រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សកាន់អំណាច លោក ស ខេង សរសេរលិខិតផ្ញើទៅកាន់រដ្ឋមន្ត្រីក្រសួងសន្តិសុខសាធារណៈចិន ឱ្យជួយលុបបំបាត់ព័ត៌មានក្លែងក្លាយស្ដីពី ទាសករឈាមនៅកម្ពុជា ព្រោះវាបានធ្វើឱ្យប៉ះពាល់ដល់កេរ្តិ៍ឈ្មោះរបស់កម្ពុជាយ៉ាងធ្ងន់ធ្ងរ។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីផ្សព្វផ្សាយរបាយការណ៍ជាតិស្ដីពីការប្រយុទ្ធប្រឆាំងអំពើជួញដូរមនុស្សរបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ដែលហៅកាត់ថា គ.ជ.ប.ជ កាលពីថ្ងៃទី៧ ខែមេសា ឆ្នាំ២០២២ ថា គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សតែងតែយកចិត្តទុកដាក់ពីស្ថានភាព និងការប្រែប្រួលពីមួយឆ្នាំទៅមួយឆ្នាំចំពោះល្បិចកលថ្មីៗនៃជនល្មើស ដែលធ្វើការជួញដូរមនុស្សយ៉ាងហ្មត់ចត់។
លោក ស ខេង អះអាងថា រដ្ឋាភិបាលកម្ពុជា និងដៃគូពាក់ព័ន្ធជាតិ និងអន្តរជាតិ បានព្យាយាមប្រយុទ្ធប្រឆាំងអំពើជួញដូរមនុស្សគ្រប់រូបភាពតាំងពីថ្នាក់ជាតិដល់មូលដ្ឋាន និងរហូតដល់កម្រិតអន្តរជាតិផងដែរ ដើម្បីឃាត់ខ្លួនជនសង្ស័យពាក់ព័ន្ធទៅនឹងអំពើជួញដូរមនុស្ស ការអនុវត្តនីតិវិធីតាមផ្លូវតុលាការ ដើម្បីផ្ដន្ទាទោសជនល្មើសដែលពាក់ព័ន្ធនឹងការជួញដូរមនុស្សប្រកបដោយប្រសិទ្ធភាពនាពេលកន្លងមក។
ការអះអាងនេះ ធ្វើឡើងបន្ទាប់ពីកម្ពុជារងនូវការចោទប្រកាន់ថាមានការបង្ខាំងមនុស្ស ដើម្បីធ្វើជាទាសករឈាម ដោយការបង្ខាំងដើម្បីបូមយកទៅលក់នៅក្នុងខេត្តព្រះសីហនុ កាលពីពេលថ្មីៗនេះ។
ស្ត្រីជនជាតិថៃម្នាក់ធ្លាប់អះអាងថា នាងបានប្រឈមនឹងគ្រោះថ្នាក់នៃការជួញដូរសរីរាង្គនៅកម្ពុជា ប៉ុន្តែក្រោយមកនាងបានសារភាពដល់សមត្ថកិច្ចថា ករណីនេះគឺនាងជាអ្នកប្រឌិតឡើង ដោយសារតែនាងបានចូលមកប្រទេសកម្ពុជាដោយខុសច្បាប់ ហើយបារម្ភខ្លាចមិនអាចវិលត្រឡប់ទៅប្រទេសកំណើតវិញបាន។
សារព័ត៌មានពីររបស់ថៃ គឺ Thai Examiner និង Thai PBS World បានស្រង់សម្ដីរបស់នគរបាលកម្ពុជា និងនគរបាលថៃ ធ្វើសន្និសីទកាសែតកាលពីថ្ងៃទី១៨ ខែមីនា ឆ្នាំ២០២២ នៅប្រទេសថៃ ថា ស្ត្រីថៃរូបនោះបានចូលកម្ពុជាដោយខុសច្បាប់ ដូច្នេះនាងបារម្ភខ្លាចសមត្ថកិច្ចកម្ពុជាមានចំណាត់ការផ្លូវច្បាប់លើនាង ដែលធ្វើឲ្យនាងមិនអាចវិលត្រឡប់ទៅប្រទេសកំណើតវិញបានឆាប់។
បើតាមសារព័ត៌មានថៃទាំងពីរនេះ បានឲ្យដឹងថា មូលហេតុដែលនាងសារភាពអំពីការប្រឌិតរឿងដូច្នេះ គឺដើម្បីអាចឲ្យនាងរួចផុតពីចំណាត់ការផ្លូវច្បាប់ពីសមត្ថកិច្ចកម្ពុជា ហើយអាចត្រឡប់ទៅកាន់ប្រទេសថៃវិញបានលឿន ក្រោយពីនាងត្រូវកាត់ទោសឲ្យជាប់ពន្ធនាគារ ៦ខែ។
ជុំវិញបញ្ហានេះ ក្រុមអ្នកសង្កេតការណ៍លើកឡើងថា ខេត្តព្រះសីហនុ ធ្លាប់តែជាខេត្តដែលផ្តល់ផាសុកភាពសម្រាប់ភ្ញៀវទេសចរជាតិ និងអន្តរជាតិគ្រប់ជាតិសាសន៍អស់រយៈពេលជាច្រើនឆ្នាំកន្លងមក ប៉ុន្តែចាប់តាំងពីមានវត្តមានជនជាតិចិនមករស់នៅក្នុងខេត្តនេះ បានបង្កអសន្តិសុខយ៉ាងធ្ងន់ធ្ងរ ដូចជាការចាប់ជំរិត ការធ្វើទារុណកម្មផ្លូវភេទ អំពើឆក់ប្លន់ និងការប្រើអំពើហិង្សាគ្រប់រូបភាពផងដែរ។
ទាក់ទិននឹងបញ្ហានេះ រដ្ឋាភិបាលកម្ពុជាបានបង្ហាញរបាយការណ៍របស់ខ្លួនក្នុងរយៈពេល ៦ខែកាលពីដើមឆ្នាំ២០២១ កន្លងទៅថា នាយកដ្ឋានប្រឆាំងការជួញដូរមនុស្ស និងការពារអនីតិជន បានរកឃើញ និងបង្ក្រាបអំពើជួញដូរមនុស្ស អាជីវកម្មផ្លូវភេទសរុបបានចំនួន ១៩៨ករណី ដែលចំនួននេះបានកើនឡើងចំនួន ១៣៥ករណី បើធៀបនឹងរយៈពេលដូចគ្នាក្នុងឆ្នាំ២០២០។
ជុំវិញបញ្ហានេះ កាលពីចុងឆ្នាំ២០២១ ក្រសួងការបរទេសអាមេរិក បានចេញផ្សាយការអង្កេត និងវាយតម្លៃប្រចាំឆ្នាំរបស់ខ្លួននូវរបាយការណ៍ស្ដីពីការជួញដូរមនុស្សលើសកលលោកឆ្នាំ២០២១ ដោយបានចាត់ថ្នាក់ប្រទេសកម្ពុជាស្ថិតក្នុងកម្រិត Tier 2 Watchlist គឺកម្រិតពីរដែលស្ថិតក្នុងបញ្ជីតាមដាន៕