​នយោបាយ​សកល​សម្រាប់​ប្រទេស​ជា​សមាជិក G20 និង​ប្រទេស​ជា​សមាជិក G7 ក្នុង​ឆ្នាំ​២០២២ នេះ និង​ឆ្នាំ​បន្ត​ទៀត ជាពិសេស​ពិភាក្សា​លើ​ប្រជាធិបតេយ្យូបនីយកម្ម ដើម្បី​ចូលរួម​ស្ដារ​ឡើងវិញ​នូវ​ការ​អភិវឌ្ឍ​ផ្នែក​សេដ្ឋកិច្ច និង​សង្គម។

គួរ​បញ្ជាក់​ផង​ដែរ​ថា កាលពី​ថ្ងៃ​ទី​២៣ ខែ​មីនា ឆ្នាំ​២០២២ សាលាដំបូង​រាជធានី​ភ្នំពេញ​បាន​ច្រានចោល​នូវ​សំណើ​សុំ​ទៅ​ចូលរួម​វេទិកា​គោល​នយោបាយ​ពិភពលោក​នៅ​ប្រទេស​អាល្លឺម៉ង់ របស់​មេដឹកនាំ​ប្រឆាំង លោក កឹម សុខា ប៉ុន្តែ​តុលាការ​អនុញ្ញាត​ឱ្យ​ចូលរួម​កិច្ចប្រជុំ​នេះ​តាម​ប្រព័ន្ធ​វីដេអូ​ជំនួស​វិញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស